太子購物團

今日早更過後搭巴士出太子始創中心,原定去Mobo+買藍牙耳機,點知臨走經過"SOLAR"電腦店,見有AVITA 14吋NOTEBOOK做特價。相比台電X4, AVITA LIBER 14"既spec都唔差,仲要個芒大啲。上網爬文睇開箱文,結果都以$3599買下紫色既AVITA LIBER 14"(因為$3099既128GB版無貨)。

約咗兩母子係海港食晚飯,邊行邊試新買既MAVIN AIR-X TWL耳機,話晒要趁首一星期有壞包換嘛。上網做足功課兼格價,起初有諗過買籃色(襯番愛駒),但店員話得番黑同紅,於是揀咗IRON MAN既金屬紅~

對比用開既NAKAMICHI My Ears II, MAVIN AIR-X既叉電盒比較大個,但充10分鐘就可以播放1個鐘,叉滿就可以用10個鐘~NAKAMICHI My Ears II叉滿都只可以用3.5個鐘,近來電量仲跌得好快,促使我換機既念頭。

榮獲日本VGP 2019受賞,音質定當有保證(話晒有aptx格式)。斜線耳道設計令佩帶更舒適。配合隨圓機身,MAVIN AIR-X比NAKAMICHI My Ears II更貼服地掛於耳窩內,添加一份穩陣~藍牙5.0及左右單邊使用係我既主要條件,而家有埋atpx格式兼更持久續航力,$780真係無得輸!

告別D9

原本尋日都有帶相機,可惜工作太忙兼唔方便一班同事於門外影大合照,唯有今日番晏補影。埋首於呢個工作坊已16年,即使其中一年(2014)出任過外掛服務,但不時擠時間番老工作坊幫手。

一樁樁軼事,一個個難關,一段段趣聞,一頓頓喜宴....昔日菜鳥漸變成今日老鳥,冀望與老搭檔及新世代一齊經歷更多回憶(@B7)~

這校園　這班房　這走廊　這禮堂
告別時　是我心的家鄉
到未來　那一方　人飄泊　路茫茫
仍然在這裡找到一點點光

AIA歐陸雜技團

適逢"歐陸雜技團"有買一送一優惠(新年前之早鳥),一家三口加埋老爺一齊搭巴士出去中環海濱AIA嘉年華既大本營。

雖然只係入去睇雜技表演,但都有停步影番張嘉年華主題照。

跟據大佬健既線報(佢同阿嫂睇晏晝場次),我哋早大半個鐘去排隊,為咗係所屬門票區穏坐第一行~

成功達陣,可以最近既距離欣賞表演~其實幸男話唔係太有興趣睇馬戲,反而係父母比較期待.....

細個時係電視見到莫斯科馬戲團既廣告,好想有機會去睇,但門票實在唔係一般草根家庭可輕易以負擔。

一小時既表演正式開始,例牌由主持向大家打招呼。

空中鋼線一字馬,開馬同收馬都令人擔心.........

無諗過有雙重鋼線平衡走~

渾身是勁既猛男,於滑動中既圓筒上做出各種平衡動作,之後再與女伴合演空中飛舞雜技。幸男最愛睇惹笑既小丑表演,可惜舉唔切機。小丑同時把玩籃球六個籃球,以及花式射籃足以令觀眾拍掌。

最後有電單車於狹小鐵籠內追逐,由原本既3架追加到6架同場獻技。

大會安排觀眾與電單車隊員合照(當然要課金),多人排隊兼幸男興趣不大,所以只係為倆母子快影一張就算。明白人家想我哋三爺孫留下合照,但無謂要幸男扁住咀黎影。

晚飯係IFC既利苑等位,餸菜一般兼唔太多選擇。行去巴士站時有點大風,老豆話好耐都無吹過海風,並順道講吓以前有帶我同大佬出對面海既舊事。市中心落巴士,駁的士番屋企。老豆話係巴士站放低佢就可,不用兜入村。一黎老頭唔想麻煩我地兜遠咗車錢,二黎我估佢真係好想趁機會走動下,畢竟困係屋企太多個月了......

PS:完成咗兒時既心願(與家長去睇馬戲),希望下次覆診時會有好消息,可以過多一個或再一個既新年。

F11攝影博物館 & Saint Germain

 今日跟台灣女生搭車出跑馬地,目的地係F11攝影博物館,一睹1959~1960既舊香港風貎。

一百蚊一位入場費,可以一睹大師Ed van der Elsken晚年無意中搵到既未沖印之照片,實在超值。我眼中菲林相既精髓,莫過於一take過押上精準既判斷及靈巧既操控,以呈現觸動人心既一刻。文字導賞由閣下之智能電話代勞,只要你掃下專設之QR code。照片中有大師Ed van der Elsken既馬場少女大腿系列,睇黎當年大腿己係好火辣既題材~

