I'm an angry father

幸男升小六了,但解難能力依舊令我擔憂,甚至係動氣。

話說賽車GAME停滯不前,故我提意拎番隻足球小將出黎玩。對立花兄弟輸7:0,唯有重回練習。幸男未能成功於鳥籠訓練做出20個傳球,只會一邊喊一邊不是味兒地盲試。即使提示埋要推方向桿住合適之球員,再按傳球制,以圓周陣作短傳黎廻避敵人既搶截,但幸男都係無毅力去完成(仲不時交錯球員)。

平時同同學打FIFA時已係咀炮隊,睇波亦然。我一向好唔喜歡諉過於人以及無反省既觀念,好明顯幸男已被寵壞至只會理所當然地接受別人既愛及照料。遇到困難,只會以喊作逃避而不懂得自我反思兼解難。

PS:如果香港既社會氣氛繼續往現方向朝進,我真係好擔心幸男他日能否於社會求存.......

下雨天

是日落大雨,無得騎愛駒點對點出觀塘,一落巴士就濕住對腳咁行入工廠區。

臨近午飯時間,係附近一個工廈見有樓上食店,望中Bistro La Bon Oyster Bar & Grill。一心可以少酌,可惜該店仲未開門(準備中),於是去咗同層既六両三食台灣嘢。大鄉里,唔慣用食店WiFi兼掃QRcode落單,問過職員至落到單。

加錢揀咗牛肋條肉,但味道唔太驚喜。雖然裝潢係黃店,但性價比不高,當一份支持就好了(茶木好食啲)。

有經驗下行到威登中心,今次就㩒攞機既飛,。Keyboard面版連摺鉸一併更換,。收機入背囊時,驚見古早Mac機～

PS:回程係巴士站望到裕民坊YM2 ,當年舊址已不再有痕迹。

夜班後的日常

夜班收工,啱啱落完場雨,去攞車時見到有彩虹。感覺似辛勞後既鼓勵,但又覺得重拾熟識既定理。四十出頭,由細到大認為理所當然既事情,宜家已變得模糊甚至荒誕。或許雨後晴天,不再有彩虹的話,大家都不會感錯愕。

訓醒去相熟茶餐廳食晏,再入元朗良記續牌費。無諗過一人前拉麵會仲挨得住,畢竟疫情下好多店舖變成吉舖或轉手。

太陽傘既退色兼污糟都可以接受,但開始薄到穿窿就真係時候要更換。呢個篷已經係入黎住既第二個(用咗4年半),第一個反而用到6年半。以WHATSAPP詢問舊店,色版依舊,但變咗係支柱靠邊兼立於篷外。睇黎要開家庭會議,商討新布色~

TMAX腳車

晏晝三點半幸男要趕去踢賽馬會足球班,當然係以愛駒作載具。日光之下,於看台曬住腳黎影相,唔少都係背光黑面作品.....

熱到爆,帶去球場既水都唔夠幸男同自己用,中途行咗去隔離既SHEL油站買水同寶礦力俾幸男。我仲第一次俾錢放容器(可摺疊式水樽)入機添凍水,可惜漏咗電話係球場,無得影低。見到雪櫃內有罐裝藍妹,忍唔住買咗罐.........不過掛住去斟水,漏咗係櫃枱,好在店員係我出門口時提醒我。

台灣女生補鐘早放工,睇咗陣幸男既後半既比賽。夜晚去貝爾特食飯,我先騎羊去攞位,走個陣都係一個人騎羊。

其實足球班之前,我帶咗幸男去眼科覆診。由於撞正面試班時間,唯有用網課模式參予(期間要幫手連接藍牙耳機)。度數同舊年差唔多,繼續努力滴眼藥水~

陪幸男去眼科之前,我騎愛駒出去觀塘,因為幸男部AVITA notebook螢幕鉸位爛咗....過往十年都係觀塘check車,加上地圖app語音導航,絶對無行錯路或入唔切線。

早幾日上網補登記保養,先至可以受保(延至2年)。一如電話查詢所講,最快3日後通知取機。

PS:係觀塘直往燊光食晏,室內無位,唯有坐半戶外位。可以望住架車黎食,熱少少都無咩所謂,因為TMAX既係腳車亦係愛駒~

衝擊壽司郎

 

原本委託台灣女生於午膳時間代取壽司郎既飛,點知四點左右已經要入座。遲放工都騎愛駒去市中心搏下仲有無得攞飛,明明見掛住無WALKIN籌,但又有人排住隊,於是照排住向店內推進,成功㩒到一張4人枱飛!!

