幸男覆診

今日同台灣女生一齊放假,因為要陪幸男去覆診,少主都尚算有耐性等候.

可惜度高磅重後,幸男有少少"扭計",原來唔覺唔覺,少主已經差唔多係一包8公斤米咁重,俾佢呃咗添.....

睇完醫生,無咩嘢,下次再覆診.行去搭輕鐵時,見相熟阿姐係度,於是派幸男上前打招呼.

預食團年飯

今晚提早食團年飯,係市中心睇均晒迎喜,稻香,好日子,都係美心皇宮既餐最啱心水.

今年係少主幸男先生第一次出席,當然帶住條"杜卡迪"口水巾,記住住後都要年年出席,唔好嫌我哋煩........

個燒味拼盤係好味,如果搭埋海蜇就無得頂~

菜式簡單,蝦球大粒又爽~

重頭戲莫過於"懷舊雞燉排翅",阿姐將啲料舀上碟,真係夠晒份量,大家各自夾番啲料落啲湯度邊飲邊食.

有幾好食?睇見人家既笑容就略知一二啦~我就當然忙住食,無影相上鏡啦!

大個咗至鐘意食既蒸魚,老虎斑當然好食過屋企常規既紅鮪啦~

最後食埋個鮑魚花菰(生菜底),真係飽到上心口,始終我哋係三個人食四人餐嘛~等幸男大個啲,幫輕吓我哋肚仔既負擔啦.

零的領域

今日番早更,係一點左右偷時間入pantry叮咗個波仔飯食(係屋企帶番工),因為放工要趕時間出觀塘整車.話說星期五起見愛羊行車時,速度錶同里數計唔郁,打去原廠問話可能係個錶芯壞咗,所以預咗今日check車.

放工騎羊全程零速前進,以路上既巴士速度及運作正當既轉數錶作參考指數.無驚無險,安全抵逹車行,只係比平時用多5分鐘時間,落車時發現一盞頭燈燒咗.......交低部車去行APM,一個鐘左右就話有得攞車.

其實師傅話我十月至換完機油,今次唔太肯同我換,但我話要湊仔,好難得偷到時間出黎整車,師傅至笑住話"咁又係~"速度錶,里數錶回復正常,回程就更加安心,前後brake比之前敏感,相信師傅應該幫我校緊咗wire.

愛羊總算係過年前完成維修,搵日抺埋車打腊就最好嘞~~

住家"蚊"型遊樂場開幕

放假同台灣女生湊住幸男係市中心食完麥當勞晏晝,係超市買埋嘢就番屋企,安心育嬰(沖涼,卡片,餵奶)~

搞掂晒基本嘢,就鋪膠地氈,,玩具被,及砌合玩具健身架,客廳頓時變成遊樂場.雖然少主好開心,笑到嘔奶,但其實佢無咩點用手去摸同fing(揮舞)啲可動部件,只係我哋示範俾佢睇點玩.

見少主玩到呆呆哋,捉佢出黎坐櫈仔,點知佢卦住望電視..............

晚飯由人家主理,成份大盆咁上枱,出街食唔知要收幾錢呢?

無時間入元朗買紅酒,唯有係吉之島買之前飲過既智利紅酒,價錢相宜又隱隱陣陣(相熟promoter阿姐無番工)~唔洗番工,係屋企天輪樂,兼有住家飯食,都算係咁.

懷舊士多

今朝係德輝同子健既陪同吓係元朗簽完文件,見未夠鐘番工,於是去咗德輝阿姨間士多食啲嘢兼坐吓.

好耐都無去過啲咁舊式既士多食店,雖然只有麵食,三文治同飲品,但不少村民幫襯,我點咗個牛肚河,味道又唔錯喎~

孫&仔&媳,齊齊捧場

老豆今日係市中心大會堂對開廣場攞保安優異表現獎,我同台灣女生及幸男都有去趁吓老豆高興.由於台上表現音響太大,老豆怕嚇壞孫仔,不時用手遮掩住幸男既耳仔.

特意為幸男戴上禮服口水巾,以示尊重嘛~

雖然老豆話其他同行都係自己黎,無家人陪,但係睇得出我哋一家人既支持令佢安慰~

夜晚同卓敏及小歌仔一齊食晚飯(朗豪坊Mr.Steak),其實人家係市中心搭巴士出荔枝角搵佢哋睇衫,而我就搭的士番屋企,將幸男交俾外母,再搭63x出去.

尋晚幸男成晚"扭計",令我同人家都身心疲倦.原本諗住唔出黎食飯,但人家聽到有得睇衫,就建議叫外母幫手湊幸男,兩口子出黎抖吓氣.

