シャドームーン(SHADOW MOON)

是日A/N,番夜班前拎出尋日P後交收既真骨雕影月出黎玩吓,上色唔見有太大既瑕疵(還得神落)。

拎埋多年前既SHF影月(左邊)出黎作比較，真骨雕忠實地呈現特攝片既比例!!

有別SHF,真骨雕既影月可以換上2段關節既褲仔,完美平衡外觀及可動既需求。

PS:趕番工,急急將新品安放上神位(display櫃),搵日安排兩位真骨雕既世紀王一齊交手合照先~~

BALL換入,ENICAR退場

戴開既ENICAR(服役9年)已經殘到上鏈都唔太順,今日扚起心肝,將行街用既BALL推上前線,變成全職粗用錶。

雖然工作時間唔會戴錶,但每一程既電單車歷練都會比文職戴法更秏損。無諗過世界呢2年黎都未能與疫情共存,更無諗過自己會活係東德,唔知有無機會戴住佢黎去旅行呢?定係只能提示我,香港曾經係世界既一份子呢?

PS:新錶上既時區亦提醒我,咩時間至啱搵海外舊朋友作電子通訊

怕羞的鏡粉

臨訓前,台灣女生用XPERIA向幸男分享舊歌MV。點知幸男向人家推介MIRROR既歌,結果兩母子用XPERIA飛姜B既"阿特蘭提斯"MV YOU TUBE上電視睇。 

用NOKIA 9黎影低兩位鏡粉,兩母子夠膽睇唔夠膽認,並以手及咕臣遮面...............

為張櫈出港島

趁大假,同台灣女生一齊出灣仔睇電腦櫈,因為坐緊果張IRIS TORCH唔夠三年就無晒及承托力,變相我坐到頸部被推前。

上網做足功課,特意唔出近啲既觀塘分店,因為得灣仔分店有日本OKAMURA實物陳列。試過其他品牌,都係OKAMURA既SYLPHY最啱心水,陳列品有埋個頸枕位,頸椎不再被推前!!MADE IN JAPAN,$8500成交,等2個月左右到港再安排送貨。

咁啱樓下有間叫KNOCKBOX既cafe,於是入去歇吓腳。

凍飲KB TONIC好似幾特別,人家揀咗nutty flavour既焦糖咖啡。

Cafe有生啤飲？仲要係少爺啤添！點可以錯過呢？坐吓飲吓，篤吓電話，慢活閒聊吓。

店內有set lunch輕食，18：00休業，睇嚟係主打附近既白領。

傍晚行SOGO，之後去食RED LOBSTER(當年係日本旅行食過)。

唔知係旅行心情問題,定係食材既問題?今次係香港食既感覺,並無當年既歡欣。

PS:上菜速度慢,大家呆坐了不少時間......原來除咗酒店餐廳,其他餐廳都陸續轉為C類食肆,要食客嘟安心出行,好在我有專用機體~

慶生要在放學後

是日閒日,幸男放學番屋企做完功課就搭車出太古城,因為有CYBER FORMULA 30週年既展覽。最搶眼既當然係Lifting Turn中既V ASURADA AKF-0/G (Livery Edition),唔少FANS都拍照打卡。由於台灣女生操刀既父子合照失焦,故列入"永遠珍藏系列"。

呢張幸男扮被SUPER AERO BOOST MODE既AN-21凰呀追趕。

宣傳空泛地講5G RV實體虛擬賽車體好似好勁,但原來只係得職員車係雷神外殼,訪客只能渣普通車款。其實只係RC車CAM以5G通訊將車前畫面呈現訪客面前之螢幕,而訪客以賽車遊戲之軚盤及腳制黎控制RC車。車速唔高,而且畫面解像度不高兼爆格.....

精品區得模型車,布公仔同口罩賣,無日本當地咁多雑貨揀.......

失望地行完CF 30週年展,係商場內一間日式餐廳快食(明天仲要番學嘛)。

Call車番屋企,照舊影張家庭合照。

又大一歲了,出年升中一,確實擔心唔夠獨立既幸男.....

