街車

放工去新墟食吉野家,見到有架街車掛滿油缸袋,頭盔,行李網,感覺有點兒"論盡"....

考咗電單車牌後,曾經有諗過出架街車,心水選擇係HONDA既VTR250撇.除保險問題,最後令我投入綿羊懷抱既因素,就係唔方便載嘢.

街車既行車表現當然比綿羊好,如果可以做到KEEP一架綿羊用黎購物,一架街車用黎兜風,咁就好了~

襟章

呢個襟章係我剛畢業入行時買,就快有八年了,其實底托已經爛咗,只係替換咗個啱size既.

近排係我咁多年工作以黎最難過既日子,新既specialty編制,新既department system,新合作既professional team........

咩都新,搞到做咗咁多年,都好似新人咁,番到工作間,吓?又轉咗啦?每天都要適應新policy同document,有啲朝令夕改既感覺...亦有點被淘汰既感覺...

工作忙,大家齊心咪得囉,好似踢波咁,人腳唔夠,咪一人行多步囉,好可惜,新合作既professonal team係只會話隊波唔好,但從不交心出黎,一人走多一步,應付場逆境波...

電視補習廣告話齋"張cert跟你一世0架",鬼叫你讀書唔叻咩?Paraprofessional咪俾人地睇唔起囉,不被尊重,無人埋會你既感受同工作.即使一個清潔阿姐,我都唔認為就要俾人呼喝.不懂禮貌,恃強凌弱,不是文明既做法,只是蠻橫.

將心比心,好黎好去,係現今社會真係無立足之地.取而代之既係,權力鬥爭,自我保護....原來,現實社會裡,白色巨塔係活生生的存在....

ps:呢個襟章底色,同我training yr 1時戴既名牌係一樣紅色.撇開偶像產品,用意係提醒自己,做咗幾耐都好,要記住同保持,初入行時既"心境".

玉林苑

番完早更,騎羊去玉林苑食晏,順道去相熟玩具商場同藥房睇吓有無平嘢執.

雖自中五起已經搬離置樂,但一直不時番黎行吓,可能係呢度有我好多既回憶,中學既轉變,生活既鎖事,成長既趣事,當時係屋企最穩定兼健全既時期.

第一次去玉林苑,係有一排老媽子煮既晚飯好不濟(其實佢厨藝好好,只係個排較懶),老豆帶我同大佬去玉林苑食碗燒味粉麵打底(應該係老豆放工番到屋企湊我地落樓).

以前我既餐飲係汽水,但見老豆飲熱奶茶飲得咁"芝味",於是呷咗一口,覺得好似怪怪地,有啲澀口,但又唔係難飲.經過好幾次試飲老豆既奶茶,卒之都可以自己叫一杯熱奶茶飲~

放工騎羊黎食晏,除咗係抵食,可以行玩具店game鋪同藥房,好大可能都係想重拾番細個同老豆一齊食嘢既感覺.

清水灣

今日騎羊同台灣女生去清水灣玩,係上水公路有一陣驟雨沾濕我上身衫同愛羊既風擋及前包圍,幸好只係過雲雨,行車亦安全一點~花咗一個鐘頭零十五分鐘到達大清水,當然要開支香檳仔啦~

擺好個陣,一邊晒衫,一邊享用當地士多既豉油雞髀,當係晏晝兼下午茶~

食埋啲雜糧就忙於用氣泵為浮床充氣,用腳踩氣泵都幾吃力,如果用口吹都唔知要吹到幾時..人家只係貪得意泵脹個沙灘波,兩張浮床都係由我主理(邊泵,邊出汗,邊隊罐裝百威)

之後我地就向相片中紅圈中既浮台進發,人家先係淺水區訓上螢火黃既浮床,由我充當人肉摩打,以蛙腳作動力,手推人家張浮床出浮台.人家起初都怕浮床唔可以托起佢,要我用手托住張浮床,至敢訓上去,慢慢至完全相信浮床既能力.人家好開心,因為佢係第一次上浮台~人家係浮台坐定定望風景,而我就偶爾跳落水游吓.

玩到六點鐘左右就執嘢,人家先去排隊沖涼換衫.我係看管物資時,見到露天沖水區有人幫帶黎既狗隻沖身,康文處幾時話帶得狗隻落公眾泳灘?

入黑後騎羊走人,紛暗又多灣既路面,消耗既體力同精神亦較多.八點幾係元朗泊好愛羊,同人家上咗小肥牛打邊爐.我地點既火炎醉蟹牛肉粒火煱,原來真係有火,阿姐將啲配料放晒落煱,淋上酒,點火就係咁兜係咁炒,直至啲火熄咗,再注入湯底.

