拜山,食飯,飲嘢

去完柴灣拜山,夜晚同一眾屯宿之男去跑馬地食飯.雖然係大排檔,但都係名牌大排檔,名人都黎幫襯. 

拜完阿強,一齊食飯,呢個模式已經係第四年了.各有各忙既大家,好難得一齊聚吓,雖然係咁既原因下黎聚會唔係一個特別開心既主題,但難得既係,大家都仲係咁記掛阿強,大家都係為自己既既信念而活著. 

食完味道較溫和既沙拉骨,上湯菜蕊,食呢味辣酒煮中蝦,覺得好辣口,但好好食~

邊飲啤啤,邊食邊傾,大家有無宿舍年代係和生食飯既感覺呢?

風沙雞又幾好味,好似酒樓食咁樣.

筍殼魚,第一次食,哥仔話呢條新鮮又大條啲,所以比餐牌上既定價高少少,果然無介紹錯,美味.

最後食埋個豬頸肉同滷水鴨下巴(唔記得影相),大家都好滿足咁埋單,準備去下一場.

搭的士去銅鑼灣飲酒,咁啱又係當年同阿強一齊去既樓上BAR,雖然唔係同一間(新哥話舊個間好似無做),但總係諗番當晚既片段.閒事,湊仔經,苦水,樓市,大家無一不談-Gentlemen, all the best~

唔覺意打爆機

成日聽同事講"唔覺意打爆機",今日卒之都輪到我.話說今日番早番夜,中間時間訓醒咗,訓唔番著,結果咪係床度打機囉.無端端試咗幾次就過咗關好難過既追截飛彈(之前打極都唔過),LAST個兩版又好順利咁完成,結果咁就打爆機.

感覺上3DS版既ACE COMBAT係比大機爭咁啲,一黎故事性太單薄,無間場CG.任務都係殲滅戰,護衛,峽谷潛行,可能係因應SCREEN 細既短絀,未能好似PS2時代ACE COMBAT 5 咁加入起飛,降落,及空中加油等MINI GAME.ATTACK, ESCAPE MANEUVER系統正正填補咗screen細,遠距離睇唔真敵機既方向及航線既問題,繼而增加爽快程度.貼圖方面,高飛還可以,一低飛就出晒粗粒兼一達達色既地形.

有啲唔滿意爆機CG短,兼且係default咗係F-22機戰,但我明明係用XFA-27原創機體.....未試玩過X-BOX360既ACE COMBAT,暫時最鍾意既都係ACE COMBAT 5.

PS:http://www.youtube.com/watch?v=UUE5lC7MbzI

流浮山飯局

今日番晏補鐘早走,因為趕入流浮山會合大隊食晚飯.騎羊係公司出發,15分鐘就到埗,再一次感受電單車既偉大. 

褔娃都有黎為威猛餞行,仲親自剝蝦俾人食,非常恩愛. 

由於要開車,所以無飲酒,只以可樂解渴,姐姐們就有飲天地一號溝汽水.(以前係大陸飲過一次,但真係頂唔住醋酒)

海鮮為主題,瀨尿蝦當然係必食之選,再大隻啲就更好.

清蒸鮑魚仔,比酒樓既更大更好味~ 

中式多舊魚,應該係炒斑塊.....

炸蠔夠香脆,肉又唔乾身,有埋他他醬就仲好.唔係個個食,結果我食多一舊~

均衡飲食,碳水化合物!

鹽焗奄仔蟹,好好食,自己都好耐無食蟹,所以特別開心.

今日另一個主題係玲玲生日,清咗枱之後,大家一齊唱生日歌,食蛋糕.埋單後,騎羊番屋企,唔洗十五分鐘就番到屋企,台灣女生以為我放工去咗買少少嘢至遲少少番黎.過相入電腦,望一望至知點解最後影大合影個陣,食店阿姐要影成四五張,因為手郁咗,得一兩張係好啲........

PS:其實都未病好晒,食到尾段都頭痛,但無所謂啦,大家高興嘛,番屋企食必利痛,早啲訓囉~

便利單車

今日傍晚踩單車出村口攞嘢俾阿潘,記起當初唔識踩單車走去學電單車,上咗好多堂都上唔到腳,其他同學已經可以上腳兼轉彎,結果都係要同時間自己學埋踩單車至搞得掂.當年係阿潘借出單車俾我係宿舍附近既爛地停場練平衡,學有所成,再跟阿潘同阿強去沙田特訓一轉.

