RACER ALL SEASON JACKET參上

天文台預報今晚氣溫驟，所以帶定新買既既電單車褸，放工就即著上。今次既款無拉鍊封位，所以行車時會有中線滲風既情況。18度下，電單車車褸內得薄身長袖衫，短途就啱啱好，高速長途就真係要加埋內膽。

其實見一心買番紅色既電單車褸，但呢個款只得黑色主色配紅色襯線同LOGO，於是揀咗灰色主色。錯有錯著，襯埋條牛仔褲，可以偽COSPLAY南光太郎~

PS:舊電單車褸已服役8年，唔知呢件會唔係著到掛褸呢?

v ASURADA AKF-0/G

係相熟玩具網站見到Hi-SPEC出終極雷神v ASURADA AKF-0/G，非常感動～

Lifting turn故然係與動畫設定相若，仲但最難得既係AERO Mode既二段Boost形態都可以做到！點都諗唔到個定風翼係用咩機關去配合，畢竟Hi-SPEC 就係“完全変型”既代表。

一直擔心v ASURADA AKF-0/G會否列入Hi-SPEC系列，因為可變金屬外殼既設定絕對係一大考驗。與凰呀相比，v ASURADA AKF-0/G既還完度更高，唔知實制派貨時間會否係2024年呢？

幫高達執書包

之前問過大腳八老闆娘有無呢隻08小隊陸戰高達，無諗過尋日老闆娘話番貨，令我可以入手一年前既出品。

把玩一輪，開始幫陸戰高達執書包。

背包可以收納大炮同步槍，不過要拆到幾散下，見到説明書都驚。

部件細，我隻手又大，攪咗好耐至成功執好個背包。$360，造工同可動性都ok，可惜特效配件要另配。

再次Web!ke

尋日收到郵局短訊，話今日一點前送派遞郵件，結果10點三就送到。咁啱今日番晏，可以收件，否則要1日後去市中心郵局自取。

之前載住嘉耀（後座）同康楠一齊出車去土瓜灣車迷城睇電單車牛仔褲，試啱size至係web!ike訂購，計落慳一舊。

即刻著住去燊光食晏,感覺比edwin果條貼腳，尤其係膝位既立體剪裁。唔知點解內面有啲好硬既縫線，界到上5吋下5吋位同腰位，今晚番去修剪下先。

為人家長日

今日重返校園，因為要出席幸男既家長日，背囊掛係枱側勾，切合校園風。

台灣女生成功從最後一行，搵到幸男既座位(以鎖相認)，聽班主任既簡報。

廿年前，中一時代既一樓，不時與同學仔打打作作，尤其係呢個露天位置。升班後，就不時去隔離班問小測tips(其他班考先)。

去禮堂聽講座，牆邊掛住既<文行忠信>字聯依舊，只係設備裝潢有變。

同幸男係安定食過晏之後，我就搭巴士出灣仔交收Hi SPEC SUPER ASURAKA AKF-11，兩母子就跟旅遊巴去沙田踢U13。

搭巴士時係PRICE.COM搵到灣仔電腦城有間舖頭有Tamron 28-200mm f/2.8-5.6 Di III RXD行貨，於是上去問鏡。

試過又真係幾好，尤其係佢既最短對焦距離，不過明明問行貨，到埋單時又話得水貨........難得佢話水貨都有一年既保養，行貨又遙遙無期，唯有就犯。

搭巴士番入屯門時收到人家既電話，話教練擔心幸男既左腳趾公唔只係擦傷，可能係骨折。經商量後，人家call的士帶幸男去仁安睇門診，我番到屋企放低晒啲嘢就call的出去會合兩母子。溫馨提示人家先去醫院既餐廳食晚飯，怕佢會早閂，我就食咗個包兼飲杯咖啡就出門。

番照多張X光，醫生都只係話有可能係骨折，等出找數單同攞藥，call的士番屋企。番到屋企都以雪櫃既小食作填肚，為人父母既當然係將自己放係次選。已嚴重告誡兩母子波襪配拖鞋既無知，以免重蹈覆轍(上天橋樓梯kick腳)。

PS:真係咁易fracture?定係擦傷加contusion咋?

累

每次番老家幫老頭子洗頭沖涼後，都會經過呢個燈位。每當停低時，總覺得攰之餘又唔知為乜。係我唔想做衰人？定係為咗慳老人院既錢？既然當事人都唔為自己健康打算，我又何必無謂既堅持，令自己難受？

 

行電單車用品店+即興懷舊

搭巴士出去頭盔王新舖，街名東安街係邊度聽過呢?愈行愈覺得個景熟口熟面，原來正正係以前阿婆阿公住既唐樓附近。

之前去過舊鋪睇手套，但無我size，所以趁搬大舖過黎碰吓運氣。上次睇中既黃色helstons皮手套有我SIZE，不過呢對FUEL既皮手套好似靚啲。試戴過之後，帶咗佢去俾錢。

櫥窗有SHOEI J CRUISE既中碼頭盔，搵日兜台灣女牛過黎試帶吓都好，畢竟用緊果個都夠晒期換。

店內有唔少電單車服飾，原本睇中兩件衫，但可惜得一款有我SIZE。呢條電單車牛仔褲特價$400，亦都只得一條加大碼........影低張相同個TAG牌，試吓係webike睇吓有無先。

入舖頭前去讀幼稚園前既舊居望吓，記得以前出入都會經過五金舖同工程舖。

經典綠色鐵閘無變，從通風位窺望紙皮石樓梯及黑膠扶手，好掛住以前手持膠坦克電燈籠兼被抱上樓既小朋友。

PS:昔日既小朋友，有無諗過30幾年後會係佢樓下買電單車用品呢?疫情嚴重時，有諗過騎愛駒出黎懷愐吓，但一直以忙於照顧老頭子同自己屋企為借口。

水戰

台灣女生有約，今日由我帶幸男去踢波，昔日藍天既隊長已成為友隊既球員。

開賽前大家都爭取時間熱身，我亦為相機熱身，trial and error式算取最平衡既設定。

表現一般，中途有教練商議踢法。

又俾天文台呃，原定係踢完波至落雨，我一心預幸男的士番屋企，我就騎愛駒買嘢食番屋企。

A7 III冒雨拍攝，熙迅家長借咗把遮俾我，但我都要不時抹機同鏡。

大家都不諳水戰，控球跣腳，射門失焦，撲救甩手.......

先大敗於屯門隊，小勝譚伯羽1:0，負陳瑞芝2:4(幸男OG)，小組出線止步。臨尾先至開始細雨，解散前為大家影張大合照，以鼓勵各位既努力。

噏住濕襪濕鞋去食麥當勞，幸男高咗之餘，食嘢亦多咗，一個麥樂雞餐加份雞翼都未夠飽，結果要食埋我讓出既半份薯條。

一對耳機兩份分，一齊邊食邊睇車路士對阿仙奴，半場就騎愛駒歸家。

PS:夜間拍攝運動主題既質素太粗糙，唔通真係要試用RAW作比較??

Apex Slim Sleeve

今日收到DHL既送遞，苦等多時既新系列Apex Slim Sleeve銀包到手!

當初得知有新系列將至就一直係官網目及住，因為用咗近3年既Note Sleeve開始殘嘛~Apex Slim Sleeve賣點係立體剪裁，兼有磁力吸附，銀包好似個飛碟咁，無咁易俾紙幣頂同單據頂到彈開。中間拉動叠咭既布帶有啲鬆，可能要塞得夠多咭證至可以無咁易跣出。

PS:呢個係我第三個BELLROY銀包。