星期二

幾經辛苦(整損咗隻手指),卒之都成功拆開紅酒木箱,將刻有年份,酒莊名同徽號既木板作留念之用.

用既就係呢個封存係士多房既架撐(外母家既鎚仔),係咪有啲似雷神既神器呢?

台灣女生番夜,番工前同我去會合ACC舊同事一齊係德國餐廳食飯,順道為薇紅打氣.餐廳坐滿客人,搵極都無職員理會,於是我要拎住部相機行去搵職員幫手影合照.可惜個個都係背向你就走咗去,結果我要問洗潔阿姐邊個得閒,結果阿姐一指就搵個經理黎幫我地影相.點解張相無我份?因為經理果張大合照手震矇咗.

食完飯搭的士趕番屋企,因為IVAN帶晴晴家訪,交流下湊B經.雖然有攞幸男既玩具招待世侄女,但始終都係要爸爸陪至開心(我個樣太似壞人.....).

沖完涼,睇租番黎既<超人類-卓比>,劇情普通,警隊專用既人工智能機械人<童子軍>之機動性及前線掩護,大大降低人類警員既傷亡,滅罪率高企.<童子軍>創造者研發出新一代人工智能,並於一個原定銷毀既機械人裝上,取名"卓比".卓比意外地落入黑幫手中,由小童般既智能發展為青少年,培養出人類之情感,又一對人工智能及靈魂數碼化既反思.

PS:中段劇情少悶,不勝酒力,熄機係梳化訓.醒來時已過近兩個鐘,繼續睇埋下半截,好有以前租百仕達DVD睇爛片既青春回憶.

VF-19 ADVANCE

今晚係老家食完飯,就行番屋企,途經輕鐵站收取老闆娘預留既超合金VF-19 ADVANCE.番到屋企就忍唔住開盒拎出黎睇實物,真係好靚好精細.MACROSS PLUS裡既YF-19絶對係往後系列可變型戰機既先驅,因為YF-19既摺合式機頭打破了原袓VF-1既單調,當然要同MACROSS FRONTIER既VF-25一齊影番張合照.

開封前我都望咗個盒一陣,實物既質感與照片真係兩回事.雖然話係超合金,其實大部份都係塑膠,只係關節位及腳掌係金屬,始終要係纖型同合金之間作取捨.望過說明書,變形比以前我果架複雜好多,搵日幸男唔係屋企至試玩變形先.

呢架係2000年既產物,當年我Yr2,放工自己出旺角睇玩具,係潮流特區地庫既玩具店見到有呢架超合金,不過就只得藍色版,無主角既卡其色.呢架超合金係宿舍裡,陪我飛越了不少時光.

電子紅酒櫃配Grand Cru Classe

番完個早更,好趕咁食過晏,就去聽presentation.放工同邦邦傾多陣,就騎羊番屋企,等收人生第一個電子紅酒櫃及一箱grand cru casse.

我之前係屈臣氏酒窖買過呢款紅酒試,非常啱口味,但特價咗都要$598.後來上網見係批發訂平成7折,但就要段箱買.計落條數,一次個買12支,平時去前輩飯局或朋友聚會唔駛次次都撲出去揀同買.平時返而散買黎試口味,啱的話就搵批發訂一箱,好似會精明啲.

正因為要儲放一箱紅酒,所以較早前去咗豐澤睇VINVAUTZ既電子紅酒櫃.原本諗住買個裝6支既,但見加多三舊水就可以有個裝12支,仲要都係窄身,啱晒個客廳位(加多兩舊水多啲就有埋豐澤既安心保).

PS:希望可以多啲機會同台灣女生係屋企一齊飲番杯兼睇電影.

聖衣神話FX系列,十二黃金聖鬪士結集!

今晚卒之提起精神,將金牛座,山羊座,水瓶座,雙魚座從電視機櫃下方既盒開封.對上一次十二宮結集係第一代聖衣神話,而家就以星座形態安放係書房既陳列櫃.

原本陳列櫃裡的八位黃金聖鬪士以兩層前後擺放,但我係未出齊十二宫時作好準備,買咗兩個啱size既透明架作最高既第三層.FX系列比初代精緻,聖衣既可動性提高,人形素體亦有改良,面貌亦與原作無異,唯獨係QC較初代差.我曾經一開盒就發現頭盔或面罩有脫色及異常花痕(處女座及山羊座),需要託老闆娘交回代理更換,但亦只係可接受既花痕,並非完美(第一隻買入既獅子座面罩都有脫色,但怕愈換愈衰至無搞).

