疲累的父子

番完早更自己去食晏兼買啲嘢,就騎羊番屋企.見少主係咁喊,台灣女生又無陪月忙手,於是沖個涼,換過衫就幫手抱吓少主.

自己都好攰,抱住喊到攰都要喊既少主,覺得佢都幾重,再大啲咁我點抱呢?之後都係頂唔住,同少主一齊入房訓,怕被單會焗到少主,所以只係冚下半身.烏吓烏吓咁過咗一個鐘,少主無再喊,但我就因為怕轉身壓到少主而無放心咁訓....

愛羊定期維修日

朝早騎羊出觀塘鈴木check車,十點出車,十點九個字就到埗.原本諗住趁大假係5號出黎,但怕少主早出世所以押後至今日至得閒,可惜天氣已轉涼兼起風, 所以比較辛苦.....

放低羊仔,行去apm既palace睇吓有無戲睇,用黎打發時間.由於跳躍大搜查線未上,啱時間既只有"再單身遊記"(Eat Pray Love),於是買咗11:35早場$40飛,抵~

一點十個字至散場,內容麻麻地,Eat Pray Love三個部份連接得有點格格不入....係APM行咗陣就去番工業區既餐廳食晏,貪佢夠平,下午茶時段(14:00後),干炒牛河,連凍飲都係$24~

食完嘢,行多陣就收到鈴木既電話,話可以攞車.行入車行時撞見salesman黃生,大家打過招呼,可能我買第一架車時俾cash太令佢難忘~

今次除咗基本既機油,機油隔,同火咀外,仲有風格綿架,皮帶,及迫力油,所以手工(包埋check極力子同珠仔)都平時貴啲.

回程時覺得羊仔行車時靜咗啲同穩定啲,希望愛羊可以健健康康~已經個半月無清洗打腊,搵日放假幫愛羊打理吓先....

儍瓜機影少主偷笑

經常喊又唔訓既少主,好難得會笑.咁啱見到佢偷笑,手邊又有相機,所以影低佢.

好多朋友都話有bb就好應花錢去買部數碼單鏡機,留住動人一刻.我又唔想拎住大部機出入,最多都係買部prosumer機.一黎無錢,二黎方便出入方便啲.

煩惱的少主

少主好多時都係"鄒"埋眉頭,就連訓覺時間,都會好似好"愁"咁.人仔細細,咁多嘢諗,幾時至得大呢?

少主見爺爺,見世交

今日老豆放假,中午偷時間黎探吓孫仔,因為係醫院度只可以隔玻璃望,唔可以抱.咁啱少主喊肚餓,於是叫老豆客串吓黎餵孫仔食奶,老豆話對上一次餵奶都係廿幾年前既事.

可惜少主玩口水兼吐奶,如果唔係,呢張三爺孫相會完美啲~老豆坐個個零鐘就走,我哋叫佢抱多陣先,臉帶甜笑既老豆答"再抱就真係唔捨得走0架啦~"

傍晚Andrew同Michelle黎探少主,Andrew話自己感冒未清,所以戴住口罩同無抱少主.好多謝佢哋既心意,希望滿月時,Andrew可以抱吓佢,影番張相留念啦.

湊仔經

照顧少主幾日,已經覺得好體力透支,又去健康院,.為咗俾台灣女生多啲休息,係第二晚(星期五)本人訓梳化,方便看顧訓係high chair既少主.

兩晚加埋訓得6,7個鐘....抱,換片,餵奶,清奶樽,消毒奶樽,重覆又重覆......星期六晚真係頂唔住,食完晚飯就訓咗兩個幾鐘.顧埋12點個輪奶,半夜就由外母幫手邊訓邊等少主喊醒換片兼餵奶.

人家坐月時,暫定既計劃:

九五時間由陪月幫手湊少主,照顧人家膳食.

外母大人會係六點左右到訪,準備晚飯.

如果本人第二日番早更,外母大人就留宿過夜,邊訓邊等少主"差遣"

如果本人第二日番晏或放假,外母大人就係晚飯後番屋企休息,夜晚由本人邊訓邊等候少主"差遣"(yes, my lord~)

生活模式改變唔少,訓少咗,幫愛羊清洗打腊,睇電視同上網既時間都少咗.身邊既同事朋友都話過咗頭一個月會好啲,但可能只係父母開始習慣湊仔既體力同時間消耗,而唔係個bb易湊咗.

自己平時都怕嘈,鍾意靜,喜歡自由生活,隨心而行.bb同小朋友唔會同你講道理同有故定時間表,永遠依靠父母照顧.可能人大咗心態會改變,無諗過自己既耐性大過預期(雖然都比唔上其他父母).希望少主健健康康,快高長大,早日獨立,成家立室~

少主出院

等埋兒科醫生十一點半巡房,等出帳單等咗成個鐘.找埋數,上番房,台灣女生憑單據入育嬰室接少主,由於多人出院,所以成一點鐘至可以出醫院門口搭的士番入屯門.

一番到屋企,就俾少主訓吓張BB床,床舖係"死懶鬼"鬆馳熊系列,希望少主都係咁relax.