生日禮物得TOMICA車仔同條輕鐵?人家已係早前買定個LEGO版魯營球場,仲有伯伯同伯娘既LEGO TECHNIC藍牙遙控車(唔記得入鏡)。

PS:食飯前係LOG ON買咗個坐墊俾幸男,等佢做功課時可以無咩易變蛇腰。另外,原本出發個程搭巴士,但行咗一個站就收到ALARM通知,結果我要先落車行番屋企處理完,再出市中心會合兩母子上CALL車追番啲時間。

台灣女生牛一

是日台灣女生牛一,臨出門前向幸男撒嬌索吻,小六生半推半就向媽媽表達了祝福。

無得去旅行下,酒店既STAYCATION成為酒店及港人既寄託。今次既半島STAYCATION,當係我送係人家既生日禮物(雖然係佢自己預約)。12生肖cross over 12星座都走過了,老夫老妻兼老對手,禮物亦由驚喜變成一齊商議~

原本係住舊座,但因生日月份兼新座有房多,所以被提升咗一個級別既房間。

浴室內有幸男最愛既浴缸配電視,可惜今次係純大人既休閒時光~

書枱上放有一個生日蛋糕,味道一般,志在氣氛。

望唔到海景,所以內街背光作佈景都無咩所謂,祝壽星女生日快樂~

大型組合櫃內除咗收藏茶具,咖啡機及雪櫃之外,原來仲有個電視機。

由於我哋遲check in,所以係房唔係hea咗好耐就要衝去log on買浴鹽(可惜買唔到),再趕番去酒店既嘉麟樓食晚飯。

套餐望落唔係太多項目,究竟夠唔夠飽呢?唔少食肆轉做C類,酒店餐廳亦然,所以我哋都谷嘟2維條碼入場。

等咗好耐至上菜,生拆花膠魚蓉羮味道一般,隨後既松露珍菌虎蝦球都唔錯,只係細碟咗啲。臨尾果兩味就真係好一般,食楊枝金露時忽發奇想,不如買世界の山ちゃん夢幻雞翼外賣上房食丫~

侍應生既代影,都叫可接受。畢竟大家都慣咗用智能電話黎影,對相機既重量及按鈕非常陌生。論伙食,我覺得朗廷既唐閣出色好多。

Food panda有服務,俾$25就可以慳番來回腳骨力。等待期間,行咗出去門口影相。

以往熙來攘往既街道,要企定定黎影相確實唔係易事。太空館天象廳換咗新螢幕,唔知有無啱主題既全天域電影呢?平日放工後,時間都花係幸男既功課,考試及足球班,可以一齊睇電視或靜落黎既時間都唔多。

入番室內影住相黎等,試極都無張滿意,唯獨呢張(同幸男講電話)既背景無人兼神態自若(唔會太過低炒)。

適逢JAMES BOND NO TIME TO DIE上畫,酒店大堂擺放咗經典Aston Martin DB5,不過車牌係Gold Finger既Sean Connery時代,並非Daniel Craig 。

起初仲以為會有架綿羊會兜入正門,點知係步兵!!人家去log on時,我就去咗CITY SUPER買啤酒,啱晒黎送香口宵夜。人家眼濶肚窄,結果大半係我食.......

曼城對利物浦,上半場悶波無入球,我睇到訓著咗。下半場醒一醒,先由利物浦既文尼先開紀錄,再由曼城既霍頓追和,之後沙拿入球令利物浦反超前,最後被廸布尼攤平。下半場各有攻守,夠晒戲劇性,不枉我上半場訓咗。早知房有得睇,我就唔駛孭埋部notebook出黎......

PS:晏晝食完燊光,順路兜去陳正記買泥,揀咗款日係貨色,貪佢100日內唔駛施肥。希望壽球花可以養耐啲同大棵啲,為客廳帶來一點生氣~

Happy birthday to me

心不甘情不願地又大一歲了,台灣女生一大早就帶幸男去上足球班。午餐於家中享用人家買番黎既鰻魚和牛丼外賣兼一田生蠔,襯埋個小花圃,都似出咗街食丫。

夜晚出去尖沙咀滬江,每年生日月份去食大閘蟹,已經係家庭傳統。

幸男由以往只食小籠包,到而家由頭盤食到尾~

今晚有英超賽事,曼聯對愛華頓。1:1和氣收場,可惜C朗無咩特別表現。

愛食蟹既幸男,暫時未識拆蟹,要由雙親代勞~

大閘蟹餐質數依舊,只係蟹粉小籠包內餡不再黃金(蟹粉量銳減)。

店内坐滿客人,與上年未有疫苗前既十月,分別好大~以往西洋及日本顧客,亦變成南亞裔食客;国內客亦減少,由本地客補上。

呢一兩年過得不容易,社會體制上既變遷,工作領域既窒息,以及疫情下既疏離,令我仍然覺得係生存著多過於生活著。

PS:話晒生日,點可以缺少愛駒既份額? 番到屋企,掀開布冚,去相熟油站入油之餘,亦讓迎風吹提升身體既銳感。