老爺讚家嫂

今晚老豆無飯開,我叫佢放工上黎搭食,順便可以探孫仔,爺爺當然開心.行出輕鐵站等老豆攞出埋架摺車出站,就一齊踩單車入村,經過花炮會買埋兩罐冰凍健力仕黑啤番屋企(今日無買定,焗住俾人賺....).

蒸排骨,炒豆苗,煎餃子雞翼,簡簡單單,老豆話好食,排骨無柴皮,雞翼好似炸過咁.人家聽到當然開心,啱啱結婚搬出黎個陣,叫老豆上黎食飯,老豆每次都婉拒,可能係拍拖個陣老豆見過人家煮俾我食既麵同餸.唔係讚自己老婆,人家廚藝真係有進步,雖然唔係咩星級大廚,但足已令我期望及放心係屋企食.以前細個唔明老媽煮既飯好似無咩花款咁,而家先知放工仲要煮飯,都真係好攰,有菜有肉有飯已好好了.

幸男開始自己攞奶樽黎食臨訓個餐奶,不過朝早個輪就訓到烏吓烏吓咁等你餵到埋口.幸男既笑聲同成長進步,絶對係我同人家既生活情趣之元素.

人日

是日人日,師傅同師母帶埋孜孜黎家訪,平日大家都較難就到時間,咁啱新年可以就到上黎,咁次都係師傅第一次上黎新居.諗番起,一個人住市中心時,結緍後既租盤,師傅師母都有上過黎家訪.幸男今次無係咁喊,同孜孜玩得幾埋,一齊分玩具玩.

傍晚就同台灣女生帶幸男出市中心間POKKA CAFE食,星期日兼新年時間,四圍都無位,本來諗住去洪水橋間德國餐廳食,但晏晝打去留位時,己FULL BOOKING,得番二人BAR枱........

食完飯,係市中心間東海堂買咗個蛋糕,再分兩架的士上我屋企食,因為今日除咗係人日,仲係教練既西曆生日.雖然有影教練切蛋糕既短片,但可惜無話影番張大合照,始終難得可以一班書友一齊聚吓嘛~

PS:多謝師傅師母送俾幸男既THOMAS路軌車

初四轉台

智能手機既普及,令手機上網變成不可或缺既生活環節.用開既SMARTONE合約將完結,見JACKY轉用既MANGO台(新世界傳動網)2.75G上網都唔差,好過PEOPLE,但月費都係$7X.我用SMARTONE齋通話,最平都要$6X一個月,於是的起心肝去轉台.

台灣女生一直都想係屋企有個平板電腦,可以係屋企四圍上網,唔洗同打BLOG既我爭電腦,但我覺得係屋裡用手機WIFI上網都OK丫.情人節前席,做定功課,格定價,揀咗XPERIA ARC S紛紅色機俾人家作禮物,上台價$2898,超抵(無保護貼送,但有多一舊備用電)!期待三月中,齊齊轉用上網PLAN~

人家好滿意新機,只係新墟間鋪細,人家要係門外看管住扭計既幸男,而我就係店內等阿姐打單同簽文件(因為三個冧巴,我,老豆,人家).最後我出去接手睇幸男,換人家入舖簽文約時,大排長龍既叔父話人家"原來打尖"......

PS:六點鐘左右插SIM咭用新機,無上網,八點鐘人家打去SMARTONE話取消流動數據,怕無端端會斷KB收錢,可惜都扣咗廿蚊有多.第二日SMARTONE打俾人家SELL上網PLAN時至知扣咗錢,原來話SMART PHONE會有啲PROGRAMME暗地裡會下載數據,真係百密一疏.......

暖氣

新居入伙時特意揀大金既冷暖變頻冷氣機,貪冬天十度左右可以暖啲,等幸男唔會凍親.舊年係租住既單位試過用陶瓷電暖風機,但係最凍既日子都係唔夠用(隊雙腳埋去,都只係腳板覺暖意).今個冬天一直都只係十二三度,雖然要著褸,但又唔洗開暖氣咁誇張.

