維修

今日出去銀城攞番部SONY XPERIA P,感覺蠻差勁.柜枱職員話係撞APPS,更新咗軟件,叫我即場試吓.通話方面,打俾老豆試,無問題.係短短一兩分鐘內無話未能讀取SIM卡或收唔到信號.唯獨係影相方面,即場係背囊內開閃燈影相就無事,但事後上車SET番用最高既800萬像數就依舊係一半相係黑咗....... 

原本話要三日至有至攞機,但我第二日打去客戶熱線問就話已經有得攞,但又無人通知我,有點不滿,而且維修未能解決所有問題,亦令我對SONY既售後服務有點扣分.本來諗住黎緊換機都用SONY,而家會諗吓出SHARP,當個芒靚啲,反正都係行ANDROID,個台又唔係4G,部機無咁快都無所謂,夠用就算.

大相架+天涯鏡

今日係市中心同OSCAR,溫生及馬SIR食OUTBACK前趕去快圖美攞絨面相,因為之前入相時發現光面相紙會黐住玻璃.番到屋企就換番啲相出黎,只係三日已經貼到好實,搣出黎時相紙都爛埋......換咗絨面相紙,效果唔錯,唔再會黐實玻璃面,搞到睇落一撻撻咁.係電腦揀相時,發現好多相都係屋企裡影,兼且一歲前都唔太多相,有少少覺得幸男少出街,但當時咁鬼攰,又點會好有心機拎個相機同幸男出街影,頂多都係用手提電話影.

食飯時順手交收埋支天涯鏡,真係麻煩晒溫生~自上次幼稚園聖誕節聯歡,用支定焦鏡影個台,啲人豆豉咁細,已經想買支ZOOM鏡.適逄4月1日同幸男去睇THOMAS舞台劇,所以下定決心買支天涯鏡,為幸男紀錄台上既THOMAS表演,而且六月又有可能一家去旅行嘛.黎緊既目標係等NEX-7N既發佈同發行,到時新機配支定焦影人像,舊機配天涯鏡影景就唔錯啦.

PS:由之前無貨要訂大相架,到台灣女生攞相架番黎,卒之都的起心肝揀相同入相,完成客廳既新擺設.

又要換電話??

 最近個手提電話成日都無故收唔到訊號兼讀唔到SIM咭,要熄機再開至恢復正常.另外於黑暗環境以閃燈影相時,相片會出現半黑畫面.除咗趕係保養期完結前拎部機去整之外,似乎都係時候諗定後繼機體.原本諗住出XPERIA ZL,但香港唔會有,Z又要成5千幾,於是鎖定中階機款XPERIA SP.

雙核1.7GHz,4.6吋屏幕,比我現時部XPERIA P進步不少(雙核1GHz,4吋芒),影相方面就同樣係800萬像數,但感光元件升級為Exmor RS.第二季推出,定價約3千尾,我既目標價係3千頭,希望年中六月時就達標,因為舊機保養五月到期....

之前打去問客戶服務熱線,話由交機起計兩個頭有得攞,點知去到銀城20樓交機,姐姐話要星期四至有得攞.........唔洗諗中間時間去度打發等機時間,係樓下商場買埋個咭套裝備就搭巴士番入屯門.由於本身部機用細咭,但NWMOBILE又無細咭出台,只係用個模黎CUT至細咭SIZE.台灣女生部舊手機又係用大咭,所以谷住買咭套($30)至有電話用.最衰就係邊位唔fit,我要自己用較剪黎俢剪吓,好驚剪得唔啱位同剪爛晶片位,一額汗總算成功.

平時用開既apps同紀錄無咗都幾唔慣,不知不覺間,原來自己都習咗用上網既智能手機.好在有帶手錶,如果唔係連時間都睇唔到添...

平嘢≠無好嘢

 上年九月買既TEMPUR太空枕訓咗半年唔夠就訓冚咗,拎咗出去葵涌代理office跟進(3年保養),話要十四個工作天至有回覆有無得換個新.唯有用士啤棉蕊枕頭訓頂住先,但訓極都係唔舒服.幸男晚晚訓覺都會成頭汗,好似游完水咁,個枕頭一陣臭味,所以今日番完晏晝更,同台灣女生騎羊去吉之島揀幸男既枕頭,見sinomax有特價,自己都揀埋一份. 

原價$1029,特價$329,認唔住問阿姐係咪真係賣一千蚊架,阿姐答話第二度係賣5百幾既.....(咁咪即係原價$5XX,現減至$329??)人家揀咗個COOL B PILLOW俾幸男,有層啫哩材料於面層黎散熱,而我試訓過蘆薈美肌枕都OK,於是一併結帳.

