意外收穫

放工騎羊入元朗搞愛駒之牌保，好在無貪方便兜去車行對出馬路泊位，原來修路鋪瀝青…

先係唯一冰室食下午茶填肚，試咗個特式鮮茄芝士蛋菠蘿包，無諗過呢個組合又幾夾喎～

係珍藏買完酒杯，上咗合益探下老闆娘，得知即將結業，並改為網店代熟客訂心頭好。老闆娘叫我睇下有無嘢啱，當用埋之前訂貨既按金。咁啱見到屈機最強既00 Gundam+00 Raiser ($800)，拎上手望前望後，就笑住黎課金。之前出既Metal Build 版太大架同貴，反而METAL ROBOT魂既size比較啱我。

PS:夜晚買西川外賣雞煲同台灣女生食,用電視劇黎放空腦袋

幸男重遊AIA嘉年華

幸男頸痛初癒,卒之可以趕係AIA嘉年華收檔前一日去玩.今日台灣女生要番半日工，所以出到中環已經近傍晚，先係Starbucks 食少少嘢至行去會場。

大人入場$130 X 2, 小童入場$90 X 1，共30個代金幣。雖然大部份既機動遊戲,都係同之前一樣,但小朋友每次總係玩得開心.

幸男揀咗個頭位坐,一個人坐都無懼,可能對幸男黎講只係小兒科.

人來人往,但都未至於等多過玩,兩母子等一陣就可以係畫框影合照.

幸男今次可以自己一個人玩三層樓高既充氣滑梯，唔再需要媽媽陪。

卒之夠高啦～幸男可以同媽媽一齊玩碰碰車,每架要個6代幣(6X$10),慳家既爸爸只係場外為兩母子拍照(大大個相機背囊亦唔太方便玩)。

幸男揀番3年前坐過既車款，依舊享受彎位之加速。

大型兒童過山車,可惜觀眾只可以係場面仰望,否則會影得更好,至少唔會被圍欄阻礙.

急流浮艇,每位6個代幣,只行一次路線,真係有點貴,但叫做有彎曲道兼高台斜坡.

賭博味重既攤位遊戲,先以碌保齡球作熱身,結果當然係一場空....

單方向扒艇，幸男係用支槳黎刮底推進……

搵到個摩天輪同IFC背景位，掛住玩既幸男好似唔太集中影相。

溫馨浪漫既回旋木馬又點可以唔玩呢?

爺爺送既電動車已失靈報銷多年，難得有賽道，當然有排隊玩，而且身高限制下，相信只可玩埋今次～
幸男一人入奇趣屋玩，多樣既機關玩意，令幸男盡興而歸。

入夜後遊客無明顯增加，好難搵到個有氣氛既構圖，唯有再次借摩天輪黎襯托燈光色彩鮮豔既Fun House～

其實中途要俾多$300換多30個代幣，先至挨到2個幾鐘，臨走前係投擲遊戲攤位。幸男睇中瑪利奧系列既菇仔毛公仔，但一如既往，空手而回…

搭渡海小輪去尖沙咀，商場過商場，我哋係一風堂食拉麵。幸男玩得開心,我就不時諗點先至可以影得好啲啲.以前拍拖就真係全心投入黎玩,而家為人父母,就只為求小朋友開心.工作以外,照顧小朋友既衣食住行已花唔少時間,攰到兩公婆傾多句計既時間同動力都唔多.朋輩們建議兩口子去旅行放鬆吓,叉吓電,但我卻捨不得旅費.一家三口一齊去還可以,兩口子就有點奢侈,畢竟平日花咗唔少錢係外出食飯嘛(自己既興趣又花錢)~

PS: 中午處理凋謝既櫻花時，花瓣散落地面，於是靈機一觸，為柯柏文拍下日式亭院照～

年初六的休假

是日放假,同幸男一齊落藍地食晏.由於燊光要初八至啟市,唯有帶幸男去3 CONCEPT食晏.第一次晏晝黎幫襯,座滿客人,但都只係等一張枱就到我哋.

我叫咗個大叔炸雞漢堡(因為無海膽黑松露忌廉長通粉),而幸男就食香腸拿破崙長通粉.幸男話想黐我少少薯條食,結果自己碟長通粉都食唔晒.

