睇跌打醫師，初嘗針灸

右膝背持續痛,已兩星期了,今日早更過後卒之都去咗睇跌打.推拿時故然係痛,但係俯臥之下(無被通知，只聽到“消毒綿，火針”),俾醫師用火針拮落膝背時,真係有一股電流直湧至腳板底!敷完藥,包紮好,俾診金,"十一點可以拆藥",慢慢行去搭小巴番屋企.好在無騎羊黎,發軟蹄難落腳.....

醫師話要戒口,好在我晏晝食定碗生牛肉湯檬.下星期覆診,希望快啲好番…睇黎之前都係過勞，用按摩器紓緩咗肌肉痠痛，又繼續忙急步番工及繁重家務，無在意筋腱既極限。

倫哥私房菜-$278 CP值超高

之前台灣女生一直都話想試吓元朗既倫哥私房菜雞煲,今日中午就以whatsapp成功預訂今晚既二人名額。雞煲小辣,雞件唔會太細件,但好似無西川咁入味,下次試吓叫中辣睇吓有無好啲。

主題係無限時海鮮火鍋,前菜係蒜香蒸蟶子,以及蠔皇扣鮑魚(唔記得影相)。

湯底方面,我哋加咗$30轉龍蝦湯底,味道一般,叫做有半隻龍蝦食。

海鮮主題,除咗扇貝同蟶子之外,蝦,蛽,魷魚及鯇魚都係任添。

牛頸脊只限一碟,但數落都有十塊有多,對兩個人黎講,份量應該啱啱好。仲有鯪魚滑同蝦滑,雲呑,四寶丸,枱面都放唔晒,要擺係旁邊既架。

甜品係燕窩燉蛋白,我果份都俾埋人家享用。汽水同自家製涼茶就任飲,啤酒要自費,但生啤選擇唔多,結果我揀咗ASAHI.兩個人食到捧住個肚走,無再添海鮮既餘力。

十號風球-天鴿下之晚餐

朝早六點就掛八號波,九點左右就轉掛十號,幸好屋企安好,屋外去水渠位亦無被樹葉樹枝所淤塞導致水浸.平安大吉,真係要開支紅酒飲,話晒天鴿真係破壞力驚人~

台灣女生因颱風而不用上班,冰箱存貨加上尋日買既食材,造就了呢餐晚餐.

Barricade

原本以為市中心電影變形金剛展覽場區會有得買,點知係無!急急行落吉之島玩具部,都係無....好彩係玩具反斗城搵到呢架狂派Barricade,開開心心咁去俾錢.

咁有衝勁撲買,因為上網係you tube見到呢隻玩具既介紹.變形後既線條及比例良好,唔會太突兀,而且背包(車頂)可以拆落黎,扮係防暴盾.雖然拆背包唔係官方既設計,但我就覺得好切合防暴盾既概念,反正有警棍同佩槍.

自少就喜歡警車主題既變形金剛,2000年時代(日系變形金剛)警車玩具,我仲有保存著.幸男出世時,我就將警車變形金剛交俾佢玩,但幸男bb時最愛拆走車呔,大個啲就拆埋車門(營造歷練感?).相中車子好端端既樣子,只係近鏡兼角度錯覺.

幸男亦努力地投入玩具世界,但要不時提醒唔好太近眼睛(近視加深).

食完晚飯,執好枱,再繼續為新玩具影相,難得$200有找既官方版玩具造工有咁細緻嘛.

唯一可惜既地方,就係頭部後方既方板,以及上臂既肩甲太大塊,如果可以再摺疊小一點就好了.歷集變形金剛電影版既Barricade,以今集既設定最為搶眼!

PS:有勞台灣女生主埋是晚既餸菜

炎夏送別巴斯光年

輕裝上陣帶幸男去迪士尼,一機,一鏡,一閃,為咗騰出空間,收納其他用品(外套,電風扇,遮,外置充電).

搭68A到青衣城,一心早食個晏晝飯就搭鐵路入主題樂園,點知食店要十一點半至開門.睇均咁多間,都係別府拉麵啱幸男心水,兼且早開門做午市,唯有係門口附近等候.

幸男點咗個九洲拉麵,食得滋味~其實之前都一家三口黎過食晚市(去完迪仕尼),味道好過屯門市中心果間好多.我叫咗個牛肋粒拉麵,再食埋幸男有剩既叉燒,杯凍奶茶反而有驚喜,幾好飲.

搭鐵路入到去車站,己經近一點鐘.一大一小,門票$1008.

沿途唔少小朋友手持製泡玩具,咁啱行過售賣檔位,影下呢張泡泡照(較早前仲多泡泡飄浮半空,可惜攝位影相途人太多).

今次既主題係臨別秋波,明日世界既巴斯光年設施會於八月尾結束.第一個項目就係排隊玩"巴斯星際歷險",三十幾度高溫,幸男靠飲冰水及敷冰巾黎降溫.

