車行&琴行

今朝特意騎羊入元朗,因為行車證今日到期,趕住今晚零晨前要更換.雖然二月尾就去良記搞牌費燕梳,但一直無時間黎攞.以前良記係地舖,但二月尾黎個陣已經係轉咗係閣樓舖,唔知係咪要慳租定係自己舖間出黎收租?? 

收齊文件,行番去大馬路既通利琴行,因為屯門個間執咗,谷住要入元朗,無諗過係地庫舖.啱啱至上樓梯,而家就落樓梯,為既係台灣女生係FACEBOOK見有THOMAS火車既舞台表演,於是被委派去買4月1唬既飛.VIP飛$550一張,大小同價,見都有G行,所以買3張. 

同台灣女生係市中心食完晏,騎羊去接放學時,俾咗張RECEIPT飛同宣傳單張幸男睇,問佢四月去睇火車好唔好,答案當然係"好"! 

平時都少帶幸男出去玩,見幸男仲係咁有童真,當然要一家去親子娛樂,下次唔知會唔會有機會去睇馬戲團表演呢??

驚動了愛情

今日係租碟舖見到有<<驚動了愛情>>,台灣女生至愛既愛情小品.男主角係吸血新世紀既主角錄片羅拔柏迪臣),好鬼靚仔,所以我都想睇吓.男主角原本只為報被警察粗蠻對待之仇,而親近其女兒,亦即係女主角(艾美莉迪韋雲).日子久了,男主角完全愛上了女主角,因為女主角不但陪伴佢渡過家庭紛爭難關,其獨特個性及對男主角既關愛,已變成男主角不可缺失既一部份.

例牌橋段,女主角知道男主角當初既目的,繼而分手,之後又被男主角打動,重收舊好.其實中途有少少悶,我同人家講"又話好好睇",人家答我"邊個話丫?",我答"個盒話..."我講完,大家都一齊笑,咁又係既,有邊齣戲既封面唔係話自己有幾咁好睇0架?

臨到最後,我話無理由會HAPPY ENDING,一定會有人死.人家返問我邊會,我話屋企漏煤氣,成家爆炸.諗都無諗過,結局係911襲擊,男主角係世貿中心 裡父親既律師行,等送父妹妹番學親上OFFICE之時,悲劇結局就發生.一如個碟盒所講"電影展示了愛與家庭的力量,提醒我們珍惜生命每一天的重要性"

PS:記得番夜睇早報時,見到浴室濕身照做廣告,我話男主角真係好似阿麟,同事問咁女主角係邊個,我答話係工作間要有咁澎湃既上圍,非愛姐莫屬.....

掁興盆菜宴

今日同台灣女生帶埋幸男入掁興新村,因為大姐請我哋一眾舊同事一齊食盆菜.

每年呢度既盆菜都係咁熱鬧,有醒獅助興,高難度上樁高空採青.人家帶幸男出去睇舞獅,幸男又無話怕大鑼大鼓,睇足全程.

食到尾段,醒獅隊巡遊,走過每一張枱同大家打招呼.大家都上前摸吓獅頭,唔知係咪會好運啲呢?

人家帶幸男上前摸獅頭,幸男唔怕之餘.仲好似好開心咁,唔知係咪俾粉紅色吸引住呢?? 

幸男同上午班同學ANSON同枱食飯,對上一次見面都好似係JACKY結婚個時.

每次舊同事食飯,都令我諗起自己初出茅廬既心情,前輩既指導(以及放工後一齊玩樂),同輩既亙助(以及放工後一齊玩樂),後輩既支援(以及放工後既一齊玩樂). 

姨媽老公阿BEN每次見到幸男都係咁開心,佢既愛心同耐性絶對比我呢位在職父親好得多.我就帶幸男出去睇女子組既啤酒競飲大賽,不禁諗起當年雞脾同麥生出戰既情景.

大合照當然唔少得,可惜EMILY一家走先,未能入鏡.各奔前程,可以聚首既機會真係唔多,尤其係各有家室同小朋友添~

特意叫人家幫我同大姐及麥生一齊合照,話晒都係主人家邀請我哋一家嘛~希望大家新一年,身體健康,生活愉快.

SLEEPING DAY出觀塘

 雖然番完夜班,但十二點就起身梳洗,先搭輕鐵出市中心,再轉巴士出觀塘工廠區既鈴木科硏攞過年前就訂好既電單車布冚.本來過年前就有得攞,但要番工兼湊幸男,結果今日至去攞.車行內見到一個個舊面孔,唔經唔覺由德輝,子健大豆陪睇車至今已十年.回程時揀咗鐵路,因為怕屯門公路塞車,接唔切幸男放學,結果換黎係13個地鐵站+7個西鐵站至番到屯門....雖然站多,兼係美孚轉西鐵要行一大段路,但又一個鐘多啲就到屯門西鐵站,比巴士耐少少,但買個保障唔塞車.

三點幾未夠鐘接放學,去咗前身係無國界餐廳既台式食店食晏,叫咗個肉燥豬軟骨飯,跟餐有杯珍珠奶茶,三十幾蚊,味道一般,未必會再幫襯... 

雖然係趕,但總算任務完成,兼有時間食埋個晏準時接幸男放學.有咗小朋友,咩都要就咗幸男先,布冚可以遲啲攞,但幸男唔可以無人接送,所以至拖到今日....

愛羊卒之都有新衫著啦,其實平時都會三年左右就會係原廠訂布冚作替換,但對上個十月都無時間出原廠CHECK車(PRCC溫書),所以無得順手買埋.

