心病

今晚同andrew係大排檔食飯,之後上佢屋企坐多陣同飲嘢.正當準備開紅酒之際,收到老豆電話,話心悸兼訓唔到,呢幾日都係訓唔得好,想去睇急症....

向andrew告辭,截的士去急症室搵老豆,唔知點解等好耐至有車....到埗打俾老豆,話做緊心電圖,就快出黎.等極都唔見,聽廣播叫老豆去8號房見醫生,於是走去撞吓.

醫生話雖然心臟有啲發大(始終年紀有番咁上下嘛),但心電圖正常,似係心理因素居多.本來老豆唔太願抽血驗心臟酵素,但係俾我講多兩句,就乖乖就範.

係等照x光時,我同老豆話不如搬出黎,無謂對住老媽屈到病,大佬又唔會點埋佢,老媽日鬧夜話,毫無尊嚴同溫暖.

食過藥,同老豆搭的士去我屋企坐吓,播擺酒既dvd過佢睇.期間老豆有參觀我屋企,有傾有講,係梳化閉目養神.雖然力勸老頭子搬出黎,但老豆依舊唔想放棄自已後生建立既家,縱使愛已經不再存在.老人家無信心去改變生活模式,可以理解,但見到老人家生活得咁委屈,確實不是味兒....

安慰說話講過了,支援計劃提過了.收到電話得知血液報告無異樣,用愛羊送老豆番屋企.幫老豆戴上"士啤"頭盔,手腳唔太方便既老豆總算安全坐上後座(老豆好似對坐電單車後座幾有興趣,話未試過,記得老豆話後生時渣過大膽電單車).

路程雖然只係十分鐘之內,但我永遠都唔會忘記呢程車,呢位後座乘客.

ps:同老豆玩咗鋪wii釣魚game(想起細個時同老豆大佬一齊玩任天堂紅白機既時光),雖然佢話低能,但玩起上黎都有笑.好想氹佢玩多啲game,輕鬆吓,但老頭子始終婉拒咗.

客串搬屋

番完夜班,番屋沖完涼,食埋孖寶蛋糕早餐,訓咗三個鐘唔夠,就出門搭的士去幫大力仔搬屋.

冒失既我竟然上錯樓,去咗以前percy個座.........會合大隊時,德輝同子健已經搬咗陪份既物品係樓下.可能大家知我番完夜,所以安排我係樓下睇住啲物品同幫手落手推車上既貨.

尾板車一到,我地將啲物品堆晒入去,大力同阿嫂跟司機車,我同德輝,子健就坐的士去新居會合.

我繼續負責看管,以及將啲物品砌上手推車,方便大力,子健同德輝上落樓.期間見到有架掛住p牌既大包圍好串咁斜泊係路邊,司機就入咗去隔離既茶餐廳食嘢.我仲撞到阿潘同阿嫂,佢地入咗另一間茶餐食晏.

四點鐘完成物資上載,德輝又要趕番入村起屋,我就同大力仔食埋下午茶至走.

由於晚上既IPSC唔成局,於是去市中心洗衣坊攞羽絨褸,買多少少嘢再搭巴士番屋企.......好趕咁騎羊去伯母屋企食飯,送埋人家番工,攰到andrew打黎時已經訓著咗...........

補購

今日台灣女生話想出尖沙咀崇光掃平貨,於是順道出旺角買番啲war game用品,好在都買得之前個款goggle,但手套就無之前個對日本品牌.....

搭番地鐵去sogo,人山人海.人家揀衫無咩收穫,但我地去係超市部就買咗唔少特價特色食品.最終拎餐死去搭巴士番屯門,等人家買埋宵夜,搭的士番屋企,再騎羊上外母屋企食飯.

身穿啡色皮衣之訪客+民間小工藝

今晚趁台灣女生準備晚飯,我就將已分類既垃圾拎出去街上既回收桶.當閉大閘時見好似有啲嘢係視野既左下方,細看之下發現呢位身穿啡色皮衣既訪客.

立即入屋攞相機,影相同拍短片,見佢係度伸脷捕食飛蟻.之前都試過有隻啡色既蛙類生物闖入客廳,嚇到人家要急call外母黎捉蛙...為免人小蛙誤闖寒舍,唯有用樹葉兜走訪客,誘導訪客往隔離屋覓食.

而我就入番屋企,係厨房幫陣手,跟住就同人家食晚飯.雖然係搞到九點至開飯(因為七點半至買齊嘢番到屋企),但勝在可以舒舒服服,二人世界.

 ps:晏晝燒錄擺酒video碟copy,收拾老豆執俾我既ps2game時,靈機一觸,用ps2碟盒加用剩既擺酒帖黎制一個獨一無二既盒用黎收藏隻video碟,等外母收得開開心心.

人家見到都話好主意~~制作公司只係用個紙cd封入俾我地咋......

脊部都有花心思整0架,無咁齋嘛~~背部就用請帖既內文牛油紙黎裝飾,整體感覺好以係張帖包住隻碟咁.

帖內既地圖都夾埋入去說明書位,再剪埋帖咭既熊貓酒店logo黎遮住ps2個logo(memory咭位).效果幾滿意,於是自己留既orginal copy都照樣整番個特別包裝~~

休班天,下雨天

番完夜班,起身換衫出去最近幫襯開既士多,堂食雞脾薯條.地方又幾企理,座村屋都好似係新起咁.

食飽就行出去巴士站,見到著住雨褸既郵差,冒住雨踩單車收信.令我記起細個時被問到第時想做咩時,有諗過做郵差,可能係覺得可以幫人地送聖誕咭係一件有意義既事卦?(細個時都幾鍾意收聖誕咭) 

上到巴士經過老家馬路口,熟識既油站,疾走中既西鐵,等燈位入村既汽車,但走進去的不再是舒適的家,而是不快既回憶同經歷.