排到入去啦,呢張相都叫做係同巴斯合照丫.

我坐幸男前一架既飛船,目的係幫幸男影相,但幸男連支鎗都調轉黎拎.......

定焦F1.4全開,雖然只得高ISO值質數,但總叫影得到四周環境.

其實自己讀書時代睇TOY STORY時,最喜歡既角色就係巴斯.由於當時巴斯既玩具賣斷市兼價高,一星期$20零用錢既我未能完夢,只能買TOY STORY既官方珍藏咭.

唔見有巴斯出黎同遊人影相,於是叫幸男係"巴斯星際歷險"外既影相區打咭留念.

見時間尚早,當然排多次隊再玩.有唔少人係特意黎送別巴斯,少女們趕緊係排隊時自拍打咭.今次我同幸男一齊坐,我打出第二高level既分數,幸男好驚訝點解爸爸咁高分.

之後幸男話要玩太空飛碟,我一心諗住室內避暑0家嘛....無法啦,陪太子讀書,再以smartphone自拍親子照.

小朋友坐內座,幸男不時調高調低運轉中既飛碟,我影相時都有啲驚.

經過旋轉杯,幸男話想玩,好在條隊唔算長.幸男不時用軚盤為座杯加速旋轉,我要出手阻止並喊道:"有啲暈,有啲暈...",幸男當然有取笑我.奇怪地,心裡想起胡師傅既名句"俾啲掙扎.俾啲掙扎",睇黎番工同阿Jim講得太多添....

出發前下載定個app,清楚了解地圖及各設施之排隊等候時間.三點左右就放茶點,幸男頭又濕,面又紅,但都無叫辛苦.我不時為冰巾加水,以及管理冰水(第一壺冰水飲完後,將室溫水放入保溫壺內,讓未溶化既冰粒冷却新載入既水.當第二壺冰水飲完後,重覆相同手法,並開以飲用第一個保溫壺內既新制涼水.)

大熱天時,有咩好得過係食雪條(橙味)呢?

台灣女生吩咐可以去故事劇場俾幸男涼吓冷氣兼大人回氣,但真係好多人排隊,要出動埋風扇黎吹走悶焗.

劇場故事以公主題才為主，所以幸男都唔太投入。

散場就去咗“小小世界”遊船河，都多人排隊，期間要俾fruit bar 過幸男填肚。

幸男好認真咁四圍望(好多嘢諗？)，呢張相似2046迷幻照。

五點幾，我自己都覺得肚餓。$38一個單球，一芒果一朱古力，買多支凍水就一百蚊有多。當然有將凍水注入兩個保溫壺,以將價值發揮至極致~

食完雪糕,行去就近既幻想世界火車站,諗住坐火車去迷離莊園站,行去隔離既反斗奇兵.由於最後班車已截龍,我地要徒步前往,目標係轉轉彈弓狗.

 排隊時間都耐,卒之都排到下一轉有得玩喇~
幸男都係鍾意不停轉既遊戲,我都係開始前用smartphone自拍,怕開動時甩手.

幸男都覺得夜晚玩廻旋木馬係開心啲,因為燈光會靚啲.

臨走前玩多一次“巴斯星際冒險”，兼係招牌下影番張相作道别。

我地無睇晚間巡遊，係紀念品商店買咗個巴斯同三眼仔既鎖匙扣($138)，仲咁啱撞見Ronnie添~見到噴水池就諗起幸男坐BB車時既到訪經歷,忍唔住叫幸男係度影番張相.

搭番地鐵去青衣城會合台灣女生，係Mr Steak享用半自助晚餐,最吸引既係呢個生蠔海鮮拼盆.

連幸男既兒童餐,都係半自助形式,小朋友可以同大人一樣,出去揀選主菜外既食品.

人家放工後,先陪外母覆診皮膚科,再出黎青衣搵定位等我地開餐.

幸男叫咗杯水果特飲,由於等咗好耐都未到,我地叫幸男自己舉手問職員哥哥.職員耐心地回覆小朋友,話會幫佢去問吓.

起初唔明點解侍應生無問我哋牛扒要幾成熟,當上碟時就明白了,牛扒不太厚,没有控制生熟度既本錢.$288一位,味道同份量都算超值.

自助式食品以沙律為主,其次就係甜品,我就揀咗泡芺.

兩父子無中暑,劫後餘生,託人家為我影相作表揚(成隻臘鴨咁).雖然係辛苦啲,但見到幸男開心,就可以了.平日主攻生活知識及品德操守既父親,只有今天陪玩主題樂園,才可以令愛兒大半天天都放懷歡笑.

PS:幸男唔足三歲時,第一次去廸士尼就同巴斯影相.

幸男得知"巴斯星際歷險"將會於8月尾執笠時,哭成淚人既樣子....