兩父子行太子-買6th頭盔&買玫瑰花

 較早前已睇中SHOEI既J CRUISE頭盔,一心等拉花版,早幾日打去嘉利問,第一款拉花CORSO已經有得買,另一款STOLD拉花就要九月至有.

一家三口一齊係HK DINNER食完晏,台灣女生番晏,我就帶幸男去華都巴士站上58X出太子,去嘉利睇頭盔.對上買既J-STREAM我要戴加大碼,今次呢款J-CRUISE大碼就夠了.揀咗橙色試戴,我好以女仔試衫俾男朋友睇咁,"幸男,好唔好睇呀?"幸男話好睇,於是放心俾錢,盛惠$3900.

買頭盔之前經過花店已同幸男講要買花俾媽媽，去咗最近頭盔店既花店，唔太啱心水，細細紮都要一舊水。另一間大啲既花店(繽紛) 反而多啲選擇，結果聽幸男建議買紅色花。幸男一手拎住紮花，一手攞住錢排隊(我同幸男講要用佢啲利是錢買花,因為平日媽媽買咁多嘢俾幸男,幸男都要氹番媽媽開心).一個大男人帶住個小朋友係花店買花,惹來不少職員及顧客既目光,尤其係幸男拎住紮花四圍行,而我又追住佢黎影相.....

見入屯門塞車,於是同幸男搭地鐵轉西鐵番入屯門.雖然係美孚轉西鐵時俾果汁幸男飲過,但上咗西鐵無耐幸男就話肚餓.幸男竟然係天水圍站至訓著,結果我要係兆康站抱佢落車兼出站行去澳斯林.入到茶餐廳幸男至訓醒貓仔覺,叫咗份西多士下午茶同幸男分黎食,比較過都係藍地間燊光既西多好食啲~

平時用開既花樽太大,靈機一觸,用芝華仕吉樽黎插花,效果唔錯丫~夜晚帶幸男番老家黐餐,爺爺嫲嫲見到乖孫當然開心.

 

雖然WHATSAPP已見到有花收,但人家放工番到屋企見到玫瑰花既實物,先至係真正既感動~

好滿意新頭盔既款色,原來中間既白色係珍珠白,而唔係淨白色,而且黑色線旁邊既銀線係有閃粉既.單靠官網既照片真係唔睇唔出.最鍾意內置太陽鏡片既設計,方便夏天猛太陽時行車.獨特既設計,絶對唔會同駕駛者既眼鏡碰撞,四眼人仕可以放心購買.唯一美中不足既係size比J STREAM大少少,放係seat位下既後方會頂到冚,前方就無問題.希望遲啲出女性化拉花時,人家既中碼頭盔可以啱位放係seat位下後方就好了.

TURBO

晏晝同台灣女生食晏時,突然諗起好似今日上極速TURBO,於是用手機上網CHECK,得知四點場凱都有得睇.人家打電話叫外母帶幸男去蔡意橋站交收,我就先去戲院買飛.

本來眼訓既幸男,入到戲院見到以賽車主題既故事,開心到挨住眼訓睇足個半鐘.之前CARS只係租藍光碟係屋企睇,今次係戲院內睇聽強烈既賽車音效,幸男都無驚同喊,反而重好開心.上次入戲院睇THOMAS,只係一個鐘,今次幸男做出新紀錄個半鐘.往後既動畫電影,一家三口入戲院睇都應該無問題.輕鬆笑料得黎又有緊張賽車,都啱小朋友睇.散場搭車番屋企時,幸男問"點解蝸牛咁快既??"

時差31年

番完夜,騎羊去市中心一個人食晏,因為番早更既台灣女生上大興接幸男番屋企.其實屋企清潔做咗一半,出黎食埋個晏番屋企仲要做埋下半PART.

人家出去會合中大書友去聽EASON演唱會,我就繼續做我既家務.為咗令幸男唔好打擾我做家務,我播番之前錄落既thomas,兼且呈上油站攞既車書俾幸男睇,務求將幸男封印係梳化上.

