培養耐性

今晚同幸男一齊試玩幼稚園聖誕禮物-砌圖,對幸男係一個挑戰,因為平時砌既只係十餘塊.面對無耐性既小朋友,先引導幸男將完整邊位既砌圖抽出,拼出框架,再以顏色及圖案作線索,逐一填滿中央部份.

幾經多次放棄,幸男係半鼓勵半督導之下完成60塊既聖誕主題砌圖.幸男為完整既圖畫,感到開心同滿足.希望幸男可以培養出耐性及毅力,以應對往後學業及生活上既難題.

私房菜之聖誕大餐

彩雲屋企搞聖誕大食會,我帶幸男一齊同大家聚吓(真係好多嘢食吓喎).

幸男起初比較怕醜,但好快就同大家打成一遍片,全靠一副迷你層層叠.

除咗彩雲新自下廚外,養病已久既光仔都復出獻技.

肚餓既幸男,見有烤雞就雙眼發光,坐既位置都係近住隻烤雞.正所謂"守得雲開見月明",幸男卒之有雞髀食~

多得Sanna,我地至可以試到光仔主理既千層麵,真係好好食,唔怪得加菲貓咁鍾意食.飽到上心口,仲有火炙甜品(法式焦糖燉蛋)奉上.

光仔係26號生日,所以主人家準備咗個生日蛋糕俾光仔.幸男見到蛋糕,就問光仔"你生日呀?",跟住就自己去吹蠟燭,童真既反高潮令大家大笑一餐.

開心既一晚好快就過去,祝大家聖誕快樂,身體健康(尤其係光仔).臨別在即,呢一年多謝大家既相助,寄望大家往後工作順利,笑口常開!

奇妙聖誕之-學生>出身>父親

朝早訓醒食早餐,睇尋晚錄落既Gundam UC.感覺好似讀書學生時放長假睇電視卡通咁,心境都後生咗一陣.睇完之後上陣網,跟住就再訓第二輪,直至Andrew打電話我約係市中心同馬sir食晏,感覺又變咗係初出茅廬但又未結緍既時間.

係意粉屋食完晏,等細雨啲就騎羊去大佬樓下,代幸男收聖誕禮物.番到屋企就動手砌Thomas火車路軌,等幸男今晚可以享用,身份又回復番為人父親既現階段.

PS:台灣女生放工後與同事食晏,再上外母家接幸男番我老家黐餐,三代同堂,共敘天倫.

迷你層層叠

今晚係書櫃見到好幾年前係泰國買既木製迷你層層叠,心血來潮拎出黎同幸男一齊玩.

幸男手仔細,迷你版絶對有利.玩咗兩三round,幸男抽出木條時令建築不穩,繼而倒塌.幸男無出聲,我同台灣女生仲以為幸男會因為輸而唔開心,但幸男反而開心大笑,"冧咗呀,哈哈哈".之後每次叠好木條大樓,幸男都一心要整冧建築-冧樓...我同幸男講"唔好咁啦,爸爸真係好想玩架"(<少林足球>裡,山西豆腐隊谷德超話齋"唔好咁啦你地,我想踼波呀")

Redline

 好耐之前係尖沙咀間HONG KONG RECORDS見過一隻叫"超時空甩尾"既DVD,有衝動想買,但又想慳啲錢.最近用手機上網睇咗頭十零分鐘,覺得超型超熱血.可惜出番Hong Kong Records查問,最後係架上已係2011年既事,發行商都無再出.

世界觀係人類穿梭星球之間,並與外星人共融生活既時代.男主角JP以候補名額參予5年一度既Redline賽車,有別於一般車手,JP既坐駕並無裝上任何攻擊或防衛武器,唯一既武器就係速度.男主角堅持賽車只係以速度比試技術,即使實際比賽係容許武器使用.

除咗欣賞男主角既執著,制作班底既執著亦令我衷心佩服.制作花上7年時間,以十萬張手繪圖來呈現一個半鐘頭既動畫,實在令人感動.即使以傳統手繪方式來演繹強烈速度感,畫質並没有退讓!對上一次被動畫美學打動心靈既作品,已是新海誠既"秒速五厘米".

