幸男送花俾伯伯

之前幸男話過伯伯生日要送花做禮物,今日台灣女生帶幸男去新墟相熟花店買花.

花紙同絲既顏色由幸男挑選,無諗過小朋友隨口噏既配搭又幾活潑.

晚飯後當然係食生日蛋糕,合照期間老豆卦住望電視.......

吹蠟燭時,幸男都有份一齊吹.幸男大個咗,唔會一見到蛋糕就話自己生日.自己送既就只係一支紅酒,起碼食飯會開黎飲,唔會嘥嘛.

換燈飾

舊年都有為客廳燈換光管,老闆已話T8管存貨唔多,因已少出.今年係華都相熟店舖買到T8管,但得6500K,無以往既8000K既白光系列,客廳既顏物怪怪的,白色既餐椅變成米黃色,生活照裡各人既膚色都係怪怪的....

於是尋日放工騎羊入元朗睇燈飾,揀咗現行既T5管系列,重點係可以重拾8000K既真白光(我同人家都怕黃光,因會覺得攰同眼訓).行咗兩間店舖,結果都係第一間專賣PHILIPS燈既舖頭平啲啲.

今日上黎安裝既師傅原來係新屋入伙時,幫我哋裝户外燈個一位.除咗客廳個兩盞要鑽過新孔外(因轉咗款色),書房同睡方都可以用番舊天花板孔.一黎同舊款一樣, 二黎可以係底板上鑽新孔黎遷位置.

雖然舊客廳既木框款(即係睡既加大版)唔再出,但新添既款式都幾時尚丫~

Post OP Day 3

今日係手術後第三日,係熱敷之下,左眼下眼皮無之前咁腫.為表揚幸男既勇敢,今日特意抬電動車出球場俾幸男玩.

公園附近有棵洋紫荊,遠望都有啲似櫻花,於是叫人家抱住幸男影番張相,可惜村屋同康文署牌已穿餡.......

見幸男有精神玩,我同人家都安心,至少無話痛到無心機嘛~ 

晏晝騎羊去置樂行吓,係長頸鹿買咗款CARS既車仔俾幸男,希望幸男會鍾意.

遲來的情人節禮物

送手機俾台灣女生,已變成每年既情人節時份既設定,但今年無睇啱既款,所以要等到今日至送第三部情人節禮物手機.

近呢排人家既手機已頻頻死機,但為咗等SONY XPERIA Z1 COMPACT既行貨,所以一直觀望市場,未有入市.見人家今日又話死機屢次,於是係去V CITY會合人家同幸男食利小館前去咗領域買水貨機$3990.新機同舊有既XPERIA V一樣係4.3吋芒,但相機升級至2000萬像數,處理器變成4核2.2GHz.

希望人家喜歡呢份無咩驚喜,又無咩新意既實用禮物-第三部粉紅色SONY手機.



捽眼的禍

去迪仕尼個日朝早已覺幸男左眼下眼皮位有少少紅,但無諗過會發展成咁嚴重.

今日台灣女生帶幸男去睇眼科中心,雖然我哋有幫幸男搽眼葯膏,但最好都係"界"眼皮放走膿水.幸男喊住咁被醫護人員固定位置,但幸男總算無咩掙扎(唔知係咪我同人家早一晚同佢講有可能要"界",並且要聽醫生話既關係).完成小手術後,幸男就喊住咁飲人家準備好既蘋果汁.

人家話係房外聽到幸男既喊聲,自己都想喊,而我只係睇人家用手機傳來既相片,就感受到幸男既痛楚及勇氣.

醫生話手術後四個鐘至可以拆紗布,人家趕得切番晏前替幸男搽藥膏.聽日就可以開始熱敷,希望幸男早日康復,見番佢討人喜愛既大眼睛.

再去迪仕尼

今日先出青衣POKKA CAFE食晏,再搭鐵路入迪仕尼(跟餐既藍山咖啡真係好好飲).我推住BB車裡既幸男順利進場,而台灣女生亦安全帶入幸男既牛角包仔及紙包果汁.人家見到有個牌話係影相景點,於是留步試影.自己改小小角度黎就構圖.效果都唔錯喎.

雖然天陰,但相機既表現都無灰矇矇.第一個環節,當然係排隊玩幸男最愛既馳車天地.

