TMAX接放學(倒數篇)

今日放假，今次應該係我最後一次騎愛駒去小學接幸男，門口依舊塞滿家長。

今次幸男唔係最後至出現，話去敏華食晏，但幸男竟然仲未分到餐廳係安定呢邊定對面友愛…

升中後，幸男要自己出去街食飯，究竟幸男搞唔搞得掂呢?食完飯，幸男攬上冰巾，穿上手袖，戴上頭盔坐住我後座回家~

準升中生家長

尋晚至同幸男說教，原定台灣女生今晚有約，故今晚既父子晚餐環節，顯得氣氛一般。晏晝問幸男想食鮨亭定千鮨壽，幸男揀後者，話多啲選擇，於是騎TMAX出發。大個啦，開始機不離手，有自己既想法，自己既群組，自己既天空，只望品行上唔好太走樣。

嗌咗鰻魚芝士青瓜巻，貪佢夠頂肚，打吓底先~幸男就揀咗蟹子同松葉蟹棒壽司。

其實幸男睇中咗呢度既串燒，堂食的確比媽媽買既外賣版脆口及香熱。

幸男無兄弟姊妹，家中獨佔關注，平日受盡家長及長輩們既溺愛。疫情下，無咗旅行為名既一星期待人接物調整計劃，平日亦無咗每星期既特選自付營虧星期天，幸男自理責任及態度不自覺地走下波。復課後，幸男亦習慣被編排得密麻麻既項目，踢波，升中講座，同輩聯誼…少了點一家人既親子時光。

明明個燉蛋應該係前菜，但食到尾段至上.......

仲有少少未飽，睇價錢做人，揀咗吉列蠔，但食到最後一舊前就突然飽(結果都食埋佢)。

由於臨尾無晒白桃味雪芭(開頭有問定是日雪芭，但無留定)，所以去咗樓上買GELATO。原本幸男話要芒果味，但我見有一對男女問職員攞試食，於是我叫幸男試吓益力多味先。幸男試味後，捨棄咗芒果味。

朝早去天水圍濕地公園草坡影小學畢業相，人家上到的士至發現帶漏畢業袍果頂帽！先影咗我哋一家既家庭照，我就上uber，番屋企攞番頂帽再飛跑羊去濕地公園…為咗連戲，我將恤衫摺好(到埗至換番)，著另一件飛車，免得整皺同被冰巾整濕衫領。

PS:升中既家長，開始退下前線，默默支援追夢既昔日BB。關愛會變得囉唆，説教亦變得煩厭…

ZE3000到手

上星期係豐澤網店訂購既final ZE3000，今日卒之到貨，可以係市中心門市提取。之前試walk in入去，見耳機喇叭位置係外判咗俾另一間公司擺檔咁，仲要無特價。番屋企係豐澤網站做會員黎訂購至可以享有$980價,等兩日至去自選既豐澤門市以e-mail相認。Send完張相上群組炫耀，行多幾步就俾咁啱係附近既嘉耀"搶截"~

上網做足功課至買，無諗過原來都幾厚身吓(雖然已比其他品牌無咁掗拃)，竟然無法單耳戴上之下，成功進入頭盔!!ATPX ADAPTIVE藍牙之下，音色當然比純APTX雄厚一點。聽番相熟既音樂WAV檔作比較，清晰度明顯提升，MAVIN AIR X變得含糊。同樣係6mm單元，今次係由VGP2019受賞跳到VGP2022金賞，期待run in後既表現~

PS:聽日試吓換個細啲既耳膠，睇吓可唔可以入到頭盔先。一心要將舊耳機轉俾幸男，自己用新耳機聽高德地圖導航兼娛樂用~

清算,沉迷

是日放假，係屋企清吓個冰格，發大量被遺忘既食材,韓式餃子，薯餅，漢堡扒........你估呢個宮崎豬肉又過咗期幾耐呢?

答案係足足一年!掗住晒啲位，平時我想雪冰粒都無位，仲要嘥電......扔咗啲太耐既食材，近三個月既就留住先。

煮咗個(過期)韓式泡菜飽子食，味道唔啱食(饀料鬆散又唔夠泡菜辣)，CP雲吞好食好多.............

傍晚繼續玩CARD SHARK既試玩版，一玩就三個鐘(後段要插住電黎玩)，因為失敗多次，要重覆挑戰。限時之內，邊斟酒邊偷望兼記牌，暗中按插有利伯爵(拍檔)既牌，最後要抽回有可能重覆出現既牌。步驟錯咗，輸牌,但花時間太耐又會俾人捉到出千。以為用SCREEN CAP記低伯爵既牌，跟住練習時既方法派牌就掂，點知每局伯爵坐既位都唔同，我要即場執生計好相隔既牌次序.....原來出千同魔術一樣，就算你知個原理技巧，但要一take過完送完成都真係好難。

PS:近七點屋企又局部停電(今次無停冷氣電)，結果要係廁所插住電黎玩。唔夠一個鐘就恢復，台灣女生做完facial買外賣番黎時一切正常。幸男同人家講，爸爸玩咗幾個鐘喇~(其實佢邊八卦睇之餘，亦都想跟機打fifa)

一人晚市堂食

晚飯對我黎講係一日裡最重要既一餐，每日既辛勞都係靠呢餐去作慰勞，所以今晩我決定一個人都要食好啲(一人前西餐)。實情係幸男今晚要去U13選拔，天氣太熱，熱都唔想出太遠，所以騎愛駒去LAM TEI GRILL食~

