渡海小輪照

上完prcc,同jacky一齊搭船過尖沙咀,適逄有帶部nex-3,於是坐定定無走位咁影咗幾張相.

番屋企用電腦睇啲相至明白鏡頭既限制,同埋德輝既講法.本身支kit鏡只可應付一般生活照,但要影風景就唔可以係太遠,俾你zoom近咗都係質數差啲.

愈遠就愈唔清,相片完全無事後加工,本人唔太鍾意,一黎嫌煩,二黎好似好求其咁.之前我同台灣女生係關島註冊結婚影相時,個菲籍攝影師就係咁auto狂影.只係香港agent公司後期制作時校色同剪裁,結果無咩構圖同選擇可言.

雖然影相唔叻又用機仔,但都想用心黎留低生活中既時刻,停下來,思考一下......

一個月後的用家心得- XPERIA P

一個月咁又過咗,阿釗同我講我部手機已跌價,一樣係新世界傳動網出機,之前$3298,而家$2988,仲要送尿袋(價值兩舊水既外置叉電),機殼,SPEAKER仔,兼沙灘用品,直係晴天霹靂....

雙核手機上網唔會慢,機身夠晒輕,震動度高(比NOKIA N8 強),透明帶上三個功能圖案可以直按.叉電速度快,但如果一整日出街就一定要用尿袋,除非真係齋等電話.

唯一要提吓既係WHITE MAGIC問題,如果網頁有橙同黃色,當係強光之下或自行係顯示設定調校至最光,橙同黃色會變咗偏泥黃色.本人曾去衞訊買SALES哥仔兼試埋部DEMO機,都係有咁既情況.其他機款,如XPERIA S同XPERIA U就無咁既現象,因佢哋無WHITE MAGIC功能. 

不過大家又可以放心,XPERIA P手機相機拍下之相片卻不會出現變色既問題.本人用手機影咗張香蕉咭相,係強光下或將顯示亮度調校至最光既情況下,都無變色現象.另外一樣要扣分既係相片檔案名稱係DCM001咁既型式作紀錄,無咁方便,唔似NOKIA咁用年月日兼數字黎命名,一望個FILE名就知幾時影.用MEIDA GO軟件黎SAVE相都有BUG,因佢唔會將啲相日子或月份黎存入不同FOLDER，只會無差別咁分入以日子命既folder裡,攞命.......

ps:如果可以將之前NOKIA N8既影相功能加入呢部XPERIA咁就無得頂了,手機底部角位已甩油,唔知係咪造功差...

單飛

今日無騎羊,搭輕鐵番工,特意買單程票黎上車,因為電視報紙爆港鐵加價,用八達通反而會貴咗.以我為例,搭三個站,普通八達通扣$4.1,但買單程票就只係$4.

雖然爭一毫子,婆乸數,但無謂俾人賺丫,係港鐵唔老實,呃大家貪方便....

初嘗住家高清足球直播

見晏晝電視機話SEARCH到兩個新頻度(CCTV高清同CCTV綜合),於是校鬧鐘兩點半起身睇吓會唔會有歐國盃睇.咁啱德國對丹麥,荷蘭對葡萄牙分別係兩個台高清直播,我就揀咗德國對丹麥黎睇.

第一次係屋企睇直播高清波,感覺唔錯,雖然旁述係國語,但無所謂啦,去黃金星群地中海餐廳都係聽英文旁述.開埋個SOUNDBAR黎睇波, 音效正好多,無咁平板,現場感提升.

如果黎緊可以係屋企睇到法國隊對瑞典,英格蘭對烏克蘭,咁就好了

屋漏兼逄連夜雨

今日番完早更番屋企,外母話客廳個冷氣機位有滲水,牆身油"撲"起咗.平時幸男整花牆身,我都會唔開心,更何況而家係咁.................

估計都係呢幾日橫風大雨令客廳冷氣機拉線位入水.之前紅雨同黑雨都無入水,所以一直都無再追冷氣師傅鹿仔係外牆補番啲玻璃膠.臨時用膠袋封住入水位,擋咁啲雨水,等好天啲至搵鹿仔黎搞.