人家與上鍾意甜品既卓敏,一齊叫咗杯沙冰特飲,但原來只係咖啡加雪糕同cream....

其實今日我都有收穫,首先係長沙灣既ducati買咗1set2條既口水巾俾幸男($230).

另外就係旺角信和地庫既橫浜買咗"鋼の錬金術師 FULLMETAL ALCHEMIST FINAL BEST"CD,原來2010年7月已經出咗.

棒球男

台灣女生為幸男換衫戴帽後,加埋個玩具波,成個造型好似棒球選手咁.人家隨即用手機影低佢,少主又難得地坐定定兼眼望前咁俾人影.

好可惜仲未掌握到係屋企用nex-3既設定,搵日要的起心肝黎試吓~

黃金海岸餐廳食散餐

今晚同台灣女生騎羊重遊相熟餐廳,今次用nex-3黎影,效果比以往用canon dc仔好得多.

人家最愛既生蠔,不過只得半打,因為侍應姐姐話剩餘個半打較細隻,所以唔上俾我哋.每人分得三隻,人家有點覺得唔夠喉~

每次都好欣賞呢個架,檸檬片,醬料,井井有條,外型又夠靚~

今晚唔食餐,全部都係望住個餐牌,想食咩就點咩,第二道上既就係忌廉白酒煮藍貝.

再叫燒鮑魚仔,一人一隻,唔太大隻,質地都唔"韌",味道都ok既~

法式燒西冷扒,但係無諗過只係黑椒汁西冷,勝在肉厚又嫰口.

燒虎蝦兩隻,除咗嗒到味道外,食咗好似無嘢落肚咁,好空虛.............

中場有段時間無餸上,邊等邊"鐘"眼訓,以逃避肚裡既空虛感.

卒之都等到德國燒豬手上枱,但個汁都係黑椒......

食完個豬手都好似爭咁啲,於是叫賣個炸雪糕球(約一個拳頭咁大),一人一半,食埋就啱啱好~

無辜樣

每當幸男喊完收聲或"扭計"完,都會裝出一副無辜樣子,包括食奶掃完風之後.

少主三個月大,開始笑多咗啲,可能加上我同台灣女生放大假,比平時多時間陪佢.

機密邂逅 (The Tourist)

特意叫外母黎屋企幫手湊幸男,我同台灣女生就出去新墟凱都睇兩點四個場"機密邂逅".

靚人靚景,計中計,兼幽默愛情故事,主線簡單,但無諗過女主角係卧底,跟疑犯條線,跟到因愛變節,後來因為水魚男主角而動搖.最後水魚男主角勇救被疑犯仇家恊持既女主角,正當情路轉軚時,水魚男主角揭露其真正身份為整容後既疑犯,真係happy ending既"新歡舊愛共治一爐"~

散場係茶餐廳食過下午茶行去大興花園既吉之島10蚊店(地方好大)逛咗個零鐘,買咗二百幾蚊嘢,搭番小巴去市中心.

係意粉屋食芝士火煱做晚飯,join埋做會員,即享芝士火煱減$50優惠,兼且埋單九折~

火煱料一碟,青口,煙三文魚,蘑菇,南瓜,鮑螺片,青瓜,車厘茄.食到尾段覺得唔太夠飽,於是散叫燒西冷牛肉條,及炒翡翠螺.職員見我哋煲芝士剩番一半,於是都主動幫我哋催廚房,結果我哋好趕咁食埋,差唔多一滴芝士都無剩咁滯,由起爐計半個鐘就清枱....

大假食豪啲之住家打邊爐

放大假第一日當然要享受吓啦,天時咁凍,有咩好得過打邊爐丫?對上一次同台灣女生打邊爐都係09年既事,因為舊年人家"陀"住幸男,飲食要格外注意.其實我哋都鐘意係屋企打邊爐多過出面,除非有特別配料,例如豬骨煲.相同價錢,自己買既料點都會多啲同靚啲,而且飲mug都得~

晏晝同台灣女生出吉之島買火煱料,幸男就由外母睇住.今晚既重頭戲係日本松葉蟹,味道鮮甜,尤其係個蟹鉗(甜度:蟹鉗>蟹腳>蟹身)~新配料-越南拉長虎蝦都唔錯(爽口),其他配料就依舊美味~

為咗食得安安樂樂,外母先餵飽幸男,再安頓佢入bb床訓覺,跟住我哋就毫無顧慮咁開餐,只係間中入房睇吓少主.

宵夜甜品係日本牛奶布丁,我食既朱古力味好似無咁味咁,早知就唔試,留番黎買多樽牛奶味俾人家啦.