今日夠晒凍,市區都話得八度,屋企凍到唔願行多步,客廳開咗暖氣後,感筧好似外邊係十八度左右既天氣,舒服好多.訓覺時係房開住黎訓,真係唔洗加多張厚被,用溫度計黎CHECK過,房間裡真係21度架~

PS:其實台灣女生試過有一晚唬我番夜班,自己係房開暖氣訓,結果舒服到唔知醒番工.....

初三中大聚會

番完一個好累既夜班,訓到晏晝就同台灣女生一齊帶幸男出去牛頭角參加人家大學書友既聚會.

朗朗不概為乖BB,咁多陌生人都無喊無扭計,眼睩睩咁四圍望,就算自己一個人訓係床度都無喊住要人陪...

幸男起初唔太放心玩,食完糊仔飯,到後期就四圍行,仲同彤彤一齊玩,唔再係一味攬住人哋.

健伯今日有少少失準,幸男唔太黐佢,好勉強至影到張合照.尾段時,我哋大人坐住黎傾計,幸男同彤彤就係SYLVIA既男友陪同吓一齊玩.主人家JUDY同佢老公阿LAM都話有咗小朋友之後少咗傾計時間,就算近黎請咗菲傭都係等小朋友訓咗覺至可以講多兩句......為人父母,心態係唔同咗,聽到其他家長既苦處,份外身同感受.
阿軒以啤酒利誘阿健爆感情事,所以我哋坐到最後至走.小雨,大風又夜,CALL的士直接番屋企($18X),半個鐘有多至番到入屋.人家傾得咁開心,因為書友們平日都各有各忙,尤其係部份成員已經有小朋友,趁今次聚會可以抖吓氣咁放鬆吓.

戶外燈

今朝特意入元朗扑鎚買尋日睇中咗個款戶外燈,十一點幾到鋪頭,老闆話倉有貨兼已攞到手,下午師傅都係有時間上門安裝.其實市中心間HOME LIGHTING燈飾專賣PHILIPS燈,但嫌佢師傅裝工每盞要$150......

夜晚著燈既效果唔錯,黃光望落幾舒服,夠光得黎又唔會太耀眼.以前只係簷篷下兩個大白光波燈,邊皮位置照唔到,而家由牆邊照番入中間,理應簷篷位唔夠光,但客廳既燈光透過玻璃作補償,效果啱啱好.

新居住落都近四個月,由當初成屋亂糟糟,外圍配備不足,到而家咩都搞掂咁滯,屋企愈住愈覺得舒適.

ACE COMBAT CROSS RUMBLE+3DS+拡張スライドパッド

尋晚臨去屯宿聚會前,搵咗阿禮係市中心陪我買3DS機同ACE COMBAT($1500+$460+$50),其實都因為呢隻GAME至會決意出機.由PS年代3,4,5集我都有打爆,第5集更煲到全S級過關!3DS版少咗啲制用(左右水平微移,上下左右回頭),好唔慣,打起上黎都無咁有FEEL,於是今日傍晚去番間GAME店買埋個SLIDE PAD黎打,可惜哥仔無平比我,一口價$150交收,希望可以打番S級出黎啦~

同台灣女生係吉之島買多少少嘢,騎羊番屋企食鴻星盆菜(多得外母代收速遞),咁啱老豆話屋企無飯開,於是上埋黎一齊食,當一齊做節.面個浸料有相為證,下面就有雞,鴨,豬皮,但無食開既魚旦同蘿蔔,反而有年藕及豬腳.....七百幾蚊,預六個人享用,我哋四個人都食唔晒,有剩既都俾外母入起帶番屋企.

一家行元朗年宵

今晚同台灣女生帶幸男去元朗行花市,貪早啲去無咁多人,可以輕鬆啲推住BB車逛吓.以前德輝會投攤位搞年宵,但呢幾年都投唔到,感覺總係無咁親切.

龍年主題,好多相關精品賣,但我哋都只係買咗個動物氣球俾幸男,行咗都無半個鐘就去番搭西鐵走人.

番到屋企,幸男對企鵝氣球不太友善,甚至可以話係唔信超,係咁抽打佢,愛心欠奉,完全打破小朋友鍾意氣球既定讑.....

