六點左右起身(番A咁早)，搭半就碌到lobby隔離既松屋食早餐。
JR站對出報到，跟指示排隊等上預約既旅遊巴。原來唔少當地人同遊客，搭呢類特別班次直去賽車場。
車程個半鐘，中途有高速公路休息站。由於報到時發生意外，所以一上車就食止痛葯同訓。休息站落車小解兼recheck唔似甩骹，一片心繼續行程。
右肩右上臂遞唔高，勉強就位影相。由於一掂就痛，所以背囊交俾幸男代孭。
故地重遊，於閘口前自拍。
坐番相熟座位，安頓好幸男，我同領隊就出去睇吓晏晝果餐如何部署。
尋日無體力同時間排生啤，今日就算打蛇餅都要買到。
人家話食咗葯唔好飲酒，但我話就係要倍大止痛效果。排得咁辛苦，點都打張咭留念。
考慮到休息時段同大圍觀眾迫買午餐，我排生啤隊之時，領隊就轉睇吓有咩弁当可以買定。
領隊提議我拎住杯啤酒，融入主題背景。
臨自由三練習賽前，兩母子再一次為愛隊打氣。
平時屋企飲住啤酒睇Now轉播既F1，今次就現場睇兼嘆生啤。
幸男趁P3開始前開動午餐弁當，一啲都無浪費時間。
負傷之下，舉機為艱，要重新適應，有啲似MF GHOST S2最後一集既片桐夏向既心情。
臨尾有紅旗出現，但Norris總算成功獲得頭位。
我無揀幸男既松阪牛，呢個飛驒牛都同官圖有99%相同。
中間三個鐘有多，四圍行吓打發時間。奢望Red Bull檔位會補貨，結果係徒然……
2014年啟用既Honda Racing Gallery，經典名車McLaren MP 4/6同Honda RA272放正中間，周邊擺放咗其他方程式賽車，房車同電單車。
番到主看台，等睇排位賽。
全日影得最滿意既呢張刮底火花照，可惜車手唔係Lando Norris。
Q3倒數12秒時，幸男個偶像以1分26秒995登上P1，諗住佢隱奪Pole位。無諗到一個sector之隔既韋少，竟以0.012秒奪回頭位。完場訪問時段有烏龍位，第二位既Lando Norris企錯咗隊友Oscar Piastri個位。
傍晚時間開始有表演，我哋叨幸男既光，可以第一輪(18:20-18:30)去排Pit Lane Walk。
可惜我哋太天真，原來已有大量家庭已提早排隊(一散排位賽)，結果我哋六點半至可以經賽道行去Pit Lane。
我就將SUPER ASURADA放係瀝青賽道上加冕，變成"落場版"SUPER ASURADA~
各戰車均被冚上網布，等待明日正賽。
唔少遊人係Ferrari駐足並嗌"Lewis"，無諗到感爺竟然出嚟同大家見面，歡呼聲四起～我哋正正係Ferrari 同Mclaren之間，即刻轉番去右邊一睹7屆世界冠軍兼咸爵士既風彩。企最右既幸男成功舉機影短片，我就勉強睇到。企最左既領隊，就因人牆而緣慳一面。
A7III配天涯鏡下既McLaren車房，呢個正正係我堅持帶相機去旅行既原因。
平時係F1個網站見得多，今就可以近距離望到實物。
排位賽多人入場睇，等shuttle bus都要成個鐘至上到車，番到名古屋已經十點半有多。酒店沿途既餐廳都已打烊，好在酒店樓下既松屋仲未收。雖然選擇唔多，但至少大家可以有正餐食。
遞唔高手，換過頭笠既衫要向前彎腰就位。上網CHECK鎖骨尾段腫痛位係AC joint，摸落無斷位，應該係type 1齋扭傷。AC joint傷係膊頭落地既常見傷患，諗起今日一跌落地，邊痛邊聽到有日籍女子尖叫(真係好似日劇情節咁)。領隊話我起身得好快，我答"而家係仆街呀，駛唔駛自拍埋先呀?"。