配撘都係依舊-幸男負責軚盤,人家操控油門,本人擔當攝錄.每次車身因轉彎方向不順而左右搖晃時,幸男都會"咔咔"大笑.

第二站就係巴斯光年星際歷險,係昏暗兼移動既環境下,可以影到張認到人樣既相已係失敗中既萬幸.

係排隊等坐小熊維尼歷險之旅時,幸男就係我同人家既單擋下享用下午茶.見瘋帽子旋轉杯速度太快,於是去玩番平易近人既廻轉木馬.

舊年六月黎個時,幸男都無咁大個.自己好珍惜充實滿童真既幸男,畢竟往後讀書會少好多玩及發白日夢既時間,純真亦會被逐漸洗刷嘛.

玩完馳車天地就開始落雨,我地轉玩室內遊戲,但到玩小飛象時都仲係有細雨.今次我卒之都可以坐到人家同幸男之前既座位,可以幫幸男影相留念.

第一次去小小世界,幸男見四周都係得既公仔,非常開心,仲話下次要再去小小世界玩.

最後係去趕去睇六點場既Golden Mickey,不少排隊中既家長都抱住累透既小朋友,人家都唔例外.入到場內,幸男都未訓醒,開場時只係眯著眼向台上既廸仕尼人物揮手,之後就再訓番.直至米奇出場時,幸男先至奇蹟復活,睇到完場.

無留步睇埋煙花,因為怕人多迫車.雖然只係半日團,但相信幸男都玩得開心及疲累.好想為幸男留多點開心回憶,讓幸男係溫暖既氣氛下成長,變成懂得愛既男人.

培爺榮休晚宴之"有朋自遠方來,不亦樂乎?"

經歷多年來既夥拍,今晚可以做既就係幫手為主角拍照及錄影,將開心既氣氛,凝聚於記憶體裡.

今晩既啤酒競飲環節,本人都有參加.好耐都無經歷呢類青春熱血活動,唔知係啲燕京太凍,定係自己年紀大兼久疏戰陣,真係唔可以連續咁一口口飲晒一罐(真係飲到個心都覺得凍到"那"住).雖然未能進入決賽,但都好開心可以湊熱鬧.

縱使繁重工作上有壓力或意見不同,但同舟共濟既文化下,大家都表現得亙相包容.榮休晚飯能夠將一眾新舊同事聚首一堂,足以說明培爺既人緣.

人生閱歷多,看過不少面孔並體會不少人情冷暖.今晚暖意洋洋之情景,應該係培爺辛勞多年既認定.

金舌放題

上星期訂定枱,今晚一家三口一齊去市中心金舌食放題.幸男一入門口就俾尺度到過90CM要俾小童價,大人就俾$199.

放題食品唔包和牛,頂多只係牛肋肉,但勝在海鮮任點.蠔無預期中好食,多殼同少腥,反而蝦就大隻又好味,可惜無影到相....

幸男除咗鍾意食燒肉,仲有飲凍柚子蜜(要另外計錢)~

每人$15就可全枱啤酒任飲,兩個人俾$30都平過一杯,我當然飲兩杯至夠抵!

以前都可以walk in食晚餐,而家放題就要預約,因為booking好滿.埋單六百蚊有找,食得開心,坐得舒適,希望呢個放題長做長有.

羊語錄

今個星期六係長週,放工就直接騎羊番屋企,因為趁屋企無人,幫愛羊清洗同打蠟.

仲有兩個禮拜,愛羊就跟足我八年.雖然比以前少咗時間抺車同打蠟,但機件保養一向做足,似終係兩個轆嘛.

好幾次係街上俾中年男人問我架車係咪新車,又問我賣唔賣,我每次都係答"唔賣!".見人哋開得好地地,做mug會賣俾你,車頭又唔係掛住"出售"牌.或者第一眼望就好新淨,但細心啲睇車身機械細節,不難搵出歲月既痕跡......

早排已續十年既電單車牌,黎緊就係續新一年既行車証同第三保.路面經驗同電單車既裝備一樣,不斷累積同進化.除咗有信心去駕馭一年四季既天氣,更重既係瞭解拍檔既能力及不足之處,以達至安全駕駛.

除咗係興趣,電單車對我黎講絶對係代步及區內選購日月品既好幫手,更加係單獨食飯既好領隊.

春日之細雨,夏日之微風,秋日之爽朗,冬日之嚴寒,每一樣都令騎著電單車既我,更深感受到四季.