濕地公園外影

今日一家三口去濕地公園行吓,幸男係最愛既大草地走動,連媽媽係大後方都唔理.

紅葉並非元朗大棠獨有,雖然係無咁多,但總叫有秋冬意景.

第一次用新相機外影,焦距既改變,令我花多咗時間去攞位就構圖.雖然比舊NEX-3性能有所提升,但當幸男走動時,都難以中焦,睇黎學用S-mode係有必要的.

自動白平衡稱職,不需每次手動設定,可惜無以舊NEX-3配舊蔡鏡黎影同一個景像作比較,但相信色水同精細度絶對有明顯提升.機身近乎單反既按鈕數目,令我調校設定時更快更直接,不用每次入菜單搵餐懵.

PS:技巧有待鑽研,寄望快啲出天涯鏡.

區內boxing day

今晚無出去食西餐,boxing day我地揀咗係市中心金舌開大餐,因為幸男上之同十一月之星食完燒肉後,就話聖誕要同馬sir黎燒肉.另一誘因係貪佢坐得舒服,唔多人等位兼迫.

今日係假日,所以無之前既優惠(滿$300即減$100),只係埋單時俾咗下次惠顧即減價錢既coupon.

呢張合照係楝哥代勞,幸男送咗張聖誕咭同鱷魚玩具鎖匙扣俾馬sir,可惜55mm既標準鏡未能作大特寫.....

食完飯,見廣場位置有聖誕節主題陳設,於是帶幸男去影幾張相兼試吓機(自動白平衡都ok喎).好難得捕捉到幸男既表情,因為走來走去,個樣矇晒(其實心水清既會見到隻左手矇咗).

好多時要台灣女生用說話引導幸男做動作,以拖延時間俾我操控相機.

假日特別多人,係滿記食糖水就更加係多人,睇黎我都係未係好適應放公眾假既生活模式.

等咗好幾個字,成十點半卒之都有枱.幸男揀咗個草莓西米露,起初我仲怕幸男唔食,好彩試過之後就話"好好味丫".雖然幸男食唔晒兼唔食一粒粒既西米,但走個陣都話下次再食過.聖誕節無西式大餐派對,無出市區睇燈飾,無主題樂園游玩.....但我相信幸男已從家人感受到一份簡單又實在既愛~

父子飯

今晚老媽有節目,但都為我同老豆整定餸(可能見台灣女生番工,免得我一個人唔知食mug).細個時總係嫌屋企飯菜來來去去個幾味,大個至發現唔洗煮唔洗你洗,又得你食已很偉大.

老豆收工番屋企"慶"番熱啲餸,我八點多啲騎羊到老家.倆父子邊食邊閒聊,一齊飲健力仕.大個咗出黎做嘢後,好怕自己一個人食晚飯,可能係番晏時,幾忙都會同一班同事一齊係飯堂邊食邊開玩笑.

初試A7

星期五放工好攰咁出深水埗買咗部A7配蔡司F1.8 55mm,番入屯門食完元氣壽司就唔舒服,星期六半夜就開始由肚痛轉狂瀉,要食Imodium至停到落黎...結果要今日至好少少,有精神試機.室內自動白平衡比我用開既nex 3進步好多,唔會黃"禁""禁".更大既感光件,更高既像數,令照片變得細緻及精巧.

聖誕樹下擺放著幸男既禮物,爺爺嫲嫲送既TOMICA停車場,媽媽送既汽車圖案背囊,仲有爸爸送既DULPO方程式跑車.

台灣女生同幸男一齊做幼稚園手工,蔡鏡下色水唔錯.新鏡焦距長咗(舊36mm,現55mm).影同一個內容,而家要吞後多幾步,想近影一碟餸或玩具就無法子了...

夜晚係老家黐餐,係白光及黃光慳電膽下,自動白平衡表現尚好.新機正好用黎幫幸男同種植家課影相作紀錄.

晚間手持下可以影到呢個景象,已令我滿意.

A7既光暈情況係我買機前,已係成為網上論壇既大議題.大多數都係話不設低通濾片既A7R無咁既情況,問題被歸咎於A7既膠質(非傳統玻璃)低通濾片.呢張以F3.5黎影既相,油站射燈及天橋街燈都有光暈既出現.本人覺得情況可以接受,亦同意係唔同既角度下,同一油站景有不同程度既光暈出現.

綜觀而言,A7既價錢絶對係性價比高,NEX 7都賣成$8XXX,俾多三千就可以由APSC升格為FULL FILM.同NEX系一樣,鏡種較少,令我唯有先買支蔡司大光圈標準鏡.期望2014年會真係有多5支鏡,最好係有天涯鏡,方便旅行抓拍及戶外人物與風景主題隨機交替既場合.

PS:好多制都未SET同試過,睇黎要摸熟部機仍需時間磨練及親身測試網上既評論或建議.

