太大意了.........

今日係置樂買咗隻VF-25G,價錢比預期貴$399,不過計番円價七算又好似差唔多....

雖然好細心咁CHECK,但透明膠盒加反光,令我無為意心口上唔應該有既白色油,經我用補油筆修補後,都仲係有個印,心痛.......鋪頭老闆只係得三隻我揀,一係啲白色油太薄,透出底層既藍色主色,一係就啲白油位多氣泡.可能係我太專心睇白油位,而忽略咗心口一大片既藍色位置,誤以為反光.另外右邊大脾既白色位有雜亂既花痕,呢批貨既QC真係麻麻.....

好在係另一間買既幪面超人BLACK-S.H.FIGURE無事,拆盒細看過無花無爛.俾錢時我同阿姐講"佢係我第一個鐘意既幪面超人",阿姐答我好幾個好似我咁既年紀既男仕黎買呢隻玩具.小學時係亞視睇BLACK,一睇就迷上,加埋之前睇既超音戰士,絶對令我自少就想騎電單車.

今次既S.H.FIGURE比多年前既裝著合金精細,關節,線條及比例亦有進步.(附上裝著變身系列舊作照以供參考)

PS:相比之下,VF-25G既超合金既白色就處理得好好,無氣泡又無透底,可能本身藍色機身既膠質比較易上色.成日都好無心機,好內疚無睇真啲,嘥錢......

爭玩麻雀game

之前買咗隻麻雀game俾台灣女生玩,點知自己試玩時沉淪埋一份,兩口子爭黎玩.........其實自己連廣東牌都唔識打,但細個打機時都會玩日本麻雀game,一黎有美少女麻雀,二黎可以一個人殺吓時間.好可惜日本牌好多規範,所以成日都食唔到糊,最多只能食"對對糊"同"七對子".

為咗可以有一番作為,我同人家好認真咁上網search吓點打日本牌,了解吓點食糊同計分.我地仲用相機影低電腦食出既牌,用作賽後分析~

經過幾日黎既實習,今日竟然俾我食到"四暗刻"呢鋪大牌(即係無碰牌,全靠自己摸番黎),簡直係我麻雀game歷程中最光輝既一頁~~~~

普通既麻雀遊戲又點會令我同人家玩得咁投入呢?答案就係呢隻game既gimmick,打橫個制黎玩,好似望住副砌好咗既牌咁,而且時機成熟時可以將個制向外翻出,電腦就sense到你食糊,真係同打真牌一樣咁爽~

唔錯既假期一天

係屯門泳池游完水,就去海典軒下面既巴士站等車出旺角,因為要同台灣女生會合一齊睇"天使與魔鬼".

貴為"達文西密碼"既前篇,當然係解古代謎團,破現代危機.其實兩齣戲都係同一條formula,而且劇情最後會轉一轉彎,結局都係會俾觀眾一個小驚喜.因為用積分買一送一,兼且有八五折,$55兩張飛,齋計場景同卡士都值回票價~ 

六點九散場,行咗陣玩具鋪,係lunch pepper食飯.food court等位已經耐,點知排lunch pepper條隊仲耐,更唔知等叫冧巴攞個餐仲耐...............

ps:睇戲前同人家趕去太子攞番個頭盔,真係幫我啤番好個膠邊,可以繼續用心愛既頭盔.唔怕貨比貨,最怕唔識貨,spare頭盔(yamaha J5)真係無得比.....I LOVE SHOEI~~

MOS BURGER

放工同台灣女生騎羊去市中心,見MOS BURGER開咗,於是入去開餐~雖然每個餐都係成$40,特飲抺茶鮮奶同cafe latte要再加$5,但質數味道真係物有所值. 

人家最愛既作雞脾當然唔少得,仲記得我地去影緍紗相時,我地兩個係午餐時間搏命扒外賣既炸脾飯盒~睇人家個樣就知好滿足啦,但我就覺得薯餅好似好食過脆雞~

硬闖一田

 今日同台灣女生去一田買平嘢,一落巴士先去元氣食個晏(小柱三文魚丼都ok噃).

 跟住就入一田,嘩,幾多人,第一日就搞成咁??於是同人家先去睇衫褲鞋襪,家品部.

買咗少少嘢,諗住去超市作最後一站時,發現人群分流作業,好大打擊.......唯有行去食少少嘢先啦.點知撞到神秘人物-jacky,原來佢一心黎買德國寶既電湯煲,但該專櫃竟然係超市裡.我地三個人一齊係鐵馬外等咗半個鐘左右,就有得入去,仲要同啲師奶爭購物車仔同膠籃.......最終jacky都能買到特價湯煲,加埋人家既恆生咭再平多$50~jacky買埋湯包就走先,我地就買咗啲食品,約大半個鐘就排隊俾錢,約半個鐘至由隊尾行到收銀.其間見無購物車同膠籃既顧客,用超市內既吉紙盒黎裝貨.

一袋二袋,腳又軟,於是上咗去星巴克坐低飲咖啡同食件餅黎叉吓電.

行多陣,人家買埋林峯既concert飛,我地就搭巴士番屯門,再轉輕鐵番屋企.放低啲嘢,搭小巴去相熟大排檔食飯,奇味雞煲,豉椒炒蜆,壓軸既就係鹽焗肉蟹,一人一隻,正~

ps:繼上次係三聖俾jacky渣車時見到我騎羊去接台灣女生後,今日就輪到我撞見佢(半個月左右)

BATTERY OBESITY

今日一心去smartone買舊原裝電(上網check過$298賣$248),點知話賣晒,偉信既display櫃有貨,仲話EPS付款85折.之行咗百老滙,國美,領域,都話無貨,只係得一間細鋪(TOP ONE MOBILE)有賣$88既代用電.為咗安全,都係去番偉信買.