對比吓舊布冚已晒到甩晒色,啲布已開始霉,所以我一揚開個布冚就"SIR"一聲撕開咗.....................

PS:特別鳴謝豹哥幫我過數俾原廠訂布冚,因為我同台灣女生都無相應既戶口.

人日=番工+睇戲+BBQ

 今晚台灣女生既中大書友黎家訪兼BBQ,嘢食全部由黎生代買,除咗扇貝同蝦係台灣女生買.有3次花園燒嘢食經驗,開檔同開爐都快手咗.

幸男都算好客,同大家有講有笑,今次都有話要燒蝦,但無上之好姐買既咁好食,可能真係要識揀至得.幸男都唔係陪足全程,中途都有話要入客廳,結果都要開錄落既THOMAS俾幸男睇.其實花炮會係球場搞盆菜宴,有"蛇宴阿姐"黎載歌載舞.後尾仲有煙花助慶,樓上KK都有出騎樓睇,幸男都睇得開心,黎生黎太同BRENDA都不禁讚嘆新界圍村既熱鬧風情~

其實今日我同台灣女生都要番早更,收工就去咗新墟好趕咁食吉野家,老豆入到黎見我哋狼吞虎嚥,"好趕喎",跟住就行番出去隔離凱都等我地一齊入場睇DIE HARD.上次一齊睇007個陣巳約定原班人馬(老豆,同我及人家)新年睇DIE HARD.片長個半鐘左右,無咩冷場,今次講老差君從手足得知阿仔係莫斯科犯事,於是隻身飛去搵仔(究竟佢有幾多仔女,上集4.0已話佢個女俾壞人恊持),點知阿仔係特工,以污點證人身份接近並保護目標人物,但原來目標人物先係幕後黑手...

女主角雖然係奸角,但真係好鬼靚....開場無耐既電單車換衫一幕已令人印象深刻.全場節奏緊湊,動作場面多,最後父子兵齊跳出大廈外時,老差骨尊麥堅淩空向女奸角豎中指既粗鄙動作,好有90年代既硬朗風格.

睇完戲,人家去街市買海鮮,老豆就帶我去附近雜貨店買炭同BBQ用品,唔知我哋下次三個一齊會睇咩戲呢??

年廿七,第一次參加幼稚園親子活動

番完早更,係更衣室沖埋個涼就搭兩個輕站去幼稚園參加親子活動-年宵攤位遊戲.好在有人請食TEA,放工唔洗再搵地方醫肚.話就話三點開始,結果都要係校門外等,約三點三至入得去.廿個小朋友坐晒係小禮堂既樓梯,每個小朋友有一至兩位家長陪同,一下至我都搵唔到自己個仔係邊,好在為幸男準備既華服係較搶眼既淺藍色,集中目標顏色下,卒之都搵到幸男.

坐定定睇完高班同學既小型花車表演(幸男睇到無咩心機,問佢係咪悶,幸男答"係",唔明點解佢咁細個就無童真...),就開始年宵攤位遊戲.六個遊戲裡面,幸男較鍾意彩蛇手工.唔知點解幸男唔係太鍾意同其他同學一齊玩咁,但同學又叫得出幸男個名,唔通令願跟爸爸多過群同學仔??

平時四點半放學,今日玩晒遊戲就早放,四點就走得,小朋友都有得好似大人番工咁年廿九早放工??拎住一大袋手工品及禮物,帶幸男行咗陣吉之島LIVING PLAZA就搭輕鐵番屋企~

我都做得到:攝影師,教車師傅,侍應生

 朝早俾塊蝴蝶酥過幸男食時,幸男無立即食,反而話"影相丫",於是入書房攞部NEX-3出黎影.幸男真係好有心情影相,定定哋咁俾我影,就算係食都慢慢食,唔會有快動作咁轉POSE.最鍾意呢張,因為斯文得黎又有啲嬌柔,好似女仔咁.

食完小點,帶幸男出球場玩跑車.由於幸男仲未有方向感,不時要幫手扭軚轉彎,避免撞邊及障礙物,我有啲似金牌路路通既師傅,"同學轉左嘞,同學停車....." 

操完車,幸男當然有去隔離既遊樂場玩SIR滑梯.雖然今日係星期六,但近中午既時間多數都無咩小朋友蹓連,所以幸男都可以一人任玩.

番到屋企同幸男洗過手就翻熱台灣女生準備既兒童餐.除咗餵食同鼓勵幸男自助進食,仲要記錄食剩既份量,SEND張相俾大廚過目,以便控制份量及改善餐單及了解幸男之胃口健康.

特警判官

 今日租咗隻<特警判官>藍光碟番屋企睇,畫質同音效都唔錯(勁到我個SOUNDBAR頂唔順,唔可以將BASS調到早高),戲院上映時都有諗過入場睇,因為當年史太龍做個齣都無睇過嘛. 

地球受到破壞, 人類要困住係未受輻射污染既有限空間,摩天大樓內已包括住宅,工業,商場及社區設施.生活迫人,罪案率高,為更有效率維持治安,引申出"即捕─即審─即處決"既「特警判官」，以趕絕一切惡黨兇徒.

男主角帶住受輻射而產生讀心術既新丁出更,第一個任務就係去200層樓高的賊竇「桃樹塔」,調查三名墮樓生亡死者,繼而直搗毒后黨巢穴.節奏明快,特警判官造型夠晒霸氣,一句" I'm the law! "就可以即場埋你單.最後當然係可以處決毒后,而新人成功通過實戰評審.