游水,覆診,行商場

朝早騎羊去泳池游水後,兜去市中心買埋MOS burger外賣(自己加多杯FULLY既珍珠奶荼)就番屋企同台灣女生食晏.

搭巴士出QE覆診咁啱係OK撞到小歌仔,其實見咁上下係佢放工時間,都諗住買埋嘢飲就打俾佢~小歌仔趕住去做gym,我地就趕住去L座覆診.

覆完診就同人家行番去佐敦搭巴士入沙田行吓商場,夜晚係Mr.Steak食,我點咗個牛柳餐.

人家就點咗個阿拉斯加蟹腳配澳洲和牛餐,埋單四百多啲,難得放假唔洗番工受氣,可以出黎行吓,偶爾氹吓自己,無所謂啦.

TOY STORY 3

閒日既晏晝,戲院理應唔太多人,但已踏入暑假檔期,兼且TOY STROY 3上畫,所以迫滿等入場既觀眾.本來諗住同台灣女生睇兩點二個場,點知太趕,無咩位剩,結果睇四點二個場.

其實之前都有同人家去戲院睇造勢既3D版TOY STORY 1同2集,等人家溫定書,至睇呢齣第三集.

同之前一1,2集3D版一樣,都係無話特別地立體,好在係屯門睇$60張飛.故事話男主人andy已經準備入大學,兒時玩具已被閒置,但又意外地被捐去托兒所,一連串笑料兼歷險.總括都無咩冷場,最鍾意巴斯光年被"重設"時,變咗西班牙模式.另外係垃圾場焚化爐度,真係無諗過會係隻爪(三眼仔至愛)救番一眾玩具角色.

Barbie同Ken既對手戲都好好笑,Barbie既動靜神態都同Natalie好似,人家都有同感,番工都要同佢講吓先~

放假一人一天遊

朝早鬼咁好天,騎羊去新墟剪髮,係排骨位見到一架好閃燿既honda fusion(德輝至愛)~咁舊款既車,無諗過又keep得幾好,起碼唔會污糟,死氣喉,尾翼同尾燈都應該係改裝品,相信車尾電鍍外殼都係後加.

剪完髮,番屋企執野騎羊去游水,中途開始天陰(紅橋).諗住去到市中心睇吓近泳池情況如何,點知一到市中心就開始落大雨,唯有係商場隊道內剷上行人路,用白布抺乾,就落布冚,叠埋心去小巴黎食下午茶.朝早仲藍天白雲,邊會諗到晏晝會搞成咁...............食完個烤牛肉凍檬粉,飲埋杯凍奶茶,行去買啲嘢,見停咗雨,就騎羊番屋企~

台灣女生出去沙田同大學書友慶祝生日,留守家中既我邊睇新世紀福音戰士劇場版第二部:破,邊享用我既西式晚餐-紅酒配凱撒沙律(茶几上既嘢,全部都係晏晝買既)~

劇場版比上一集更緊湊,雖然劇情同TV版有少少出入,但對無睇過TV版既我係無咩影響.現年三十既我都明唔晒,唔知當年TV係電視播出時,啲中學生(跟我同期)點睇得明?以前讀書時唔太接受得到EVA機又長瘦又彎背既造型,但而家又覺得無咩嘢,可能明白佢只係被加上裝甲兼改造成為人類武器既外星生物-使徒~

P更前去游水

幫emily調咗更期,今日番晏之前去咗泳池游水,運動之餘又曬黑啲.相熟泊車位置上晏係日照位,平時番完早更去的話就會無咁晒.雖然有樹蔭位,但中過好多次雀屎,所以寧願乾曬......

騎羊去游水好方便,15分鐘包到泳池,平時行出輕鐵站都要近十分鐘,就算即刻有車都要半個鐘有多至到泳池.

今年既夏天特別珍惜,因為出年夏天好可能唔可以咁自由去游水,唯有今年勤力啲曬黑,十月開始係屋企做"黑執事"~

鐵騎外母

今晚外母黎咗屋企為番夜更既台灣女生準備晚飯,人家食完就先出門番工,外母大人完成善後工作,就打道回府,外母大人唔肯搭的士番屋企,堅持行去搭輕鐵,於是本人話"一係搭的士,一係我車你番屋企,重拾昔日係大陸坐摩托車既回憶"

無諗過外母大人揀坐電單車,戴頭盔要幫手,影番張相留念吓.愛羊落咗大架,本來同外母講解吓點上後座,點知外母一嘢就擒上去.心恐反車既我,立即扶住把手,坐上前座,但係落大架時,實在吃力.....

係直路時平衡還好,只係覺得避震同剎車系統比平常較大負擔,但一轉彎就覺得重心同車身不一致,要收油,車身只能微傾,改以前軚方向黎轉向.準備cut線時向後望,見外母雙手緊握扶手兼身體向後傾,緊張僵硬......

無驚無險,送外母大人到樓下,落車時又出奇地順利,一轉身,一sir就落咗車(同人家一樣,不概為兩母女)自己番到屋企都有打俾外母,問佢有無唔舒服同受驚.雖然外母話無嘢,但見佢落車除頭盔時一額汗,下次都係迫佢搭的士好了.......

封面與內容相符

今日番晏,唔知點解好鬼肚餓,於是係冰箱攞咗個台灣女生買落既CP微波爐飯盒.

叮完之後,淋埋個醬汁上雞扒面,冚蓋焗一陣,就係咁簡單.對比番包裝上既照片,本人覺得已經好老實,味道唔錯,只係配菜較無味及急涷食品feel.正價錢40一個,特價$18.9,唔係特價都真係唔敢買黎試~

四圍撲水

一向去開屯門泳池,知道逄星期四係清洗日,點知今日星期五竟然話係清洗日!可能係因為尋日星期四咁啱係7.1國慶公眾假,所以清洗日順延一日.....背囊裡有齊裝備,著定泳褲既我心有不甘,於是先騎羊番屋企,上網check清楚元朗泳池開(星期三清洗日),再騎羊入元朗泳池,我有一個信念,"今日我要游水同晒太陽!"

用咗50分鐘游蛙式十個來回,係池邊太陽椅晒咗10分鐘,沖埋涼就騎羊去新城市美食開餐.元朗泳池既locker比屯門既新,但就無咁多池(bb池同跳水池,訓練池).

下午茶餐,雞翼薯條(本來兩隻,但食咗一隻至記得影相),凍奶茶.

愛羊就泊係馬路邊,有咩好得過望住架車黎開餐咁安心~

騎羊去市中心幫台灣女生將啲貨同餸送番屋企,再帶隱形眼鏡換衫去兆康"櫈"腳打波(雄仔,朱仔射藍中).上一次都係啱啱staff時,同德輝大豆地係公司隔離球場打,仲要係冷不防德輝傳球,皮球飛埋塊面,坐係地下,一邊鏡片一分為二.....

Leo,Eddie同兆全都在場,三對三,打咗兩三個字已經好吃力,熱加攰,話晒游完水黎..... 一如己往,行行企企,因為唔識打,不過大家係熟人,柴娃娃咁,無咩所謂.之後Leo,Eddie,雄仔同朱仔去咗同人地打半場,我就同兆全坐埋一邊看袋兼睇波兼閒聊.八點左右就走先,騎羊番屋企食人家為我準備既晚飯,今日夠晒充實~