該店既配料選擇唔太多,招牌芝士牛丸幾好味.由於無晒加拿大桶蠔,叫咗個青島石蠔,一分錢一分貨,味道同質感都好似食蠔豉咁........

PS:卒之都同人家去到海灘,其實六月大假已經買晒浮床同糧水,但成個禮拜都係天陰同雷暴.

Monster Hunter Tri

一直都未玩過"芒亨"既我,見Wii機有得玩,於是趁吓熱鬧,試吓係咪真係咁好玩.系統都幾複雜,主線係接任務,但又要以打獵黎爭取資源點及物品,用黎開發裝備.物品調合,以及武器進化,單睇game書既攻略己經頭暈....

呢幾日都係競技場打速龍王,由於係要硬性用大會提供既武器裝備,所以可以咩都唔洗諗一片心鑽研打法.經過多次既慘死,今日卒之都俾我搞掂佢,成為我玩"芒亨"第一隻成功獵殺既大型怪物.

其實往後既怪物,仲大條同勁過佢,例如海龍.雖然平時玩慣較爽快既game,但我諗我都會繼續玩落去,始終係大作兼且期望同其他大龍開片~

ps:當初以為買錯咗試玩版,因為入森林時無背景音樂,加上唔太熟個system,係咁兜圈.好在更衣室內一位玩開"芒亨"既哥仔話我知,只會打大龍時至會有音樂打底~

裕滿人家-$88任食火煱(免加一,免茶芥)

今晚同台灣女生上外母屋企坐吓,跟住就一齊去裕滿人家打$88任食火煱.

每枱都送既海鮮拼盆,啲蠔仔有啲韌,反而蟹仔同扇貝較可取.由於要騎羊,所以無飲酒,一片心飲免費既竹蔗茅根.

雖然係任食,啲配料都唔算少,肥牛都唔係全肥膏,$88真係好抵,但海鮮配料就要自費,例如海蝦同珊瑚蚌(不過啲珊瑚蚌唔太新鮮...)

家務男

細個時總係唔明點解老豆成日都好似咁忙,放工仲要洗衫抺地.大個咗就明白,屋企要住得舒服,真係要花時間做家務至得.

雖然今日係放假,但都係家中進行定時一個星期兩次既吸塵,拖地,洗廁所套餐.......

兒時卡通,電影真實化

除咗變形金剛,G.I.JOE係另一套兒時經常睇既美式卡通.其實印象都好朦糊,只係記得正派係義勇群英G.I.JOE,而反派就係毒黨,雙方都係以先進既武器黎角力.當年都有好多相關既玩具賣,男孩子總係想儲一隊正派同一隊反派,打過你死我活(直墮玩具商既圈套).

今日同台灣女生一齊電影版G.I.JOE,兩個鐘裏絶無冷場,特技動作出色,劇情緊湊,毒蛇黨司令既身份,以及女主角既變節,亦令人驚喜.

單憑戲名"G.I.JOE -THE RISE OF COBRA"就知道一定有續集,本人就非常期待~~

硬闖雨雲區

今日放工突然天陰,冒著微雨騎羊去大興還碟,諗住可以趕得切番屋企,點知上到大興橋就進入白茫茫既雨雲帶......

PS:上身衫濕晒,條褲濕咗70% 兼過底

戲如人生

今晚同台灣女生係屋企睇華爾基利暗殺行動,其實之前都想入戲院睇,好在無去入場,如果唔係我真係可能會覺得悶,反而係屋企邊睇邊食邊飲,同人家邊講邊睇,當睇電視劇反而仲好(上圖都幾似電視劇廣告硬照丫).

第二次世界大戰背景,湯告魯斯飾演既德軍上校,係駐守非洲時俾炸傷一隻手掌同一隻眼.雖然係傷殘,但無損男主角既魅力同軍階.一向反對納粹黨既暴行及侵略世界既男主角,康復後更被招攬入暗殺元首希特拉,以圖拯救德國及全世界.

計劃好簡單,只係諗住係一個密封既基地開會時放炸彈,隨即宣佈元首死訊,以名為"華爾基利"既緊急密令(當然事前係做咗手腳)黎操控臨時政權,更將暗殺罪名加於納粹黨親衞軍,順勢斬草除根.

行動完成咗大半,可惜最後因為會議地點更改為非密封式既場地,結果炸唔死元首,繼而被希特拉中斷計劃,最後被槍斃.

係現今社會,有幾多個人可以做到撥亂反正呢?公司部門最近大搞改革,結果部門內一片混亂,前線員工筋疲力竭,惡性偱環下,表現每況愈下,團隊之間既磨擦亦愈鬧愈大.既然一向都無足夠既資源,點解仲要強行擴充專門化業務呢?