番屋企沖完涼就再試新買既士啤枕頭,真係好過棉芯好多,頸椎位承托得舒服.買個棉芯枕頭都要兩舊水,而家多百零蚊就有個記憶枕,真係好抵.之前買咁貴既品牌,雖然係短身啲及3D設定,但呢款平成咁都有不俗既評價,性價比高.如果我個正室枕頭換完無耐都係扁晒的話,我以後會轉用SINOMAX.

PS:揀枕頭時忍唔住SEND張相俾ANNA睇,等佢知道有平嘢執

尖沙咀

今日放假,同台灣女生將幸男放係大興托管,一齊出尖沙咀行吓街.出到尖沙咀都三點幾,行陣商場,係STARBUCKS食個TEA已經開始天黑,不過都係QUICK SILVER買到換季平衫,又係GAP買到幸男既熱天衫(我都買咗件長袖衫).本來想買個單膊袋,點知DIESEL啲款無上網睇既咁好,而且都貴,AGNIS B既就唔係皮款..... 

星期五晚七點左右,四圍都係人,想搵個地方食飯都要等WAITING LIST,結果行番去搬咗去尖東既STONE GRILL至唔洗等枱,不過要坐戶外枱. 

平時湊住幸男,真係傾多句都無時間,原本都要趕食完飯番去接幸男,但因為夜食飯,所以順延至後日至接走.

CITI BANK信用咭二人餐,$1013,泡沫龍蝦湯幾特別,好似杯特濃咖啡咁,味道濃,因為湯少而變得啖啖都有龍蝦肉咁.

前菜日式刺身沙律好好食,餐包一支玫瑰汽酒,啱人家口味,但我就麻麻,最後都係飲剩一半...

人家要個海鮮燒,有青口,帶子魷魚,有大蝦.海鮮配蛋黃醬又幾夾,但諗起銀魂裡狂食蛋黃醬既真選組副局長土方.

我就當然係要牛扒啦,本來以為未必夠飽,但食完晒都覺得OK,雖然未至於飽到頂上心口,但味道確實係唔錯,同多年前一樣水準~以前兩口子,鍾意去邊就去邊,行夜啲咪晏啲食.區內吊腳地方咪騎羊去食囉,有時間既就屋企煮飯食,睇吓電視.今晚可以兩公婆一齊行街食飯當拍拖,已經好難得.

異能感應

好耐都無試過睇完齣戲,滿腦疑團,要上網搵影評及講解黎了解導演既心意及結局既真相,對上一次都好以係 .故事講述一名對超自然現息產生興趣的女精神心理醫生麥瑪姬（薛歌妮韋花飾演），聯同助手畢湯馬（施利安梅菲飾演）調查異能事件之真偽，此時沉默30多年家喻戶曉的通靈大師`施西蒙（由羅拔迪尼路飾演）再次復出,倆人隨即展開調查.

導演巧妙地以調查期間發生之異像及男主角既惡夢及驚慌,建築成一個懸疑迷陣.睇到最後一刻,唯一可以肯定既係,"施西蒙"並非失明及靈媒,只是一個神棍.經過思考組織後,原來男主角本身係一個有異能既人,跟隨女精神心理醫生係為咗找尋同類,可惜一次又一次既失望.假異能既擧證,令男主角都開始懷疑自己既異能是否真確及可供客觀認證,而且表露異能會否被大眾標籤為"神棍",久而久之,男主角將身懷異能既自己收藏係內心深處,直至最後才覺醒被封鎖的自己,了解並釋放自己(You can't deny yourself),於眾目睽睽下,引發小型地震.

人生

今日番早兼夜班,中間時間去咗良景租咗<<桃姐>>藍光碟,一心諗住聽日同台灣女生睇,點知訓極都訓唔著,結果一個人係廳睇.劉德華既演技同魅力當然係保證,但動人既故事却令我另有一番感受.

"生娘不及養娘大",雖然桃姐只係工人,但少爺由細到三四十歲都係由桃姐打點生活一切大小細節.二人共處既時間比已移居外地既生娘還要多,所以桃姐晚年中風,少爺會以對契娘既關係去照顧桃姐.

"家有一老,如有一寶",老人家要做到受後輩愛惜,當然並非恃老賣老,而係由始至終對晚輩既關愛照顧作基礎.即使活動及體能未能如年輕時般完善,但生活上為後生一輩既小照顧及提點,亦能令人窩心.好多時長輩們會以權威式黎與後輩溝通,但能夠好似桃姐咁以禮待人,思想開明的話,收到既"果"一定會比前者多.

