平淡但齊全的聖誕

社會運動下,無外出食聖誕晚餐,反而係晏晝出去貝爾特食午餐。行過排骨位見到有架綿掛上聖誕裝飾,記起以前我部SKYWAVE都會係風擋下加上鹿角頭飾作應節~

好在無話要硬食佳節套餐,可以照平時咁享用午餐,我倆已心滿意足。睇落似兩口子撐枱腳,其實只係幸男行咗去吧枱睇重足球賽事重播。

屋企食過簡單晚飯,就搭腳架影聖誕節家庭照。幸男既聖誕兼考試惠勞禮物,就係DX版既新幹線戰士(卒之都儲齊所有機體)。10秒自拍,每次我都係郁咗少少,可能我太趕入鏡.........

臨尾想影張我打橫係度既版本,點知"擇"到幸男同抱住幸男既人家,結果變咗呢張咁惹笑既家庭照~


PS:不知不覺間,幸男已經高過棵聖誕樹....

和牛@尚八

大假最方便約朋友食飯,偉哥提議黎呢間和牛放題燒肉。

第一次食生牛肉,咁就獻出俾大家........

啤酒就最夾燒肉,不過要散叫。呢度既放題有分A4和牛與非A4和牛,我哋擇咗豪華X抵食既A4和牛夜食時段(21:30~01:30),每位$398~

除咗和牛,客人亦可以柯打小食助酒。馬Sir遲收工,我哋幫佢上網打價的士錢,結果成功花一舊水多啲就會合大隊~

PS:其實今日我至試食正餐,為求萬無一失,出門前都食定喇叭丸。雖然唔係可以盡情嘆和牛,總算如期赴約。

LEVIUS-美學風格拳擊

尋晚又嘔疴,今朝都無食早餐,只係飲咗包檸檬茶,中午食台灣女生煲既粥。晏晝同幸男一齊睇NETFLIX既LEVIUS,因為美學既畫功為拳擊場面去腥,順便可以介紹拳擊既點到即止體育精神。

起初仲怕同MEGALO BOX相似,但意外地有驚喜,因為LEVIUS係真正機械蒸氣義肢所推動既拳擊。MEGALO BOX男主角(Joe)除咗起初用機械臂甲之外,中後段因無錢要順勢棄甲,純以肉身應戰。最後第二男主角利男亦解下融入皮膚既機械臂甲,以示尊重Joe,亙相以血肉之軀對戰,有點浪費咗機械拳擊既點子。相反,LEVIUS故事以戰爭過後既義肢普及帶出機械蒸氣義肢拳擊之興起,可以為拳擊帶出一點新元素,及違反正統拳術之新橋段。

PS:片頭曲WIT AND LOVE亦有驚喜,女聲帶點柔弱悽美感,意外地切合晝風及男主角既內心~

大假第一天

大假第一日,訓晏少少就輕鐵駁西鐵出V City ,買西餅番工司。之前老豆入院,都未買番嘢食黎答謝工作人員,所以順便買埋自己同事個份。店員一次過處理4打餅,有點忙亂。由於西鐵站近7－11出口有的士站兼有吉車等客,故順利運送番公司。

搭輕鐵番燊光食晏,忽發奇想：不如行出路口搭巴士出荃灣ICE FIRE買衫～

好耐無一個人出去睇衫,因放工又攰,放假又要配合2母子,番而大假第一天可以抽空。行過玩具部,唔見幸男尚欠既E3  DX版,反而有最新既alpha x。

行過Mirabell,見有對CAT好似都OK,應該會繼任電單車番工鞋。

見ICE FIRE有減價,結果買咗1褸2衫,再係千色店男裝部揀咗套睡衣～

番屋企放低戰利品,夜晚會合崇真書友係元朗YOHO MALL食極上大瀛喜。由於要夾大家時間,所以我今日至打去book位。大家都好驚訝可以有枱,因為平日都好爆場。$273,真係幾抵食,食材又唔差,只係個帝王蟹棒有點搵笨(只係大條蟹柳)。

Bistro Bon

原本諗住出深水埗買部TECLAST X4,但見有得買平板電腦支撐架,所以打消換機念頭。幾經波折,卒之都係太子搵到87D巴士站出去浸大Bistro Bon會合今晚既大老闆湘宜~光仔見未齊人,先上前菜小食俾我哋邊食邊傾邊等。

正式開始上菜,第一道:煙三文魚凱撒沙律~

豉椒炒蟶子以及蒜蓉蒸蟶子就食得多,呢款西式手法就真係第一次試。

威靈頓牛,如果屋企都有得食就好lu。

火鍋芋絲外型既意粉,睇得出擺碟既匠心。明明無咩配料,但又幾夠味~

彩雲同Grace與是晚大老闆舉杯道賀!!

鹽焗立魚,雖然我哋人多,但都夠分黎食。

紅酒汁牛扒,卒之可以擺脫黑椒汁,磨菇汁,蒜蓉汁同燒汁喇!

