夢之組合

係屋企度養病,唯有睇埋套幪面超人decade,主角decade造型好差,成身幪面超人咭牌,好似列祖列宗大頭相咁.頭頂又一張,而家玩非洲話事啤咩.唯一令我安慰既,係尾段有black原本既男主角倉田てつを客串,仲要有一幕係balck既南光太郎被denied召喚到rx既世界.兩個南光太郎,一齊耍出變身動作.感動~~

Black同RX兩個我最喜歡既RIDER,同場演出,臨尾仲一齊出rider kick,劃上完美句號.

唔怕貨比貨,最怕唔識貨,你睇吓decade個樣,點頂呀?故仔又唔掂,穿梭多個時空,同其他rider打,但啲rider又唔係由原本既角色扮演....最衰係last一集都好似係無結局咁,都唔知佢想點!

行街行到病

今日同台灣女生出沙田行吓,散吓啲悶氣,一落車就係pokka cafe食晏,因為人家話呢段時間食lunch抵.我揀咗鐵板雞柳定食,諗住只係得個名,應該都係碟上,點知真係鐵板上,晏晝都食鐵板好似有啲豐富得滯(八十幾蚊個餐).

人家揀既西式豬扒奄列飯亦都好睇又好食~食飽就行商場,city super,一田,uniqlo.......行到好攰,不過都買都啲啱心水既嘢~

搭東鐵去旺角朗豪坊既skybar食生蠔,呢排做特價推廣,由原本$168六隻增加至九隻,一人一set,我飲hoegaarden,人家飲perfect ten,好正~~

晚飯就反而係全日裡最平既一餐(拉上補下嘛),burger king~人家揀既whopper,差唔多成塊面咁大........

我揀既BBQ Bacon Double Cheeseburger,就顯得相影見拙,只係普通size.......行咗成日,上車時已經好攰,車程中己好唔舒服,落車番屋企就肚暈暈,反胃,好辛苦,睇黎都係作病,希望唔好係豬流感啦......

ps:係沙田商場厠所聽到兩個中學生年紀既後生仔對話,其中一個建議另一個去uniqlo買件衫(唔知係咪著緊個件污糟),點另一位不屑咁話就算買咗都唔會著(嫌cheap?我都係啱啱買咗件特價$50既長袖T恤).年紀細,未搵錢就已經咁心頭高,實在令人擔心....

晨早接放工

雖然係放大假,但都晨早起身,騎羊還DVD,兼且去公司接台灣女生放工.

番完夜班,有咩好得過可以坐定定咁去到屋企門口丫?有時人家會搭的士番屋企,但好多時都會上咗架seat位爛晒又一陣煙臭既的士.

愛羊咁幫得手,當然要影番張相黎表揚吓佢既辛勞啦~

ps:呢個大假我會幫你好好咁做個spa~

望羊石

坐係starbucks邊飲邊睇雜誌,好似好寫意,其實只係慘痛既開始........朝早騎羊去觀塘鈴木check車,本來諗住只係換機油,油隔,check風格.多口問吓車軚同轉向問題,經黃生一睇原來車軚已經行蝕咗,尤其係尾軚,唔怪得轉彎同係不平路面總係"跣跣地"...

十一點唔夠交車,話要兩至三個鐘至有得攞,所以去apm磨時間,第一站係starbucks.睇完權相祐做封面既雜誌,再揭埋自己買既八婆雜誌(新地),都只係近十二點半...

係apm繼續漫無目的咁行,再百老滙既kubrick磨時間,買咗兩張電影小海報.連吉之島超級市場都行埋,因為真係無咩鋪頭啱行....

時間過得好慢,好辛苦至挨到兩點半食吉野家下午茶當晏晝飯,一心諗住仲唔夠三個鐘.點知打去鈴木問,哥仔話仲未得,師傅去咗食嘢,可能要四點至有得攞.....................晴天霹靂,唯有行番去工廠區既公園裡呆坐...

結果近四點鐘,卒之都收到電話可以攞車,我兩分鐘就行到去鈴木.新軚既綠線好明顯,埋單$2259,因為單係頭尾軚都要$1300.....共係街度蕩咗5個鐘.....

新軚表現良好,回程時感覺穩定,最緊要係安全嘛~番到區內,係熟悉既路段行走,亦覺比平日抓地~希望愛羊健健康康,繼續合作無間~

松木塞=環保

一直我都有將係屋企開既紅酒塞儲起,當係留念同紀錄.以前我以為啲塞要用松樹林既樹皮,咁咪要斬好多樹?

今日睇咗之前係明珠台錄低既"松木林"先知,原來厚厚既松木樹皮係每九年換一次,農民會定時係換皮既松樹剥除樹皮.所以係唔會整死棵樹.

紅酒塞既價值亦間接令松木林被特意培植,有利倚賴松木林為生既生態,除咗做生意,更係間接保育~

如果塑膠同金屬既瓶蓋會取代傳統既軟木松塞,咁松木林既生態就會受到影響~

I KNEW WHAT YOU DID LAST DINNER!

今晚台灣女生想出街食飯,唔知點解市中心到到都要排隊等位,結果人家提議去美心MX打邊爐.

其實我一向都唔太想係美心,大快活,大家樂等快餐食晚餐,因為我覺得晚飯應該係一日裡最豐富既一餐,有人陪伴住邊傾邊食.如果一個人的話,我寧願食美式快餐kfc,老麥,"渣渣林"食完就走人.

