今晚同台灣女生係市中心既美心皇宮開餐,開初以為會貴少少,但望到個時令餐牌,大減價兼款式啱晒我地,最多咪加多個餸,計埋茶芥都應該係三百蚊多啲落樓~
兩個人分一煲翅,每人都有兩碗多啲,見到人家咁專心咁食,就知到有一定水準
.
.
由於驚唔夠餸食,於是散叫多個粟子炆雞煲,香口惹味,無揀錯~人家話唔知呢個散叫既會唔會大碟過跟餐既份量,四圍望過,唔見人地食跟餐既粟子炆雞煲,無從比較.
條魚老虎斑都幾大,三個人食都夠,我哋兩個人當然食得盡興~
咁啱坐後面卡位既係公司唔同部門但又成日見既姐姐,食食吓佢地問我地有無匯豐銀行信用卡,因為佢地食既餐係額外有85折.幫人簽卡,收番現金,阿姐仲請我飲杯啤酒,話個餐包既,誠意拳拳,唯有答謝"點係呀,咁客氣~"
食到中途幫阿姐簽單,待應好擔心咁問"佢地會俾番錢你0架可?",睇黎佢怕店內發生騙案兼見報
