直踩早更,收機,晚飯,酒局

今日早更過後，又撲出銅鑼灣，因為已到短訊通知相機維修完成。之前一直以為係天涯鏡壞，無諗過師傅check 過無嘢，反而叫我交埋部相機上去check，早知當初機連鏡一次交晒上Sony Store 。

相機未過續保期，所以換接環零件都無需收費。機身接環部份鬆,所以接上較重既天涯鏡時出現接觸不良.交收時，以相機配天涯鏡黎試影，對焦及光圈運作正常。卡入鏡頭時,明顯覺得接位變得緊密。天涯鏡檢查$150,續保$273;蔡司定焦鏡檢查$250,續保$483,總結$1156。配番個hot shoe cap,加多$50。

由於太肚餓,係附近既Super Sandwich叫咗份 cake set 。藍莓芝士蛋糕一般，但杯凍榛子咖啡OK。十二點幾食既芝士咖喱杯麵，唔係太頂肚餓。

番屋企放低相機同鏡頭，輕裝前往何福堂附近既大排檔，與崇真書友一齊食飯。

一枱都係助酒餸菜，好耐無食鹵水鵝片。以往客人都可以去附近既生啤店買啤酒上黎飲,但今次就只可以嗌番支裝.

原來教練自拍係咁有一手,第二次就成功獵頭取景~

意猶未盡,食完飯,去咗BARREL飲酒,Andrew仲加入埋我哋添.今晚有LIVE BAND,雖然係男人,但都總好過無.反而全晚最驚喜既係Andrew同我哋介紹世侄版本既麵包超人歌~入座時仲有唔少吉枱,但人客陸續增加,我哋臨走果陣已滿座.