點解要買多舊電?咪因為跟機出個舊電無啦啦脹大咗,頂到機背個殼都拱起咗....諗真啲,呢一兩個星期,個電話好似神神地,尤其係影相時會hang機,唔知係咪都關事.

睇番舊新電,真係唔會拱起,四四正正.鋪頭話可能係成日叉過夜既關係,令舊電發大.工作坊既雄仔原來都試過係咁,最終佢配咗一舊非原廠電池.

都幾鍾意現有既6500S,無咩後繼機體睇中, 只有未出既N97好似幾好,但要$5500,仲貴過i phone,好似有啲過份.......

環保單層巴士

今日帶埋個頭盔出去太子,上既竟然係一層既63X.雖然座位少咗,但直至上屯門公路,仲有兩個未被佔用既座位.

之前見啲區議員拉banner話抗議取消63X巴士綫,可能係因為元朗同屯門市中心既客源唔多.其實非繁忙時間,以單層巴士黎行走,一黎可以環保啲,二黎又可以節省成本,唔會影響到巴士既班次.

本身63X既班次已經幾疏吓,再疏啲就真係可能要大半個鐘至一班車.......

一個壞消息,一個好消息

今日去置樂買VF100'S系列時,驚見之前一月買既超合金VF-25F賣$750!當時間間都無貨,連日本內銷都唔夠貨,所以炒到$1300,心急既我深恐回貨無期,所以買咗.......

老闆話而家係再版,所以貨源無咁緊張,價格回落合理水平.我番到屋企上網CHECK,都見有人放直購價$850左右,真係好大打擊.........

買咗VF-25S同VF-25J,只係拆咗盒VF-25J黎玩,雖然唔係完全變形,要換部件兼拆手拆腳,但手工都算精細,為咗儲齊SKULL小隊,VF100'S係不二之算($240左右一架).即使主角機超合金價格回落,但另外三架機都係一千蚊左右,要儲齊的話,近四千蚊點走唔甩....

好消息係頭盔店打黎話可以幫我send個頭盔去原厰維修個膠邊,約咗聽日去鋪頭放底兼攞番張維修單,大約等兩個星期.

個頭盔只係用咗一年多啲,發現膠邊有問題當日,真係好唔開心,一黎好鍾意個色同拉花,二黎覺得一年時間太唔耐用(話晒都係made in japan兼號稱premium helmets).

ps:今日放假,但都好充實,無嘜點停過

朝早騎羊送台灣女生去買老麥早餐外賣兼番公司

十點左右騎羊去到泳池游水

中午友係市心食晏

晏晝騎羊去置樂買玩具(番到屋企折開其中一盒黎試玩)

傍晚係屋企吸塵,拖地,洗廁所(其間中途行出去油站俾嘢老豆)

八點半騎羊往三聖接剛與同事食完海鮮餐既台灣女生(仲係三聖既惠康買包特價米)

九點半食過人家煮既米粉及翻熱既雞翼就搭小巴去黃金同兄弟們飲嘢

一分錢,一分貨

今日業主黎睇過尋日脫落既兩塊浴屏(得番一塊無事),叫咗個維修師傅黎睇.師傅話要用縲絲批拆一隻完整既金屬塊去配,之前隔離屋都有咁既情況.

個幾鐘頭後,師傅帶埋助手黎,半個鐘左右就搞掂.原來當初既金屬部件係用銻黎做,所以會無咁"襟"用,而家換上既係不锈鋼.睇真啲,未破斷既金屬部件亦出現裂紋同變曲情況.

好在尋日事發時唔係台灣女生沖涼,否則兩塊咁大既浴屏跌落黎,人家一定搞唔掂兼受傷

豬肉佬@stone grill

係灣仔防癆會上完堂,同leo,台灣女生一齊搭地鐵去尖沙咀既STONE GRILL食特價午餐(放假既eric自行前往).一去到侍應小姐問我地有無book位,話full晒,但我地答應佢既遷就兩點半前交枱至可以入座.六五折特價咗,都要$99一位,一眼睇晒就係咁既份量,真係要試清楚有幾好食.

賣點係四百度既板烤既牛肩扒,要幾多成熟,貴客自理,塊扒靚啲當然五成熟都無問題啦.隔離枱叫二百幾蚊既午餐就有house wine,餐湯兼且份扒大份啲.

人家話我著住白色T恤加埋件aprom,好似街市豬肉佬.........

甜品hagan daz雪糕熔熔地,撈埋薄荷葉陣味,又幾盞鬼~

ps:早起身黎出灣仔趕九點鐘上堂,兼且飲咗咖啡,同leo,eric分手後,行兩行就好眼訓,好似番完個A更咁..........

外母生日

今日係外母生日,我同台灣女生出咗尖沙咀既鴻星食飯慶祝.其實呢個係之前係報紙睇到個特價四人餐(,係個翅同龍蝦仔較有睇頭~ 

 鴻星爆螺粒麻麻地....

 脆皮雞連半隻都無......(咁又唔係得呢幾舊,只係食到尾至睇得影)

 魚湯浸菇菜,好似較鹹口.

 外母同人家覺得呢碟長壽蝦子麵好食,而我就只係覺得"齋"咗啲......

 最後上既係蟠桃壽包,當然祝外母"福如東海,壽比南山".

食完飯,一齊行去海港城附近陪人家買少少嘢.雖然飯局唔太特別,但都希望外母大人笑納~

ps:個餐話就話係四人用,但我地三個人用都係啱啱好...