豚屋

晏晝同台灣女生帶埋幸男出市中心食晏,每次搭車幸男都係好奇四圍望.

人家話試吓市中心新開既豚屋,SET LUNCH無廚窗介紹既特色吉列餐,於是每人一個$88.....

有湯有前菜有吉列主菜同飯加埋特色飲品(味道麻麻),真係一枱都係嘢食.

我同台灣女生都揀咗吉列豬扖,一個係芝士,另一個係香草忌廉.塊扒都幾大份,食到一半已經有啲飽,但味道真係好食.其實真係可以兩個人分一份黎食,會比較相宜.

由於個餐飲唔太啱口味,所以走咗去買fully既珍珠奶茶飲~

YUI香港演唱會

今日同台灣女生去機場博覽館睇YUI既演唱會,八點鐘場,七點八個字到達,見精品部人山人海,為免遲入場,所以無去迫.

無諗過會爆場,真係咁多人鍾意YUI?真係咁多人有錢買貴飛?坐我哋隔離既一對小情侶,個樣未夠十八歲,但都係坐$580既中價位,男朋友仔仲用攞部單鏡機黎zoom埋個台影相,顯得打咗咁耐工既我有啲不濟....

開場以鋼之鍊金術師FA既AGAIN打頭炮,之後既歌都係新碟既歌,舊歌唔多,有CHERRY同太陽歌既主題曲.場內既觀眾包括坐隔離既小情侣都好熟識啲歌同流程,唔知係咪一早就溫定書,睇咗日本個演唱會先,但我覺得咁樣溫定書的話,咪無晒驚喜囉...

中間有葛文輝打電話到台上,用唔鹹唔淡既日語加廣東話同YUI傾計,搞吓氣氛在場當然有個翻譯講番俾YUI知啦.Encore時段,阿葛真係黎咗上台,唱咗好幾首歌,最後以自彈自唱既goodbye days作結,全場黑晒,以係一個spot light打向坐係台上既yui,無用咪清唱,但全場都聽得清楚兼陶醉~

睇完場刊至知有1set3個既襟章賣$150,於是散場走去精品部排隊.

排咗廿分鐘至輪到我哋去買,一心諗住買襟章同方巾.

點知話兩樣都賣晒,我哋問陳列品賣唔賣,但職員話唔賣,有啲失望...

黃金海岸

今日番完早更食完晏,番屋企沖個涼,洽咗半個鐘,就帶幸男出街,幸男等得有啲唔耐煩...

時間關係,我哋坐的士去黃金海岸,幸男第一次望海兼吹海風.

特意帶埋相機黎同幸男影相,當然有係屯宿之男既官方聚腳地"星群地中海餐廳"外影番張相啦~

另一個紀念性景點,就係呢間法國餐廳,舊年人家同師母陀住BB係呢張枱一齊食晚飯.

夜晚係一間好細既日本料理(熊屋)食,生蠔味道一般,賣相又爭啲.....

刺身拼盤,味道都OK,難得有劍魚腩食~

$68一個冷麵,唔覺得有幾特別同好食......食完既評價係價錢同味道唔太成正比,下次都應該唔會有交易.

食完飯,同幸男行咗去噴水池廣場趁熱鬧,睇吓夜景燈飾.

由於唔係太飽,所以去咗PACIFIC COFFEE度飲咖啡同食芝士蛋糕,順便當HEA吓...

今日我同人家都好努力咁俾時間陪幸男外出(其實好攰),等佢唔洗成日困係屋企,唔知道幸男知唔知道我哋既苦心呢?

inception應用術

是日放假,變相係住家湊仔更,台灣女生番晏,我一個人對住幸男,成個晏晝唔願訓,搞到我要邊做家務邊陪佢.趁六點半佢訓著咗,於是好急咁食咗人家為我準備既三色便當.

七點半左右餵幸男食餬仔,點知幸男愈食愈吽,跟住反眼,最後體力不繼,潛入深層意識,創造完美世界......

為幸男放低椅背,等佢訓多半個鐘至叫醒佢再食.叫極都唔願醒,擘大眼又再合番埋,用手機放歌黎炸醒佢,但都無反應.結果要用INCEPTION個招KICK,解開椅背個鎖既一瞬間FREE FALL,加埋推番高個椅背,幸男就醒咗,繼續完成埋個晚餐.

