微波早餐

 台灣女生為我買咗呢款微波爐專用早餐,今日就帶番工司試吓~

一打開睇,點解好似同封面有啲唔同既?唔通叮完會"靚仔"好多,賣相唔同晒?點知叮完之後,賣相同封面都係有幾大既出入,封面似係新鮮即整既咁,而我個兜至係微波食品既真相.......

味道一般,唔特價賣成三十蚊(特賣廿蚊),份量又爭啲,好在帶咗少量法飽同牛油做後備糧餉~

canteen城軒既不濟,實在令大家為兩餐好頭痛,連我十年黎唔帶飯同早餐既齋盆(浪子造型)都俾城軒打爛..................

愛羊保養日

朝早騎羊出觀瑭原廠check車,撞正星期六,屯門唔塞車,公路唔多車,市區又唔塞車,結果就早到成廿分鐘(09:40),人地門都未開......(其實係屯門公路見大風,所以無上汀九橋,只係經荃灣兜葵芳上程翔道,但都係比平時快)

係門口邊看羊,邊等開門,點知開門後又要等職員將店內既車推出黎,至可以有路入去,結果前後等咗半個鐘......

交低愛羊,就搭巴士番入屯門,再轉輕鐵番屋企.食完台灣女生準備既午餐,一齊睇keroro電影3,中途就收到車行電話,話搞好愛羊,皮帶只係用咗一半長度,極力子parts都唔洗換住,只係換咗電池.

騎羊回程時感覺好好,換完機油,油隔,成架車順咗好多.可能加上無咁大風,騎羊時比朝早個程輕鬆,所以就算有少少霧,都經公路行長青隧道,行汀九橋入番屯門公路.不過係臨到汀九橋時俾係中線同我平排既工程車玩,當我俾油係快線cut入線時俾佢"咇"同俾油推前黎嚇我,太過份了.

係卓爾居還埋碟,夜晚約人家係市中心食元氣,跟住係惠康見到相熟啤酒christmas gift set特價近半價,於是掃咗五盒共廿支.辛苦愛羊載住沉重既啤酒,兼帶埋我同人家番屋企~

車仔Display箱

今日行過吉之島,見到有個display箱仔幾啱心水(仲有七折),於是買番屋企,.分散放係小型膠箱既車仔,卒之都可以集合陳列,組成浩蕩既車隊~

雖然係掛牆式,但係上下倒轉佢,都可以平放係枱上.內附六塊層板,俾用家較大既彈性.

MADE IN JAPAN真係唔同啲,用料同設計唔錯,盒後面既說明書又清晰,唔怪得正價要成三舊水.....

群群歸隊

今日係群姐久休復出之日,同事們特意為佢準備小型大食會兼訂咗紮花,以表示我地對佢既關心嘛~

我成日都覺得,番工同事間多點關心同人情味,會令磨擦及壓力減少,尤其係繁忙既工作坊.

希望大家都工作順利,身體健康~

家中渡佳節

情人節,無出街食飯,只係屋企搞個小型bbq,辛苦台灣女生既準備.

飯後原定一齊睇明珠台經典西片"金枝玉葉"(ROMAN HOLIDAY),點知我睇睇吓係梳化訓著咗.不過人家都話齣戲節奏都有啲慢同平板,始終係"西式粵語長片"嘛~

交收地點

今晚約咗老豆係相熟既油站等,因為要攞啲嘢俾老豆,而老豆就還番隻batman dvd俾我.

真係好想可以同老豆入戲院一齊睇戲,唔洗之後買番隻dvd俾老豆自己係屋企睇.公司canteen咁難食,就算老豆夜晚無飯開,都唔可以黎搵我食飯,又少咗見面既機會添.......

自己想陪老豆,但俾屋企既局勢制肘.所以好多時都叫台灣女生得閒搵吓外母大人食飯同出吓街.

飲食界都有"封面與內容不符"

幫襯開既永利大排檔轉咗手兼裝修,所以我同andrew,楝哥試咗間有"yan can cook"甄子達既相做招徠既檔口(新金榮對面),結果令作決定既我好後悔同唔好意思.

