見證愛,學習愛

今日係湘宜既結婚大日子,原本番晏黎唔到,咁啱Gordon話想同我調,變相我可以A完趕入元朗觀禮.雖然自己唔係教友,但都係關島行過教堂,感覺浪漫之餘,亦牢記牧師既說話"Two become one".基督教新娘與天主教新郎,二人既相遇,定當係上主既安排.

除咗儀式前既SNAP SHOT及合照,其他時間都係專心聽道及見證.禮成之後,ACC群組一齊同一對新人合照,以行動表達祝福~

其實今日都幾趕,三點鐘行禮,我收工騎羊都要兩點八個字至係教堂附近泊車.行到去教堂,至知賓客可以係隔親既中學範圍內泊車.

PS:簡單既誓言,"for better or for worse, for richer, for poorer, in sickness and in health, to love and to cherish",至今仍在參透中.

出車兜風變咗補買兒童節禮物

雖然天文台話呢幾日有驟雨,但明明出車前都係有太陽,係燊光食完個晏就落雨,好在有帶雨褸係背囊.

乖乖地搭巴士,係轉車站駁263出沙田會合康楠及嘉耀.未去車公廟之前,先係奇趣天地一齊睇玩具,發現有幸男玩開既新幹線玩具DX版.用智能電話將相片send俾台灣女生,再轉傳去外母電話,一如所料,幸男揀有二段形態既N700A.

康楠趕時間走先,我同嘉耀去搵地方飲咖啡.近六點鐘,間間都多人,唯獨Delifrance大把位.雖然價錢唔係太貴,但Mac Cafe絶對會好過佢(最衰隔離間老麥無).

坐兩程巴士上外母家,為咗呈上手信.DX版確實係靚好多,手腳之線條比例似番個人型,肩膊同胸部無縫連接.

背部亦多了一點立體感,唔會好似舊作咁以平面去交待.

第二段形態,與舊作差唔多,只係右手大拳有爪,以及多咗小腿褲腳既小修飾.

攰到眼澀

放工急急腳走去換衫，騎羊去友愛買雞蛋仔，再撲去接幸男放學。

 

乾啃又點得呢？帶幸男去麥當勞飲橙汁,小朋友陶醉於解渴既香甜凍飲~

幸男一笑就見到個窿,唔知要幾時至生出門牙呢?"左轉,左轉,順住行,左轉,右轉,再左轉就到",幸男話新路線比平時快好多.

番屋企係梳代挨咗陣,又騎羊趕去輕鐵站會合台灣女生, 一齊去睇短期租約.望過單位,內籠企理簡約,預算之內,別無他選(唔洗煩冷氣殘兼上網問題),簽約作實.

反正騎羊,兩口子去咗置樂既泰味軒食晚飯.咁大個人,第一次自己屋企裝修翻新,比純搬屋多一點煩鎖及顧慮。

PS:希望一切順利，可以安心住到幸男升學反叛期，再諗新既陳設。

Cosplay外影

屯門站搭西鐵,目的地係美孚站行出去既荔枝角公園,會合幸男既小學同學及其家長.

早前學校文化節要學生扮古代人物角色,一眾媽媽上網(淘寶)團購古裝.只係著一次的話,未免有點浪費,於是大家諗起學校旅行去過既古色古香景點.

起初以為幸男貪玩,以手擋格同學之佩劍,原來係唔想同學之佩劍誤傷他人.

要小朋友合作影相確係難事,更何況係要4位小朋友同時望鏡頭?

幸男呢張本應可以扮回到古時,可惜左上方既街燈露出破綻.....

左至右順序:關羽,劉備,悟空,張飛.除咗關羽同悟空,其餘服飾既設定真係睇唔出其代表性.

呢一幕十足後宮秘史，不過加入穿越時空元素。
幸男行石春路，行到甩帽，都無話腳痛～

小公主仙氣十足，姿態優雅，沒大半點粗魯。

是日小朋友大合照，怒按連拍，揀咗張最多人望鏡既。

其實仲有位孔明，但孔明唔愛影相，最後脫下古裝，與大隊於橋上駐足。

幸男見兩位妹妹跑得咁開心(避白鴿)，於是應我要求，一齊影追逐照～

PS: 上次學校旅行時，已見唔少模特兒著住古裝或主題cosplay黎影相。今日既模特兒就比較老成…………

小型派對歡送智勤

預先夾定更期,為咗今晚可以一齊上我屋企,邊食邊傾邊飲邊打機.我先騎羊去市中心吉之島買壽司魚生,再兜去市新墟既新金榮買滷水鵝.大排檔大叔話一隻鵝好大喎,我答佢有五個大男人食,大叔才放心落單.叮埋冰格既微波爐PIZZA(2個),兼大量零食(團友自攜),雪糕甜品,總算無餓親大家.

1 2 SWITCH派對遊戲,輸咗既一方要飲一shooter份量既啤酒,想成功復仇,絶對需要酒量同意志.

特意按排台灣女生及幸男是晚於婆婆家留宿,好讓大家可以坐耐啲,畢竟有團友係P更收工趕過黎.大家玩得開心之餘,都想智勤於出國前可以有個難忘既聚會.

