父子火鍋

是日放假,打電話問過幸男今晚想出街食定係番爺爺嫲嫲屋企食,幸男答:"我想我地兩個自己食,我想睇吓你煮咩食".

就係呢句說話,我係市中心買火鍋材料,牛小排,皇帝蟹肉,粟米,荳苗,金菇,湯底及GAS.....

騎羊番屋企,洗好及切好蔬菜,就動身搭輕鐵去外母家接幸男番屋企.幸男食得開心,餐飲係美國既非濃縮還原橙汁.

潮濕天氣,開住窗同玻璃門,開行抽氣扇同抽濕機.尾段時間,幸男發現掛鐘既牆身掛著水跡,於是先熄火,再用乾毛巾抺拭,再開爐.最烏龍既係我誤將雪櫃既上海粗麵當成烏冬,無理由烚咁耐都未熟,仲係硬磞磞......

幸男食咗唔少餸,壓軸既假烏冬都食唔晒.幸男食飽就可以係客廳玩玩具,再等沖涼,我覺得幸男應該開心於家中做山寨王~

最低騎羊溫度

尋日朝早起身騎羊番工時,見玻璃窗因室內外既溫差而凝結水珠(當時十度都唔夠).

無諗過今日仲凍,得4度咋,不過我都堅持騎羊番工.正當擔心如何保暖時,突然諗起新舊長袖天蠶衣打孖黎著,加上尋日朝既戰陣(短袖保暖底衫,一件厚線衫,附內綿既電單車褸).

放工時總叫做有太陽,有番近十度既溫度.今朝我已打破自己最凍日子騎羊既紀錄,舊年都好似係十度左右.

皮制兼fleece內裡既手套明顯不敵冷鋒,除手套時,雙手仍是赤凍.之前訂唔到taichi既電池發熱手套,真係好遺憾......

夜晚臨去老家黐餐前,將一罐啤酒放係花園,事隔近四個鐘開黎飲,感覺都夠凍.未開罐之前,我係雪櫃攞一罐啤酒出黎俾幸男揀邊罐係放係花園既,幸男摸過後都無法分辨.

PS:咁凍既天氣飲啤酒,失去了平日之快意.(可能要開住暖氣飲至得)

崇真聚餐

今晩係崇真書友團年飯,大家各有各忙,尤其係要照顧小朋友,真係一年都唔見得幾次.

大家都老了,我自己都覺得頭髮少了點,頸紋多了點..........

已移遷區外既Wing Fung,今晚特意帶同愛兒同大夥兒聚舊.

酒樓變成育嬰基地,Oscar餵奶有板有眼.

臨近年尾,好多人黎食團年飯.溫生人面夠廣,我地至可以係星期日有張大枱.

中學時代,大家一定會為邊度食晏而擾攘一番,今次聚餐都唔例外.原本諗住去天水圍既韓式bbq,但突如其來既冷鋒令我地轉番室內既食店,今晚真係好凍,得10度咋.

小朋友係家長既監督下完成晚餐,圍埋一齊畫公仔,月兒都有趁高興.

以前讀書合照機會少,因為菲林年代唔方便影幾張就曬相,只有學校旅行至有機會用晒一筒菲林黎曬相.出黎番工合照機會少,因為各有各忙,仲要湊小朋友添.

小朋友好難為影相而企定定,連排個陣型都難以控制,最似樣既都係呢一張,不過其中一位小朋友離開咗大隊.黎緊約實大家年初三上我屋企,再聚一聚~

晚間一人迷你影院

今晩熄房燈,一個人冚住被,用手提電話睇頭文字D劇場版,新藍芽耳機確保唔會嘈到隔離房兩母子.

傳聞中既煲耳機,以RUN IN概念黎理解.無用Random play list黎煲成晚,只係以睇動畫卡通黎邊用邊warm up,以自然既方法黎細味變化.

Initial D既劇場版畫功同聲都唔錯,故事範圍似周杰倫當主角既真人電影相若.唔知總共會有幾多集呢?

Beats Solo2 Wireless

人生第一個on ear耳機,今晚正式入手.夜晚打Wii U可以插線落game pad黎打機,唔怕嘈到幸男,但要真係有時間同體力至得........Wonderful 101已購入兩年但完成度停留係一半多啲...

之前一直想買個好少少既藍芽headphone黎聽歌,但可以試既款式及地方唔多.選擇之一既BOSE SoundLink® around-ear wireless headphones II, 係尖沙咀既專間店試過,好似比用緊既philips唔大分別,而且款式較沉實土氣.

有專用耳機保安套,感覺良好.

再下一層就係保護套之掛扣,遙控線,及USB充電線.

跟Acatel One Touch Idol 3送既JBL耳筒,始終係雞雞地入門貨色.

半年前貪新出既PHILIPS TX2BT方便,但面對重型音樂BAND SOUND始終會"拆".上SONY試過MDR-1AB,無SONY自家既LDAC藍芽技術,聽MP3格式都係唔太特出(耳機好大隻).

於太古廣場Hong Kong Record試過既呢款Beats Solo 2 Wireless,聽"千本桜"無咁爛聲,期望叉電後試真啲.

冰感啤酒

今晚同幸男一齊制作-2度之啤酒,之前我自己試過一次,但因唔夠多冰同鹽而失敗.

 先將一罐4~6度既啤酒拉開拉環,裝入組件,注入4~6度既凍水.

 加150g鹽,溶入凍水,以降低冰既溶點.

 跟住就加大量既冰粒,至容器上既指示線.

冚好個蓋就扭制向左邊,容器內之冰粒鹽水會打轉.5分鐘後就可以關制,冰粒完全溶化,與鹽水一體化.呢個時候,要耐心等多2-3分鐘.