我地問佢有無雞煲,佢話有出名添,點知上到枱一試,無咩味,兼且唔知點解有幾多雞屎忽.話就話係半隻,但我地覺得係將啲頭頭尾尾,下欄碎件扔落個煲.....另外,豉椒炒蟶子,殼多個肉,有啲搵笨.........

食到心灰意冷,問個哥仔"呢度有咩撚手0架?"哥仔一口話切片乳鴨丫,滷水加浸酒,我地晚晚都賣晒0架"點知.........都係失望.........

黑椒牛仔骨就好似落咗好多鬆肉粉咁,咬落好似唔太似食緊牛肉咁,錯晒.早知去"新金榮"食無咁嬲!

之後我地去咗黃金飲嘢,得知肥仔明哥已番大陸既酒店打工,少咗明哥,硬係好似"爭"咁啲氣氛~~

換油劵@倫敦酒樓舊址

晏晝搭巴士出去旺角栢裕,一心換油劵,點知係樓下攞換領信睇至知地址轉咗係mk1超級數碼廣場.呢度以前係倫敦酒樓,細個時成日都會跟老媽黎同阿婆阿公飲茶.早幾年,另一間細個成日去既酒樓"敦煌"都全線結業.

好在唔係太多人,半個鐘唔夠就換到,但張油劵唔同以前係一張紙,而係變咗一張硬膠咭.

之後行咗去兆萬信和兜吓,結果買咗呢個"懶熊"既環保袋俾台灣女生,可以氹人家開開心心咁買餸煮俾我食都好丫~~人家見到個袋都好鍾意,立即成為人家既專用環保袋.

聞名不如見面,"城軒"不值幫襯

公司canteen轉咗手,今日起由"城軒"接手.該公司一向臭名遠播,公司分店既口碑都係"差","唔掂","難食".....

小弟今日就排咗成兩個字至可以係收銀打好張單,因為阿姐唔識用收銀機.......

再用咗兩三個字既時間黎排嘢食,明明係腸仔煎蛋,個阿姐望住張單,係咁將條腸仔夾落隻碟,跟住又將條腸仔夾番走,不停重複又重複......我忍唔住話"腸仔,煎蛋呀,阿姐!"

牛油方飽,一打開竟然係三點色牛油!!(毫無誠意!)煎蛋又一"劈"嘢,好似乾"曾曾"既鹹蛋黃咁................
早餐個兜麵係齋麵加西生菜,結果都係一碗"齋".啲餐又好古怪,例如大碗麵配沙嗲牛肉,又唔包野飲........
總括黎講,"色,質,量"全都令人失望,覺得啲職員生手到好似係第一次做餐飲業............
肚飽記得肚餓時,當年asia pacific照顧公司員工飲食時,點會諗到會有今日呢???

中大學生家訪

 今日台灣女生既大學書友黎拜年,我地當然以大食會招待大家啦~

 由於今次有十個訪客,所以特意俾佢地試吓新界特色盆菜,係出邊省城好難試到o架,味道同美心或太興完全唔同,唔怕貨比貨,最怕唔識貨~

 除咗pizza hut兩個大批同一個小食拼盆係外賣,其他都係我同人家準備既,好似呢個三文魚刺身船咁,就係我今日番完早更去吉之島買既~

 上次探屈仁時提過既朱古力火煱,今次都能兌現.之後iris問屋企有無薯片,話可以試吓仿傚"ROYCE"咁,朱古力配薯片.效果當然無ROYCE咁好,相信用大塊同厚身啲既薯片會再好啲~~

一眾訪客打機,打牌,飲飲食食,玩得開心,可以咁多舊同學聚吓,又真係好難得.多謝大家既拜年禮物,招待不周之處,多多包涵!

特色晚餐(二人前):火煱+燒烤

今晚同台灣女生安在家中享用晚餐,主題係fusion:打邊爐兼小型燒烤.今晚呢餐好豐富,一枱都係嘢食,仲要動用埋茶几黎擺放食材~

用石板黎烤蟹棒,以金屬板黎烤牛柳粒.下層烤至半熔狀態既芝士,加上邊爐煱既既粟米條同灼蝦上,好食!其實今個冬天,我同人家己經係屋企打過近十次邊爐,不過小型bbq爐都係第一次,效果都好令我地兩口子滿意.

可惜凍既日子唔多,下次咁既場會都要等年尾既冬季lu.