P更前後的日常

每次打完腊，都覺得愛羊特别精神，自己都有一份自豪感( 愛羊之人)。

上次番原廠換Seat 位兼check 車時，車行職員問我係咪成日省電鍍配件，因為同期回廠保養既車已暗唖無光。

放工兜去良景搵阿偉,交收代購既SAN DISK EXTREME PRO SDXC UHS-II卡,因為跟A7 III送既卡抄錄速度得100MB/s(同我初代A7果張差唔多,只係讀取快咗).

新舊兩代咭,屬同一系列,防震、耐高溫抗極寒、防水兼防X光,去旅行都唔怕有閃失.

A7 III可以插入雙卡,可以無縫容納新舊卡,唔會浪費(反而跟機送果張當係平日拎去曬相或朋友往來用).

試埋邦邦送既手信,相熟日系啤酒專用杯,兼手動發泡器.斟出黎,都似餐廳既生啤~~

復活節週日

朝早剪完髮,騎羊去市中心華都會合台灣女生及幸男,一齊入場睇超級無敵世界杯(朝早才用手機APP買飛).

由於係中午場次,所以買定小食(爆谷+炸芝士條)入場頂肚.炸芝士條無想像中咁好食,下次試炸洋蔥圈.

低光兼位置不利三人合照，故改為二人近影自拍,兩母子溫情地等開場。

故事講原始人部族被外來文明人入侵掘銅,男主角與族人為保家園,以對方最受歡迎及認同既足球比賽黎作挑戰.故事一般,無咩驚喜,但張堅庭配音既老馮就好好笑,夠晒尖配刻薄.另外,Keyman同黃興桂為旁述員配音亦係一絶~

散場食少少嘢,就番屋企,人家同幸男跟功課,我就快速抺車打腊兼美容.

三點幾至開工,無諗過都趕得切晚飯前完成.六點左右聽到Ben哥既叩門聲,原來佢同慧賢經過,順道家訪兼誠邀我去參觀新居進度.揀日不如撞日,4大1小係市中心既Berliner食晚飯.

PS:兩母子番到屋企仲有胃口食西瓜.........

沉澱.沉思

每次飲TETLEY'S,我都用番專用杯,除咗容量啱啱好,透明杯可以望住啤酒細泡之沉澱.

最後變得清澈,並被厚厚既滑泡所覆蓋著.以前經常係黃金海岸既星群地中海餐廳,與宿舍兄弟一齊飲TETLEY'S.同一輪廓既酒杯,同一結構既味道,少不了一份情義結~

台灣女生帶幸男去小學同學及家長行山,再去青山灣BBQ,我就"叮"熱尋晚有剩既飯餸(妹仔放飯).獨留家中至可以有時間,洗晾大人污糟衫,拖花園及家居吸塵........

PS:今日中午去荃灣拜山(幸男之太爺),的士司機唔熟路,將我同人家,幸男及老豆放底係海傍邊既區域.由於封路關係,我哋要行好遠至上到另一部的士,再兜番去靈灰閣山腳.....好在只係隻豬係跟我哋部的士,其他用品跟老媽及大佬大嫂部的士,無咁阻礙流程.

READY PLAYER ONE, 是日首枱龍拉麵食客

上次同幸男摸門釘,今日卒之都可以食到新墟既龍拉麵,仲要係是日最早既顧客(同嘉耀及JIM).

店內座位唔多,只得L字BAR枱外,顧客自行斟水,夠晒日式小店風味.

我揀咗$79黑龍(中間有一篤黑松露醬),唔知塊叉燒係厚切，俾多$15加多一塊。味道唔錯,櫻花蝦代替咗筍條。座位太少,怕等得耐,下次都未必會黎,除非好似今日睇完早場既時間.

食晏前同嘉耀及阿Jim一齊去英皇睇早場09:00既挑戰者一號,$50一張飛,超值~大量經典電影,電玩及動漫元素既虛擬網絡"綠洲",確實觸動好幾個時代既觀眾(70後至00後)之青春回憶.

"綠洲"內隱藏3個迷題,集齊3個答案就可以繼承"綠洲",各人可以去創立人James Halliday之資料館,搜尋破解線索.男主角Wade Watts成功破解第一個懸關,並與HIGH FIVE(網上對首5位破解懸關人士之尊稱)成員接二想出第二關卡之地點及過關方法.

遊戲廠商創新線上企業之創辦人Nolan Sorrento(昔日為James Halliday之實習生),為奪搶"綠洲"之控制權,不惜以最重火力既SIXERS團隊去防衛最後關卡地點,阻止HIGH FIVE,並企圖改寫綠洲既廣告及賭博限制.

男女主角既座駕非常討好,回到未來既DeLorean及阿基拉中金田正太朗既電單車都係我心中四輪及二輪既追夢車.

視覺享受背後既意念,亦好值得反思網絡帶來既問題,例如因過度比較而𧗠生出自悲感,過度消費(廣告推銷及遊戲中既課金或另類賭博),現實人群間之疏離.....