出車兜風變咗補買兒童節禮物

雖然天文台話呢幾日有驟雨,但明明出車前都係有太陽,係燊光食完個晏就落雨,好在有帶雨褸係背囊.

乖乖地搭巴士,係轉車站駁263出沙田會合康楠及嘉耀.未去車公廟之前,先係奇趣天地一齊睇玩具,發現有幸男玩開既新幹線玩具DX版.用智能電話將相片send俾台灣女生,再轉傳去外母電話,一如所料,幸男揀有二段形態既N700A.

康楠趕時間走先,我同嘉耀去搵地方飲咖啡.近六點鐘,間間都多人,唯獨Delifrance大把位.雖然價錢唔係太貴,但Mac Cafe絶對會好過佢(最衰隔離間老麥無).

坐兩程巴士上外母家,為咗呈上手信.DX版確實係靚好多,手腳之線條比例似番個人型,肩膊同胸部無縫連接.

背部亦多了一點立體感,唔會好似舊作咁以平面去交待.

第二段形態,與舊作差唔多,只係右手大拳有爪,以及多咗小腿褲腳既小修飾.