時光逆轉,幸男觀禮

是日放假,除咗留守家中照顧幸男,趁少主小睡,就兼顧埋家務(吸塵拖地洗厠抺門).幸男醒咗喊住要人陪,於是播咗隻關島結婚VIDEO(擺酒用既短版),等幸男可以見證我同台灣女生既婚禮.幸男可能對啲情情塔塔既主題無咩興趣,唔太專心咁睇,不時四圍望.....

幫幸男換埋衫,執埋個旅行裝就孭住幸男搭小巴出市中心,同啱啱放工既台灣女生係惠比壽食晏.幸男係小巴度"僕"住我心口訓到塊面有條痕,好似額頭有條刀疤咁.

夜晚係屋企食飯,有勞人家入厨,可以舒舒服服咁係家中享用西式晚餐~雖然放假,但都無同人家一齊係梳化度睇錄落既電視節目.

食手指

幸男由四個月開始就鍾意食手指,會用脷頂同口吐奶咀出黎,跟住就食手指,十個手指都舔均咁滯,呢張相就見到佢食到好似邊食邊做"OK"手勢咁(挑釁我??)......

湊緊BB既朋友都知食手指既後遺症就係成面口水兼又紅又起粒粒.工作間既同事話可能係出牙仔,所以流多咗口水,一個鐘都唔夠就要換口水巾.唯有勤啲換口水巾同紗巾,再密啲搽葯膏黎舒緩吓,用薄手套黎"封印"對手.

掂池邊

今日幫幸男沖涼,當擰住身洗背脊時,幸男伸直隻手,好似游自由式衝線掂池邊咁.

幸男一日一日大,個沖涼盆而家都係啱啱好,有時佢踢幾腳就一個浪打落我隻腳同地板面,唔知幾時就要轉大啲既盆呢?

住家男vs幸男

今日台灣女生番晏,中午一齊幫幸男沖涼,我就出村口茶餐廳攞外賣,人家食過晏就出門.跟住就係我同幸男既one on one,首先氹著少主訓覺,正所謂"食飽睡一睡,好過做元帥"

趁幸男訓著咗,至可以得手睇今朝錄低既幪面超人KIVA,劇中既IXA都幾靚仔~

少主訓醒咗,管家要擺番個陣黎娛樂少主,遞吓玩具,陪笑..................

除咗換尿片同餵奶,仲要孭住幸男黎吸塵,少主係咁喊,放低佢係房裡由佢喊到攰,再全速吸埋啲踎低位同其他地方,繼而去拖地,點知拖到一半又醒咗,又要抱過同餵奶兼掃風.之後再孭住黎洗奶樽同蒸氣消毒.

近九點鐘我至叮個波仔飯黎食,少主就坐定定邊食手指邊睇電視"百年好合"......趁少主無發脾氣,又嗱嗱林去拖埋個地同洗厠所兼抺門(一生為奴)....

其間幸男不甘一個人睇電視,係咁喊,我要放低家務黎陪睇電視......等到媽媽放工番黎,幸男就好開心咁同人家玩,而我就要執埋啲手尾至有得沖涼.

就係咁無騎羊出過街,無咩私人時間休息及玩樂,放假家中打湊仔工.

第一次入係屋企食生蠔

今晚同台灣女生係元朗嗰間"小樽"買咗八隻法國生蠔,再係相熟酒舖買咗支紅酒,可能兩間舖既店員都會暗暗地諗:"又會有人孭住個BB黎買嘢既?".

見到個白飯就知其實主菜係食中餐,只係見好耐無食生蠔,所以至試吓買外賣番屋企食,計落又好似抵過出街食,而且味道都一樣咁正(外賣有冰同醬)~

食完飯,人家飲檸檬茶,幸男就吮奶咀,兩母子自得其樂~

PS:SLEEPING DAY晏晝訓醒,同人家入元朗海天花園酒家同德輝,子健,家楠,JACK,愛姐,群姐,培爺一齊飲茶.個個都話幸男大隻又實淨,影相至知同我既格仔衫好撞~飲完茶,行陣街,買啲嘢就帶幸男去診所打針.