本人最鍾意既當然係獅子座,水瓶座肩甲比例靚咗,而且仲可以自然擺出曙光女神之寛恕(感動).其次,金牛座亦可以擺出巨靈號角之起手式.雖然有假手更換成兩脇夾手緊抱胸甲,但本人偏愛金屬聖衣之質感,而且素體同聖衣甲既極限,亦可以接受.

父親節禮物之手足口蛋糕

幼稚園老師昨日致電通知校園出現手足口病,我原本叫幸男今日唔好番學,點知幸男係嫲嫲屋企(等食晚飯時)喊起上黎,話好想番學整蛋糕.

今日同台灣女生一齊接幸男放學,收到父親節手工勞作,以及蛋糕.蛋糕只係現成既蛋糕上添加糖果配料,一個手足口蛋糕就完成啦(幸男話特意為我加多啲朱古力醬).一齊係翠華食晏,幸男叫我帶番工食,希望可以平安歸來!

放工跑步,深夜食堂

今日番完晏,放工去鄧肇堅運動場跑13個圈.今年想多點運動,所以夏天都去跑步,平時去泳池都只係陪幸男玩水嘛...著住背心黎跑都身水身汗,體能比以往差,唔認老都唔得.

番公司更衣室沖個涼,騎羊番屋企一心食尋晚KFC餐剩既白汁雞皇飯,但台灣女生係外母家帶咗有剩既咖哩魷魚.十點半至一個人係客廳食飯,人家已於幸男房裡氹幸男入睡.

ps：一杯凍啤酒，一個人用餐，男人既浪漫。

sleeping day

訓醒就騎羊去接台灣女生放工(成大袋斯巴產品存係seat位下),番屋企放低啲嘢,再去相熟茶餐廳燊光食下午茶.兜番去新墟,泊好愛羊就行去凱都,刷一刷咭就實體化網上訂好既門票,準備入場睇"侏羅紀世界"3D版.

繼承第一集既故事,侏羅紀公園失控事故後,新既投資公司係同一個島上重新啟動以恐龍作主是既樂園-侏羅紀世界.恐龍類比以前多,例如:滄龍既表演變成血腥版既殺人鯨海洋劇場.

為提升回落既入場人次,侏羅紀世界研發部以混合品種既方法,創造了兇王龍.新品種既智能及適應能力遠超研發部既想像,先以圍場上既抓痕,控制皮膚發出既紅外線熱能,令保安部誤以為兇王龍已爬牆跳出.保安部開閘進入檢視,兇王龍就乘機逃脫,並於樂園內殺虐其他恐龍.女主角(侏羅紀世界管理小組之首)聯同男主角(女主角之保安部同事兼前男友),以身犯險,於樂園裡搜救失去聯絡之兩名姪子.

廿年前睇既侏羅紀係2D,今日睇既係3D(雖然只係upscale),電腦動畫及特技當然進不少.故事裡有第一集遺址既場景,令一班當年既觀眾勾起不少回憶.係V City行咗陣,我地去咗工廠區內既大排檔享用晚餐.

椒鹽白飯魚,每次係酒樓或大排檔見到都會叫既餸.

油鹽水花甲,好似唔太夠味,但花甲都新鮮,當係低鹽版(健康啲).

行V City時見Clarks特價,自己買咗對開工鞋(我個對已著咗3年有多),仲為幸男揀咗對九月既開學鞋.我果對半價,加埋幸男果對,兩對再有折頭,超抵!

PS:今朝放工番到屋企食完早餐就出花園砌埋個籃球架,總算大功告成,多謝家楠,豹哥同Ivan對犬兒既厚愛.

八週年

今日先出尖沙咀HONG KONG RECORD攞訂好既和楽器バンドCD,跟住就搭小輪過中環.

每次搭渡海小輪都覺得好有懷舊感覺,因為渡輪既外觀同內飾與昔日相差無幾.

中環碼頭落船, 行番入內街既電車站等車,因為人家訂咗枱係西環食晚飯.電車無冷氣,坐上層都無咩風,偶而經過較闊既十字路口,才感到空氣既流動,又一趟懷舊之行.

電車行走速不似預期,我地比預約時間遲咗近半個鐘,職員話已取消訂枱.人家據理力爭,話無收到職員電話,並稱留枱用餐個半鐘,我地埋應有一個鐘時間用餐,呢張枱真係得來不易.....