宿命-病住黎過紀念日

上年就腸抽筋,今年就感冒,一樣有去泰殿做按摩.用職員優惠去咗PACIFIC COFFEE坐吓,$66兩杯咖啡兼一個TIRAMISU,超抵. 

夜晚個餐都無特別諗定,起初我話跟上年一樣去利苑,但人家話想食鐵板燒,於是帶咗我去I SQUARE,結果無鐵板燒店,唯有去咗間食日本燒肉既食店.頭盤係海螺刺身,食落有啲似係北海道活壽司既活海螺,不過就大隻好多同貴...... 

其實有二人餐食,約一千有找,但唔係樣樣啱食,結果都係散叫,無謂求其"塞"飽個肚就算.  

主打當然係食牛,點咗個究極七色和牛,好食還好食,可惜份量少到係每人每款得一塊仔.........

我哋仲有個海鮮拼盆做後盾,再叫多隻石蠔黎燒.睇好似好多嘢咁,但食咗大半都係未飽.人家提議去一風堂食拉麵填肚.手機上網CHECK過仲有一個鐘就閂門,所以總攻擊,咩都扔晒落去燒熟黎食,埋單一千六百幾,再急急腳行去新港城.

平時見人山人海等位,而家臨收舖,一入去就要落order,有得食都執番身彩....

一人一碗拉麵,人家怕我唔夠飽,讓咗個半隻糖心蛋俾我兼一塊叉燒.諗諗吓,今晚好似火影裡面鳴門係忍村食燒肉同拉麵咁...

兩碗麵盛惠一百六十大元,食完千六蚊燒肉,顯得呢個價錢好合理.同人家已一齊生活五年,計埋拍拖就快七年,時間好似過得好快,幸男都歲半有多.記得我曾經同人家講:"我一生人無咩投資,只係擺咗係間屋同人家身上".

英法對壘

今晚同台灣女生搭的士去新墟NEWAY,會合大隊一齊睇歐洲國家盃分組賽-英格蘭對法國.人家自中學睇英超足球起就鍾情於英格蘭國家隊,而我就因為"真人版戴志偉"-施丹,而喜歡法國隊.出門時至諗起,幸男出世後,我同人家都好耐無出晚街,十一點幾番到屋企都算係夜歸,更何況係十一點幾出門口呢?

無入鐿既除咗有我同人家外,仲有JACKY,琪芝及GORDON,$129蚊包兩杯飲品.十二點都未有得入房,要係睇住RECEPTION部電視黎睇唱國歌.入到房見電視有殘像,都已經唔係高清,仲要唔清....同職員反映,我同IVAN去另一間房視察OK,大夥兒至過黎新房.

大家都卦住睇波,唔得閒叫嘢飲,結果要半場至落ORDER.完場1:1,和氣收場,雖然無咗施丹同一眾老將,法國隊都OK.法國隊甚至壓住英格蘭黎打,無咩死猜悶局.雖然可以睇埋02:45個場烏克蘭對瑞典,但我同人家要番A,大家都無咩興致,於是各自歸家.

收禮物

尋晚訓覺見枕頭有個白色盒係度,起初仲以為係台灣女生無手尾,但原來係送俾我既禮物.人家平時都好少諗到買咩送俾我,因為結咗緍洗錢會成熟咗,無謂嘢我都唔會點買.平時玩具電玩都係少買,人家又唔熟行,怕買錯同買貴.

散銀包爛咗好一段時間,但又搵唔啱心水,故於是一直都係用住先.今次俾人家見到新番既款式同顏色都係我喜歡既類型,所以人家至咁有信心買俾我多謝晒呢份註冊結婚既禮物,不過我無為人家準備禮物....................

ROBIN HOOD

今日係節拍租藍光碟既"俠盜羅賓漢",唔見到都唔記起當初都想係戲院睇,而家有得睇番當然係求之不得.仲以為係睇男主角點樣刧富濟貧,原來係好似前傳故事.

