OUTBACK

七點幾出到荃灣愉景OUTBACK,見門外幾多人係度等入座.入去攞枱時,姐仔問我地介唔介意坐BAR枱,BAR枱即有,.一向鐘意坐BAR枱既我當然無問題啦(當年求婚都係座bar枱)~

變相唔洗等位就可以坐低點嘢食,一人一個扒餐,五成熟,好好食.人家讚個甜蕃薯甜得黎又唔覺"滯"(而我就食晒成個培根牛油焗薯~)美中不足係伴菜之一既牛油蔬菜竟然係西蘭花配紅蘿蔔....

食到九點鐘至埋單走人,見外面仲有人等緊,真係好在當初坐咗入黎BAR枱~之後我仲係商場買咗兩件特價夏天衫(T恤$120,薄身長袖恤衫$100),可惜無冬天衫執丫~~

玩物喪志

今日外母人大人黎家訪兼下厨,因為台灣女生身體不適.為表謝意,飯後呈上老虎機供外母大人耍樂,發番個新年財嘛~~

外母大人一玩就玩咗半個鐘,期間仲中過JACKPOT"777",另外亦有中過其他小奬.玩到一額汗既外母大人,好滿足咁番屋企~~~

PS:其實都只係入假銀,唔係太明有咩咁緊張?

年初一,區內放羊

 夜晚係相熟油站接過老豆既利是後,心血來潮,一個人騎羊去兜風,係龍珠島長堤前停一停,再去相熟既碼頭仔吹下海風.平時呢度久唔久都會有人係度釣魚同食煙,今日大年初一又凍,一個人都無,我可以好狂妄咁將愛羊駛到碼頭影相~

無帶數碼儍瓜相機,唯有用手提電話3.2mega pixels相機影,好在效果都唔係太差啫.一位已故既好朋友,以前渣車帶我黎呢兩個地方,傾吓計吹吓海風.我有時都會騎羊去吹海風,發吓呆,兼散吓心.

其實轉入呢個路口之前,因為睇唔切路而要急停,搞到愛羊失平衡向左跌.正當覺得拉唔住愛羊之際,突然一下子將愛羊拉番正,不致落得跌車收場(唔知有無嚇親踩單車路過既哥仔).

可能係太凍,手指都有點彊硬,而且未被沖走既brake粉令剎車表現未如理想,加上自己有啲心不在焉,總知無事就好了.(唔知之前張牛肉乾擋既係咪呢單呢?)

新一年,希望大家身體健康,心想事成~

ps:搵日天氣暖啲,再同羊仔行大運~~

元朗年宵(牛1)

 番完P更,同台灣女生搭西鐵去元朗年宵,探吓德輝,兼且食即制既棉花糖(我都有落手轉幾個圈).好耐都無食過,細個時覺得佢好似成舊雲咁,而家大個咗,感覺都係一樣.

檔主好有社會良心,用韓國白砂糖,而唔係國產貨,令消費者一掃疑慮~

雖然無買啲咩,只係食住棉花糖黎行咗個圈,臨尾買咗廿四蚊魚蛋食,希望都可以新年行個好運,話晒都行咗兩個年宵花市丫~~

維園年宵(政黨嘉年華)

今日同台灣女生出去行維園,除咗風車,精品及年花外,政黨既宣傳同籌款亦係重點,社民連既出位佈置,蕉形精品,令我諗起當初扔蕉係咪為咗年宵攤位籌務經費而鋪路.激進既成員不時出口串打斜角既民建聯.

 另一邊廂既華叔繼續以六四民主為題,以籌務經費,廿蚊幫大家寫揮春~~

 行完年宵,去咗附近既餐廳食晚飯,主打係逄星期五至有既$120一打環球生蠔~

 你睇人家食得幾開心,上一次食生蠔都好似係十月生日個時.

 雖然燈光昏暗,但都要同隻生蠔黎張合照~~

 一人一個set dinner,人家食牛扒,但唔知點解,五成熟變咗係全熟,不過味道都ok,仲有兜芥未俾我地"點"牛扒黎食.

呢個變相係雞脾扒,略嫌啲芝士味唔夠重,不過一舊水多啲有沙律,餐湯,有主菜,包飯,意粉或薯菜,再有飯後甜品tiramisu一件,仲想點丫~~

團年飯@美心皇宫

今晚同台灣女生,外母大人一齊出街食團年飯,年三十晚我要番夜班嘛~

酒樓已經推出"團年新春套餐",大時大節,雞當然唔少得,先黎美味貴妃雞~

花膠雞絲翅,令我好懷念夜上海既蟹皇大生翅........