PS:平日處世既態度與男主角一樣,只係盡量發揮好自己,不作競爭性攻擊.即使這種天真既做法會令自己吃虧,但只求無愧於心.

聖誕前夕,冬至前夕

今日一家出去尖沙咀,為既就係超級無敵羊咩咩聖誕裝飾.

幸男係明珠台睇過Shan The Sheep,每次睇都會"咔咔"笑.

海運大廈有個Shaun The Sheep既小攤位,捐咗$30就可以有泥膠,氣球及羊咩咩紙帽.幸男係屋內場景同牧羊狗一齊係梳化合照,攬唔到上身黎影相,因為公仔有膠索帶綁住...

LCX有姆明主題聖誕樹,順便叫幸男埋位影番張,到此一遊.

行到攰,四維都迫滿人,見illy內有位,於是入去歇腳.大人飲咖啡,小朋友食士多啤梨布丁.

我呢杯tiramisu味道唔錯,味道濃郁得黎唔會有難入口既感覺,賣相特別,starbuck同pacific同無呢款丫.

最後當然要係海運大廈問外既聖誕裝飾影番張相,今年既主題係Starry Christmas火車,啱晒幸男. 

行埋上去觀景台,無諗過可以鐘樓作背景黎影相.趕搭巴士番屯門市中心,買埋支紅酒就上的士去老家,三代同堂提早做冬食飯.

E MO韓燒

今晚收工去咗新墟間E MO韓燒,台灣女生同幸男已係店內等我.餐牌選擇唔多,點咗雪花牛肉,牛肋肉,五花腩,生菜,泡菜.味道同份量一般,無海鮮,無酒精飲品,感覺麻麻地.五舊幾水埋單,應該無下次(都係金舌既放題啱口味啲).

老豆話齋-"肚空空,得個窿",行去V CITY買泡芺食,幸男就同人家分士多啤梨班戟.

人家見唔夠飽,叫多咗串燒墨魚鬚,幸男試咗一粒後,覺得好好味.原本同人家每人兩粒(我一粒),點知幸男食完兩粒後話自己只係食咗一粒,同媽媽爭食之餘仲要喊.講完道理,幸男知錯後,人家同幸男一人一半分黎食(都唔知好嬲定好笑).

PS:其實幸男兩三歲時係嫲嫲屋企,同媽媽爭食一粒花生而喊....

和牛飯盒

尋晚家楠上我屋企一齊食飯,因為家楠加料(魚生),所以我連每人一份既牛排都食唔晒,所以連埋幸男有剩既份量,堆砌咗個和牛飯盒.

 

台灣女生落咗A-1sauce係牛扒面作調味,即使番叮都好好食,牛扒一啲都唔會韌咗,感動!今日既飯盒與平日canteen既午餐選擇,絶對係一大對比.

 

PS:朝早去7-11買定罐凍奶茶時至知原來已賣到$9.5一罐,以前係超市買都係5蚊罐左右.

佈置聖誕樹

踏入十二月,商場都充滿聖誕裝飾及氣氛,台灣女生今晚都要攞番士多房既聖誕樹出黎,同幸男一齊佈置.

呢棵光纖燈光聖誕樹係我舊年係LOG ON買,比傳統小燈泡慳電同無咁熱.樹上既裝飾物,都係拍拖時買俾人家個堆(夠晒環保兼懷舊).

大功告成,兩母子一齊合照留念.由幸男兩歲起,我同人家都會將聖誕禮物放係樹下,直至BOXING DAY至拆.距離聖誕節仲有兩個星期多啲,我同人家都要開始物色下幸男既禮物.

PS:今日試戴新手套,感覺唔錯,活動性良好,比舊既暖少少,啱廿度左右戴.配埋舊個兩對手套(十五六度就戴TAICHI,十度頭就戴羊皮fleece),足以應付"秋","冬","春"三季.

