Sheep Rider Blog: 6月 2019

2019年6月27日星期四

心情複雜地睇MIB INTERNATIONAL

原定今日早班後,騎羊去華都會合老豆睇MIB (3) INTERNATIONAL,但番工中途得知TRUE CUT BIOPSY結果係DLBCL。內心一沉,但仍要繼續工作,及如期赴約。

強裝平日的從容,同老豆一齊睇呢齣笑料動作片。原本開懷大笑既心情(尤其係外星兵仔Pawny既觀音兵設定),變成苦中作樂。續集(3)故事係原有既世界觀加入新人物,分區,任務及懸疑,總叫輕鬆度過近兩個鐘。

散場時,只係輕描淡寫咁同老豆講係RA藥多既潛在風險,人大咗就唔係呢度就係果度唔妥,如果當初心臟檢查結果唔好,煩心臟病咪又係唔開心。約定老豆下星期二陪覆診聽報告,兼今晚2大1小番老家食飯。

晚飯後依舊係路口抱起幸男,等幸男可以夠高攬住爺爺黎鍚。番到屋企，我問幸男“俾你揀多次，你會唔會仲想爸爸照顧你？”。幸男笑住兼毫不猶疑地答“會”,其實我都一樣，好想再一次俾老頭子照顧。

2019年6月24日星期一

潮豐打冷

傍晚落雨,換上涼鞋加腰包就輕裝上陣,出輕鐵站等車入元朗。

一衆姐姐睇住我結婚生仔,感覺上係半個阿姨。平日工作忙,無咗好多閒聊既調劑,只剩下崩緊既氣氛,唯有工餘時間聚下。

PS:拎新腰包出黎拼吓,原來舊果個真係好殘…色水都差好遠…

2019年6月22日星期六

火鍋要在拜山後

過對面海上山探完阿強,Percy,瀟灑同Jay先行離隊,我同潘及華B就搭巴士去旺角搵定地方食飯。創興好多間放題都係2個鐘,唯獨呢間“一鍋豐”係2個半鐘,啱晒我哋食住等阿禮同Bill。

揀咗$268餐,除咗附送最多款式既海鮮配料盤之外,仲可以任飲大支裝藍妹(每人飲到一支已賺回差價)~

聽店員叔叔既推介,試吓馬來喇沙大頭蝦湯底,真係有隻大蝦做湯料喎~~

任叫既火配料選擇多,有我最愛既串蝦,牛肉都唔似吉野家咁得肥膏過肉。相比倫哥私房菜,我覺得呢度既配料質素較好。

有諗過叫職員幫手,但華B話自拍就可以了。我當時諗起ASUS ZENFONE6既FLIP CAMERA,可以用主雙鏡頭自拍。

食完飯同阿潘及禮行到朗豪坊角就分道揚鑣,自己行去旺角街市巴士站等63X。會考班至今,由讀書到投身社會及成家立室,都經過呢個車站,禁不住駐足係天穚上用NOKIA 9紓發回憶。中年了,要好好愛惜自己同關心身邊既人,畢竟體能及精神都過了頂點。

PS:之前係幸男房用NOKIA 9於低光下影既MONCHICHI,有賴5鏡HDR天賦,ISO 6400配1/4秒都唔會朦鬆~

2019年6月20日星期四

SHINKANLION E5 Mk II

三婆孫之前係日本旅行時買既新幹線戰士E5 Mk II卒之解封,因為今日電視正正播到E5 Mk II登場(我同台灣女生話要E5 Mk II出場至有得拆黎玩)。幸男努力地睇說明書,可惜都要向父親大人求助.......

新幹線會進化,“幸男笑”都係，唔再係見牙唔見眼。

自DX版起,新幹線戰士玩具既外型不再笨拙,Mk II就引入新變形及連成系統,不過依舊未能解決小腿外既車頭外殼之收納。

PS: “焦～砰砰砰！”,卡通裡既對白不時從幸男口中重覆。追問之下,原來Mk II 只係以新幹線形態出場,尚未變機械人…

2019年6月14日星期五

臨時組隊家庭自助餐@普慶

上午同老豆入元朗做檢查,食午飯時夾過日子,得今日可以係父親節前出街食飯(正日我要番夜班)。打去逸東問今晩自助餐仲有無位,竟然可以容納我哋6大1小。無諗過係下一個巴士站,會撞見老豆老媽同笑姨上車。原本就啱班次時間,好讓台灣女生係市中心收工上車,變成三代同堂坐巴士出九龍。

訂咗七點半枱,早到既大隊先行入座,一心食住黎等市區放工既大佬同阿嫂。我哋張枱係正冷盤食品檔附近,向前轉彎就見到其他主食既攤檔,變相我哋張枱所屬既區域唔會太嘈同人多。

深知幸男喜好既人家,同幸男一齊出去揀嘢食,當然唔少得串燒雞翼。

話晒是次主題係父親節,幸男同父親²既爺爺合照。

網上介紹父親節期間,普慶有不少威士忌風味菜式。

甜品亦有唔少選擇,威士忌元素就有粟子同咖啡慕絲。

人家搵到鮮果班戟,開心享用。

老媽主攻生蠔,而且堅持先食生冷嘢,再食熟食既原則。

有生蠔既自助餐確實係回本既保證,但由於衛生問題,餐廳職員不時溫馨提示顧客盡快食用(怕客人食完肚痛嘛)。

餐廳用上懷舊地板,本人就覺得好切合油麻地佐敦呢個舊區特式。

我受命去搵負責我哋張枱既女侍應生"傻貓"幫我哋合照,大家都好欣賞呢位疑似暑期工既侍應生之服務熱誠。

人家提議之下,全家男仕一齊合照~

PS:笑媽以農曆生日壽星女身份參加是晚父親節自助餐,老媽少有地笑得開懷~

2019年6月13日星期四

訓住食

經常夜訓既幸男,好多時邊訓邊醒咁食早餐,幼稚園至而家小三都係..........

過埋暑假就升讀小四,會唔會升到中一都仲係咁既樣食早餐??

2019年6月11日星期二

陪診

番完夜更,收到台灣女生通知話老豆下午去覆診(因FNAC結果而提早),好趕咁起身梳洗,翻熱尋晚既飯餸。騎愛駒番公司,係咖啡店買杯凍榛子咖啡,趕上日間大樓七樓會合老豆,靜待叫名。聽過醫生既陳述,即場做埋TRUE CUT BIOPSY,幫老豆止好血,就分道揚鑣。

先係雅蘭落車,配番吸塵機爛咗既集塵箱($120),再行去星際睇相機嘢。行埋信和及ACTION ROBO,慢慢行去逸東既FOOD HALL食晚飯。沿途諗起好多童年回憶,因為週未經常出黎同阿婆阿公飲晏晝茶或食晚飯(係阿婆屋企食或出街食)。冬天時係阿婆屋企行去碧街既巴士站等車時,都會食住啡紙袋內既炒栗子,食到手指黐淋淋。