雖然好攰,但又唔想番屋企再出過黎,於是去咗cafe坐底等枱兼等人家及幸男會合。見有free wifi,於是邊睇GUNDAM 00電影黎等。

唔由頭翻睇都唔記得,原來開場有一段娛樂電影既天人部隊,而真正經歷過戰爭既沙慈當然覺得好諷刺。六點左右,文朗到CAFE會合我,一齊坐住飲住黎等枱。

外母帶幸男出市中心會合人家去買足球鞋,大約八點唔夠就可以入座~食物選擇多過元気多多,難怪開張至今都係排長龍～3大1小,40碟,8舊水埋單。睇黎往後都要一放早更,就撲過黎攞定飛搏食19：00果轉。

PS: 現實不會像電影這麽美好,令我諗起Batman既台詞"Sometimes the truth isn’t good enough. Sometimes people deserve more. Sometimes people deserve to have their faith rewarded."

父子三級片

朝早同老豆去STAGE睇自殺特攻隊,今集比2016年既首集,動作更出色,角色更鮮明,笑料滿載。

隊長Rick Flag之外,Bloodsport亦算係帶罪隊員之長(戲份都多),帶領一眾隊友執行自殺式任務。其實我最喜歡King Shark,因為佢儍更更,好多笑料,例如裝黏土炸彈時搓公仔,以及於大魚缸前跑跑跳跳。

女主角當然係小丑女最搶鏡,瘋狂既行徑配上少女心,茅盾既張力~

晏晝同老豆去食敏華餐廳,老豆揀咗"黯然銷魂飯",仲讚夠晒熱兼焫咀。

PS:尋日同幸男去STAGE買定飛時,俾職員姐姐提示小朋友唔睇得。我回覆:小朋友只係陪我黎買飛,一張大人一張長者丫~(其實我至係阿仔)

再歡送你

今晚出去荃灣一品雞煲食飯,因為雞髀下個月就舉家移居海外,舊同伴一齊聚吓。記呢兩同學初黎報到既胡鬧情景,為工作坊帶來不少生氣~

臨到餐廳果三個街口,突然落大雨,所以鞋連襪都濕晒,影張時都係噏住~有別之前轉行既歡送,今次將會係難約相聚既地域性分野。邊食邊飲邊傾,好快就坐咗成4個鐘,祝生活愉快~

老頭子生日飯

好耐都無一家人出外食飯,今次適逢係食老豆既生日飯,更加難得!祝老豆生日快樂,身體健康~

今餐最特別既係黃油蟹,雖然係貴啲,但真係好好味!老豆仲係戒口期,所以只係飲少少紅酒兼合照做下樣~平日較多意見既老媽,都讚呢味餸多工序兼好食,亦滿意樓面既服務。

疫情下,平日walk in海鮮選擇唔多,所以要一早留枱兼預訂食材。

點少得老豆既至愛-(之前佢試過係自助餐食到胃痛.....)龍蝦?其實仲有條魚同西湖牛肉羮,只係無影到相。

PS:大家都食得開心滿意,回程一齊搭輕鐵。心水清既老媽問我幾錢落樓,我答佢啱食又可以一齊坐就好了,咪當一次過補食番佢二月生日果餐。

熟成接力

等咗成個月,之前搵阿偉留貨既VINTEC酒櫃,今日卒之都收貨喇~有別退役既VINVAUTZ12支裝電子紅酒櫃,呢部VINTEC係行壓縮製冷兼可收藏18~20支紅酒,往後可以訂一箱加散裝。

希望幸男大個時,呢支酒同樣可以成熟既狀態去祝賀幸男既新階段~

PS:受制於電子製冷兼年時已高,舊機實質製冷溫度比設定高出十度(夏天),絶對不利愛藏。