平時係連鎖式咖啡店都只會飲Mocha,Cappuccino及Hazelnut,見餐牌上有Vienna Coffee,於是叫一杯黎試.雖然味道唔錯,但唔及Dalloyau既濃郁.

幸男揀咗巨峰梳打,作為是日餐飲.

番到屋企就忙家務，用咗Philips Power Pro Aqua一個月，感覺良好。以往先用吸塵機，再開一桶水黎拖地。宜家只要配上水箱(~200cc)，就可以一次過吸塵拖地。拖過既地磚面，濕度與旋風式脱水地拖效果相若。其實可以風扇吹乾，但我比較心急，故用乾毛巾擦去水痕。以前兩個幾星期至拖一次地,而家方便咗,四日就會拖到一次。

太耐無幫襯，食店已引入特色啤酒，價錢與酒吧相若。

另一款就多個架上,但高身漏斗式杯會否唔太方便??

夜晚同台灣女生係牛蓋食過晚飯,就趕上去英皇戲院睇七點場次"黑豹".

黑豹除咗世代相傳既心形藥草之強化能力,依靠既仲有汎金屬戰甲.感覺上好似有點與IRON MAN重叠,只係一個識飛兼具大火力武器,而另一個較多埋身肉搏.

PS:一如朋友們既評價,戲院較細,但畫面好清.敗筆之處,係出入口太近銀幕.出入口上之"出口"燈箱,對播放陰暗場景時之銀幕,造成光害.....

側頸男行公園

今日原本話上外母家接幸男去AIA嘉年華,但幸男訓醒就頸痛(落枕),於是由台灣女生諗出臨時文靜景點-香港公園.先係太古廣場既DALLOYAU放茶點.

我就叫咗杯viennois,雖然係細杯啲,但勝在夠晒濃味,配上致命忌廉,$55俾得心甘情願(每啖隨後之呼吸,都有咖啡香餘於鼻腔流動).

用5分鐘行去香港公園,兩母子如遊客般,係瀑布涼亭影相.

側頸既幸男動作遲緩,影相都比平日容易不少.

單係睇相,就知道幸男邊一面頸扭襯,呢張已經算係無咁明顯.

首先去睇溫室植物,喜愛濕地公園既幸男,當然唔會覺得悶.

之後,我哋穿過塑膠鍊簾,入去觀鳥園.相比之下,元朗既觀鳥塔被比下去.

園內既雀鳥習慣了遊客既到訪,不時飛到近遊人既位置.

用天涯鏡打雀,影得最合心意既就係呢一張.

幸男妄想可以同雀仔合照，又隔咁遠，當然顧得前就顧唔到後…

番工就聽得多“堅離地”,今日就真係行過“堅利地道”，仲要經過纜車天橋路段，可惜只可怱忙舉機…

第二個景點係香港動植物公園。

園內有各種既樹木，人家發現有楓葉樹。

相比之下,香港動植物公園顯得無咁吸引,可以影相既地方唔太多.

園內主力係展示猩猩,其次係大型雀鳥。傍晚時間，天色昏暗，呢張猩猩照已係最好既收獲…

PS:人家帶幸男去大學同學屋企團拜兼晚飯，我就自己搭車番屋企。咁啱嘉耀又無飯開，於是騎羊去友愛大排檔一齊食。

戊戌狗年之初一

年初一番早更，夜晚係老家黐餐，夜晚番到屋企至set腳架影新春家庭照。

每年都為幸男拍新年賀辭短片，今年都唔例外(本人覺得幼稚園時代既短片係最得意既)~拍完短片，兩母子以雪榚作甜品。

其實今日晏晝台灣女生帶咗幸男去老家食開年飯,之後上咗伯伯屋企玩SWITCH(尋晚我執定個袋)。人家將幸男暫托係伯伯家，搭車出去卓爾居既PACIFIC COFFEE會合早更收工既我，一齊食下午茶。

臨近晚飯時上伯伯家接幸男，見幸男玩到成頭成身濕晒。伯伯話幸男玩瑪利奧賽車，玩得太緊張.......

PS:尋晚包咗封利是俾幸男同愛羊，希望新一年健健康康，大吉大利～