講番個餐,啲蝦熟咗都係黐殼,美國穀飼牛薄到三塊至得如酒樓既一塊.....啲菜係預先包裝內既貨,都多黑點...坦白講真係麻麻地,無耐人家又覺得無咩嘢,咁又係兩個人至係$100,想點丫?

食完無耐就去咗兩次厠所拉肚子,雖然人家無事,但我都係覺得啲嘢食唔得.........

簡單複雜化

食杯麵一向都係為咗方便,落滾水等三份鐘就可以食.新出既杯麵,唔知點解要加滾水後,再放入微波爐叮30秒再等1至2分鐘(唔通該公司應為每家人都會有微爐?).

本人試過新方法,又唔太覺得有咩唔同,而且啲配料好多沉底,舊包裝既配料浮係麵上好似方便啲.唯一特別既係個杯既用料係紙,而唔再係發泡膠,較為環保~

親子(媳)晚飯

今晚老豆無飯開,於是約佢係市中心好日子食飯,三個人食四人餐~

本來睇中咗個$488四人餐(雞燉翅湯,紅燒乳鴿,清蒸海斑仔,鮑汁菜膽扒螺片,西蘭花炒花姿),點知老豆話叫平少少既老火湯餐就好了.我話都係爭一舊水,啲餸又啱食啲,咪照叫囉,老豆聽到就邊笑邊話"好啦,好啦".

我明白老豆想幫我地慳荷包,但平時又難得可以偷時間出黎一齊食飯,傾吓計,當然想佢老人家食得開懷啲同舒服啲.成晚三口子有傾有講,老豆平時係屋企都無人同佢咁傾,我仲自爆小學時曾係佢個散銀包偷幾蚊雞黎買萬變咭.

我一直以為老豆知道,但原來佢一路都係唔知,佢話邊會特意數有幾多個銀仔丫.而家講番出黎,兩仔爺只係當一樁趣事~

臨尾上糖水時,侍應想上三碗,但老豆堅持要四碗,"明明係四人餐嘛"~

ps:今日出咗出去旺角代購王攞VF25F既太空裝,由於太貴,於是我同店員理論.當初我同店員講落ORDER時要報個實價俾我聽,但結果係一路都無,只係話日本遲咗接受網上預訂.真至前一星期,我係旺角既玩具店見人地都有得賣,點解我仲未有?

行去代購王舖頭問,話應過呢幾日會有,結果係6/10至收到E MAIL話有貨攞,貨品定價由當初落單時4200円變咗係7200円!雖然件貨係平過人地,但計埋運費同服務費就貴人地成二百蚊(人地賣$760),仲要遲過其他舖頭.結果店員都肯俾我退訂,原銀奉還,但令我以後都唔會幫襯代訂玩具既服務.

其實七百幾蚊買個超合金玩具既外加配件真係有啲貴同肉赤,所以我都無去其他店舖買,再見啦,太空裝.....

芒亨新裝-雌火龍

今日卒之都俾我儲齊雌火龍既套裝,比起好似愛斯基摩人裝既水獸套裝,順眼得多.呢套係我第二套芒亨怪哭裝備,黎緊目標係海龍套裝~

台灣女生牛一

今日係台灣女生既生日,亦都係中秋正日.夜晚騎羊去黃金海岸食飯,係馬會附近已經開始有多車,置樂起慢車,三聖後塞車.......

停車場泊滿滿車,好多私家都慢車兜圈等位,好在仲有少量電單車排骨位.沙灘迫滿人同螢火棒,浪漫氣氛被熱鬧喧嘩聲取代.一坐低就享用預留既美國生蠔,其實店內都坐滿人,好在有訂位.

上年都係同人家黎呢間餐食飯,仲記得上次係打一號波,叫咗一打生蠔,同二人餐,食咗好幾個鐘至食得晒,加上明哥體貼既服務,所以好開心.今年明哥無係度做,而且撞正大節日,餐內既菜式唔可以更,上菜又等得耐,睇黎下年都要考慮吓轉地方.

生日禮物早係幾日前送出,人家見到都話鍾意,外母大人話其實人家一直行街都有睇耳環,份禮份啱晒人家心意~~

隱世牛一

朝早起身食早餐,打機,中午同人家騎羊去市中心惠比壽食個豐富既午餐.係市中心閒逛一陣子,再去買餸~

係台灣女生既努力下,今晚可以安在家中享用美膳,係吉之島買既紅酒,味道唔錯,睇黎有法國農業獎既紅酒係有一定保證~

其實煲蟹我都有份幫手,因為當我租完碟騎羊番屋企時,見人家係厨房好旁惶.原來係人家對住會郁既蟹好驚,雖然對鉗係被綁住,但四對腳仲有活動能力嘛.結果我跟住人家既講法,用筷子從蟹既口部直插到尾,咁人家就可以安心清洗,免得外母要特意過上門幫手~(人家見成功殺蟹後,踎低對住煲內剩餘個隻蟹講"嘻嘻,你死梗啦你")

食完飯,坐定定咁繼續打機,仲俾我首次"做低"雌火龍,當然要影番張相黎留念啦(其實今日斷斷續續咁打咗6個鐘頭58分)~

夜晚邊飲住紅酒邊同人家一齊睇X MEN狼人外傳,雖然臨尾個大佬"雞雞地",但整體都算唔錯(尤其係電單車個幕),解開狼人金屬骨骼既秘密.

雖然唔係好特別既節目,但可以悠閒咁過一日,做自己鍾意既事,感覺都好唔錯~人大咗,無咩話一定要成班人出黎慶祝,朋友們既短訊,電話祝賀,已經很足夠.

PS:繼上之係百佳買咗水蟹後,今次我地又中招,其中一隻係水蟹....