彩雲屋企搞聖誕大食會,我帶幸男一齊同大家聚吓(真係好多嘢食吓喎).
幸男起初比較怕醜,但好快就同大家打成一遍片,全靠一副迷你層層叠.
除咗彩雲新自下廚外,養病已久既光仔都復出獻技.
肚餓既幸男,見有烤雞就雙眼發光,坐既位置都係近住隻烤雞.正所謂"守得雲開見月明",幸男卒之有雞髀食~
多得Sanna,我地至可以試到光仔主理既千層麵,真係好好食,唔怪得加菲貓咁鍾意食.飽到上心口,仲有火炙甜品(法式焦糖燉蛋)奉上.
光仔係26號生日,所以主人家準備咗個生日蛋糕俾光仔.幸男見到蛋糕,就問光仔"你生日呀?",跟住就自己去吹蠟燭,童真既反高潮令大家大笑一餐.
開心既一晚好快就過去,祝大家聖誕快樂,身體健康(尤其係光仔).臨別在即,呢一年多謝大家既相助,寄望大家往後工作順利,笑口常開!
