除夕大餐

早更收工番屋企放低愛駒，搭巴士出轉車站，搭城巴去SOGO會合倆母子。為咗用SOGO禮劵，先係運動部為幸男添購運動外套，其他嘢睇唔啱之下，落番去地庫既蟹宴食晚飯。上一次惠顧係年頭頭禁晚市堂食時期，我哋特意出黎食晏晝，順便上SONY攞番外母換好芒既XPERIA 10 iii。

木今次我哋嗌咗個二人餐加散叫，呢隻蟹仔令我諗起屯門果間omakase。

蟹刺身，絶對係蜜月旅行既情義結。

海膽燉蛋，人家將佢唔食既海膽俾埋我食。

補食聖誕大餐，PREMIUM SET COURSE包既時令活蟹係毛蟹。

相比年頭黎果次唔夠一半，今晚多人到近乎滿座，晚市對食肆正係好重要。

怕餐包既燒鱈場蟹唔夠食，所以另外嗌多一份。隻碟望落熟口熟面，原來同屋企買個隻膠碟同一紋路(超市買刺身)，只係變咗藍底金線。

為興祝新一年既來臨，飲杯~我飲完生啤後，叫咗杯SIGNATURE COCKTAIL，味道唔太啱飲，得個酸字......

鹿兒島A5和牛，有蒜片，芥末同辣醬任君配搭。

我同幸男一人一耳機，邊食邊睇狼隊對曼聯(人家就齋睇無聲)。

食埋個飯，大家都夠晒飽，但無諗過陣間要追巴士(因為APP話就快有車)。

PS:呢幾年變化好大，但時間又好似凝滯著，無力感好重。希望新一年會有多啲好消息，新方向。

秋冬要進補

番完晏晝更，騎愛駒去置樂食蛇羹，朝每個冬季食10碗既目標進發。雖然無以前training時一班兄弟去食，一個人都堅持堂食。

行番去攞車時，經過一個電話亭，其實電話亭同蛇羹舖一樣，買少見少。

舊A2黃金BBQ

收工騎愛駒去黃金海岸，因為Mathew師兄將會離港，所以趁聖誕節一齊聚吓。

Mathew屋企係頂層單位連天台，所以今晚係露天BBQ，對住無敵大海景。

主人家對食既要求，絶對令大家都大滿足(仲有長腳蟹)~

食到一半，我要騎愛駒去置樂接幸男放足球堂，其實呢度泊車係$16一個鐘，電單車都無得平，所以點都泊正車位中間!

幸男到埗就係室內同SMILE一齊打機，嘢食都係大人傳送落去。

大合照搵咗幸男揸機，戶外大燈下都可以用手機影得清楚。

當年Mathew有抱起BB時代既幸男，宜家已經高過膊頭位，希望Mathew生活美滿。

愛駒維修日

每四個月一次既原廠check車，今日見到位銀髮族拎出新車。雖然係細羊，但都好佩服前輩既熱誠。

放低車匙，搭巴士去尖沙咀，先去SOGO睇GEOX鞋，適逢有折，買咗對鞋做後備。

行番去新港既FOOD COURT，食台式鐵板午餐，再上去PACIFIC COFFEE邊飲邊黐WiFi睇行運超人。

原本只係常規換偈油，但職員打俾我話前呔己光頭，建議更換，計落數用咗兩年。新呔既線印同呔鬚證明係新品，俾錢交收車匙時，職員溫馨提示"新呔唔好渣咁快"，我似係快線L?

咁啱架車後方就係車行招牌，影番張相當打卡。搭單話SEAT位難扣實，攞車時已經完滿解決，趕時間冚車都唔洗發䒐䒏。

PS:除咗出車兼訂後座椅背開訂收過軟膠鎖匙扣外，咁耐都未收過車行既禮物，今次竟然有聖誕禮物收。

e-HEAT最大輸出

尋日開始既寒流持續，收工得11度左右，e HEAT手套同電單車褸全開。新手套既電池比舊一代大，但都未算係好大負擔，只係帶上手外觀擁腫一點。

PS:保溫短袖底衫，線衫，e HEAT保暖內褸加擋風外褸(仲有頸巾)成功抵禦冷峰，暖笠笠番到屋企。

陪診日

今日同老頭子出去尖沙咀覆診，覆診前依舊係新港FOOD COURT食晏，中途有電話打俾老頭子，無諗過原來係診所打黎。上到診所，職員話預約時間係11點半(我入日曆係12:30)。

覆完診，搭巴士入屯門，安排速剪，安頓老頭子到染髮店，我就去咗華都既順豐寄件(燈光唔光唔暗下SHARP既自動MODE係廢廢哋)。今次係我第一次係Carousell成功放賣，仲要係用送遞形式，以方便買家慳番來回車程時間車錢。

