盆菜

今晚又係花園食晚飯(連電飯煲都拎埋出花園),不過主題係盆菜.上網見洪運盆菜用料好豐富,於是訂咗個5~7人用既細盆黎試吓.

合作多時既同事又要調動了,臨別秋波,約大家一齊聚吓.(碧權去T8,Jason一月轉去Surgical,釗十二月中出placement,韻詩出年去rehab)幸男個樣無咩心機,因為盆菜唔太啱小朋友口味,唔得夠香口.

起初我叫大家唔好買嘢上黎,好在大家無聽我講,有豆苗加落盆及甜品填肚.盆菜味道唔錯,但份量無想像中咁多,應該6人用就啱啱好.

希望大家去到新既工作環境,都會記起一齊番工既軼事.

PS:Jason買既happy gathering主題蛋糕,令大家想入非非.

中大外影

黎氏一家三口番中大,因為黎太約咗同窗們一齊影master畢業相.

幸男見到BB就話要抱吓,睇真啲只係單手兜住BB個pat,主力係台灣女生抱實....

黎生愛攝入鏡頭內,幸男有樣學樣,妨礙黎太同Brenda影相.輪到幸男同黎太合照時,黎生竟然抱埋bb一齊入鏡......

影咗一輪,大家去咗canteen食下午茶.幸男主力食薯,大人就食雞髀同青檸檬撻.

校園內穿梭各建築物,竟然發現一部好大既lift,成架車入去都夠位.

傍晚入黑時份,Iris一家到獅子亭會合大隊.好在有閃燈同腳架,令原本望唔清路面既環境變成黃昏般溫暖.

由於環境真係好黑,所以影咗出黎至知相機直擺唔夠垂直,但總算認得各人既樣丫.

一行人搭東鐵番沙田,係稻香食火煱,Judy兩母女同Sylvia都有加入大隊.

無諗過稻香都係影畢業相既場景,不過一眾女仕喜歡就可以了.一班舊姊妹可以合照,應該會諗想以前無數既少女心事.大家好滿意沿途我用WiFi過相去手機,再轉發至群組,手機即時有相睇.才藝不精,希望大家唔好介意相片質素.先天不足,今日既相用apsc鏡令像數輸出得番一千左右,但對我黎講係一個好寶貴既經驗.是日隨行幫手影相,令我思考多咗唔同既設定問題.

PS:去中大之前,人家同幸男係SNOOPY LAND玩咗轉遊船河.

修葺屋旁樹之(枝)小意外

花園隔離棵荔枝樹愈生愈過,開始遮到花園.除咗樹葉外,雀糞都增加清潔工作,更外有礙晒晾作業.今日動手擒梯作截枝,由於室內短梯唔夠高,要用埋個戶外架黎幫手.

中間發生小意外,剪刀卡住係樹枝上,試圖擺脫其間,剪刀脫離伸縮棍並掉下.幸好回迴得砌,只係擦到上臂,無中頭剖.

剪刀掉下時,利邊已收,所以無界傷,只係刮紅咗少少(一額汗).其實當初係元朗買把剪時,老闆俾少咗粒螺絲黎固定剪刀頭係伸縮棍上,睇黎真係要去五金舖配多粒至得....

PS:下次都要把高啲既梯至可以繼續收葺

第四代電單車褸

今日放工去市中心食完晏,搭61X去土瓜灣阿林買電單車褸.之前上TAICHI官網睇過,今年唔太多款可以調校上臂,前臂及衫尾之闊度.當中只有呢款DRY MASTER PRIME ALL SEASON JACKET(RSJ298)既內胆係以身位既拉鍊及袖位既拍鈕作固定結合,而唔係獨立穿上.

著開個件電單車褸已有5年年資,趁日圓下調,所以決心買件後繼電單車褸.件褸賣30000円,低滙算下都要2千頭,而家阿林賣$2550,如果遲啲日圓升番都唔知點算.....5年前買既RSJ226係前一年既款,所以由2500円賣$2020減至$1730.今次都見到上年既DRY MASTER款,都係賣平啲($21XX),最衰個色唔啱,唔係就可以再抵啲.

其實早兩個星期前出黎睇過今年冬季電單車褸款,只係因為心儀既DRY MASTER仲係倉內(未送到門市),所以先買住Fleece Face Mask作頸巾用(用開既neck warmer唔見咗).2百蚊有找,仲要係日本制,又靚又超值.

元朗Check車&食泰菜

近排愛羊行車時,車頭常傳出"唧唧"聲,好似部件接合鬆動之震動聲.今日放工入元朗,交俾相熟師傅望吓.師傅話無頭盔係車上,我答"唔介意的話可以戴我個頂黎試行轉車內街".師傅試完兩轉內街後,都話似豬頭有雜聲,要放低部車過夜,聽日報價.

即興打電話俾家楠約食晚飯,好彩家楠未食晚餐,於是出黎一齊食泰國嘢.

大家都無開車,安心飲泰啤.飲住啤酒傾計,絶對係男人浪漫的一種.

生活難題永無休止,係唔同既年齡就有唔同既決擇.後生就為自己作打算,成家立室既就為家庭下一代或上一代作安排.