先係旺角落車,去栢裕換油劵.兜陣玩具店同電玩店,行去太子金都攞番隻擺酒既video碟(因為之前個隻又搜畫又無聲...),最後搭地鐵去尖沙咀攞番張商店會員証.

當係文化中心去完厠所行去隧道途中,有一對操國語既中年男女,問我點去紅磡.我心諗要行幾遠喎.後黎聽多幾句至知係問邊度有火車站去紅磡.於是我用唔鹹唔淡既"煲東瓜"指示佢地落隧道過對面馬路,火車站係半島酒店附近.該名男子聽到半島酒店就明白,仲向我道謝,希望佢地真係搵到啦,條隧道都幾多牌同出口架嘛.

舊物憶住事

 今日放工去停車場時,見到愛羊身旁有架相熟又復古既街車~

無錯,就德輝既座駕,唔知今日係咪戴住個紅色開面頭盔黎襯埋一個色系呢?上次係雜誌見到有個叫三椏村既地方,真係想搵日一齊出車行番轉~~~

番工都幾忙吓,無意中見到無線播魔法小金毛-加旋.起初以為係重播,睇真啲原來係續播幾年前既集數,最後至記起德輝有同我提過.

之前都有追開,停播時就租漫畫睇,我仲有keep隻加旋公仔.望住個電視畫面時有少少感觸,things change.....

福伯-Raiders of the Lost Ark

放工即刻騎羊番工企,趕睇明珠台九點半既奪寶奇兵.泊好個位,落埋布冚,入到客廳開電視,啱啱好開始~~~

雖然係舊片,但其實我係未睇過,可能係太細個時,睇過都唔記得,更何況有無睇過或完整完都成問題.....當年既福佬又真係幾有男子氣慨,造型夠晒硬朗!

故事簡單,要同納粹黨委任既考古學家爭奪沙漠下古墓裡,傳說中擁有超自然力量,內藏十誡石塊既約櫃.無咩冷場,特技動作場面當然無而家既咁靚啦,尤其係睇過盜墓者羅拉.不過以當年黎講已經係好緊張同刺激,片房大賣.

貴為電影中既經典,連係Wii既RAVING RABBITS都有奪寶後,被大頭球追既遊戲玩~~

ps:下星期六可以睇埋第二集,好好咁為黎緊上映既水晶骷髏國.

GUNBUSTER

今晚係屋企睇之前買落既gunbuster劇場版dvd,細個時無睇過,只係知道有呢套動畫,同埋個機械人成日翹埋對手.

主題曲由當年紅遍日港台既酒井法子主唱(可想而知係幾耐之前既產品....),機師係兩位青春可人既女角擔當.故事係話地球軍為免被外星生物入侵,所以係太空進行保衛戰.gunbuster並唔係一架機體打晒所有敵人,而係配合戰艦隊同機械人去打仗,咁佢既戰鬥力當然係超勁同關鍵性啦~~~

節奏明快,可能係濃縮咗六集OVA既劇情,努力,根性,感動,係故事一大賣點.大場面,機械人,合體,,美少女,熱血,啱晒我心水!睇完之後,好想買GUNBUSTER既超合金番屋企~~~~

大整頓

今日繼續為客廳display櫃抹塵兼執位,共換咗六桶水至搞掂.為各陳列品清潔故然之攰,但為佢地重組擺放仲頭痛.....係執拾期間,將一啲平時擺埋一邊既嘢順便用黎點綴吓屋企,好似呢張SHOEI既catalogue咁.

最過份就係咁得意既2008年既月曆,要係今日至可以重見光明.........

ironman

sleeping day,晏晝訓醒同台灣女生係凱都睇鐵甲奇俠,節奏爽快,特技出色,英雄主義,型!

本人幾鍾意男主角同電子管家既關係,老闆有啲刻薄,員工有啲儍氣~~如果有續集既話,相信我都會入場睇.

揀番完夜黎入戲院睇戲,好處係唔太消耗體力,又可以放鬆吓,真係唔錯.晚飯係明星食八點半後特價小菜,兩舊水多啲找數,捧住個肚走~~~~

ps:字幕完結後既小插曲,唔係好明做mug.....

潮濕日子,家居巡視

今日係屋企,巡查衣櫃,橱櫃,厠所櫃內既抽濕器,發覺好多隻都載滿水.係潮濕既日子,真係要勤啲換,如果唔係啲衫同雜物發霉都唔知......

前個禮拜想係士多房搵鞋時見到對皮鞋面鋪住暗綠既mould,所以至提醒我屋企真係好潮濕.多得台灣女生既搶救下,對皮鞋回復舊貌,其他鞋亦得到護理~

ps:晏晝係屋企附近新開茶餐廳叫既外賣雞脾薯條都幾好食,比幫襯開個間有良心,無咁搶錢,不過杯凍奶茶就好似淡口咗啲..

令人嚮往既電單車郊遊

今日係一個 日本電單車品牌網站,見到以漫畫黎介紹當地既電單車trip,真係好羡慕人地有咁大地方同咁多景點~~

除咗美景,仲有美食實圖,真係好吸引!今年都要趁好天日子,同台灣女生多啲騎羊郊遊吓~~

日本既網站真係比較用心啲,會用盡心思去包裝同顯示箇中樂趣.如果係假期可以去啲郊外地方吹吓風,relax吓真係唔錯.不過係香港呢類型既地方就真係唔多,或者只係我唔識去啦,只係行過鹿頸,大清水,入機場.