歡迎加入父親大人行列

平時SLEEPING DAY十二點幾都仲係張床度,今日就已經出到太子,與同事們一齊探哥頓既小朋友Ariel,睇落去較似阿嫂.

初為人父,暫時未哥頓既倦容,只見歡喜笑臉,加油呀,哥頓!

探完Ariel,落番旺角行陣黎等小歌仔放工一齊食晏聚舊.

搵到間餐廳,有餐湯,沙律,主菜,餐飲,地方舒適.

食完嘢,坐係度傾呢傾路,侍應都無話催我哋埋單或交枱,其實食物味道都ok,可惜唔記得係叫咩名...............

泳季

早更臨放工係pantry食少少嘢,交埋更就換衫騎羊去相熟泳池游水.雖然游得唔快,十一個來回,都算有交代.平日少運動,尤其係冬天,唯有夏天去游水,雖然今年要做湊仔公,但都總堅支擠時間出黎游水,最多係早更後趕住六前番到屋企.

游完水,係池邊曬咗十五分鐘太陽,急急腳去沖涼換衫,騎羊去市中心,買啲補給品兼台灣女生托我買既餸.夜晚安在家中食飯,同幸男玩吓.天氣好,騎羊出入都方便得多,藍天白雲黎兜風,感覺最好~

PS:今日買咗SANYO既叉電機同電池,因為用開既GP電成日叉唔夠50次就死...SANYO既eneloop可以叉1500次,而且80%電量可以儲備達一年.希望以後唔洗得係咁多死電同浪費.....

探霍氏(阿公)

今日番完早更,行去紅橋既金銘食晏,再搭58X出去荃灣,因為要上仁濟醫院睇阿公.

老媽星期一朝打黎話阿公可能唔得,但由於我腸抽筋兼結婚註冊紀念日,所以到今日至就到時間出去.

係急症詢問處得知阿公係15樓內科既CCU,見多人等電梯,所以行上去,好攰,平時番工都係行九層,要豪多六層....

霍氏頭髮剃短咗,有啲唔認得,因為入老人院之前都仲係分界頭,呢幾年同老媽交惡後都無再經家庭聚餐見到阿公.

駁住部OXYLOG,吊住DOPAMINE,DORMICUM,ISOKET,仲有部TEMP CARDIAC PACER掛係床頭.人老了,無法子.跟霍氏既童年回憶,一一想起:夏天去荔園玩,係阿公房用放大鏡燒窗外既盆栽,係枕頭下搵到本<龍虎豹>(但當時太尊重阿公,無擅自打開黎睇),聽阿公係報紙上教生字,人生道理(難得糊塗/做人豈能盡如人意,但求無愧如心/唔好偏食,世界上咩都食得,除咗碟,骨,同番皂)......最近既回憶都只係四年前同拍緊拖既台灣女生一齊陪阿公去聖母醫院覆診,係CANTEEN坐住食住黎等攞藥.

同行家交談得知病情後,開盆水用手巾黎幫霍氏抺面抺身,鬚唔太長,所以無用即棄剃鬚刀.其間同霍氏講佢已經有多個外曾孫,叫幸男,意思係幸褔男孩."你咁鐘意睇新聞,之前日本咪有個內閣官房長官-枝野幸男,咪就係嗰個幸男囉".有諗過搵日去老人院夾佢出去飲茶見吓幸男,但無諗過趕唔切.我會等幸男大過啲,同佢講我同霍氏既回憶.

見老人院啲片只係中碼,於是去樓下既真善美買咗包大碼片,點知番上去個陣撞正老媽.同大舅父及表哥打過招呼,再同老媽交手,俾佢煩咗陣,始終都係話我唔啱,"樹欲靜而風不息 子欲養而親不在",自小學就用黎話我既說話,今日三十一歲有多都仲係受緊呢句說話,其實陰乾屋企啲錢兼唔理屋企既係老媽既最愛-阿哥.

唔想係呢個時間嘈,唯有沉住氣,借詞先走.近六點,撞正放工時間,全桯係巴士企番入屯門,區內番工真係偉大.....

