小型工程啟動

前年裝修洗冷氣時,從師傅得知當初安裝高度不足,令客廳冷氣排水出現倒灌問題。由於其他工程已完成,唯有試下清洗以減少排水阻塞。事與願違,倒灌事故持續發生,所以索性趁大假搵師傅換個部新機以重新安裝。台灣女生話好在我無趕去做工作坊代表,先至可以跟進安裝後既手尾............

上星期六已收新機,今日師傅拆舊機兼安裝新機(師傅試機時仲話"嘩,好鳩涼喎")。經老豆介紹,搵咗個良景既冷氣店回收舊大金2匹機,收番百二蚊(因為佢出車上門收)........

客廳尚未完成補油,所以夜晚同台灣女生係睡房用LAPTOP駁JBL CHARGE 3一齊係Viu TV一齊追睇Love Generation。

睇一集時已覺得無Long Vancation咁大衝擊,主題曲既失色以及老掉牙既辦公室戀愛,令大家有為完成而看既感覺,缺失應有既感動,新意和代入......
 

午餐要在覆檢後

今早放低老豆去HK MDC做PET SCAN,自己行落去搵咖啡店坐吓,結果意外地係逸東酒店附近搵到呢間舊式餐廳。

睇番個餐牌至知歷史咁悠久,黑白相時代已經開業。

內飾走懷舊風,但不失簡約,感覺有點似歷史悠久既酒店。

老豆話住油麻地時都無行過逸東呢邊既内街,所以唔知有間舊式餐“飡廳”。

午餐牌約一百蚊上下一份,特式套餐就要多一倍價(驚見焗法國蝸牛豬扒飯！)。

網評話呢度出名瑞士汁雞翼,雖然講明制作需時15分鐘,但香濃而不鹹口既味道確實令人心悦誠服。特意安排檢查係最近覆診既前一星期,因為我好怕報告未如人意。原本諗住血科覆診前可以同老豆入戲院睇007 No Time To Die , 可惜被疫情順延…

PS:其實放低老豆係檢查中心後,我行番去近逸東既STARTBUCK坐底,邊食二次早餐,邊睇時效警察黎放空。

飲完都仲未夠時間接老豆,行去對面既永安運動部睇跑鞋。好多款都老土,得呢款啱心意,可惜每日都忙累,未能定時練跑。

很地道既解說

 

檢閲信箱時見到一份深入淺出既單張,不禁諗起利君雅既“講人話”。

空窗期確實係一個難題,如後天免疫力缺乏症,檢測者需要暫停性接觸3個月後接受檢測,才可以得出真陰性既結果。面對社交接觸傳染既新型冠狀病毒(另稱"武漢肺炎"),大眾確實難以排除空窗期之混淆。因為每一天既生活,都不能避免接觸有可能被飛沬污染既環境。

如當初肯全面封關的話,又何需花一大筆公帑去得出可信性不高既局勢評鑑呢?

愛電單車,愛電影

晏晝騎愛駒出土瓜灣既翔利車行,因為我係電話裡留咗個雨天鞋套。跟住語音導航之下,都係出錯咗一個路口,好在及早修正得切~

見店內有維修補品,多口問吓有無得代訂兼安裝MIVV既死氣喉。師傅話有,不過有客裝完兩個月就穿咗駁位,原廠換過條新既都係穿,所以唔太建議MIVV品牌。師傅推介TERMIGNONI,同樣都係意大利品牌,安裝未曾有客回頭投訴,品質有保證。經店員同意,影張相黎方便search下YouTube有無Tmax既配合同試聽聲效~

行去碼頭方向搵廁所,以前迫滿內地團既旅遊巴及遊客不復再,街道主調已轉為抗疫。

忍唔住拎NOKIA 9出黎影吓,如果愛駒可以行去碼頭仔盡頭就好了.....

閘內有乘客,但又係咪真係多人搭呢?

