TOY STORY

由前日起, 幸男已一連三日睇TOY STORY藍光碟三集.原本只係見上星期明珠台播TOY STORY3,錄低俾幸男睇,點知播出黎開場個段都好爆格吓,尤其係成個畫面係紅色馬騮暴走個幕.....由於太不堪入目,於是走去市中心間精美買一套三集既TOY STORY藍光碟BOX SET,盛惠$598大元.

3隻我係戲院睇過,因為人家無睇過第1,2集,所以同人家係第3集上之前既造勢電影重播3D版時係屯門UA溫書,第3集就一齊第一次係戲院睇.雖然係陪幸男睇兼解說,但原來劇情細節已遺忘,例如第1集裡壞人小朋友阿薜幫玩具動手術改頭接肢時,巴斯光年話佢咁細個無埋由讀過醫科....

幸男睇得開心,最鍾意巴斯光年(我都係),一有巴斯出場就坐定定睇,無巴斯就當文戲.我哋趁第三集既故事,教幸男要愛惜玩具同分享玩具.自己買嘢都左諗右諗,但買俾幸男就無計咁盡,$200一隻藍碟都係咁上下.計落條數一家大細出市區戲院睇戲都要近二百蚊(一隻藍光碟價錢),感覺一連三晚都一家大細出街睇戲咁,有少少奢侈.......但見幸男咁開心,都無所謂啦,家庭樂嘛~

PS:幸男識講"巴斯光年,一飛衝天"

007

今日約咗老豆睇戲,一心諗住睇三點場,點知去到至知無咗三點個場,變咗係五點場((明明賢仔早兩日行過巴倫紐見個時間表有三點).....等我仲係番工時間叫同事一齊叫盈豐外賣晏晝,用tea時間入去食晏,方便趕去新墟添.......老豆番屋企坐吓先,我同台灣女生就係老麥飲咖啡,我仲洽咗三四個字貓仔覺,四點左右至去買飛同去接幸男放學,不過我哋只係接個吓,但幸男由外母帶番大興湊住先,我哋行番去戲院會合老豆睇戲. 

無諗過主題"sky fall"係指占士邦既家鄉......故事比第二集"量子殺機"好,雖然主力講長江後浪推前浪,但老經驗總比高科技花靚實用,尤其係作出即時決策時,經驗係好重要.今集不再有花樣百出既道具武器,只有一把掌紋確認槍同迷你發訊機,其餘都係靠埋身肉搏同老把戲.

雖然老娘子M由開場帶到尾,但我絶對唔會認同佢係今集既邦女郎,最多都係呢位出場唔夠廿分鐘就死既奸角情人係邦女郎.蠻滿意呢齣戲,只係臨尾係家鄉祖屋度打大佬時有啲老土....老豆當然睇得開心,散場人家搭的士入元朗同中學同學食飯,我就同老豆行去輕鐵站時話"以前你同我係電視睇鐵金剛,都無諗過之後我大個咗會同你入戲院睇鐵金剛,兼且仲有多個家嫂一齊".總覺得同老豆一齊入戲院睇戲,比起買隻DVD俾佢自己睇,點都係開心啲,反正我都鍾意睇戲嘛~

我上外母屋企接幸男搭的士番老家食飯,車上問幸男大個咗會否同我入戲院睇戲,幸男答會,但我答到時都唔知仲有無鐵金剛做....如果幸男大個咗真係同我入戲院睇戲的話,相信我會好安慰~

PS:戲中占士邦老一輩既忠誠及重情,係現今社會已被視為無大志同野心,兼埋不識時務.....

HERO

九月尾有TIGER & BUNNY既電影版上映,只係得市區幾間戲院上,仲要係得兩日,我就番P同A/N所以無得睇.今日就睇錄底既J2 TV版大結局,總算係HAPPY ENDING,但其實都埋晒伏線有第二季度,但超能力衰退至一分鐘既WILD  TIGER變咗二線英雄就有點美中不足.其實故事內容豐富,初段講TIGER同BUNNY搭檔既摩合,中段講英雄們既工作及各別生活難處,後段交代BUNNY既復仇及幕後黑手.....

可以的話,我都想當劇中"英雄"職業,係城市裡保護市民,又以偶像形式擔當廣告代言人,總比純商業或專業共公服務來得自然.自由度較大,不需跟隨刻板既工序指引,各人以拯救市民表現為競爭基準,以人氣度黎增加廣告商支持及商品發展,當一個有血有肉既職業英雄(類似奬金獵人)!

買禮物

尋日偶然見到"他"的銀包蠻破舊,想起這是我數年前送給他的生日禮物.....人大了,唔會為買禮物而亂買,反而會買實用或肯定對方喜歡的物品,不然就食一餐開心飯聚舊.

本來係網上見到有FRED PERRY既淺啡色銀包,但騎羊去到市中心睇,SALES哥仔話全線售罄無貨(係咪真係咁好眼光呀??)....無晒心機咁行出店外,發現附近有間新開既CALVIN KELIN JEANS,於是行去睇吓有無銀包賣.經過一輪挑選,揀咗個黑色大路款既銀包,無想像中咁貴,仲要有折添.