麻甩晚飯

 今晚台灣女生番晏,我約咗楝哥一齊再幫襯上次間大排檔,今次叫咗好耐無食既鹵水鵝片(雖然餐牌無寫,但問到有無時,阿叔又肯寫落單).

隔離既生啤舖有新產品介紹,仲話今日至新引入香港,全港第一.雖然唔知真定假,但味道唔差,好過上一次試個款. 

麻甩菜色仲有韭菜豬紅,以及黃金三寶.新崗位第二天,好多嘢都仲係未明同掌握.可以同老朋友邊食邊傾邊笑,係辛勞一天後既安慰.

流浮山歡送晚宴

今日係我第一日出任專科門診,邊聽邊做咁過咗一日,夜晩就同台灣女生帶幸男坐的士入流浮山同一眾同事食歡送飯.

平日常與姐姐傾師奶嘢,記得當年幸男仲係手抱時,不時帶埋幸男去同姐姐出街食飯(姐姐輪住抱幸男玩,我就可以偷時間食餸).而家幸男已三歲大,唔再係得個喊字既麵粉人.

晚飯主題係海鮮,有瀨尿蝦,鮑魚,奄仔蟹,炸蠔......但最重要既係大家可以聚首食餐便飯.多謝大家既款待,承蒙各位既厚愛,陪伴我多年渡過人生中既大小事情.回憶充滿溫馨既叮囑,以及逸事分享.

大排檔

今晚無飯開,約楝哥一齊食大排檔,星期五好多人,咁啱見到有一間有枱,於是坐低望餐牌.咁啱生啤店就係正隔離,當然要叫番杯黎飲.

該店有燒烤助酒小食,燒蠔味道ok,但楝哥個羊架就唔得(羶味).

主菜係黃金三寶,油鹽水花甲,味道同碟頭都比幫襯開既順德小廚好.上次去順德小廚,嘢食細碟又唔好食,相信往後都會轉投呢間大排檔.

ESCAPE PLAN

 

細個睇荷李活動作片,一定係布斯韋利士,史太龍同阿諾舒華三大巨頭各自擔正做主角,為票房爭磞頭.自從"轟天猛將EXPANDABLE'既出現,昔日既三大巨頭復出兼且同台演出,繼而各自再擔正做主角拍新片.今次係由阿諾舒華同史太龍合作既動作片,當然要約埋老豆一齊入場.

故事講龍伯係保安公司既逃獄專家,受聘CIA去測試一個政府秘密監獄,豈料原來係一個私營既黑暗監獄,為各國組織蒸發目標人物或仇敵,並套取重要情報.名為"墓塚"既監獄係根據龍伯撰寫之監獄保安學而設計,進化成終極嚴密格式,秉棄人道立場及私隱.成係與世隔絶兼毫無支援下,龍伯聯同高深莫測既倉友阿諾一齊刺探"墓塚"既弱點兼策動逃亡大計.

動作情節OK,係臨尾龍伯係沖水缸逃走有啲牽強.另外之前睇過生化危機,所以對基地位於大貨輪既橋段感到似曾相識.

平時約老豆放假睇戲,多數係我番完早更後或放假及訓覺日,番晏之前去睇戲就真係第一次.月中開始轉番Office hour,到時約睇戲就無咁彈性,只可以撞老豆星期六日放假睇早場.

晏晝係廚房佬食鐵板餐,食飽飽就騎羊番工.仲有兩個星期就要轉工作環境,累積著既緊張又唔捨得既心情.

夜拍

今晚台灣女生番夜更,同人家係嘉爵食完飯,就騎羊送番工.之後心血來潮,番到屋企就快手晾曬啲衫,攞埋相機腳架,騎羊去青山灣隔離既碼頭仔試夜拍.

以前阿強開車帶我黎吹風兼訴心事,而家我偶爾會駕羊黎諗吓嘢或都發呆.碼頭好平靜,起初有一位男仕抽悶煙,之後就有兩個男仕踩單車黎閒聊.

最後一站係黃金海岸沙灘,其實今晚騎羊外影既目的係星星.事前無上網睇吓要點影星星,膽粗粗就以NEX-3配定焦24mm蔡頭,安上腳架,就係暗黑既沙灘朝天拍攝.

影咗成個鐘,都唔知自己影咗啲嘜,因為個DISPLAY太細,就算100%放大都只係又爆格又黑.平時影相有主體,只靠肉眼就可從LCD DISPLAY,配合手動環隨意左右轉動,就可以調整自動對焦後既焦點所在及清晰度.如今我想自己用手動俢正對焦時,發現無實體主題物作參考對焦,鏡身無刻度(非手動鏡),根本唔可以逐個度數試影黎搏一張OK.番到屋企係電腦芒睇番一大堆失敗作品,有啲係因曝光太耐引至星星有重影,亦有太大光圈引至矇糊,仲有太高ISO................