霧中行車日

夜晚同楝哥係市中心元氣食晚飯雖然同日頭一樣都係大霧,但都照騎羊出門.飯後再騎羊接台灣女生放工,好耐都無騎羊去接人家放工,因為對更期個日我都係屋企湊仔.今日外母係度,先至可以出去同朋友食飯,同接放工.霧水撞埋風擋同頭盔既風鏡,凝結成水珠面,感覺蠻得意~

人家番到屋企立即會同幸男打招呼,沖完涼再去抱抱同撩幸男玩.最近幸男對擺動既衣物好感興趣,而且好鍾意UNIQLO買既格仔衫,每次見到都大笑,仲會用手抓住佢.

PS:今日番完個忙到嘔既早更後,同德輝哋渣車兜去睇屋,再入元朗食埋晏,係良記車行續埋牌費同保險(依舊$1314+$1050).踏入三月份,愛羊就跟咗我五年了~

爺,孫,媳,仔,世侄,共晋晚餐

今晚由台灣女生主理四人前晚飯(炒菜,蒸魚,白灼蝦,炒排骨,鮑魚仔,共5個餸),因為楝哥放工後上門電腦維修,兼且老豆屋企無飯開.材料都係晏晝係市中心食完晏,去超級市場買,再騎羊番屋企準備,有勞人家.

有孫仔陪住黎食飯,老豆當然開心.今次係佢老人家第一次上黎食飯,之前有邀請過,但老豆好似唔太相信家嫂既手細,今晚應該咩信心都有啦~

今晚有勞楝哥幫手裝window 7,食飯時己斟定啤酒俾佢,老豆仲問佢"馬仔,唔啤呀?",結果係老豆飲藍妹,楝哥飲hoegaarden,我就飲suntory.由於中一就識馬sir,成日電話問功課,所以老豆都當佢係世侄.

食飯時,老豆拎手機幫幸男影相同拍短片,臨番屋企前都有抱吓孫仔,見佢老人家咁開心,自己都有點安慰.

年初五,幸男打針

新年流流,幸男除咗收利是外,今日就要去母嬰健康院打針.今次除淨條片黎上磅,有7.6公斤咁重.見相熟姑娘時,幸男無"扭計",但當入去打針時,姑娘話只可以一個家長陪.台灣女生話當我走出去,姑娘準備落針,幸男就"啤"住個姑娘~

見市中心飲茶又多人又貴,於是就外母大人口味食越南嘢SAIGON BISTRO.卡位好窄,食物份量少,最重要係職員態度差.

事源係上餐飲時,熱檸茶,凍檸茶,凍奶茶裡,其中凍檸茶變咗熱檸茶.平心靜氣問有杯嘢飲唔啱,阿姐話"唔關我事,唔係我落單",俾你慶唔慶丫?當另一個職員埋黎,唔好意思都無句,只係話"有咩唔啱?".我答佢"我叫咗,熱檸茶,凍檸茶,凍奶茶",個職員真係無心聽同理解你既說話,只係話"咁即係邊杯有問題?",要我講明邊杯有問題至好負氣咁暁拎去換.即使換啱番黎,都只係放低,無句"唔好意思",荼餐廳都會有句"唔好意思呀,哥仔"啦.....

年初一,派利是,收利是

一踏入年初一,將利是交俾幸男,可惜佢只係顧住睇電視,對我同人家俾佢既第一封過年利是無咩興趣(唯有放係佢枕頭底).幸男飲埋支6安士奶,就安心訓覺~

番工除咗派利是,都有收到各方好友俾幸男既利是,祝佢"快高長大",其實我都想,最好聽日就十八歲添.

放工騎羊歸家,經過相熟油站為愛羊添油,阿姐話公司有利是俾顧客,內裡係便利店既優惠劵.雖然唔太實用,但叫做"利利是是"攞個意頭.仲記得第一年騎羊(BURGMAN150)過新年時,特意為愛羊入一缸"白金旋風"電油,阿姐問我"平時都唔係入白金架喎",我答"新年嘛,食好啲,常滿".直到而家我都係入緊白金旋風,感覺又真係架車去啲既.