食飽至番晏

見咁好天,番晏前騎羊同台灣女生去置樂既娘惹食飯,搵個遮蔭位泊好愛羊~

今日人家放假,夜晚自己一個人係屋企湊住幸男黎食,所以晏晝呢餐都想去兜程車,坐得舒服啲黎食晏兼傾吓計.

食完嘢,順路兜埋人家係市中心既燈位中途落車(行吓買啲嘢),自己就孭住人家既頭盔繼續上公路番公司.呢排番工咁忙,唔食飽啲,都真係未必挨得到晩飯時間.....

結緍四週年

今日係我同台灣女生關島註冊結婚既紀念日,臨出門幸男見我戴住頂帽,係咁扭住要抓.當我俾佢戴,幸男就笑晒口~

本來諗住早啲出門行吓,但因為我尋晚開始肚痛腸抽筋,所以好晏至出去太子做預約既按摩.可惜店員搞錯咗,令到兩個鐘既全身磨沙加香薰精油按摩,變咗只係香薰精油按摩.本來已經有啲不快,加上人家既技師好大力,人家話好似俾人打咗一身咁,事後向櫃面就約期及按排失當而"理論",結果每人平咗$100.附近多咗個花墟1號既小檔區,行咗個圈就走,買咗件廿幾蚊既背心俾幸男做"手信".

雖然今日個肚仔好過尋日,但都係無精神同體力去行遠啲,所以去咗皆旺睇咗陣玩具就去隔離既利苑食飯.餐牌選擇唔太多,同上次一樣諗咗好耐至有定論, 先上既係法國藍龍蝦(潮食),冷盆咁上,醮上醬汁黎食,好味又夠特別,拆晒殼,啖啖肉~

脆炸海山骨,好香口,但又唔覺油膩,送啤酒一流!(可惜我肚痛初癒)

油鹽焗奄仔,部長阿姐話時令喎,於是一人一隻.本來諗住咁細隻,好快食完,但蟹蓋裡好多膏同油,肉都比預期多~

見人家既笑容就知係幾好食啦,不時不食是對的!

以為會唔夠飽,叫多碟家鄉炒茄子,點知食咗幾舊已覺得飽(結果將有剩既茄子同海山骨加白飯用外賣盒帶走).咪以為啲茄子濕漉漉,其實咬落都仲係爽口,同埋唔知點解可以咁鮮紫色.

無咩特別節目,希望人家體諒.有期會的話,真的想同你去多次關島行吓~

老豆探幸男

今晚老豆無飯開,於是過黎屋企一齊食住家飯兼探幸男,可能幸男開始認得爺爺,無之前咁扭計.

今晚海鮮類係蒸花甲,因為百佳賣游水魚要$45條,少見既花甲反而$28斤.

肉類就係蒜香牛柳粒,香口嘛~

仲有鮮魷炒白菜,辛苦台灣女生主理晚飯~

三爺孫一齊影合照,幸男坐係專用櫈,係爺爺隔離同我哋一齊食飯.

食完飯,老豆同男一齊坐係梳化睇"魔術擂台",幸男好集中精神咁睇,好入神.當魔術師表現完畢,幸男就會叫出黎(噢,嗚....),點知老豆好搞鬼咁同幸男講,"咁緊張?俾個A佢咪得囉"

每次老豆黎探幸男,都開開心心,我同人家都覺得安慰~

PS:體貼既人家,為咗我同老豆可以邊坐邊睇電視邊傾計,兼顧埋洗碗碟,有勞了~

手機閒照

番晏前係村口茶餐廳食咗個双菇肥牛飯,飲凍啡($32),每次我都係叫少飯,因為我胃口無正常男子咁大.

藍天白雲,可惜我要番工,無得去游水,希望今年可以同台灣女生去清水灣玩吓水(巳經一年有多無去).

放工見到前輩既布冚被吹開,於是偷影張相,再幫佢笠番好佢.

之後再騎朋友托管既400cc羊出去新買糖水,當係放羊,run吓副engine.唔知係車身較重,定係緊張渣朋友車,兜番公司前後行咗8km後,覺得無自己架250cc咁輕鬆~