二百蚊有找,番屋企模擬濕地效果,矽膠質地跣水,即使底部有坑紋,但都唔及齋鞋底既抓力(睇黎未能解決地磚濕地泊車既驚險).....

天文台預報天陰落雨,所以搭輕鐵入元朗,於YOHO直接等台灣女生。六點會合,趕住去睇戲,揀咗MY CINEMA隔離既Glasshouse用餐。

二人餐,仲要升級埋龍蝦湯,埋單五百幾蚊。

原本諗住柯打"BROOKLYN IPA",可惜無貨,唯有揀ASAHI。食物味道唔差,可惜得一個鐘時間,我連杯生啤都飲唔晒就要埋單(其中一個甜品要打包走)。

怕醜既我,無係宣傳牌前自拍,只係為戲飛影相。

BATMAN Triology, Prestige, Inception, Interstella, Dunkrik都係我睇過Christopher Nolan既作品。今次既作品令一眾科幻電影迷驚訝,逆向時間觀確實耀目!!我心目中既老蘭,對時空有獨特既觀點,撇除BATMAN Triology,每齣戲都有涉及時間與空間既概念。今次大師就非常大膽地將逆向元素放入特務片,為觀眾帶來動作及舖排上既震撼~

PS:番屋企同人家係電視上YouTube睇解說(智能電話飛上A8F),人家頂唔住訓著咗,而我就好無耐都無為一齣電影而雀躍及著迷於網上網上解說。

融入家庭生活的星期六

放假日既下午,的起心肝騎愛駒去市中心,為客廳既光管作替換。番到屋企發現有2支唔係好著,於是出正去店舖作更換,點知即場試又無問題…老闆懷疑我配錯24W, 因好少用呢個watt數。番屋企望番舊光管,原來支支都係14W,得一枝係24W,偏偏我影咗呢支黎配…趕6點前去舖頭換番哂14W, 多得老闆好人事。

其實第一次出市中心時,回程係藍地買咗咖啡番屋企同台灣女生飲,個下都無過要再出出入入.........

係華都順便買過條type c叉電線,因為舊果條插頭已鬆.....

晚飯後,兩母子咁啱㩒去明珠台,結果一齊睇Vertical Limit後半段。

我已唔記得當年係租碟睇定入戲院睇,但廿年前既劇情,仍能令二人緊張。

事隔多年重睇,原來2008年美劇The Mentalist既女主角Teresa Lisbon,就係當年既女主角。我同人家全程係PEARL由第一季追到第七季結局,見證"真柏齊"既復仇追凶之路,以及與女主角有情人終成眷屬。

PS:泊車時既TRICK EYE MUSEUM~

新外飾,心糾結

早更過後,騎羊去學校為幸男領取上新學年既通告。原來停課其間,學校既紙皮石外牆已靜靜地被換上湖水綠油漆。校徽經過翻新,英文校名亦由黑色變成金色~

又熱又攰,行咗去屋村商場既Mc Cafe飲杯凍啡。幸男升小一時,我同台灣女生曾入學校參加講座。無論係外牆定內飾,都與我小學時無咩大分別。樓梯間既掛畫與扶手,地面既紙皮石,走廊半露天既中空橫濶式景觀........明白大人懷舊既心意,因為舊景物勾起不止童年及青年回憶,更重要係純真及夢想。

虛擬開學日

原本今日係開課日,但疫情下變咗網上教學。由於太眼訓,朝早無同幸男影相,訓醒時已經係中場休息時間.....

外母上門為幸男準備午餐,為咗唔好整污糟校服,我將我件睡衣冚係幸男上身。梳洗完就準備出相熟茶餐廳食晏兼番工,多得台灣女生為幸男預習GOOGLE CLASSROOM應用,我至可以安心補眠~

PS:全民驗測排長龍兼室內採樣就無問題,唔明點解學生帶住口罩番學反而係高危?