少主係屋企既第一餐奶係由台灣女生出手,睇佢眼大大咁,好以好乖同享受咁~

餵飽少主,掃埋風,就將少主放係客廳既high chiar訓覺,仲幫佢同人家既熊仔影相

少主成日都好平靜,點知夜晚至醒同"樓計"餵奶又唔願食,唔願訓係床仔....食完又要喊醒換片食夜奶(Q2h)...結果我哋半夜三點至有得訓,少主訓係房門口既high chair.三個鐘頭又俾少主既喊聲morning call.......初夜難忘.............

第三天住院

中午時份,小仔sleeping day特意黎搵我同台灣女生同我兼探吓bb,人家精神同移動力回升,所以行落床一齊睇bb.人家享用外母既飯餐(由我護送),而我就同小歌仔去咗隔壁九龍城一間日式餐廳仔食晏.

四點幾台灣女生既大學書友黎探BB,大家一齊熱熱鬧鬧咁隔住玻璃睇BB.Iris愛女晴晴見到BB,忍唔住拍玻璃,好似好想同呢位小弟弟招呼.

夜晚再有中學同學Iris黎探人家,正如張醫生所講,第二日係最痛,第三日起就會好好多,見到人家無咁辛苦,自己都安心啲,希望聽日兩母子都順利出院啦.

多謝各方祝賀~

今日張醫生巡房後,話台灣女生可以off晒啲drip同foley,可以試落床.朝早去外母家攞人家晏晝個餐同代茶,就再搭的士去市中心會合老豆,一齊搭車去探人家及孫仔.係太子買埋個老麥外賣,十二點幾就見到人家,未夠鐘見bb,影住張合照先~

排12:55個轉時間,老豆隔住玻璃望孫仔都好開心,本來想叫佢踎低黎同孫仔照相,但講咗出口至記起老人家關節唔好,但老豆亦嘗試屈少少雙膝,我心裡有點酸酸的.

老豆坐到一點半就告辭,人家三點去咗餵奶.四點多啲人家既大學書友,brenda同阿健帶埋玫瑰花型蛋糕黎探人家,慶祝我哋一家三口之生日,再去睇16:55個輪bb探望時間.

夜晚先有蛟龍黎探人家,之後esther,leo同福娃都黎埋,真係多謝晒大家既心意.

區氏伉儷同教練都係放工後,抽時間黎探人家,結果工作部同中學部兩個群組"磅"住外母大人一齊去睇bb(我同人家就留係房裡食外母大人準備既晚餐)~

2-3-4 一家親

今日係小兒既出世日子,而家我哋一家人係連續三日黎慶祝生日~重記得新年個陣,制服房阿姐講頭祝我生番個老虎仔,台灣女生就打電話黎同我講有喜,雖然係計劃生育,但都等咗一年(仲諗住去睇醫生添...).

朝早食過早餐,梳洗過,就搭的士出法國醫院,十點唔夠就到婦產科登記但多人到連位都無得坐咁滯.登記完就要落番大堂再登記,又係要等,"私家都要等啦"呢句說話真係無講錯.....

去埋會計部交按金,上番三樓交文件,姑娘話仲未有吉床,見無位坐住等,於是同人家落樓下星巴克坐吓.人家要早餐後禁食,而我就飲杯凍cuppacinno同一件烤雞卷做晏晝.

一點鐘收到姑娘電話,話床位已準備好,上到去又話未得,可能職員太忙,其實係有床位.同房竟然有人家另一個婦產科私家醫生既case.

預約手術室兩點鐘,上房無耐就要執嘢入LOCKER,換衫等抽血,一點半就"上轎",都幾趕吓,有啲公家個clinical case咁.

人家要半身麻醉,而本人換好手術室既衫就等到近兩點四個字至入去陪伴人家.因為葯物關係,人家又發冷又打震,我只可以握住人家落住drip又冷又震既右手,同細聲安慰.幸好bb順利係14:28出世.合照完,我就要先離開手術室,人家就等醫生同姑娘善後.

人家番到病房時都仲係不停打震同發冷同嘔,好在一如醫生姑娘們所講,一個鐘後就會消退.由於觀看bb有固定時段,初生bb要訓四個鐘暖箱,所以排19:55個輪登記.

人家今日要絶對卧床休息,所以得我同外母大人,好姐及群姐隔住玻璃睇bb.

ps:多謝群姐同好姐既鮮花,以及探望

第六次同台灣女生,共晉牛一晚飯

晏晝同賢仔及德輝睇完"生化危機4之戰神再現",騎羊番屋企,抖一陣就同台灣女生搭的士去黃金海岸餐廳食生日飯.人家都係忙於試吓新買既sony ericsson vivaz(生日禮物之一)

鑑於台灣女生唔方便,於是同上年一樣近近地係同一間餐廳食(下年一定去第二度食),希望人家唔會嫌無新意.大假第一個星期雖然好忙,但好似過得好耐咁,加上自己又失眠...

聽日就係人生既新階段,希望一齊順利~

PS:生日快樂,姬絲汀,聽日辛苦你了.