 拉動手桿,冰感啤酒會由啤酒罐吸出.

最後推動手桿,細滑泡沫就被打出.試飲過後,覺得係比平時既雪櫃啤酒凍一點.由於無合適既溫度計,故未能証明有-2度.

平時都試過將罐啤酒放入冰箱一陣先拎出黎享用,但時間難將握(會結咗冰).本人建議用500ml既罐裝啤酒,因為搞咁多步驟,飲得330ml有啲唔抵.

PS:多謝Andrew同馬sir之心意

二人宵夜

今日番晏放工同台灣女生騎羊去友愛冬菇亭側既小食店食宵夜,因為之前我都係度買過生菜魚肉同煎釀三寶外賣俾人家食.

炸大腸$10,燒蠔三隻$50.

燒雞翼3隻$25,價格相宜得黎又好味.

湊小朋友既日子,除咗少出夜街之外,去熟食檔食宵夜都少.今晚可以發吓呆等食,兼邊食邊胡扯已是難得.

物換、斗轉、星移

客廳既掛鐘已服役近十年,由我同台灣女生拍拖時係旺角Bear In Mind買定為結婚新居作準備,到我地結婚個年掛係租住既單位,再跟我地搬屋.年時已高,時間開始唔準,日子揭板未能運作順暢,有時要人手幫忙撥去下一日之揭板.

原本白色既外殼及跳板文字,已變成淡黃色.若干年份之數字版嚴重發黃發霉,故"1"及"6"只係用白紙剪出並貼上黑色底板.　

早幾日上網搵flip clock,竟然搵到一間公司有同款既掛鐘.雖然價錢比當然上漲不少,但買得番十年前既產物,已經好感動.

今日收過新掛鐘,面善既入電方式,相熟既調校轉盤,給予親切感.摩打改良了,跳板翻動之聲浪大幅降低.希望十年後,還可以購入同一款之掛鐘,因為到時幸男都會對呢款日夕相對既掛鐘有一份親切感.

趕尾班年票入迪仕尼

上午同幸男去眼科覆診,食過晏後之搭68A再轉地鐵入迪仕尼,因為年票明天就到期了.

幸男第一次黎迪仕尼既時候,係同巴斯光年合照.由兩歲幾到而家,只有今次可以同米奇及米妮一齊合照.原本我將校好設定既相機交俾職員為我地一家三口合照,可惜職誤觸轉盤,令相片唔夠光.

排隊影相都花咗大半個鐘,下午茶時間,一齊買嘢飲,幸男享用小食.

露天茶座有不少麻雀徘徊,守候遊客掉在地上既食物.見到麻雀咁肥壯,就知道佢地好食好住.

小休之後,幸男話要搭船去泰山既樹屋.小朋友可能覺得有探險既感覺,身為大人既我就只係在意邊度同阿仔影相好睇呢?

幸男話要玩<玩具兵團跳降傘>,仲要一家三口一齊玩......

之前人家同幸男都有玩過,人家都話驚.我親身體驗過,最驚係拋到最高時個一下無重既感覺.幸男唔驚,可能係平時俾大人抱起時,已習慣緯軸既升降.

<飛馳天地>依舊多人排隊,今次我自己坐前方既一部車,方便為兩母天影相.

行過Space Mountain,見無人排隊,人家見幸男既高度足夠入場,於是本著唔好蝕底既心態,帶幸男去玩(幸男應該無諗過會有比迷離莊園更得人驚既玩意).其實當年同人家拍拖時玩過,已覺得"fing"到七彩,眼鏡都會飛出黎.幸男玩完話好驚(中途人家已聽到身傍既幸男叫嚷),始終漆黑既環境,配上嘈雜既音效及猛烈既搖晃....重見天日,幸男知道有雪糕食先至笑番影相.

幸男向父母另一索償項目:迴轉木馬.我同人家夾定戰術,我揀馬車位置坐,而人家及幸男騎馬車正後方既木馬,以方便影相及拍短卡片.

幸男話應該玩太空飛碟而唔係space mountain,所以要玩番太空飛碟(撥亂反正?).沿用飛馳天地既戰術,但為咗方便影相,我揀咗坐後座.當開始轉動時,我因唔夠手長撥動前座既升降桿,故不能高炒黎影人家同幸男之飛碟,要佢地下降黎就我.....結果相片"矇"鬆"散".......

呢張相好似幸男可以擧起個星球咁~

Star Wars熱潮直捲全球,迪仕尼精品店都有唔少相關商品售賣.

原定六點半走人,但遇著晚間巡遊,幸男眼定定咁望,結果都係無得早走.

一心為幸男同麥坤或阿麥影相,但漆黑環不利A7對焦.先以幸男面孔作手動對焦,等心儀巡遊車輛經過時按下快門配閃燈,但幸男企唔定兼不時擰轉面望巡遊車,所以得呢張係較為符合設定.

向年票告別,臨走前係噴水池影番張夜景照,唔知人家會唔會忍唔住再買年票呢?

晚飯係青衣城既別府享用,起初幸男堅持要番屯門既築地拉麵食,但半信半疑咁試從餐牌揀既拉麵後,幸男話"好食~".食品比市中心果間(已結業)好食,我點既"火炙腩肉麻辣地獄拉麵"好正,食到我滴汗.

柚子雪糕好特別,先將水加入木桶,就會有煙霧釋出,令人有冰冷既感覺.幸男話"咁大霧,點食呀?",因為連雪糕本體都被霧氣遮蓋.

幸男玩到攰,上68A無耐就訓著,落車後我同人家輪流抱到番屋企.一整天都有父母陪伴,有得玩有得食,好似大假旅行般~