雖然影得唔出色,但過程都係開心.好記得德輝講過最精密既相機始終係肉眼.明明肉眼好輕易睇到清晰明亮既夜空,但要用相機就要配合好多技術及裝備至可行.

PS:其實相內有獵戶座星組,唔知大家睇唔睇得出呢??

聖誕節氣氛

之前已經係市中心LOG ON既聖誕攤檔買咗細個款光纖聖誕樹,只係電單車載唔走,所以至揀今日同幸男一齊黎市中心攞貨.

人家攞番之前舊聖誕樹既裝飾出黎,俾幸男掛上新既聖誕樹上.幸男好開心咁逐一將小掛飾放係樹上,不時拍手兼講"搞掂".大件同最高既掛飾由人家代勞,睇張相就知幸男有幾開心同鍾意棵聖誕樹.                       

燈光昏暗下,聖誕樹上既LED光纖燈效更顯亮麗,五顏六色.雖然係貴少少,但其他較細棵既光纖LED聖誕樹都要幾百蚊,仲要燈光唔會變色.影棵聖誕樹時至知,用相機影燈飾都真係要用腳架同花時間,準備外影時,不妨係屋企熄晒燈黎用室內聖誕樹黎練習吓先~

村內親子活動

是日放假,接幸男放學,一齊搭小巴去市中心.台灣女生番晏,所以買埋MOS BURGER外賣就搭的士趕番屋企.幸男食過人家準備既午餐,晏晝覺都唔訓就出去球場玩.  

見近排少咗幫幸男影相,於是斜孭住部相機,一手抽住部電動跑車,另一手拖住幸男出球場.幸男見到我部相機,不時停低話"影相丫","呢度影丫".幸男無差別既駕駛,我不時要用盡F1.8至可以影得清幸男既樣子.

幸男每次都會玩齊遊樂場內既設備,尤其係呢架大吉普車.

韆鞦亦係幸男喜愛既項目,但由於無小童專用既坐兜,所以幸男要坐係大人大髀上.每次蕩個陣,幸男都會問"你驚唔驚呀?",我答"爸爸驚",幸男話"我唔驚". 

呢張相好似一TAKE過就收工,其實幸男背靠住紅柱,轉咗兩個圈,要係好幾張相中搵到個可以收貨既樣本.....

玩咗成個鐘有多,番屋企沖涼後,因太攰而好快訓著.訓醒幸男享用茶點(午餐外賣有剩既MOS BURGER 薯條),晚飯就同幸男一齊番老家黐餐.

自問係一個較懶既父親,無話帶小朋友去學興趣班,或要去較遠既地方玩同體驗,希望幸男大個咗唔會怪我啦.我個人認為,緊密既親子聯繫,應該係成長既首要元素.

一家三口之平日

騎羊送台灣女生去接幸男放學,晏晝係V City既牛角食.第一次食,菜單上既選擇雖然係比金舌多,但好多組合都係唔太啱心水(例如跟沙律)

醬汁比金舌重味,肉類份量比金舌大少少,坐位無金舌咁舒服闊落.較等別既係個牛角飯(白飯上加上醬汁同紫菜),起初幸男唔願食,試過之後就話好食.

夜晚安在家中享用人家準備既住家飯,好耐都係屋企食,所以特意影咗張相.

近來幸男常將筷子放係口內,貪玩咬筷子,睇黎要多加管教....

學校旅行@挪阿方舟

  今日係幸男間幼稚園旅行日,地點係挪阿方舟.
唔係好明點解挪阿方舟好似係天橋底?夾係兩條天橋之間,壓迫感重,香港地真係寸金尺土....

館內其實好似納納雜雜咁,介紹世界文化歷史.幸男最鐘意既係呢間以未來建築師為主題既房,因為多積木玩.

午餐時間係出戶外沙灘享用自備既食品,臨落沙灘前,以青馬大橋作背景影親子照.

沙灘上有老外一家大細曬太陽,仲有懂得享受寫意生活既本地人.

有得玩就食都唔顧,每個小朋友都唔太注心家長們準備既午餐.幸男就掛住同坐隔離既女同學一齊玩泥沙,兩小無猜.

小朋友見到沙灘同水都係情不自禁四圍走.人家要捉住幸男,至可以影到張合照.

玩埋集體堆沙比賽,坐旅遊巴番學校解散.我哋就去咗V City既羅麥記食下午茶.

幸男今日好似好開心咁,扭住媽媽係咁錫面,人家當然受落啦.

原來幸男係謀住人家隻炸雞脾,人家索性俾幸男自己拎住黎食.雖然今次旅行比上次去錦田鄉村俱樂部好,但對大人黎講都有啲悶,志在陪太子出遊.