蘭花珊瑚蚌蝦球,唔知關團年咩事?

清蒸海石斑,年年有餘~

金瑤扒時蔬,亦即係金菇,瑤柱,白菜,加芡汁.

雖然個餐比平時既貴啲,但一年一次,食完又唔洗洗碗,座得舒舒服服,無所謂啦,支持餐飲業嘛~

零速告票

今日騎羊出市中心買啲嘢,行開唔夠一個鐘.番到愛羊旁邊時見車尾布冚被掀起咗,心知不妙,一開布冚,係風擋下就見到呢張價值$320既賀年牛肉乾............

其實市中心一向排骨位不足,而且又無時租既電單車位停車場,真係唔知點搞..台灣女生話破財撞災黎安慰我,但我始終都係唔開心俾交通部逗大利是......

石亭

 夜晚我同台灣女生去咗好耐都無幫襯既"石亭"食飯,雖然今次無鯨龍魚食,但我地就點咗時令精選-魴鮄魚,仲要係原條刺身~~(本來仲有另一條魚揀,但見佢黑"炆炆",於是揀咗紅色既魴鮄魚)

 另外又點咗呢客蜆刺身,平時點會食得到呢?浸過黎炒都會有沙,但佢真係一粒沙都無(原地唔到嘛~),不過味道就無咁特別,可能賣點係可以100%咁食到蜆既原味同質地.

 店內師傅特意為我地做既天婦羅炸蝦,因為我地唔想食雜錦,想專心食蝦~

 我一人獨享既海膽壽司,都幾足料,味道偏向清新,唔會太濃烈,連唔食海膽既人家都可以試一口.

 張相濛咗少少,呢碟係一口芝士,內裡既芝士又熱又軟又香,好好食,好有衝動想叫多碟~~

串燒雞翼,味道令我地諗起係北海道 旅行最後一晚食既串燒居酒屋.本來諗住一人一隻,由於太好食,所以叫多一串~

 呢碗就係用之前食既魴鮄魚剩低既魚頭煲出黎既湯嘞,我同人家每人一碗~

最後呢串牛柳串燒都令我地好難忘,大家都覺得比沙田一田附近FOOD COURT裡一間串燒專門店既鹿兒島和牛串燒,好食得多~

BEN & IRIS

今日番完早更,係7仔隔離既"那渣"麵檔買外賣,騎羊番屋企同台灣女生食晏,自己再沖涼換衫.咁趕就係為咗去BEN弟同IRIS既結婚酒會,要五點去到尖沙咀諾士佛臺號7樓既"縁美傳說"~

 會場裡有位少年攝影師,用既應該係半專業機,令"渣"儍瓜機既我相形見絀....

 雖然係酒會兼見證,但制作認真,有姊妹幫娘子外,仲有花仔花女添~~~

 我同人家既中學同學一齊影相,企我隔離既正係佢地既中學英文老師Mrs.Chan~

 講咗咁耐都未見新娘子IRIS既相,呢張就係一眾中學女同學同一對新人既合照.咬住奶咀既小朋友同一眾親戚影完合照後唔肯走,喊住要留低再影多張相~

祝一對新人永結同心~

日式午餐+全西晚宴

 今日同台灣女生係市中心既元氣食新出既$39午餐,四件壽司,一份炸雞件,同埋一個燉蛋.我地仲以優惠價$9加多一個軟殼蟹手卷,好飽~唔知係咪見新開張既"金水",下午茶時段以半價作招徠,所以出午餐黎招架呢??

食完晏,係吉之島買啲材枓就騎羊番屋企.夜晚台灣女生係屋企煮西餐,一人一塊牛扒,一齊分意粉同凱撒沙律黎食,十足電視裡西人住家飯咁.

襟章

由細到大都好鍾意金屬襟章,記得第一個襟章係用兩個果醬(robinson)樽上既職業公仔印花,寄去該公司免費換番黎.(當然要出回郵信封同郵票啦,童真既我竟然寫要太空人......)

升中學後,開始有零用錢,就開始買動漫既襟章,見到心儀既都會買落黎,不過係香港可以買到既真係唔多.