夜晚帶幸男番老家黐餐,食完飯老媽話攞我細個時既相俾幸男睇.幸男邊食雪糕,邊睇三十年前既舊相.

細個時我塊面都幾肥吓,脹到好似生痄腮咁.著咁多衫,個肚都幾拋吓.....

老媽話我兩三歲就食珍寶珠,唔知真定假....睇完相,推BB車番屋企,自己沖完涼再幫幸男沖,之後開奶同做陪"訓"員.十一點左右"陪訓",醒過來已經近一點.台灣女生己番到屋企沖好涼,坐係梳化邊用用手機上網睇衝上雲霄2,一邊食送既法式杏仁餅,我仲要晾埋洗衣機內既毛巾及掃塵手套.....當年既小朋友,而家已經要同身邊既女人照顧另一個兩三歲既小朋友.

近水灣

今日同台灣女生一齊番早更,放工我就番屋企攞沙灘行裝,搭的士去大興接人家同幸男一齊去近水灣,但無諗過綠的去唔到,要係大興轉紅的.最攞命係紅的司機都唔熟路,過咗龍都唔知,結果要孭住冰袋同飲品黎抱住幸男行15分鐘....幸男見到汀九橋上既車輛同海上既船隻,興奮地叫"車車啊,船船啊".

沙灘範圍細,一眼望晒,浮台都無個.....但勝在無黃金海岸咁多人,岸上既垃圾都無咁多.

幸男係沙灘度搵到隻蜆,可惜得個殼.......番完早更再趕去沙灘都幾攰吓,但趁好天陪幸男出去戶外都係難得,落雨天想出去行吓都唔方便.

不時見有飛機經過汀九橋,幸男都睇到,不過就掛住食星星餅.雖然人少,但沙灘更衣室設備簡陋,連花灑頭都無,只係以膠樽代替...掛衫既勾位都唔多,好唔方便......

搭小巴去深井,目的地係KCAL,好耐都無幫襯,以前既有蓋室外枱都變咗有冷氣.星期六人多,好在人家訂咗位.經過裕記時,記起細個同老豆老媽及阿婆阿公去裕記食飯,搵日同老豆老媽又去食都好.

藍貝無預期中好味,啖淡的,黃金海岸餐廳好食過佢好多,失望.......

法國生蠔,逐隻計無話半打特價,但總算新鮮多肉.

法式燒乳豬,保持一貫水準,依舊好食,連幸男試過都係咁追住食"肉肉".

之前一試難忘既鱸魚,今次都有ORDER,配碟既意粉啱晒幸男食.由於要帶太多嘢,所以無帶相機,只係用手機影相.今日既支出雖然係多啲,但可以一家三口食餐特別啲既飯,兼去遠少少既沙灘嘛.

大假LAST DAY

趁大假最後一日好天,帶幸男出球場玩爺爺送既跑車.因為太陽猛烈,所以為幸男戴上太陽眼鏡及CAP帽,造型似職業司機.

玩咗15分鐘左右,突然天陰落大雨,我抽住部玩具跑車,再帶住幸男緊急離撤離.....

兩仔爺一齊係遊樂場隔離既有蓋乘涼處避雨,大家都無整濕衫褲.

過雲雨後,我哋又再出番球場操車.由於太熱同曬,叫幸男係樹蔭下兜圈同開住風扇消暑.

玩咗一個鐘,帶幸男番屋企.由於要等番完夜班既台灣女生訓醒至一齊出去食晏,所以發放星星餅茶點.

呢排天晴雲少,晚上見到天蠍座同天秤座,我不時會用GOOGLE SKY MAP黎幫手搵星座.見幸男食星星餅,忽發奇想,用紙巾同SIGN PEN配合星星餅,列出天秤座既陣式.因為我哋一家三口都係天秤座,所以好想幸男記得.

一家三口去咗市中心既金舌食晏,雖然要等位,但無其他食店咁長龍,話晒都係禮拜日嘛.

相熟日系生啤,點可以唔叫番杯黎飲呢?其他日式食店都無咩日本生啤,最多都係ASAHI.

唔係好明點解會有泡菜做午餐既前菜,泡菜唔係韓式既咩???