台灣女生放工番黎都話個銀包款OK,仲笑我好似買禮物俾男朋友咁緊張.雖然正日送唔到俾壽星仔,但已約聽晚放工騎羊去佢樓下交收.

預祝馬SIR生日

今日馬SIR上門幫手UPGRADE電腦(馬SIR推介SSD黎行OS,效果媲美換底板連CPU),128GB款$990,裝咗真係快咗好多,LOAD相都快咗,唔會LAG.棟哥代買料上門整,仲要因為無SATA線而要番山景攞,真係麻煩晒.好在台灣女生為馬SIR準備家常便飯,兼生日蛋糕,當然唔少得幸男擔司儀搞氣氛. 

幸男見到個蛋糕就話"男男生日哦~",睇黎係一心謀住個生日蛋糕.係提示之下,幸男總算唱咗首生日歌"happy birthday..... to馬sir~",仲鍚馬sir添,最攞命佢哋倆個一齊吹蠟燭....

雖然後日至係正日,希望馬sir唔好介意預祝,我同人家番工難就時間嘛~幸男同馬sir都鍾意食個蛋糕,希望大家都開開心心~

心力

今日同台灣女生睇租番黎既"IN TIME",故事講未來世界人類經基因改造,由BB長大至25歲就會停企生長及老化,但手上會顯示剩下既一年生命時間倒數.為咗續命,大家都會打工賺取時間,因為交租,買嘢,搭車都係扣自己既時間.出身貧民區既男主角,因生活迫人而去母親,但於酒吧偶遇一位有錢人(時間).該富戶被男主角相救後,以自己一百年既間作報答,自己卻望著手上既倒數而迎接死亡命(心臟停頓).男主角以得來既一百年時間,去富豪區打破富豪搾取貧民區市民時間之不公平局面.

厭世既富豪對男主角一番說話確實發人深省,"即使你尚有過百年既精力,但心力已耗剩多少?"親友既離去,不如意既事,確實令一個人既心老化.未夠三十歲,我經歷我人生第一次我重視既朋友之喪禮,很大打擊...舊年阿公病逝,我失去第一個重視既親人.面對生活及工作環境上既不公或黑暗,都令人喘不過氣來.事事順境兼有權貴既人當然唔會有咁深切既體會.往往憑良心去做事及生活的人,都係被剝削及欺壓的...我自己既心力還剩下多少呢?

QC下降

今日興之所致,折開之前買落既射手座聖衣神話EX黎玩,驚見頭罩係純銀色而非淺金色!點解會由黃金聖衣降格為白銀聖衣??

開埋攞咗無幾耐既處女座黎睇,嘩~頭盔頂一點點甩油,情況猶如生辣哩.....

EX聖衣神話俾我既感覺係精細,多配件同可動性高,但敗筆之處就係QC較上一代差.雖然上一代都有甩油,破相或電鍍起氣泡既問題,但起碼無咁大規模既缺失.第二彈既獅子座面罩都有少少'甩油,但見唔太礙眼就算......最近既處女座雙手結手印既部件都有問題,共有十一隻手指.細看之下,原來係多咁舊膠(未被批去既位)兼上埋肉色油所致,結果用牙籤隊走舊膠至回復十隻手指....

實物有問題都算,BANDAI連包裝同網上公布圖都出事.第一彈既雙子座,星座型態竟然無砌上腹部既裝甲,支架外露.....真係傷透一眾FANS既心!好在我買既係行貨,打電話去相熟玩具店哭訴,老闆娘話可以有問題既配件同代理返影兼更換.如果買水貨或求其一間唔相熟既玩具店買,就喊都無用.....

BALL

今日番早提議同事一齊叫外買日式飯臨放工用tea時間食,因為要趕住出去尖沙咀買結婚周年禮物.搭西鐵出I SQUARE,用咗近一個鐘去到舖頭睇心水禮物既實物.上到周大福,約好咗既伍生攞出留起咗既ETERNAL LADIES,兼介紹其他價相約既錶款.一坐底就有杯熱茶奉上,令我諗起細個跟阿媽去油麻地金舖會有紙包飲品奉上既經歷.睇過晒都係上網睇到既呢款ETERNAL LADIES最啱心水同價錢,雖然貴少少(貴過我自己戴個隻英納格),但無所謂啦,5周年嘛~

其實都有打去元朗間相熟錶舖問過,但佢哋無BALL呢個品牌,得依波路多款啲.放低英納格番廠整時望過實物,就算係較特別既藍色行針款都係麻麻地....加上ANNA都話好似較老成啲既款,所以都揀BALL.早兩個幾星期已上網做晒功課,見元朗間錶舖無BALL賣就問代理最近邊度有呢款ETERNAL LADIES賣,打埋去舖頭問價同約期留貨睇款,至可以今日買得咁順利咋.

見台灣女生平時帶既飾物來來去去都係個一兩件,因為番工唔可以咁誇,唯有買隻靚少少既錶,既實用又有心思.湊幸男個陣都唔洗吓吓摷個電話黎睇時間,或者係"裝"人哋隻錶丫....."BALL"係我既名,而且機械錶俾我既感覺好浪漫,人手工藝品嘛.

PS:番到屋企就俾人家睇,當預早送出結婚周年禮物.好在人家都鍾意個款,搵日去屯門既分店校埋個錶帶就可以戴住用~