今晚心血來潮,將儲落既襟章"釘"係一塊絨布上,放係客廳上作陳設.有啲係人地送既,有啲係經歷特別事宜至有既,但大部份都係自己買既~

每一個襟章都掛住我既回憶,記錄住我既愛好,生活~

龍鼓灘燒烤

幫愛羊清洗好,打埋腊,騎羊同台灣女生入龍鼓灘bbq,而外母就自行搭輕鐵轉的士入去會合我地.平時少食肉既外母大人,今晚都算肯食嘢.

番薯同菜包亦成為外母既主要食糧~外母開頭好抗拒食燒好既乾魷魚,但當人家話係好似平時既魷魚乾同絲差唔多之後,至肯試一口.食過番尋味,我再"搣"多幾塊,外母都照食~~

當我已經好飽之時,人家兩母女仲可以清埋剩低既番薯,真係好利害.........

ps:今晚都有啲凍,新買既過頭笠頸巾都幾好用~~

VF-25F MESSIAH

 朝早起身食過早餐,正式試玩呢隻超合金,當然事前有洗乾淨對手啦~

 機身好仔細,完全一張貼紙都唔洗你貼,主要pattern有齊.整架戰機既造型跟動畫設定好相近,精密既變型系統,真係令人讚嘆~

 機械人形態非常合比例,一點都無因為要遷就變形系統而失實,絶無負超合金DX之名!

(附上動畫設定圖,方便比較~唔怕貨比貨,最怕唔識貨)

原先係網上見到商品照片,腳踝位較長,而小腿側裝甲較動畫設計為短,搞到好似有以著住條吊腳褲既感覺.好在實物既腳踝部份可以維持半伸出既狀態,消去"吊腳"既感覺~另外膝蓋既裝甲,亦比想像中可以外翻得多,感覺較神氣~

唯一係個盾牌位,未能做到緊貼前臂側,可能個兜位係為咗係飛機型態收納雙掌罷~

本人覺得VF-25其實係前作MACROSS PLUS裡YF19既進化版,因為其摺合式機頭設定,以及護盾佈局實在有點相似~其實YF-19亦係MACROSS 7既主角機,只係色調,頭部以及其他小處作修改~

親子活動之元旦飯局

 今晚老豆無飯開,約我食飯,於是係市中心既美心皇宫兩仔爺加埋新抱仔一齊開餐.老豆同我份一支大喜力黎飲,咁高興當然要影番張相啦~~

我地食既餐係$368海鮮餐,海皇豆苗羮,燒味拼盤,清蒸海星斑,水晶海蝦球,百合翠瓜炒帶子.最好食既當然係條魚啦~~~細個唔太鍾意食蒸魚,以係食炸魚同煎魚,大個咗至鍾意食蒸魚.仲記得老豆氹我食蒸魚時會講"食舊fish丫~~"

老豆都幾滿意餐飯,佢同人家一樣都鍾意食燒味,當然要影番張相啦~食完飯,send番啲相俾老豆,再一齊行去cd鋪買隻BATMAN-THE DARK NIGHT.見老豆當時偷唔到時間去戲院睇,咪買番隻碟,得佢可以係屋企睇吓,氹吓佢老人家開心~
好開心可以同老豆食飯,希望可以一齊睇戲啦~老豆起初係電話度話美心皇宫貴,但我話有得食咪食囉,不過結果又唔係太過貴,起碼係物有所值~~

聖誕禮物變元旦禮物

一直唬住呢隻超金合幾時出,明明27號出,行旺角又唔見有,到呢幾日係屯門吉之島同置樂都唔見有,於是委託住係旺角附近既福娃幫我去睇吓.

結果福娃同里奧先生放工後一齊行,幫我係旺角兆萬逐間問,原來到到都斷貨,日本都唔夠貨(店員話).皇天不負有心人,佢地最後都搵到間有,打俾我報價$13xx.我見貨源咁緊絶,於是下令即買~

其實之前上網睇過啲人擺上網bit底價都要$1000,直購價為$1200.計落兩條友搭車一來一回,加埋個晏晝,都要成舊水,加埋時間,都唔係差太遠.

好多謝福娃同里奧先生,完咗我一個心願,我好耐無一個超合金咁著迷~~可以係元旦買到心頭好,真係好兆頭.新既一年希望諸君同我事事順景,身體健康~~