而家除咗用單車黎出去垃圾收集站扔垃圾,平時仲會踩單車出去村口士多或阿婆熟食小販檔食嘢,慳番唔少腳骨力.當然唔少得踩出牌坊,接朋友仔入黎屋企坐吓啦~

轉台

今日正式由SMARTONE轉去新世界傳動網,無諗過係屋企度可以收爆,之前SMARTONE都係一格,傾得唔清仲要隨時斷線.七十幾蚊個月,包無限數據,估唔到係3.5G,起初又話係2.75G?

係屋企測試上網速度可以接受,開自己個BLOG要20秒左右LOAD晒首頁既相片同文字,用WIFI就10秒.往後WHATSAPPS唔係局限係屋企同CANTEEN,同書友同事們約飯局都方便啲.

黎緊期待既係SONY部XPERIA P推出,咁就可以投入ANDROID手機行例,同SYMBIAN講拜拜.

PATLABOR

其實好多年前已經睇咗機動警察劇場版2,但都係睇無字幕既翻版,因為正版既劇場版無係市面售賣.雖然估到大約係講MUG,事隔多年,今日至睇番隻租番黎既DVD,明白劇情細節.

TV版既女主角泉 野日非常喜歡機動人,更視專用一號機為自己既寵物"阿魯凡",但到劇場版既時代,阿魯凡已經退役,特車二組既98式英格倫己全線退役,由新型號代替.野日亦由前線,轉職為試機員,阿魯亦變成收集資料及測試機.

故事後段,第二小隊隊長後藤召喚上一代前線特車二組第二小隊隊員執行非官方正式任務,遊馬問野明是否堅持正義任務而違反高層指令,野明答"我不想當一個只是喜歡機動人既女孩".呢句說話令我好感慨,人大了,心態會改變,以往迷戀或執著的人,事,物都會有所變化.以前阿魯凡係野明既寵愛,現在已經變成野明既回憶及經歷.即最後要用上阿魯凡再上前線執勤,關係已經由愛機變成老拍檔,不變既係保衛市民既心.

我對第一部電單車都好執著,想擁有佢直至收山唔開電單車.可惜胡亂改裝兼先天不足(第一代),三年左右就五勞七傷,賣車時好唔捨得.無幾耐買咗部後兩代既新車,感覺已無第一部咁熱情,反而係好拍檔,要好好咁保養佢,不變既係喜愛騎電單車既心.

出黎做嘢咁耐,我唔知自已變咗幾多,希望係變得更成熟,關心身邊既人,而唔係趨炎附勢,自私自利,迷失自我...

PS:老生常談-同一個人係唔同既年紀睇同一本書,,有唔同既感受.

GUNDAM 00 劇場版 A wakening of the Trailblazer

今日租咗GUNDAM 00劇場版DVD黎睇,個人始終鍾意係大電視度睇,而且加埋5.1聲效,同電腦下載落黎既點都係唔通."對話"係今次既主題,外星生物侵入地球,主角們聯同地球既軍力都未能阻擋,唯有主角F剎那用00 Qan[T]既GN粒子,配以韋逹系統既輔助,以腦量子波與外星生物溝通,並成功建立共識,和平共存,F剎那利用空間跳躍,飛向外星生物之母星.

高逹對外星人,有CROSS OVER既感覺,但不太討好,變咗勇者王?其實GUNDAM 00都好似係以往高達既精良版,新類型人變咗係變革者,強化人變咗係強化兵,阿加瑪粒子變咗GN粒子.....

故事上SEASON 1完結就好了,因為SEASON 2有點添食既感覺,尤其係Lockon Stratos(緑色狙擊高達機司)死去,由其孿生弟弟代替,不過00 RAISER系統確實棈彩,而且多機體演出.繼MACROSS FRONTIER既劇場版後,又一個令人有點失望既劇場版動畫.

PS:幸男見我睇高達,唔知第時佢會唔會都鍾意高達呢?我有唔少高達既故事同佢分享~

貪字得個貧

舊年3DS新出個陣,都有衝動買呢隻GAME同出機,GAME書又有攻略,電腦GAME又有出過,應該都係大作丫......呢排吉之島裝修,玩具部有減價,原本賣四百七十幾既GAME,賣$299,咁啱又係吉之島感謝日再95折,結果搵台灣女生幫我買.諗住都係好似METAL GEAR咁既啫,點知齌潛入兼收集情報,無大佬打,有槍都無駁火既機會.配樂差到無咁滯,畫面貼圖差,殺人無血,槍擊景物無頝果.打咗一關,LAST去到指定點,揀"脫出"就過版....上網睇埋餘下既攻略,關關都係咁,連LAST一關都係咁,萬念俱灰,一於賣咗佢....