男主角為一個隨十字軍前往法國既箭手雇傭兵,為護送戰死沙場既英國國王之皇冠返國而冒充殉職既皇家騎士.其後繼任既大英國王(前國王之弟弟)暴政專橫,重稅令人民生活苦不堪言,正當法國國王乘機揮軍越海洋攻打英國之際,男主角說服各地侯爵團結助國王保衞國土.可惜事後國王違反當初對各侯爵之承諾-民主憲法,更以冒充皇家騎士之罪名通緝男主角,令羅賓從此隱居森林,暗中反抗腐敗皇室.

最後海岸線英法兩軍大戰時,英軍從崖上萬箭迎戰法國海軍一幕,我同台灣女生都清楚感受到5.1既聲效(當初買PHILIPS SOUNDBAR係無買錯的),前後左右都有箭聲,自己好似中咗幾箭咁~如果有人問我有無相熟電影可以試5.1聲效,我會推介ROBIN HOOD.

天降狗屎

中午訓醒出花園打掃,見戶外燈上有舊紙巾.原以為係樓上天台開完party既紙巾吹咗落黎,但記得有次係花園地下又係布舊紙巾,用掃把清理時至知內有狗屎.

為免好似下次咁無仇報,所以掀開黎睇...頂!真係又係狗屎!嬲到爆炸,擺明今次同上次都係三樓天台用紙巾包住啲狗屎,再扔去圍牆外既明渠,點知失手掉到地下花園範圍.走上樓上理論,敲極門都無人應,唯有當係番晒工,先用膠袋冚住證據,等自己番完晏晝更,樓上番屋企至算帳.

十點唔夠上二樓敲門理論,男屋主應"邊個呀?",我答"我係地下個位X生呀".跟住屋內傳出女屋主既聲"殊",向男屋主示意不要出聲,扮無人.我唯有大力連拍幾下門,男戶主至怒氣沖沖咁回應"咩事呀!".

我大聲答:"我係你樓下X生,你D狗屎扔咗落我花園度,出黎傾吓好唔好呀!".男戶主至開門,面對面對話.男戶主話無扔落黎,唔會落黎執.我質問佢咁一座三戶人得佢係養狗,唔係佢咁係點解釋.男戶主堅持無扔,聲稱屋內無其他人,兼且佢唔會打電話問屋企人有無扔,亦唔會落黎花園睇同處理. 邊有人咁鬼衰,你一句話"唔好意思,可能係我屋企人唔小心跌咗啲垃圾落黎,我同你搞番好",大家好黎好好咪算囉,駛唔駛咁無賴?

"你話唔關你事丫嘛,你唔會處理丫嘛?好,第時你門口有咩事污糟咗,你都唔好話係我做,因為我上過黎理論",女戶主至行出黎話"咩事呀~~".又話屋企無人,擺明係扮無人,側側膊.女戶主都係堅稱與事件無關,我答佢上次扔煙頭落我花園,佢哋開初都答無,後尾至話係可能係啲客人扔,佢哋控制唔到.

我據理力爭,要求女戶主落我花園望清楚兼俾個合理既解釋,唔通有龍捲風吹黎?女戶主想著住自己拖鞋入我客廳出花園,台灣女生阻止佢,並叫佢出外圍入花園,繼而閂門.女戶主聲稱自己被嚇親,話自己有心臟病,我答道"我都周身病,仲有情緒病",女戶主才肯出去外圍入花園.

女戶主聲稱無辜,但都肯用膠袋收拾,但佢一手就抛去圍牆外既明渠,擺明就扔慣,仲話唔係佢哋扔既??樹葉昆蟲或灰塵都算丫,話晒平時都會自然被吹到或掉落明渠,但狗屎話晒都會滋生害蟲兼傳播病菌,無理由咁無公德心,仲要係我面前照扔.女戶主辯解,該狗屎並非出自其家犬,所以唔會拎上樓上扔,但都可以行多幾歩出公厠垃圾桶扔丫.

女戶主臨走時都係話我哋寃枉佢,如果唔係佢哋,又點會肯黎執?又點會扔得咁順手?真係好嬲,唔鍾意啲人一味撒賴,持惡洽人.如果今晚我哋怕事,唔堅持,佢哋就不了了之.