"生活迫人",人老咗,自理能力差,入老人院確係無可厚非,邊度有後生可以唔番工黎照顧長輩?最多都係請個外傭黎幫手照顧,避免院舍生活既擠迫及尷尬.即使長輩入院病重彌留,後生既為咗糊口,都要繼續上班.現今社會,手停口停,有幾多個良心老闆會俾你放好幾日大假黎侍奉長輩?戲中主角亦因工作關係,未能陪伴桃姐最後一程,只能吩咐醫護人院可以直接將桃姐送去殮房,手續待佢返港時才補做及辦理後事.聽落好似"疏離",其實反而係"無奈".....

睇完之後,想到自己老病時,能夠做到一位受人愛惜既老人家,並可以對床邊既幸男講聲:"只要你健康就好了,爸爸會化做天上既星座守護住你,個星座係叫"DREW(住) B 打"就好了.......

PS:DREW(住)B打係幸男由手抱BB學講話至而家兩歲半仲講緊既BB話.

人人有禮物收

今日番完晏晝更就騎羊趕去市中心,因為之前係吉之島訂落既THOMAS火車車卡玩具有貨番,兼且要去新世界傳動網出部XPERIA V俾台灣女生.

當初諗住趁吉之島感謝日至買套火車車卡玩具,點知感謝日當日無貨,都唔知係買晒定扣起咗.即場留電話訂購,但翌日就CALL我話番咗貨,有無咁啱丫?仲唔係收起啲貴嘢,唔俾我九五折買??

至於部電話,人家一早就話鐘意,話係SONY既年度之作,所以我都好留意佢低價,當係補送情人節禮物.見由$3998減到$3198(其他舖頭由4千頭減到達3998),於是出手入貨,揀部人家至愛既粉紅色.雖然我無份有心頭好,但見幸男同家都開心收到心儀禮物,我都鄧佢哋歡喜~

大姑拉s

今日兩位大姑拉到寒舍BBQ,因為其中一位就快生日,當係預祝牛一BBQ.本來話會早啲入黎屯門幫手買嘢,但結果係放假既我同番早更既台灣女生係市中心食完晏,帶住幸男一齊買嘢,再行去置樂搵老媽帶路去街市買多少少肉類同雜貨店買炭,就搭的士番屋企,而兩位大姑拉六點至到達寒舍........

幸男當然有同準壽星大姑拉合照啦,不過幸男今日唔太合作,不時話要入番屋內,要用錄落既THOMAS至可以令幸男定定地係客廳.食物份量預計得唔錯,只係我同人家都好攰,無咩時間同胃口再食啫.

由於近七點至開始BBQ,幸男又無MUG點訓晏覺,所以去到後段已失控扭計喊.人家要先幫佢沖涼兼餵埋支奶,氹訓覺,再出席蛋糕時段. 

生日蛋糕係兩位大姑拉係市中心揀選既,結果同上次一樣都係食唔晒,由小歌仔拎走番屋企.

祝準壽星大姑拉,生日快樂,身體健康,童顏常駐!黎緊下次聚會,應該係4月1 日我哋一家睇完THOMAS舞台劇後既晚飯~

BB先決模式

今日IVAN黎家訪,幸男一訓醒就有位大哥哥陪佢玩,當然開心.IVAN怕阻住我同台灣女生照顧幸男兼準備番學,但其實相反,有佢係度MARK住幸男,我哋仲多咗時間自己梳洗同執嘢.

除咗玩THOMAS火車,幸男仲同IVAN一齊玩巴斯光年,一按巴斯手上既鐳射槍,就要IVAN扮中槍受傷....

IVAN都有係幸男細個時家訪,唔知幸男記唔記得?起碼而家佢地都玩得埋丫,出門口一齊搭一個站輕鐵去嘉爵飲茶.IVAN都話一如我所講,酒樓啲員工做事風好似我哋既工作坊,個個都忙住見嘢就做,氣氛搞笑蝦碌~飲完茶,IVAN就係巴士站等車出市區,我同人家又好趕咁上的士送番學.

湊住幸男,每天都係好趕時間咁,凡事都係"BB先決"模式.番晏晝更就趕督促午餐,梳洗,換校服,搭車番學,自己再趕番工+/-快食午飯..番早既就趕食飯,再去接放學,搭車番屋企,幫幸男沖涼,氹訓小睡,再準備晚餐,自己求其食都要顧咗個細既先.最辛苦既當然係人家,因為要負責幸男既膳食-買料+洗切+開爐煮,我就只係翻熱同督促進餐.