區家少主百日宴

今晚係區家少主百日宴既日子地點係市中心剛裝修好既稻香,一眾崇真書友都再一次為佢而高興聚會.區少主頭上開始生頭髮,係咁熱鬧既場合都無扭計喊,都真係夠晒乖仔~

教練抱完區家少主後,唔知係咪真係會心郁郁呢?本來應該係七子齊集,但楝哥晏晝一訓就唔知醒,響極電話都無反應,睇黎讀書時代既特性,一直都無變~主人家擺五圍,我地書友都坐咗大半圍.我帶咗支紅酒同oscar,教練一齊飲,好在酒樓無收開瓶費~~

PS:晏晝騎羊去良景搵老豆食飯前,入咗天水圍搵教練攞佢係沖繩買俾我地既手信.

食完飯就騎羊去大興買魚旦河,因為台灣女生早更放工,自行番屋企等食,慳番啲時間hea吓抖吓~

用新手機既相機係幫愛羊影番張相,以表揚是日既辛勞.

豪華T MAX

今日係公司停車場見到呢架豪華版T MAX,四隻喇叭,就咁睇好似只係加裝咗音響設備.

睇真啲,其實係拉咗花,條喉都應該係換咗,可惜在加咗個尾箱,稍減"跑"格~

最近因為工程關係,搞到大家泊位都好困難,要扭多好多轉至入到個位,仲要係大家都要隔多半個位,變相少咗位泊.希望工程快啲完成,大家可以泊得順手啲~

Rives de la Seine a Paris

之前係吉之島見到呢個巴黎鐵塔既積木,台灣女生已經好鐘意,見呢排人家屈係屋企度,於是送俾人家以作解悶.

砌出黎都似似地樣既,14.5cm高,絶對唔"雅"位.人家當然開心,一個鐘左右就完成呢個作品.

ps:呢盒嘢既另一賣點係"made in japan"

落足心機,挑選手機

今日晏晝騎羊去良景搵老豆食晏,見老人家想換電話(舊機用咗兩年多),順便俾本衛信既書仔佢睇(真係好有心機用放大鏡黎睇啲細字).老豆睇中咗nokia既5230,但我嫌佢個殼膠得滯,而且相機得20萬像數,所以"說"佢揀5530,個款好啲,相機又係30萬像數,價錢只係貴百零蚊~

大家睇吓5230個樣真係膠膠地,機身又厚啲,真係得個"平"字($17xx)

睇個款都無咁似玩具電話丫,都係touch screen,啱晒老豆試新玩意既心願.事源係佢有個同事出咗部5800,見人地篤得幾好玩,所以話想出番部"零"機價.之前已經係smartone問過,係就係$0機價,但要簽約用$300既上網plan,計落唔花算,仲貴過齋買機......而家啲後繼機平咗,所以就心郁郁出部$2000有找既平機玩吓.

PS:係市中心CM concept出5530,但哥仔用我張咭試唔到部機,話可能係我張咭有問題.我明明部機夾張sim咭都無事,以策安全,都係唔買住.搵日去老豆睇過個間T ONE MOBILE問吓先.

美心"魚.翅.滋味"餐

今晚同台灣女生係市中心既美心皇宮開餐,開初以為會貴少少,但望到個時令餐牌,大減價兼款式啱晒我地,最多咪加多個餸,計埋茶芥都應該係三百蚊多啲落樓~

兩個人分一煲翅,每人都有兩碗多啲,見到人家咁專心咁食,就知到有一定水準.

由於驚唔夠餸食,於是散叫多個粟子炆雞煲,香口惹味,無揀錯~人家話唔知呢個散叫既會唔會大碟過跟餐既份量,四圍望過,唔見人地食跟餐既粟子炆雞煲,無從比較.

條魚老虎斑都幾大,三個人食都夠,我哋兩個人當然食得盡興~

咁啱坐後面卡位既係公司唔同部門但又成日見既姐姐,食食吓佢地問我地有無匯豐銀行信用卡,因為佢地食既餐係額外有85折.幫人簽卡,收番現金,阿姐仲請我飲杯啤酒,話個餐包既,誠意拳拳,唯有答謝"點係呀,咁客氣~"

食到中途幫阿姐簽單,待應好擔心咁問"佢地會俾番錢你0架可?",睇黎佢怕店內發生騙案兼見報

邊食邊傾邊學

今日番完早更,騎羊入元朗搵阿潘食晏,自從大家係唔同分店做事,午間小敍比晚間酒局更少.可能我份人較老套,喜歡面對面傾多過係FACEBOOK留言.

坐埋一齊話題依舊多,除咗生活鎖事交流,我仲請教如何使用GPS地圖,原來都要戶外兼睇天氣撞手神,唔通唔洗錢係爭啲既?新機相片質數唔錯,有微距拍攝模式,碗清湯牛腩河都靚啲,唔講仲以為係儍瓜數碼相機既出品.

第11代手提電話

今晚係delifrance食完飯,行去睇電話,因為用開既6500slide已服役近兩年半,開始收唔清.目標後繼機體係N86 MP,貪佢相機係8百萬像數(蔡司認証).由於機價$4388持續高企,所以一直卻步.近來至跌到$3988,但潤訊既厨窗標明客戶價$3788,入去問售貨男仕,男仕話唔上台都係呢個價,"你買咗咪係我地客戶囉".該售貨員見我拎住本衞信既書仔,就話衞信都無咁平,見臨收舖兼清貨,平多一百蚊俾我.經過一番掙扎,結果番轉頭試機兼磅水.....