店內除咗主打韓式蒸氣海鮮外,亦有日式剌身作頭盆小食,藍鰭吞拿魚非常好食,劍魚腩反而無咁鮮味.

講得出,做得到,我地真係一個鐘就交番張枱出黎.見隔有間酒吧餐廳,於是入去飲番杯,幸好BAR枱仲有兩個位剩..

Aqatini味道唔錯,第一次飲有金萡既cocktail,drink menu陳述有艾苦酒既成份(之前睇漫畫"Bar Tender"得知艾苦酒既特別).人家個杯Peach Sangaria香甜怡人,啱晒女生.

酒吧對我黎講係親切既地方,初出茅廬時,當與教練去李白吧,與屯宿之男去雅仕堡,同工作坊同事去元朗既酒吧.....向台灣女生求婚都係相熟既李白吧進行.一杯cocktail,一杯long drink,一set啤酒,讓大家放下繃緊既心情,坦誠地向表達真我及了解對方,我覺得是一件很美好的事.我柯打多一杯black russian,無諗過係熱咖啡底,通常飲既都係凍飲(kahlua底).

八週年了,很想與你多飲一杯,無聊地閒談或夢話,讓遲緩的時空感包圍著你我.

童真vs大腸桿菌

今日台灣女生接幸男放學,我就騎羊去外母樓下,係翠華會合食晏.

送幸男番上樓時,幸男望住富豪雪糕車,話想食電糕.我同幸男講婆婆屋企都有芉頭味綿花杯,不如番上樓至食(其車我怕富豪雪糕車出名既大腸桿菌多啲.....)幸男不為所動,雙眼開始水汪汪,一臉失望.

無法子,嚴父都唯有就範,順便影幾張相當香港特色景點兼童年回憶.小朋友有軟雪糕在手,一切都是美好的.

觀塘

今朝早騎羊出觀塘鈴木check車,天晴無落雨,只係黃大仙至德褔路段塞車.比原定十點半遲咗15分鐘有多,報上車牌及型號,確認check 車,換機油,油隔,電池,頭燈胆.

特意帶埋相機隨行,以攝影實習來打發時間,因為怕APM既Palace戲院無戲啱時間睇.呢張snap shot如果途人既步姿與雕塑既型態,相映成趣.

每次出黎原廠check車,都會經過呢個十字路口.之前送幸男番學時影相,發現不少相片係曝光不足或過曝,甚至係陰天背光.細心想想,原來買咗部A7後既夏天,我係番9-5,甚少於陽光猛烈既時份影戶外相.再者新引入既35mm F1.4定焦鏡口徑比舊55mm F1.8大,舊年夏季日本旅行既攝影經驗及設定變得不適用,促成是日既市區抓拍實踐.

近APM附近,見到後巷有架紫色既FORZA,即時諗起Cyber Formula裡加賀既愛駒顏色.

晏晝果餐依舊係花園餐廳享用,不過餐廳已由呢楝舊樓隔離,搬往對面馬路較新既商業大厦.舊式唐樓背後與洋樓並存於同一天空之下,一下子分不清是否2015年之影照.

觀塘保留著舊居風味,小型既商戶緃橫交錯於這裡.這間店舖,好可能見證著二至三代既居民,昔日途經既小童或已變成老頭兒.

交低車匙後,行去APM既百老滙Palace買得到11:50既"加州大地震",不用齋行商場打發時間.原以為12:00前當早場會平啲,點知都係70蚊....幸好音效比區內凱都戲院出色,兼且動作特技點子唔錯,足夠中和老掉牙既故事主線-萬能拯救員父親勇救前妻及愛女.

飾演男主角女兒既Alexandra Anna Daddario所帶領既支線會係咁吸引,機警美少女巧與初到三藩市既兩兄弟,一齊逃難求生.

PS:睇完戲,食埋飯,行多陣APM,四點就有車攞,宵遙自在的一天.

INTERSTELLAR-星際啟示錄

今日晏晝安在家中睇大佬借出既藍光碟"星際啟示錄",一部成為一眾男仕們慕名入場既話題作.(導演:Christopher Jonathan James Nolan)

男主角Cooper本為NASA駕駛員和工程師,但因地球氣候轉變及疾病引至農作物失收,被迫轉職農夫.在一場沙塵暴中，Copper和女兒Murphy意外地解破沙塵在房間中留下既間距不一既平行痕跡為坐標通訊碼(二進制)-NASA的一個秘密基地.Copper從教授得知,正準備一項太空探索任務為人類找尋合適既遷移星球,教授順道招攬男主角入伍.