叫咗唔係好多餸,家楠無上次食放題既容量,唔知係咪唔舒服呢?

PS:師傅話以前係澳門玩電單車時都係用SHOEI頭盔,當時紙水賣一百蚊.

山頂遊

市中心食完晏就搭961出金鐘,再行15分鐘去到紅綿道既山頂纜車站.排咗半個鐘隊至去到售票處,再等咗兩三架車至輪到我地.

係山頂廣場見到一架舊式纜車,我諗細個坐個架應該係呢一款.

雖然今日係晴天,但天色灰朦,香港既空氣真係差啲..........

兩母子輪住睇望遠鏡,唔知望緊啲咩呢?

見有大學生影畢業相,於是煩請一位女學生幫我地一家三口影合照,背景係凌霄閣既飯碗外底邊.細個跟老媽上黎山頂時係有老襯亭,而家拆咗變成淩霄閣,唔知第時幸男帶小朋友上黎時會否又變成另一個建築?

夕陽美景,可惜唔識點影到鹹蛋黃.肉眼睇既夕陽唔大,唔通要zoom遠啲既鏡到做到大鹹蛋黃既效果?

星期日應該full booking,但我地六點左右食早輪就仲有吉枱.

其實大家都有啲攰,卒之可以坐吓,幸男就係等嘢食時塗顏色解悶.

店內燈光昏暗,唔好意思開flash影響其他客人,只有影靜態食物比較清晰.人家叫咗份漢堡薯條食,幸男就食軟殼蟹手卷兼黐我地啲薯條食,但食到尾段幸男特然喊同嘔.今朝幸男都係有啲肚痛唔舒服,不過見佢有精神玩先至出街.

食完飯,我用套票既飛上咗凌霄閣摩天台428,呢度可以俯瞰維港兩岸夜景.

其實觀景台好多人,我好難至搵到個位可以齋影到幸男同人家.大會有指定位置為遊客影相,有腳架及閃燈支援,再以i pad俾遊客預覽相片,啱心水至記低"冧巴"去購買(黃金設定令人同景都一樣清晰).比以往係咪都印出黎讓遊客睇既做法,新科技顯得環保.

回程時又要排隊等纜車,番到起點時見無咩人,於是叫幸男去噴水池位影相留念,好似接替我細個時企既位置.

由於時候唔早,所以無同幸男坐電車.幸男攰到行去巴士站都不時要媽媽抱,上咗車無耐就大覺訓.希望幸男快啲好番,人家見到幸男食飯時喊住嘔,樣子好心痛.

馬SIR生日@滬江飯店

 今日係馬SIR既牛一,臨時即興食晚飯.壽星仔上環收工,台灣女生係沙田買完嘢,我就係新界西收工,於是揀咗係尖沙咀呢個中間點相聚.由電話whatsapp約定到見面坐低,只係一個鐘既事.....

呢間上海飯店係人家與同事幫襯過,好評如潮,所以提議食大閘蟹餐黎賀馬sir牛一.

本來人家打電話去訂位,職員話full booking,但walk in隊仲有位.點知去到時,女職員話無walk in.多得人家堅持話當初拉電話個位男職員話walk in有位,結果職員要求我地八點半前交枱就可以入座.

大閘蟹餐係逐個計,頭盤蟹粉翅之後,主角大閘蟹上場!

臨時約既飯局,無帶相機,唯有用手機頂住先~

蟹粉栥飯,細細籠,比例啱啱好,每啖飯都可以伴著蟹粉.

平時食開既蟹粉小籠包,只係得包頂少少係蟹粉,但呢個真係堅好多.

咬開一睇,裡面既餡料被蟹粉浸到變晒金黃色!大家都食得好滿意,即使人家係第二次食都覺得好出色.

PS:人大咗,唔會為買禮物而買,除非係好肯定啱朋友心水.一齊出黎食餐飯,開開心心聚吓,影吓合照,已經好足夠了.祝馬sir生日快樂,身體健康!

元朗公園

今日台灣女生番晏,市中心食過午餐後,我帶幸男去元朗公園放電.首個項目當然係SIR滑梯啦,每次幸男都係忙住又上又落.

元朗公園對幸男既賣點係大草地,可以盡情地跑動.

之前買落既鋁合金可摺式茶几大派用場,即使草地不平,飲品食品都唔怕倒瀉及滾動.

其實去到草地鋪好地蓆後,我問幸男食下午茶未,幸男答我"我肚餓會話你知丫".之後幸男跑咗幾轉後就鄒著眉同我講"爸爸,我肚餓啦",我內心既對白係黑執事既名句"Yes, my lord",以執事既身份為幸男呈上茶點.

難得好天,可以同幸男出戶外走動兼影吓相都唔錯.呢張幸男懸浮照雖然因為草地斜坡而未能突出主題,但反而有意外既玩味,究竟係懸浮定係落斜急停呢?

最後既環節係玩韆鞦,心急既幸男拎住個環保袋黎跑去搵韆鞦.幸男已經四歲了,我同人家既心意都係俾幸男多點歡樂及輕鬆既童年.寄望對幸男既薰陶,可以奠定強壯既心,以面對往後複雜既時代.