新機比用開既大少少,同重手,但無所謂,反正我手大嘛.新系統較難上手(本說明書又雞....),唔少功能同icon都係要你上網至有用,好似facebook,you tube,ovi store...睇黎威逼利誘手機客戶多用上網係大趨勢.

ps:手機PROFILE更新

1st  Ericsson PF768        > 黃色                                       sunday
2nd  Bosch 909 Dual       >  灰色                                      people
3rd  Siemens A40            > 藍色                                       orange
4th  Ericsson T29             > 銀灰色外殼,紫色panel         one 2 free
5th  Ericsson T39             > 灰藍色                                   one 2 free
6th  Sonyericsson T300    > 紅色 (紅豆)                           smartone
7th  Sonyericcson T630    > 黑色                                       smartone
8th  Nokia 6260               > 銀色                                       smartone
9th  Nokia 6270               > 黑色 (深啡色,鋁金屬外殼)  smartone
10th Nokia 6500 Side      >銀色(鋁金屬外殼)                 smartone
11th Nokia N86 MP        >白色                                        smartone

樹大有枯枝?

之前跟開既郭先生帶我地去睇盤同傾盤,感覺都唔錯,有禮貌,以客為先.點知今晚黃生打電話黎話郭生已經離開該公司,基於當日佢代黃生收我張cheque黎同發展商傾價,所以代為接手.
黃生先講述郭生手腳較慢,跟住就問我另一個10年樓鹷既地下連花園盤有無興趣,我答無因為太貴同樓鹷大.跟住黃生就話yoho midtown既呎價.我答佢之前睇中既全新盤都估唔足價,十年樓銀行更加估唔足價,而且個價標到同新樓差唔多,咁我咪要幫一大筆錢出黎. 黃生態度開始轉差話”你都按既啫,你一之過俾架?”,”你搵邊間銀行呀?係咪我搵到間唔洗你補咁大差價你就買呀?” 又話我既定價係脫離現實.

當初黃生收cheque時,已經要我係一張未填寫細節既臨時買賣合約上簽名,話只係一個做法,等業主(發展商)覺得我係有誠意傾.我答佢郭生唔係咁講架喎,只係叫我放底張cheque等業主知道真係有個實客黎問價.我指出如果我簽咗名,到時佢自行加上銀碼同細節,業主同佢加埋個名,咁我咪硬啃個盤?黃生聽完就收番張臨時買賣合約,話唔緊要,咁咪照郭生既講法,放低張cheque,同業主慢慢傾個價,當時我已經覺得佢唔太可信….

我同黃生講,我當初問過地產,業主既底線係咩價,先至提出我既上限價,我只係睇吓三個月限期內,業主會否妥協.如果話業主見yoho價高,向地產提高咗個定價,咁我個價就硬係由到價變成唔到價啦.黃生竟然答”啊~你又知發生緊咩事既?”

黃生強要我加多5萬黎向業主試價,我一口拒絕.”你又夠薑,放低張cheque,你放得低,咁我要做嘢0架嘛”.我聽完之後,忍無可忍,立即話既然張cheque咁為難佢,聽日我去攞番張cheque!黃生聽到呢句至開始收歛,話唔係跣佢時間,只係俾機會佢做嘢,又話聽日佢唔番工….”你地公司聽日都開鋪嘛,我十二點去攞番張cheque,件事就咁完結.

PS:以自己名字開地產代理行，四川物業老闆黃四川原來最初是從事時裝批發，突如其來的轉變，只因希望成為設計師。如果村屋有如一匹布，他就是一名希望為客人度身打造安樂窩的「村屋設計師」。

「新界的村屋設計保守，我希望成為設計師，通過地產代理及村屋發展，為住客設計出富特色的安樂窩，令村屋變得新穎，剪裁一件漂亮的衣裳。」黃四川發現時下發展商興建的村屋，沒有車位、空間及綠化環境，失去原來特色，跟市區私人樓宇無分別。(http://hk.realestate.yahoo.com/091016/299/3jych.html)

高清廣播住入外母家

早兩日為外母訂購既victor高清電視iDTV(26吋內置機頂盒$2990),今日送到外母家.由於唔包安裝,所以我番完晏,放工上外母屋企拆盒,駁線,追台,試機.Set好晒,外母大人煲韓劇DVD碟,睇13個免費電視頻道都無問題~

雖然貼住係VICTOR,但我上網CHECK過係大陸機.機身膠質都好似大陸機,睇埋張保用證,"TELEDEVICE邦威牌",鐵證如山,大陸機一台!!!!!!!!!!

其實有諗過買LG,但同吋數既IDTV,要貴多六百蚊.係網上CHECK過評分只係差少少(LG:8.9分VICTOR:8.3分),於是從經濟效益角度決定買VICTOR.

PS:外母大人好開心, 電視大咗,又唔再洗等半個鐘,個畫面至由矇變清(15年機齡既東芝顯像管電視).