幸男既主要食糧,加埋少少肉類,應該夠幸男裹腹.幸男之前去沖繩都有食燒肉,所以我地都好有信心幸男會啱食.

對上一次同台灣女生係香港食日式燒肉,都好似係旺角間盛八.可以係屯門區內就有得食,真係無諗過~

叫咗兩個午餐,一個係和牛,另一個係和牛拼牛舌.成日聽人講話牛舌好食,但我本人再一次試過既評價都係麻麻地...

怕唔夠飽,叫多咗份牛肋肉,味道都唔錯,但好以啱啱解凍完咁,左手邊個舊表面仲有冰霜.

幸男鍾意食燒牛肉,望見天花板既倒影,不禁笑起黎.小朋友有父母陪伴,有得玩,有得食,永遠係最開心.

SEND咗啲燒肉相俾師傅,師傅打俾我話佢哋一家都係市中心,於是帶幸男去別府同孜孜相聚.兩個小朋友熱熱鬧鬧,一齊笑同玩.幸男相比孜孜怕醜得多,孜孜會大精神地打招呼,幸男只係細聲兼唔望人咁打招呼.....

之後我哋去咗STARBUCK飲嘢,再行多陣IDC買幸男既食具,就搭小巴番老家黐餐.聽日就要番工,兩星期既大假就咁完結.

MAN OF STEEL

趁仲係放大假,今日同老豆入凱都睇"鋼鐵英雄".細個時都有同老豆一齊係電視睇christopher reeve 基斯杜化李夫擔演既超人,當時既設定係外星遺孤BB經太空囊到逹地球,由一對年老兼無下一代既農場夫妻發現兼收養.當超人成年就去城市打工做記者,當有人需要幫助時就入電話亭變裝成超人去鋤強扶弱.

時代進步,新片並無只係將舊故事以高清畫面重塑一次.依舊係外星文明因過度開發而崩塌,唯一血脈經太空囊漂泊到地球,但敵人係當年被流放既將軍及其隊員.好多觀眾覺得新男主角Henry Cavill無Christoper Reeve咁溫柔同靚仔,但我又覺得佢著西裝個樣OK斯文靚仔丫,只係戲中佢要做一個隱姓埋名而暗中幫助人既不修邊幅既角色.另外時下興大隻型男,所以相比起以前Christoper Reeve既書生路線,可能落差會較大.心口個"S"字亦巧妙地演化成外星文字"希望"之意思,一洗SUPERMAN之"S"既過時代號.

妄圖將地球轉變成克利普頓星（Krypton)既外星同族成為超人既敵人,亦係一個大突破,總好過鎖碎咁去救天災橫禍,反而呢啲小任務已係超人成長及隱姓埋名時交代過.現今時代,係街搵到個電話亭都難,有咩好得過一次過換件戰衣出黎救水兼打大佬來得自然呢?唯一美中不足係最後埋單個吓,竟然係扭斷頸就KO,咁一開波玩埋身打摔角咁鎖頸咪得囉........結局時男主角為咗可以係城市幫人,結果諗到記者呢個職業可以唔曝露身份之餘,又可以第一時間去到災場,兼且親近女主角,絶妙地同舊作當記者既橋段接軌.令整齣電影既首尾都同舊作重叠,但中間佈局及內容添上新意.

本人一向都好喜歡Christoper Reeve,尤其係佢既溫柔既氣質,非一般明星既型格,瀟灑及不羈.除咗超人之外,最愛佢既另一代表作"SOMEWHERE IN TIME".如果Christopher Reeve倘在人間的話,見到呢一代既超人作品,應該係會心微笑,多過不滿"新不如舊"~

等整車=行APM

騎羊出觀塘原廠CHECK車,今次既主要目的係要換頭尾呔,因為已經用咗四年.十一點前放低愛羊,點知話今日師傅未番齊,未必可以今日交車,因為我多嘢換.行去APM兜陣,係UNI QUO買咗件平T恤,兼訂咗件麻質長袖格仔恤衫(無中碼,訂咗屯門分店攞貨).晏晝係對面既花園餐廳享用,貪佢比APM裡既食肆平.