主食加幾十蚊就可以沙律吧任畢沙律,餐湯同飲品(咖啡,奶茶,檸茶,果汁)。

禁晚市堂食前之前嗌過外賣，堂食既阿根廷牛扒比起外賣既好味，至少唔會焗到全熟...六點鬆啲入門，我係第一位客人，之後有枱多人既食客。除咗店員，我諗果枱客都感到好奇，點解會有個怪人係度一人FINE DINNING。

七點都未夠就食完飯，番屋企攤抖一陣，就騎羊去老家幫老頭子洗頭沖涼。

PS:其實晏晝已經係藍地食飯，無諗過晚餐會係隔離舖度食。

早:西鐵，午:巴士，晚:電單車

紅磡搭東鐵落旺角，係朗豪坊附近既裝修街配浴室龍頭後，係朗豪坊誤打誤撞下入咗TEXAS BURGER食晏。呢個餐成舊水，但味道的確令人心悅誠服。落單時，職員同我講啤酒係支裝Corona，我不以為然地答"ok"。呈上時有青檸於樽口，好耐無飲過咁清新既配搭，足以抗行猛暑及中和油膩~

望啱巴士app既班次，擔住遮黎行去街士巴士站，趕四點前番到屋企,等時師傅上門換龍頭。雖然人家話DHL送貨扔咗入花園(屋企無人)，但無諗過一開電閘就見到咁搞笑。師傅差唔多六點至到，但半個鐘左右就搞定，總算唔洗細水兼無熱水沖涼。原本諗住無師傅肯接就試吓自己換，但又咁啱俾舖頭姐姐搵到個師傅今日有時間，唯有乖乖呈上七舊水.........

兩母子去咗睇FANS包場既<<闔家辣>>，再同大學書友食埋晚飯至番。麻甩佬既浪漫，騎愛駒兜去洪水橋買佐酒食品就當一餐。

PS:朝早出門搭輕鐵轉西鐵出紅磡，出席朱雄既喪禮。簡潔既儀式下，與工作坊既朋友一齊送別永留大家心中既朱兄~

暴露年齡

平日番工用既布袋(PACIFIC COFFEE贈品)都開始甩色同殘，所以今日帶咗個"昭和拉打"布袋頂替。當年小六既我，被BLACK深深吸引，係我第一個啟蒙拉打~

本來唔明長短帶有咩用，原來短帶手抽，長帶肩孭又幾方便。袋口中間有磁石扣，內側有一個小暗袋，方便收納小物件。

PS:尋日放工係市中心千色附近既FX Creation櫃台買咗呢個tote，兩邊都有唔同圖案。俾錢時，店員向我介紹影月主題遮，仲話賣點係中骨可以發光，太毒了…

自顧人仕

今晚幸男約咗同學一齊食晚飯兼睇Minions 2，我就變成"自顧"人仕。原定收工騎愛駒入東涌買鞋，收工時好攰，一心打退堂鼓，但泰GG既激勵，令我照原定計劃出發~泊車時七點唔夠，無諗過夏天既屯赤隧道係咁悶熱....

商場人流唔多，係2期搵咗間食店享用一人前晚餐。

揀咗UFUFU Café，因為outlet加日洋式料理，滿有日本旅行既感覺，諗起幸男幼稚園及初少時既旅行鎖事。

咖哩芝士和牛漢堡，唔跟餐就只係淨上呢一鍋。味道還好，只係嫌內裡既芝士唔夠流心。店內有鹿兒島和牛，但成四舊水，都係有機會同人家一齊黎試。

高速巡航既感覺係自由自在兼沖走腦鈍，因為呼吸及體會與平時不一樣既空氣(天能既逆向?)。地平線與風擋邊界既不一致，讓我多一刻抽離生活既刻板及納悶。

PS:行均GEOX，Timberland同Clarks，結果都係行番去ROCKPORT買咗對休閒鞋嚟騎羊。

父子晚飯

今晚台灣女生有約，騎愛駒同幸男去咗置樂食晚餐~

雖然有餐牌，但都係叫客人用智能電話嘟QR code落柯打。貴為父親大人，當然託幸男做點餐助理~

原本擔心walk in無位，原來又唔係滿客，我哋揀咗bar枱望魚缸。

手安格斯牛肉烏冬有啲煮過籠，韌咗少少….我照舊回收幸男唔食既筍片。

我揀咗日本特盛岩蠔，蠔上舖有三文魚子，海膽同魚子醬，不得了既組合~蟹肉忌廉薯餅就同幸男分黎食，味道一般，可以多啲蟹肉就好了。

雖然三多利啤酒買一送一，但渣車兼載人，所以齋飲茶。幸男杯巨峰乳酸竟然用啤酒杯上，令我無言以對…

串燒有鐵板助熱，可惜無實體餐牌上既魷魚鬚。

評估失手，食埋幸男剩落既烏冬都係爭啲，臨尾落多個吞拿魚壽司。等咗好一陣先上枱，要幸男碌住電話黎等我。埋單後，騎TMAX番屋企，唔知幸男仲會坐我後座到幾時呢?

PS:朝早落雨，望住天文台APP話十二點左右停雨，點知一落燊光外賣柯打無耐又落一浸。冒雨出車，番到屋企就出太陽!!外賣都未食就要快速抺車同換衫沖涼.....