歡歡出嫁

今日放工坐彩雲順風車出旺角,因為今日係歡歡既大日子.新娘子,姊妹,Jacky同我係PRCC同組同學,芬芬又係新娘子既老友,當然要一齊合照啦.

雖然有大半枱係唔知叫咩名,但又熟口熟面,好在芬芬係度,絶無陌生或尷尬場面.

其間不時為新娘子既工作坊同事影相,好在有閃燈防身,大合照無問題!男司儀於台上話佢係新郎哥結婚前幾個月至知好友既拍拖及婚事,其實新娘子前年同班時都無露出拍拖跡象.祝新一對新人白頭到老,幸福美滿!

PS:我上酒樓前,好趕咁行去太子既嘉利物流買咗對薄身皮製手套($680),因為舊個對已舊到甩色兼腕邊皮位一塊塊咁甩出黎.....

盆菜

今晚又係花園食晚飯(連電飯煲都拎埋出花園),不過主題係盆菜.上網見洪運盆菜用料好豐富,於是訂咗個5~7人用既細盆黎試吓.

合作多時既同事又要調動了,臨別秋波,約大家一齊聚吓.(碧權去T8,Jason一月轉去Surgical,釗十二月中出placement,韻詩出年去rehab)幸男個樣無咩心機,因為盆菜唔太啱小朋友口味,唔得夠香口.

起初我叫大家唔好買嘢上黎,好在大家無聽我講,有豆苗加落盆及甜品填肚.盆菜味道唔錯,但份量無想像中咁多,應該6人用就啱啱好.

希望大家去到新既工作環境,都會記起一齊番工既軼事.

PS:Jason買既happy gathering主題蛋糕,令大家想入非非.

中大外影

黎氏一家三口番中大,因為黎太約咗同窗們一齊影master畢業相.

幸男見到BB就話要抱吓,睇真啲只係單手兜住BB個pat,主力係台灣女生抱實....

黎生愛攝入鏡頭內,幸男有樣學樣,妨礙黎太同Brenda影相.輪到幸男同黎太合照時,黎生竟然抱埋bb一齊入鏡......

影咗一輪,大家去咗canteen食下午茶.幸男主力食薯,大人就食雞髀同青檸檬撻.

校園內穿梭各建築物,竟然發現一部好大既lift,成架車入去都夠位.

傍晚入黑時份,Iris一家到獅子亭會合大隊.好在有閃燈同腳架,令原本望唔清路面既環境變成黃昏般溫暖.

由於環境真係好黑,所以影咗出黎至知相機直擺唔夠垂直,但總算認得各人既樣丫.

一行人搭東鐵番沙田,係稻香食火煱,Judy兩母女同Sylvia都有加入大隊.

無諗過稻香都係影畢業相既場景,不過一眾女仕喜歡就可以了.一班舊姊妹可以合照,應該會諗想以前無數既少女心事.大家好滿意沿途我用WiFi過相去手機,再轉發至群組,手機即時有相睇.才藝不精,希望大家唔好介意相片質素.先天不足,今日既相用apsc鏡令像數輸出得番一千左右,但對我黎講係一個好寶貴既經驗.是日隨行幫手影相,令我思考多咗唔同既設定問題.

PS:去中大之前,人家同幸男係SNOOPY LAND玩咗轉遊船河.

修葺屋旁樹之(枝)小意外

花園隔離棵荔枝樹愈生愈過,開始遮到花園.除咗樹葉外,雀糞都增加清潔工作,更外有礙晒晾作業.今日動手擒梯作截枝,由於室內短梯唔夠高,要用埋個戶外架黎幫手.

中間發生小意外,剪刀卡住係樹枝上,試圖擺脫其間,剪刀脫離伸縮棍並掉下.幸好回迴得砌,只係擦到上臂,無中頭剖.

剪刀掉下時,利邊已收,所以無界傷,只係刮紅咗少少(一額汗).其實當初係元朗買把剪時,老闆俾少咗粒螺絲黎固定剪刀頭係伸縮棍上,睇黎真係要去五金舖配多粒至得....

PS:下次都要把高啲既梯至可以繼續收葺