上網CHECK過人哋全新既都放$300左右,我九成五新,諗住放到近$200.今日番完個早更就騎羊去置樂問價賣GAME.第一間話$80(心都寒埋),第二間話$90(有啲擔心),第三間話唔收(有啲氣餒),第四間話$120(開始心淡),結果我騎羊番市中心,去番買3DS機個間問.哥仔話$120,我示意想買埋佢隻$368既<忍>,埋單補$230換隻全新既<忍>走人.

試玩過新GAME,音效同畫面都唔錯,但好似無NDS忍者龍劍傳好玩,節奏無咁爽快,例如<忍>唔係用TOUCH SCREEN黎操控行動及斬殺,同埋擋格只係一下,而唔係長按長擋...感覺上係難玩過<忍者龍劍傳>,要啲時間適應.人大咗(而家仲有埋小朋友),想玩啲簡單啲或爽快既GAME,因為難得抽到時間出黎,真係想娛樂吓,快過關或有成果而唔係俾隻GAME磨自己時間.

希望操熟啲會好玩啲,因為係咁死都幾無癮吓,可能太耐無玩過要強記敵人及地畫面位置黎一路行一路打既遊戲.記得當年玩ROCKMAN都係忟咗好耐至操熟到邊玩邊緊張既心情.

台灣女生愛WESTLIFE

今日同台灣女生一齊放假,因為夜晚要去機場EXPO睇WESTLIFE告別演唱會,人家係"資深擁躉"嘛.其實之前買飛個日,差啲買唔成,因為網上訂票網站話無晒孖位,親自騎羊去市中心通利琴行,一心面懵懵咁問兩張鄰近既單位飛,但職員咁啱CHECK仲有孖位係$880區.無帶銀包既我,唯有如實向人家報告,等人家係輕鐵站跑過黎買,呢兩張飛真係得來不易.

入場前去咗醫肚,俾完錢就收到一塊牌,當食物準備好就會震動同閃燈,提醒閣下去領取食物(令我諗起當年係關等入座時既炸彈).

人家點咗個龍脷柳配薯條,炸魚肉厚又唔會軟林林,外脆肉爽.

我叫既黑椒牛仔骨飯唔錯,好過大家樂,大快活,美中不足係餐飲得汽水,無咖啡或茶任君選擇. 

話七點開場,我同人家都係準時入去搵番自己個位,坐定定得,人家開心又雀躍.話說當年人家讀晝時,有去機場接機,但接唔到....

睇我個樣就知唔係DIE HARD FAN,只係陪太子讀書個款.

結果係七點五十五份至開場,望台真係睇得個型,主力都係睇大銀幕.例牌廢話:"HONG KONG!","DO YOU HAVE FUN?",其他都係話多謝歌迷多年支持,有機會一定再黎香港(又話係亞洲區告別演唱會?).

中段搵咗台下既FANS上台一齊合唱(唔知係咪做梅),FANS又攬又影相,少少抽水門既感覺.

而家聽演唱會真係唔係淨係帶個人去就得,記得帶智能電話.後段時間,歌手叫大家用手機既FLASH APP黎一齊(當螢光棒)揮動伴唱.人家起初以為係用個SREEN既燈光,經我提點後,至用手機本身既補光燈功能,因為人家唔係用I PHONE,無FLASH APPS都可以開補光燈.另外當女FANS(坐我哋前面)唔太熟某首歌時,就上網搵歌詞,而其男朋友就上網玩FACE BOOK(應該都係陪睇).

完場時觀眾們唔願走,人家都係,仲跟其他人行近個台等偶像們再出台,我就潑冷水話"走啦,人哋開演唱會係商業生意,同你講心咩?真係會你哋叫幾叫就出黎ENCORE咩?"結果我去埋個廁所,都係無人出黎,行到近出口時至有廣播話節目已結束,觀眾請離開...人家好滿意演唱會,但嫌HIT歌未唱得夠多,以我非歌迷既身份黎講,都OK既.

PS:我仲同人家講,四個人都走晒樣,有個仲肥到個肚都拋出黎,唔解散都唔得啦....