失意車手BBQ聚會

早前一直都約唔成既BBQ，竟然因為兩位失意既電單車車主而成事，唯只欠占兄。龍門居綠在屯門做完回收分類，去埋新屯中買啲嘢，就兜去市中心DONKI買肉類，再係屋企附近既惠康買埋汽酒同蔬菜。

多謝大家為我送上炭爐BBQ餐枱，效果唔錯，用炭量比舊式BBQ爐少。雖然燒烤既面積細咗，但可以輕鬆用夾嚟翻撥食材(唔洗一人一叉)，變相大家(我都)可以邊飲邊食邊傾。

PS:炭燒翻熱老麥薯條味道意外地唔錯，啤酒，汽酒，舊Whisky(響)，燒酌......=盡興!

小店

Ruby Tuesday食到厭，建生果間Dineland又唔太值得再追食，電話上網搵區內西餐，今晚同台灣女生去試置樂既西餐小店-吉氏。

舖位前身係聚福樓，drink list無生啤，紅酒又唔太吸引，唯有嗌long island 。

一人一法式洋蔥湯，人家果杯係Fruit punch。

話晒係法式西餐，＄88一碗都要試下，味道對得住個價錢。

威靈頓牛＄428，好在唔洗預訂至有得食。

西班牙燒乳豬，皮脆肉嫩，都係＄228咋。

甜品我揀咗檸檬撻，都幾酸口吓。

人家既梳乎尼比我個檸檬撻大好多。

經過雅仕堡，感觸良多。計下數，當年既老闆，都應該到退休年齡。再者，舊煙竇酒吧，都要跟上時代既裝修。

PS:元朗仲有無舊式既酒吧呢？

唯有對自己好啲

入一入元朗，放低愛駒唔夠5分鐘就被派告票(時間為行開2分鐘後)，無奈生活於國內化的XIAGGANG。被割韮菜後，兜去藍地食晏。番屋企執嘢去回收，再去新屯中既living plaza行吓。最後係市中心買咖啡同晚餐，就回航歸家。

三婆孫福岡自由行今晚七點落機，我就邊睇拉打邊食DONKI刺身同鰻魚便當(先乾焗後蒸熱嚟番熱)，用豐富晚餐($130+$79)嚟安撫心情。

PS:無諗到水木一郎有客串仮面ライーダW。

Black Butler寄宿学校編

 

尋晚番夜班前睇咗一集黑執事-＜寄宿学校編＞，意外地吸引過之前既＜馬戲團編＞，至少靚人靚景。

主角凡多姆海伍奉女王之命，去調查與家人失聯既寄宿學生(皇室成員)。節奏明快，每集既故事推進，勾起追看既意欲，今日我就由第二集煲到第十集。結局竟然係四位PREFECT生為咗阻止敗壞校風既學生，錯手將其誤殺，並經地下渠道搵到死神嚟處理屍體，以及假冒正左外地旅遊既校長。

PS:原來＜馬戲團編＞同＜寄宿学校編＞之間有劇場版既＜豪華客船編＞

如果Netflix會上架就好了。

舊酒新評

之前係相熟商店買咗支舊響版響17，交收當晚有即開嚟試。酒蓋既松木塞唔太緊實，但又聞唔出瓶頸位有漏味。味道比十年前係日本買既響17少咗份荔枝味同甜香，網上搵唔到相應既樽背招紙，有少少擔心真偽(網上見既係金底黑字)。

“養傷”期間，除咗完成10集既風都偵探之外，卒之睇埋Bartender既結局(有提及來島爺爺飲番當年錯過既Suntory角whisky)。今晚細味小酌30年前未享譽盛名既響，我覺得好似開展一個小朋偷飲威仕忌既多元宇宙。

PS：酒舖職員話有客人反映呢支酒有淡淡菊花味，睇嚟要飲杯菊花茶作對比。

閉關養傷

之前已對拉打動畫<風都偵探>有興趣，咁啱係木棉YouTube channel搵到。故事原來係<仮面ライーダW>既後傳，故事沿用委託作開始。劇情(有大人向褔利)，節奏同分鏡都唔錯，動畫可以避免特攝低成本既穿崩位，尤其係非CG特效既怪物造型(例如火燒)。