之前睇電視知道有代食肆清潔食具既公司,但今次都係第一次親眼見到獨立包裝既非即棄食具.

有湯有餐包,比一般茶餐廳好味,屯門元朗都無花園餐廳,類似既有元朗既安娜餐廳.

芝士焗瑞士牛仔肉飯,本人都幾鍾意食焗飯,一黎屋企唔會食到,二黎夠香口~飲埋杯凍奶茶,埋單都係$50有找,點都平過APM裡面食.

為咗唔想係條街蕩住黎等攞車,於是去咗睇13:30既神探伽利略2-真夏方程式.故事已比第一集電影好,但始終欠缺緊湊.伽利略同小童既對白,唔及對女警既刻薄冷笑,笑位相對少過電視版.

睇完戲都係未收到車行電話,於是打去問黃生,回覆係車軚未送到車行,四點鐘再電話確定今日可否交車.唯在行住LOG ON打發時間,無意中搵懶熊既頸帶,配埋沖繩買既咭套,幸男專用既八達通裝備就齊晒~夠鐘再打去原厰問,結果都係趕唔切收車軚兼即日交車,明天等電話消息........戇居居係APM蕩咗5個幾鐘,好在都叫做買到平衫兼幸男有手信.

第十四代手提電話-SHARP AQUOS PHONE SH930W-進擊的巨芒

用咗一年零兩個用既4吋芒SONY XPERIA P開始多病痛,近來透明天線位既觸控反應變差,唔知係咪同裡面既COATING破裂有關.之前經電腦作系統更新失敗,搞到要打去客戶服務問系統修復之方法,仲要由頭入過晒啲APPS.今日卒之的起心肝,去市中心新世界傳動網出機!

之前都幫老豆出咗部SHARP SH930W,當時2千八左右,而家就$2500有找,平多四舊.當時幫老豆試用部機時已覺得介面比SONY好,而且咁既價錢有全高清5吋日本屏幕,真係性價比高.

本來諗住等下半年新機發佈,睇吓新款既SPEC如何,但事隔半年仍未見SHARP有新機款既消息.細心想,就算有新機,都要等半年左右至跌價(SH930W剛上市時賣$3900),所以而家出機都係好時機.SONY太多新機推出,我試過系統升級後,影相用FLASH時會有一半既照片變全黑色,除非唔用最高像數黎影.拎上客戶服務中心搞,UPGRADE多一次都係一樣,最終係要等再下一次發表既系統升級至可以解決問題.SHARP非機海策略令我比較放心,日後既系統升級及改善會真真正正為現役機款,而唔係齋為近一季出既"新機款".

出機時職員叫我耐心等候,因為SHARP原廠要佢地幫客人將手機系統升級至最新(因為收音機軟件有BUG,上次老豆部機都試過),結果我去附近超市行咗陣至番去攞機.今次唔再好似上次老豆個部咁係黑暗環境影相用FLASH會有個光點.好想快啲叉滿電,SET好心儀WALLPAPER同APPS,開開心心用新手機.期望SHARP係手機業務可以做到"貴精不貴多".

PS:手機PROFILE更新

1st  Ericsson PF768 > 黃色    sunday

2nd  Bosch 909 Dual    >  灰色   people

3rd  Siemens A40     > 藍色    orange

4th  Ericsson T29   > 銀灰色外殼,紫色panel  one 2 free

5th  Ericsson T39  > 灰藍色   one 2 free

6th  Sonyericsson T300     > 紅色 (紅豆)    smartone

7th  Sonyericcson T630 > 黑色    smartone

8th  Nokia 6260     > 銀色    smartone

9th  Nokia 6270  > 黑色 (深啡色,鋁金屬外殼)  smartone

10th Nokia 6500 Side    >銀色(鋁金屬外殼) smartone

11th Nokia N86 MP    >白色     smartone

12th Nokia N8    >橙色(金屬外殼)   smartone
13th Sony Xperia P   >紅色(金屬外殼)   NWMOBILE
14th Sharp SH930    >白色   NWMOBILE