Copper為咗兒女一代既將來,踏上太空船永續號（Endurance）參予Lazarus Missions.該任務始於十年前,以土星一個蟲洞作空間隧道,派遣了12名科學家搭載探測器穿越該蟲洞各自降落在12個被認為有居住可能性的行星上回報狀況.根據滙報資料,一個以黑洞「巨人」（Gargantua）為中心的恆星系統有三顆星球可能適合殖民，並以降落該行星上的科學家名字命名它們：米勒（Miller）、艾德蒙斯（Edmunds）和曼恩（Mann).

A計劃是讓地球人類能在確定適合移居後遷移；B計劃是帶着多個人類胚胎，讓人類能在另一星球殖民重新開始，而原本地球上的人類則會滅絕.Copper與其隊員先探訪Miller星,但發現一片汪洋,並不適合居住,而且大海嘯令其中一名隊員喪命.成功脫險後,團隊前住Mann星,並發現科學家Mann冬眠於太空船內.一片冰川既Mann星原來並非科學家Mann所滙報之有居住可能的行星,Mann一心誘騙後來者前住該星提供物資,並一心向Edmus星尋找生機.

Copper識穿Mann之陰謀時,卻被Mann破壞其維生裝置,唯有向隊友救求.失去氧氣及無壓支援既Copper幸得女主角艾米莉亞(Amelia)所救,可惜另一隊員被Mann於機械人CASE設下之圈套,爆炸身亡.

團隊剩下Copper同Amelia,Copper決定以把永續號駛往黑洞「巨人」，射出機械人TARS讓它收集引力奇點的數據，再將數據傳送回地球.最後目的就是前往艾德蒙斯星實行B計畫,為減少永續號的質量讓Amelia成功到達Edmus星,Copper讓自己的飛艇於耗盡燃料後分離永續號,並進入黑洞.Coppper醒來時身處老家女兒書架後方,時空重叠之空間,並能與身處黑洞深處既機械人TARS傳話.

由於引力差距導至時間差別,Murphy己於地球長大成人並識破NASA教授無法破解重力之方程式,一直既計算研究只係不停地兜圈子,讓地球人類可以移居外星之夢早已幻滅...教授一心Copper團隊執行B計劃.

地球天氣持續反常,山火波及Copper老家.Murphy回到老家收拾細軟時,重故舊筆記內紀錄書架掉落之書本空隙以摩斯密碼解釋成"STAY".從書架上回收父親臨出發太空前留低之腕錶時,發現秒針有符合摩斯密碼既震動.此刻,Murphy覺悟出書架既鬼其實係父親以重力令書本掉落並令沙塵留下痕跡,現以手錶秒傳遞重力方程式之要素-量子數據.

結果Murphy成功計算重力方程式,令地球人類可以移遷第一個人類居住太空站-Copper Station,並繼而開發更多供人居住之太空站.Copper再一次醒來時,已身在Copper Station之醫院(於土星附近之太空被發現).根據時間差,Murphy已年老體弱,但堅持從另一太空站前往Copper Station,為見父親一面.父女重聚,但子孫郤無一人認識Copper,Murphy不想父親目送自己老死,建議父親前往Edmus星找尋Amelia,因為Murphy可能Amelia己為合適人類居住之星球作好安頓(種植)並進入冬眠,等待支援者共同開拓人類新故鄉星體.

本人覺得電影除咗以科幻,懸疑歷險外,父女情都貫徹始終.男主角上太空執行任務,為既唔係單純一展抱負,愛女愛兒既生命延續才是大前提.Copper深信愛女會回收舊手錶,充分表現出父女之間既厚愛.男主角係太空站重逢年老既女兒一幕,令人感動.幾經波折,父親終能遵守承諾,回到女兒身邊.雖然相聚時候太短,但見幼女兒孫滿堂,捨不得之餘,夾雜著無比既安慰.

以太空主題黎講,已經好唔錯.記得以前睇阿波羅13號,真係悶到想訓著.與前作"Inception"一樣,導演著重時間差,及open ending(究竟Copper成功找到Amelia並於Edmus星為人類開拓新紀元嗎?).

PS:今日為幼稚園便服日,所以幸男著住超人童裝番學.常FF既我成日同朋友同事講,第時年老個陣都唔知係咪傾各自既兒女已否往太空居住.