山寨美學

今朝臨番工前,試用尋日收貨既Alfabot T30無線吸塵濕拖機。 相比用開既Philips SpeedPro Max Aqua,今次地板無咁濕,因為我可以係把手控制出水量。太濕的話就唔落水兼前後推拉,讓轉動既刷頭fing乾,繼而擦乾濕地。最正係佢既自動清洗模式,用一分鐘黎沖水兼fing乾(我就㩒咗四次去洗)!

上網見過介紹短片,再上網search Alfabot , 但搵唔到公司網站。估佢係山寨貨,果然收貨時見個盒寫shenzhen…

上網做功課,搵到呢個最近似既正牌TINECO,只係個水箱搬咗去後方兼電池改為可拆式。可惜TINECO無行貨買, 近四千蚊得一年不知明保養有點呀煙嘛~

有別於Philips SpeedPro Max Aqua齋吸水箱水既平面抺布(平日我會中途換專用抺布),轉動既濕刷頭不斷濕水再fing乾,感覺好以乾淨啲。雖然山寨品既奧義莫過於零開發成本兼可以順勢加入優化元素,但我希望正品早日有代理引入香港。

PS:轉動濕刷頭既效果比平日既Philips SpeedPro Max Aqua乾淨,但始終都係有水痕,下次都係用番塊舊沖涼毛巾印乾。另外,Alfabot T30做唔到Philips SpeedPro Max Aqua既水平切入。舊機留番黎平日輕便乾吸,狩獵昆蟲或窗簾除塵。

電單車後鏡?

今日番早兼夜更,中間收工時間,見到有部車掛上中置後鏡!!應埋睇唔到頭盔正後方丫,唔通只係當係私家車側鏡上之魚眼鏡咁望濶少少?

 

雖然非常好奇究竟可以望到咩view,但我都無騎上去作實測,只係影張相作參考。希望泊車時有機會遇到車主,可以親自問吓~

韓男

放假日,台灣女生接放學,我就去茶木搵定位食晏。人家話市中心有間新既齋剪髪型店,建議去望下。店內得一個師傅為女客人剪髪,於是嘟八達通俾錢等候。

我行去超市望下有咩買,另一邊廂既人家send相過黎,幸男已經就坐。

幸男唔太滿意新髪式,回程用校服風褸頭兜遮住個頭。番到屋企,好唔情願之下俾媽媽影「오빠」OPPA頭。幸男話以後都唔會再去呢間髪型店,令願去番婆婆屋企附近商場果間~~

PS:我同人家都覺得係短咗少少啫,長番啲就無咁韓風。

二人逛東涌

台灣女生放大假,夾正我今日例假,雙騎入東涌行OUTLET,不過先去人家訂好枱既地方食晏。東薈城泊好愛駒,經過公園就到海邊,到達與公共房屋相對既酒店。烈日當空之下,行15分鐘都有點辛苦,下次都係兜到黎附近既鬼崇位暫泊(當初怕人多兼無位泊)。

唔熟路,要問職員至搵到LIFT上餐廳所屬之樓層。酒店地方,職員都係講英文。

上網查餐牌上既陳述,成功揀好心水午餐,Young Master Pale Ale當然唔洗查字典。

女生既視角,點既係Sparkling Hibiscus Lemonade~呢杯mocktail都同我杯生啤差唔多錢($75vs$80)....

綠色既湯究竟係咩味?好在個湯係跟台灣女生既set lunch。

人家揀呢間餐廳,因為有我喜歡既dry aged牛扒。雖然呢個dry aged T bone要成千蚊,但真係好味兼且晚市都係一價錢。

Set Lunch既牛扒都唔差,話晒都要補錢嘛~由於份量十足,結果我哋都係食唔晒,唯有拜託職員打包剩餘既牛扒,西蘭花同焗薯。

坐唔到窗邊位,只能隔遠望海。食物同環境都唔錯,希望下次再有機會黎再食飯或小酌。

食完飯,行番去東薈城行OUTLET,分別係POLO同TOMMY HILFIGER為自己同幸男買到新衫。

原本諗住試Moccato既蛋糕,但無力行番去商場另一邊廂,貪就腳係i CREMERiA放茶點。人家睇中咗杯日本士多啤梨紅茶梳打特飲,我就只係飲杯凍cappuccino。

茶點過後,行番去Chloe'買過氣銀包。由於藍色得番陳列品,結果順利成章買咗個桃紅色全新品。其實人家轉用咗細袋,所以用咗一年既長型銀包變得太大。雖然唔係最新款,但合眼緣兼實惠就更緊要~