西式雜菜煲?呢個時候大家都有啲飽,而彩雲就認得個煲係佢送俾光仔既le creuset。

難得光仔出到黎影相,當然要搵光仔既兄弟幫手機。今晚光仔送咗支紅酒俾我地,結果係我同IVAN飲得最多。

唔好以為影完相就可以走人,食埋個甜品至準走!我揀咗蘋果批,光仔話呢款都多人鍾意。

PS:多謝彩雲用座駕兜埋我番屋企~

住家雞煲

雖然仲未咳好病好,但見好耐都無係屋企一家人食雞煲,於是照樣電話落柯打。台灣女生接幸男足球班,於,我就騎羊出去西川交收。咁啱外母係街市買多咗蝦同蟹,令今次既住家雞煲生色不少~其實我哋都好耐無去堂食,因為要遷就幸男番學及踢波既時間,兼且配料唔似以前有咁多選擇。

入廁所時發現幸男於玻璃浴屏上畫公仔, T 畫家於訪問透露,原來意境係足球國旗(睇黎幸男真係好鍾意踢波)。

童年回憶

由於魔神英雄傳於明年會有新系列出台,所以逢星期五BANDAI係YouTube重播第一代既集數黎做宣傳,我當然係乖乖開電腦芒黎重溫小學時代既卡通。

事隔多年,已淡忘既故事細節,再次從腦海中與眼前劇情結合。胡鬧元素串插冒險進程,最後以“登龍劍”作結。

PS: 小學既我點會諗到30年後會再次逐集追,兼且有另一位小學生作伴呢？

咳住黎行旺角

番完夜班,元氣大傷,抖咗一日至有精神搭巴士出旺角。交通燈號不足下,交車流比平常慢,但司機們都算禮讓。上Sony store睇豹哥份禮物(A7iii既叉電機),一心純格價,點知sales 哥哥話會員85折。“咁我係咪會員？”, 電話號碼驗明正身,成功享用折扣優惠。

上星際睇下相機嘢,結果買咗塊布。

落信和逛下,舊CD舖無開,只能隔住玻璃窗望。好後悔當年齋租CD錄落MD碟,無買CD 珍藏(MD已成泡影)。

每層都發現夾公仔機舖既存在,但又唔見多人幫襯…

行均現時點搜尋Pierre既禮物,卒之搵到間日版15機合1賣$3300,呢個價只係亞洲版既低線～原本想搵Faiz配Auto Vajin,但空手而回(當慳番啲錢買OGRE AN21)。

香港人適應力強,無欄杆之下,路人都總會搵到最佳過馬路既路線。

巴士入屯門會合足球班後既台灣女生同幸男一齊食晚飯,60X去到美孚都未坐滿人,明明七點撞正放工時間…

PS:今日卒之都著咗之前係日本買既sneaker,又真係幾好著,顯得電單車果對半桶boot好殘.......

早更後的爸爸

 

放工騎愛駒落新墟,先係相熟位置泊位,再行去食龍拉麵,乜幾時變咗“黃店”(叉燒由1塊變咗2塊)？店舖擴充至鄰舖,不過無打通,相信碗麵要經門口送去新舖。雖然有傳聞話係“偽黃”,但無所謂啦～

從同事口中得知恒生銀行之所在,輕輕鬆鬆轉個彎就到埗,安心為幸男既交流團排隊入數。

番屋企轉腰包模式兼TMAX行李袋,帶埋幸男頭盔去婆婆家接幸男去踢波。由於泊位唔夠近(第一次黎唔熟路),所以安頓好幸男就行番去帶愛駒過黎。

今日大會派波衫,幸男話要即刻著,但又真係大咗啲,攝晒衫尾都鬆泡泡。訓練有短傳及走位,最後時段有分組比賽。

解散前有課後檢討,呢個時候家長們都準備收拾行裝。

15分鐘就送幸男番至婆婆屋企食御膳,我就兜去良景買KFC外賣番屋企邊食邊睇LATE SHOW,卒之都可以稍息...............

V City新食店-但馬屋

未開張時已想試,開張後多人排隊,今晚卒之都可以得償所望~我哋揀咗日本産特選黑毛和牛放題套餐,回本目標係10碟牛肉!

台灣女生揀“美肌鍋”,幸男揀"千夜鍋",我就揀咗"藥膳麻辣鍋"(其實藥膳同麻辣又點扯得上關係?)。

幸男攞咗好多菇番黎,我就主力食牛肉,配料以雞髀菇為主,其次為粟米,雞肉,貢丸.......加湯真係添番相應之湯底俾客人,唔係齋水或百搭清湯。放題包飲品,除咗罐裝飲品,仲有逐杯斟既飲品,幸男揀蘋果汁,我就飲罐裝Coke Plus以減罪惡感。

PS:結果食得7碟和牛,唔知回到本未…價錢同食燒肉放題差唔多,都叫做食和牛丫～

第十三個花球

是日擺酒週年,同幸男講:"爸爸出去攞花,唔好嘈醒媽媽"。一如已往買番同款花球,今次老闆娘話攞唔到平時既單托,反而得較少有既雙托鬱金香。過氣新娘子依舊欣然接受,但覺得似壽球花多啲~

將幸男放係外母家,晏晝騎愛駒入元朗IMAX買飛睇即場既"極速傳奇-福特決戰法拉利"(對賽車主題有情義結)。

"Ford v Ferrari"主力講福特車隊各人(班主,行政團隊,領隊及車手兼機械工程師)交織出黎既奮鬥翻身之夢,夾雜著權謀及寫實元素。相比一級雙雄"RUSH",它無觸動心弦既配樂,以及車手間之熱血死拼故事,少了一點戲劇性,但賽車迷準會乖乖買飛入場。

散場就去王子私房菜食晚飯,見有大閘蟹餐,於是勇敢一試。唔怕貨比貨,點都係比唔上滬江。大閘蟹無咩問題,但其他蟹粉菜色則唔夠大方(蟹粉小籠包,蟹粉扒豆腐及蟹粉薑炒飯)。

PS:没有戲劇式既驚喜,只有二人既放空時光,黙黙地走過12生肖...