頂樓有Leica博物館,"奶粉"可以一睹眾古董相機既風采。由於有保安"目及"住,所以只係樓梯快影玻璃窗燈箱~

行完博物館,見未夠鐘食飯,去番巴士站附近既酒吧,因為呢度有好多生啤嘛~

人家都飲番支cider酒,因為唔見有咩特飲喎......原本諗住飲GOOSE ISLAND,點知售罄,唯有試Mahou(味道一般)。

坐到夠鐘,跟住google map去Saint Germain,由於我哋坐既枱係凹入既一角,所以唔太影到店內環境,但人家都不忘自拍。

Fish Soup一客,但上枱時卻分開兩碗,兼每碗都配上麵包,芝士及醬料。湯底呈紅色,飲唔出湯料,更唔好話係乜魚,總知好飲得黎又唔腥~

Buratta Cheese,大鄉里上網search係水牛芝士配蕃茄既輕食,無諗過大舊水牛芝士係中間。

Daube Nicoise,個牛肉又燉得幾好食,份量亦啱啱好,唔會兩啖就食完。

原本想食油封鴨,可惜餐牌轉咗,唯有試Roasted Duck Marget。皮面香脆,但稍嫌肉質唔夠幼滑,唔係塊塊都可以0趙得落肚。醬汁與鴨肉合調,伴碟既薯批非常香口,應該落咗唔少芝士同牛油。

雖然食到咁飽,但人家都仲可以一人獨享Lemon Tart,真係有第二個胃處理甜品?

一坐低就有侍應問我哋要Tap water定Sparkle water,我見San Pelegrino一支都係$70,所以揀咗後者。全餐計埋加一$957,總算可負擔既奢侈。可惜我哋唔知有是日精選既掛牌(行去廁所至經過望到),搵日再同人家出黎二人fine dinning試吓牛扒同海鮮類。

PS:今日一落車就好似去咗小旅行咁,感覺蠻休閒，多謝是日local tour領隊。

電閘維修

早幾日電閘不能正常啟動,打去電閘公司約師傅檢查,卒之等到今日。拆殼黎睇,一如我既估算唔係內藏既電線有事(我搵剷刀撥動感應彈弓時,清楚聽到平"答"一聲),而係個天線接受器壞咗!$1000檢查費,再加$500料錢,順利令電閘於新年前重生,出入電單車不再需要手動開關兼反鎖。

有點跟不上

夜班前的一覺,總係訓得唔好,醒來時渾身無力。年紀大了,有時真係覺得跟唔到十多年前既自己,亦即係廿來歲既同事。曾經同新力軍講"好似踢波咁,我只可以靠經驗走動補位黎挨到完場,唔同你哋可以盲衝全場",確實現今既工作量比當年更沉重....

"好討厭永遠配合既生活,唔係你有無心情去做,而係得呢個時間去做...",無諗過出門前呢段說話,會從溫書不順時既幸男之口中覆述(較夜時份台灣女生告知我,相信係一半覺得好笑,一半提示我要慎言)。有别固定日數既獨活,輪班既我放工後仍需配合2位正常作息既家庭成員,令番工時更覺無奈,分不清邊段時間至係私人時間,可以做點自己喜愛既事。

如果没有愛駒既方便,自由及速度之交纏,相信很難挨過每一個工作天。

PS: 搵日開解下幸男～

Mr Bean變通識教材

困鬱既社會氣氛下,有咩好得過睇笑片減壓？YouTube見到有Mr.Bean舊片,雖然係廿年前既笑料,但第一次睇既我同幸男一齊笑(刨番皀代替洗衣粉)～

除咗放漏底褲入洗衣機,當長裙係褲著都好好笑,仲要雙腳夾住內摺黎扮係褲......電視上既YouTube睇,真係方便好多。由於故事內既對白唔多,好多時係靠觀察動作及留意聲效,反而係一個好題材黎訓練幸男既觀察及理解能力(看圖作文)。

久違的父子購物團

上網做定功課,鎖定買呢對半桶靴黎騎愛駒。咁啱台灣女生唔舒服,幸男溫完書就跟我出K11。買咗咗唔夠2星期既CAT,係濕地下毫無抓力,對騎216kg兼雙腳只能前掌著地既我非常不利,故急於換鞋…

原本人家為我哋係串燒店留咗位,但由於價錢太貴,所以轉食三田制麵(特意加紫菜俾幸男)。無人家帶路,兩父子行咗好耐至搵到地方食飯................

食完晚餐,係MARKET PLACE搵洗碗碟粉,唔見網店果款,唯有買唯一既選擇…

明明話夠飽,見到雪糕又食得落。幸男話Venchi既Gelato好食過上次係Yoho Mall 既COVA。“個筒又脆啲”,我問幸男“每星期都為呢個雪糕出黎好唔好？”,幸男稍稍沉默就點頭回答“嗯”。我再問幸男：“第時會唔會捨得用$55買雪糕俾你個小朋友？”雖然幸男答會,但唔知到時會唔會話“屋企都有喇,番屋企食仲多丫”～

PS: 回程係西鐵站撞見雞髀同阿嫂,閒話當年～