尋晚特意上大佬屋企用SWITCH試吓隻GAME有無全英文介面，實試主機語言設定為英語即可。Send相俾買家作確實，造就成交兼今日寄件去買家銅鑼灣地址。

PS:日頭都係十幾度，染完髮近五點就得番十二三度兼細雨，老頭子受不了寒意，急忙退口商場。著番電熱背心(染髪時除低)，熱力全開，再出去上的士。凍天絶對係難關，尤其係活動量其低既老頭子。

是日番P

今日番晏，早少少出門去幫老頭子洗頭沖涼，忽發奇想"燊光唔開，不如去進達"。相熟既泊車位，與前兩代愛駒重叠。

以前好多時早更收工去食下午茶既雞翼薯條餐，強既離去兼搬離老家之後，已好少黎食野(老豆子病發前都仲會約佢一齊食下午茶....)。

RACER ALL SEASON JACKET參上

天文台預報今晚氣溫驟，所以帶定新買既既電單車褸，放工就即著上。今次既款無拉鍊封位，所以行車時會有中線滲風既情況。18度下，電單車車褸內得薄身長袖衫，短途就啱啱好，高速長途就真係要加埋內膽。

其實見一心買番紅色既電單車褸，但呢個款只得黑色主色配紅色襯線同LOGO，於是揀咗灰色主色。錯有錯著，襯埋條牛仔褲，可以偽COSPLAY南光太郎~

PS:舊電單車褸已服役8年，唔知呢件會唔係著到掛褸呢?

v ASURADA AKF-0/G

係相熟玩具網站見到Hi-SPEC出終極雷神v ASURADA AKF-0/G，非常感動～

Lifting turn故然係與動畫設定相若，仲但最難得既係AERO Mode既二段Boost形態都可以做到！點都諗唔到個定風翼係用咩機關去配合，畢竟Hi-SPEC 就係“完全変型”既代表。

一直擔心v ASURADA AKF-0/G會否列入Hi-SPEC系列，因為可變金屬外殼既設定絕對係一大考驗。與凰呀相比，v ASURADA AKF-0/G既還完度更高，唔知實制派貨時間會否係2024年呢？

幫高達執書包

之前問過大腳八老闆娘有無呢隻08小隊陸戰高達，無諗過尋日老闆娘話番貨，令我可以入手一年前既出品。

把玩一輪，開始幫陸戰高達執書包。

背包可以收納大炮同步槍，不過要拆到幾散下，見到説明書都驚。

部件細，我隻手又大，攪咗好耐至成功執好個背包。$360，造工同可動性都ok，可惜特效配件要另配。

再次Web!ke

尋日收到郵局短訊，話今日一點前送派遞郵件，結果10點三就送到。咁啱今日番晏，可以收件，否則要1日後去市中心郵局自取。

之前載住嘉耀（後座）同康楠一齊出車去土瓜灣車迷城睇電單車牛仔褲，試啱size至係web!ike訂購，計落慳一舊。

即刻著住去燊光食晏,感覺比edwin果條貼腳，尤其係膝位既立體剪裁。唔知點解內面有啲好硬既縫線，界到上5吋下5吋位同腰位，今晚番去修剪下先。

為人家長日

今日重返校園，因為要出席幸男既家長日，背囊掛係枱側勾，切合校園風。

台灣女生成功從最後一行，搵到幸男既座位(以鎖相認)，聽班主任既簡報。

廿年前，中一時代既一樓，不時與同學仔打打作作，尤其係呢個露天位置。升班後，就不時去隔離班問小測tips(其他班考先)。

去禮堂聽講座，牆邊掛住既<文行忠信>字聯依舊，只係設備裝潢有變。

同幸男係安定食過晏之後，我就搭巴士出灣仔交收Hi SPEC SUPER ASURAKA AKF-11，兩母子就跟旅遊巴去沙田踢U13。

搭巴士時係PRICE.COM搵到灣仔電腦城有間舖頭有Tamron 28-200mm f/2.8-5.6 Di III RXD行貨，於是上去問鏡。

試過又真係幾好，尤其係佢既最短對焦距離，不過明明問行貨，到埋單時又話得水貨........難得佢話水貨都有一年既保養，行貨又遙遙無期，唯有就犯。

搭巴士番入屯門時收到人家既電話，話教練擔心幸男既左腳趾公唔只係擦傷，可能係骨折。經商量後，人家call的士帶幸男去仁安睇門診，我番到屋企放低晒啲嘢就call的出去會合兩母子。溫馨提示人家先去醫院既餐廳食晚飯，怕佢會早閂，我就食咗個包兼飲杯咖啡就出門。

番照多張X光，醫生都只係話有可能係骨折，等出找數單同攞藥，call的士番屋企。番到屋企都以雪櫃既小食作填肚，為人父母既當然係將自己放係次選。已嚴重告誡兩母子波襪配拖鞋既無知，以免重蹈覆轍(上天橋樓梯kick腳)。

PS:真係咁易fracture?定係擦傷加contusion咋?