少見多怪

今日係公司泊車,見到有架Fairing車既布冚鎖有埋個防盗器 ,覺得幾特別,唔知係咪智能電話藍牙配對開關呢?

之前睇中ABUS既藍芽碟鎖,貪佢係keyless,用智能電話既專用app就可以控制開關。網上搵到油麻地既頭盔王有得買。一直都無行動,因為愛駒都好少係長時間泊街,多數番工放工或係區內補給日用品。另外,最怕個鎖壞咗要自己鋸security level 18既精鋼........

FAST & FURIOUS 9

因疫情而遲咗成年上映既FF9,卒之呈現大銀幕。今日幸男加入當年睇"正義聯盟"人腳(老豆,大佬,我同人家)入場,因為電影宣傳片內既撞車特技,遠勝SWITCH既ASPHALT 9。已經唔記得上一集講咩,只係認得被困押既女奸角係上集出現過。

飛車兼爆破故然係主打,但男主角無端端多咗個細佬,兼家庭糾紛,劇情有點老土及突兀。鋼索釣呔鈴揈過山谷,高空發射火箭綁車上卡門線(以影響衛星)......動作設定既誇張,絶對可以中和牽強既添食感~

大佬健約咗阿嫂食飯,所以我哋一家三口同老爺一齊搵地方食晏,結果去咗La Postre。由於我哋遲出門,無時間開場前合照。散場又人多,故無三爺孫一齊影相。防疫操控之下,院內只可三人連座,所以幸男由爺爺同伯伯看管(臨尾仲借伯伯件風褸著)。

幸男既松葉蟹意粉,好似木乃伊咁(肉量都係)。人家同老爺揀黑毛豬扒配薯條(份量OK),我就揀焗蠔義大利飯(蠔比menu縮水)。

埋單上去一田買定今晚餐餸,見到有少爺啤既檔攤。生啤即場入罐喎,當然要耐心等到開檔時間四點。

第一次屋企食火鍋配新鮮生啤,仲要係大罐裝～味道有别超巿既常規款(Pale Ale, IPA ),玉露係LARGER啤加上四川青花椒既麻勁,期待試飲另一罐既SPINNING PEOPLE(triple hazy ipa)。

PS:仲記得想當年同德輝,表叔,大豆,Emily 入戲院睇第一集狂野時速。

飛車趕買手制黎飛車

跟機既+JOY CON因電池老化, 早已換上士啤既SPLATOON綠配粉紅色制。唔經唔覺已經玩咗SWITCH既Asphalt 9有7個月時間,粉紅色+JOY CON既SR及SL制開始時得時唔得。晚飯後一心開機儲Ferrari 488既設計圖,點知完全無反應........試過用+JOY CON代替,但四粒制偏向中間,篏入呔盤後右姆指難以觸及。

晚上八點三個字,置樂利寶及華都Domain都可能已拉閘,唯一希望係騎愛駒飛去市中心吉之島玩具部(轉埋個彎就到0架喇)!

雖然有單一隻+JOY CON賣,但只係得紅色(兩舊幾),結果買咗呢個藍配螢光黃(五舊幾)。

其實原本既劇本係打機儲一陣488設計圖,先至騎愛駒去接幸男放足球班~

努力至半夜三點,卒之都將488既設計圖集齊!黎緊就要儲C幣黎將佢升級能力值。

情義結在之前睇MAGNUM PI,男主角就係渣住Ferrari 488 Spider四出行動~可惜game裡無開蓬版,未能完美投入角色。

PS:問過康楠,原來SR及SL制係易壞既設計(薄片線路)。暫約康楠下星期換淘宝件,留番黎做士啤制~

堂食燊光常餐

放假天,訓晏啲補回五天工作下既透支,近中午就出裝身騎愛駒去接幸男放學。由於今日要近一點至上完特別班,馬路不再塞滿正常放學時段既人群同車龍。靈機一觸,不如直接去燊光食晏丫?

平日係學校附近商場食晏,以逃避塞車,今日就好舒服咁去到相熟茶餐廳~幸男已好耐無坐愛駒後座黎堂食,假日都係食FOOD PAPA既外賣常餐。

話時話,幸男由幼稚園起就係食常餐,只係由仿鮑絲火腿通粉,轉沙爹牛肉通粉,再轉食羅宋湯扭扭粉。

PS:食飽上車時,幸男嗌"個位好熱呀~",唔記得幫佢搵嘢遮吓後座添~

悶波悶到訓著

十點三,一家三口坐定定睇西甲決賽-巴塞隆拿對馬德里體育會。睇到近70分鐘,幸男已體力不繼,係梳化鐘眼訓。中途有旁述講基斯文錯失射門良機,幸男半訓半聽之下都出聲:"千..古..罪...人..."。

訓到口水流出,幸男至醒一醒。抺過口水,見比數依舊,好快又再訓番。我同人家見證和局收場,睇黎幸男真係訓得英明~

PS:夾手夾腳抬幸男番入房兼拾級放進被舖,"蘭蘭"已經唔再係一手就可以打橫抱入懷裡........

跟蹤失敗

原定今晚叫幸男踢完波,就自己搭輕鐵去婆婆屋企過夜,台灣女生負責係球場附近監視及跟蹤。我就騎愛駒去外母家樓下,再去輕鐵站迎接幸男落車。

月台上既我一直與人家通電話,正當人家衝上月台時,人被身旁既幸男問路:"媽媽,我係咪去錯月台呀?"(幸男從對面月台驚覺方向箭咀與目的地車站不配)。邊有人跟蹤跟到甩咗個目標?探員既解釋係成月台都係著住同款波衫既小朋友,而且怕早上月台會被目標發現喎.........結果人家送完幸男上樓,再坐我車尾番屋企。

過埋個暑假,幸男就升小六。除咗要培養自理能力,日常生活細節都係,例如點餐。

今日放學同幸男去咗HK DINNER食晏,我揀午餐,幸男揀常餐。味道尚可,只係選擇唔算太多~

熱<愛

平日外母負責接幸男放學,我就係閒日放假日子俾外母可以抖吓。貪就腳兼避塞車,好多時都係八戶屋食晏,但質數好似愈黎愈差......

 

大熱天時,坐電單車確實需要一份"愛",同埋一條冰巾纜頸黎降溫。

番到屋企,忍唔住手為愛駒補噴膠邊保護劑同抺車(皂水再過清水)。

對我黎講,電單車除咗代步,仲係愛好!速度感與敏銳度,連接身與心之聯繫~拉筋小習慣下,腳痛得以減輕,希望今年可以騎愛駒去多點地方。

人生第一個真骨彫

今日卒之拆開之前訂購既真骨雕BLACK,網上熱論其肩關節軟膠之耐用性,我就欣然接受筋紋既重現。

我反意較在意肩甲既大小,可能係要遷就活動幅度。除咗右胸有一點小瑕疵(白點),我讚嘆呢隻BLACK真骨彫既質感和比例,因他完美呈現特攝英雄於掌內~

PS:細個時已背熟BLACK及RX之変身動作,真骨彫令我腦海同步重現。