PS:回程時撞正近六點既放工時間,要係泳池附近駛出公路,行小路燈位以迴避塞車路段。晚餐係人家主理既輕食,難得既二人電視慢活。

新背囊投入服務

尋日係LOG ON買既Vibe 25L Anti-Theft Backpack,比舊既FOCUCED SPACE大啲,放入愛駒收納格內佮佮㪠~

內裡以淺灰配疑似地圖既花紋,外格有唔少分格,方便分類。拉鏈網格用黎裝鎖匙同車匙,電話銀包同耳機都應該可以妥善安置。

之前見過海洋藍色版本(上一代),覺得唔襯非運動向既衣著,今次既石墨灰色比較百搭。多項防盜功能,故重量比用開既FOCUSED SPACE多,但孭上身又幾舒服。我最鍾意佢既拉鏈扣鎖工能,孭住黎騎愛駒都唔怕袋口意外打開。

PS:尋日買完背囊,唔想另買個購物袋,故將幸男之背囊放入新背囊內,並拜託幸男代孭。幸男苦心婆口咁話媽媽個手袋個開口無遮無掩,唔夠佢既背囊安全~

星期四的接送

每逢星期四,都係趕住接送既日子。幸男放學番屋企食過晏,做吓功課。臨近六點,幸男食少少外母準備既熟食。換過衫,幸男就坐愛駒後座去上足球班。

放低幸男,自己騎愛駒去貝爾特,相熟位置泊車,相熟大堂空氣。坐低就揀好晚餐,安心等食。

平時呢個時間會同台灣女生一齊食,但今日人家有約。最正既係呢度唔會無位,而且可以舒舒服服咁坐到夠鐘去接幸男。

送幸男上外母家,再趕去牛潭尾接聚會過後既人家。跟住地圖語音導航,臨入廻旋處被人家既來電打斷,好在之前已聽到第幾個出口之提示。成功出廻旋處,行多一陣就到達目的地。

番到屋企睇DVD版既SWEET NOVEMBER,原來劇內無YouTube常見到MV個首It's Not Goodbye,反而係Enya唱既Only Time。當初我都係被呢It's Not Goodbye配SWEET NOVEMBER劇情之MV所吸引,至四圍搵有無藍光或DVD碟(咁啱上星期俾我係CD WARDHOUSE問到)。

人家笑我真係好鍾意Keanu Reeves ,呢啲咁既韓式偶遇X絶症X愛情片,周生係唔係專心由頭睇到尾,電話都無㩒過一下。

PS:其實幸男今日戴既唔係專用頭盔,而係媽媽果個,因為趕唔切番屋企換頭盔。

新電蚊香機

天氣熱就開始多蚊,之前係良景買唔番用開既電蚊片,所以今日兜去置樂相熟藥房望下。

雖然搵唔到另一款相熟品牌既驅蚊片,但見到有呢款驅蚊片同液兩用既機。而家每個睡房都一部,唔怕針到扎醒。期待朝早訓醒,見到地面有倒卧既蚊體。

大假的獨活

無跟兩母子去camp,自己一個人食完晏就騎愛駒去補給下日用品。難得可以免口罩戶外運動,抹完車就出球場跑步,時間都唔算差太遠。之前有諗過番早更前跑步,但怕嘈醒台灣女生,故一直以此為籍口,疏於運動。

沖完涼,騎愛駒去友愛買大雞大,見商場內有串燒小食店,試吓非日式燒牛舌。

TMAX已入伍近3年,可惜都係少去兜風,至少要再去車公廟及鹿頸。

大雞大bb雞水準一如以往,牛舌就一般,下次都唔會再買黎食......

其實今日無見過倆母子,我出去食晏兼買嘢果段時間,佢地就番屋企换行裝。

説穿了,只係父母們為小朋友安排既同學聚會。

有得玩,有得食,背後辛苦既係媽媽們。環境尚可,只係紮營地方望墳(有點似以前入大棠打war game 既經歴)…

遲遊屯赤隧道

新通車時日日都拉龍,開幕3個月了,今日出車非常順利,半個鐘就可以由屋企到東薈城~

行前少少,過埋馬路就可以入商場。對上一次入黎係2017年去長沙camp,睇流星雨果次好趕咁係taste買打邊爐嘢。

今日既目標係買平鞋,因為平日騎羊著既鞋,已經蝕到無抓力。買第三對係最平既折扣,只得2款合眼緣,一心買番著緊果款,可惜已斷碼..............行埋樓上既timberland,見有唔少賣衫既店舖,搵日同台灣女生一齊坐愛駒再入黎行吓先~

回程無去程咁多車,可以享用TMAX DX既定速巡航,平日公路上車距太短,確實好少機會用得著。番屋企泊車時,驚見尾呔中螺絲釘!好在唔係排水坑既薄位,尾呔通過泡水測試,暫無漏氣之嫌。

其實都驚口釘太長,一掹出黎就即時漏氣,好在無事過兩日再check呔壓。

呢兩款就係今日既收鑊,其實我之前著過類似上方藍色果款,不過係白色兼非網面。