當年接受唔到佢左右不對色，無諗到十幾年後無一個拉打可以超越KUGA同FAIZ。論故事及造型，唯有仮面ライーダW變得可以接受兼有動力補睇。

負傷留守家中，無法騎愛駒外出用膳，好在村口有間茶記可以行一兩鐘就到。

晩餐有外母大人到薈，三人份量，因為台灣女生stay behind同大學姊妹遊大阪。外母當然唔知我最新狀況，我亦成功避過可疑查問~

PS:睇拉打係騎乘不能既另類補償。

F1日本站快閃團Day 3

照舊松屋食早餐，趕去JR站搭個半鐘巴士去鈴鹿賽車場。今日有雨，落車就著上領準備既雨褸(可以包埋個背囊)。買埋爆谷同啤酒就入場，賽道上演緊FERRARI CHALLENGE 2nd Race。

是日正賽，大會派櫻花色旗幟。

我哋個座位望右前方就係頒獎台，唔知有無機會睇到幸男個偶像上台呢?

買爆谷時已留意到有得玩F1 simulator，兩母子放低行裝就出去排隊。

負傷在身，我留係座位上睇下非F1賽車。

12點有車手巡遊，咸爺不概為7屆冠軍，以最濶幅度向觀眾揮手，照顧每一位車迷。

相比之下，其他車手只係向鏡頭附近揮手。

日本主場榮升一隊既角田裕二，揸住房車嚟進場。

車手係頂層開蓬既巴士巡遊後，各隊既工作人員將戰車積起並推出賽道。

平時無睇賽前直擊，唔知有無直播㗎呢?

起跑路段塞滿工作人員，為隊車作最後既整備。

工作人員帶同架生離開，剩底20架賽車係場上，準備起步。

全場無紅旗，第22圈時，Lando Norris緊隨韋少入pit。未能係出pit時過頭之餘，反而被韋少逼剷上草地，幸好無損車體。Lando Norris只能係一秒以外既範圍努力，最後奪得亞軍。韋少成日話架RB21 undrivable, 但其實直路上係比McLaren有優勢囉。

主看台既好處，就係可以衝落去頒獎台下面近距離為車手歡呼。

到我哋呢邊開大閘喇，大家都係看台既細閘前等候。

膊頭痛都要忍一忍，咁難得可以近望三甲領奬，無埋由唔影番夠本。

開香檳祝賀，見佢哋齋噴唔多飲，反而工程師主動自隊。

同Podium既實制距離，所以A7III配天涯鏡係必須既。

趁人潮散去，再次為SUPER ASURADA補拍。

兩母子再一次戥McLaren車隊高興~

偶像攞第二，至少係佢今場起步位打張咭。

其實原本快閃F1之旅係睇加坡夜賽，但因為日子唔啱，所以至揀咗日本。下次幸男再嚟既話，唔知係咪帶小朋友去旅行呢?

F1正賽日子，散場係一個災難，有揸車嚟都係拉龍塞住等出停車場。

我哋搭番預約既旅遊巴番名古屋，唔駛半個鐘就排到上車，但上到車再要等塞出駐車場。上高速公路之前，都係塞住慢車行。到公路休息站已經19：45，我去廁所，領隊就衝去買小食俾大家頂肚。由上車計，用咗4個鐘頭20分鐘至番到名古屋，幸男話搭飛機都到香港……

我哋尋晚已超前部署，將大行李喼放係JR站既locker過夜，因為怕今朝無位或花太多時間搵吉位。21：30到車站，直接去locker攞喼上月台。

原定係聽日下午機至番香港，今晚可以好好休息，但出發前一星期至收到學校通知有必須出席既活動。為方便聽朝搭上午機，所以今晚一定要走難式趕去關西機場附近既酒店。

月台便利店買咗啲零食頂肚，太夜已無便當買。

前一晚領隊係KLOOK度book到最後一班既接送車去關西機場(港紙$110)，所以我哋要23：00前到新大板會合司機。司機操國語(唔太捲脷)，禮貌地問我哋係點book，原來係網站介面令人無法直接揀x3，故我哋要補番$220。

大半個鐘車程，到機場隔離既酒店已經近12點，係門口隔離既便利店買杯麵同小食。Check in攞房就趕食嘢兼沖涼，因為訓得幾個鐘就要趕早機番香港，原來睇F1賽車係要好有"愛"。

今日領隊特意為我影番尋日既案發現場，重組案情如下：點名後領隊見工作人員指示左轉，緊隨其後既我被其急轉撞至失平衡向右跌。右腳上5吋下午吋撞向石櫈角位，上身繼而凌空轉身90度，右膊落地完成意外動作。

PS：正賽前有live cam影現場觀眾，可惜我影唔切大螢幕出現領隊一刻……