其實行年宵前,我哋去咗食大排檔,幸男係咁要食白飯,食到個咀掛住一粒飯都唔知.由於晏晝有人黎家訪,幸男唔願訓晏覺,搞六點食晚飯個陣狂發脾氣,洽眼訓,結果喊到攰至訓著(其間都係抽泣住訓).等到幸男七點幾醒咗至帶出街食大人飯.....

見近大坑渠邊有間專賣生啤既舖頭,問過大排檔阿姐,話可以買黎飲,於是行咗個l大"L"字去買,哥仔話飲完攞番隻杯去還就可以了.食完飯,抱住幸男去陪我去還杯,我俾幸男代我將隻吉杯交還俾哥仔,好在無甩手打爛啫....

大假小休

放大假第三日卒之都好天,騎羊入元朗係相熟店舖買咗支紅酒.本來想買埋酒杯,但賣晒,唯有過埋年至再黎買.

順道係小樽買埋生蠔番黎食,自己買既比酒店自助餐供應既味道好,兼且大隻啲~話晒放大假,無出外旅行,咪食餐好少少既,惠勞吓自己同台灣女生.以前都會出去有蠔食既酒吧邊食邊飲,但而家要湊小朋友,較困身,所以多咗係元朗買番黎食.

MOS burger

今日同台灣女生去市中心間mos burger,見到有和牛漢堡,就算貴少少,都立即磅水試吓啦~

雖然實物同廣告個樣有唔少出入,但啲料都幾厚吓,有蛋有菜有茄,加埋啲醬汁真係好好食.話晒係期間限定,相信我同人家都會多咗啲去食呢個包~

 

帶子雄郎之紅磡飲囍酒

今日RITA同阿軒結婚,台灣女生為佢哋做姊妹,尋晚已經去咗酒店度過夜準備.我就今日傍晚先帶幸男出紅磡.單睇呢張大照,好似好順利咁,其實過程好辛酸...首先,第一程輕鐵,幸男已係咁扭計,唔願困係BB車,挨到上西鐵,無位坐之餘,幸男仲要怒喊,怒典,搞我好似結果要單手抱住佢,另一隻手就抓住扶手.幸男仲摸扶手既姐姐,好在人哋見到唔係我摸,仲幫頑皮既幸男執番隻鞋.....全程抱到手斷咁滯,臨到紅磡站至黎訓著,結果好趕咁放番佢入BB車,安全帶都係扣得一半就推出月台.又怕搞醒佢,但又要訓番好同扣安全帶,真係好倫盡...

見無落雨,由火車站推去酒店,咁啱商場扶手電梯壞咗,又無升降電梯,結果以雙臂抬打橫抬起載有(睡夢中)幸男既BB車,望唔到前咯下,一級級咁落....推到下酒店中菜廰,幸男就醒咗.起初幸男唔認得人家,之後至認得無戴眼鏡兼化咗粧既媽媽.

台灣女生忙佢姊妹工作,我繼續做湊仔公,咁啱人家既大學同生既丈手都係湊仔湊女,結果影咗張,<<三公三B圖>>.....人家無幫手送客就換衫走先,CALL8折的,都要$16X至番到屋企.

2012

新一年既第一日就要A/N,可以舒舒服服咁係屋企食住家飯,真係有勞台灣女生.雖然唔係啲咩新鮮食材,只係急凍或加工食品,但有菜有肉有湯,已經唔錯了.

幸男已經一歲零三個月,會行會走,成日係屋企度搞搞陣,多咗講嘢,"爸爸","爺爺","媽媽","打打","蘭蘭"(男男),以及BB話"打必D"......希望幸男快高長大,健健康康.隨住幸男活動能力提升,湊佢個陣都攰好多.同事長輩及前輩們都話呢段時間最得意,本人都覺得係,因為幸男好似明白大人既意思多咗,笑多咗.雖然成日臭脾氣,扭計喊,始終其他時間都係惹人喜愛.

人家既愛心同耐性都比我好,又鍚幸男,有時見到人家因為幸男而開心,自己都會筧得一家人係開心既,我主攻家居清潔同雜務,好在人家都無怪我相比下較少照顧幸男(平時人家負責幸男既膳食同氹訓覺).食完飯,,陪多台灣女生同幸男一陣,就騎羊番工,佢哋既笑容,係我份苦差既抗衡劑.