行定年宵市，食定團年飯，等過農曆年

年廿九，一家三口先係星巴克食少少嘢，再去行區內花市。六點左右，人流尚未到高峰期，唔擔心小朋友被重重包圍～

入口最近既係花檔，幸男同台灣女生睇中咗日本櫻花，最後都去番第一檔問價同揀貨。

日本櫻花2枝($198 X 2)，串串金1枝($68)，俾$500，理應找回$34。老闆大叔話我哋爽快，於是齊頭找$50俾我哋。由於屋企無高身花樽，於是買咗一個($100)，老闆當然開心～上年都係第一個花檔買花，唔知係咪同一檔？

起初幸男話睇唔上氣球款，今年唔買氣球。詫異既我答：“點可以小朋友無氣球？”我哋同幸男係攤檔認真咁睇，經父母推介後，幸男揀咗長頸鹿。幸男話無長頸鹿的話，會揀番1歲4個月時拍打既企鵝氣球。

基於動物福利問題，年宵再無撈金魚玩意。一家三口行番去市中心，我同幸男係的士站排住隊先，人家就係吉之島超市買生果禮盒。

先番屋企放低花，再拎埋支紅酒，跑番上的士去老家食團年飯。氣氛麻麻，睇張合照就知兩老曾有口角。

小學班主任帶咗幾款棋番課室作介紹，幸男就迷上鬥獸棋，不時搵同學一齊玩，今晚就輪到伯伯。記得細個時，屋企都有棋玩，但無而性兼天份既我，每次捉棋都係不情願之下作打發時間之舉。

PS:屋企第一次擺咁高既花，我要用竹韱作固定，而家卒之明白花樽中間收窄既設計奧義…