自在的一天

 

番完早更,騎羊去區內最新既泳池(西北泳池)游水.其實冬天時已開室內池,而家就戶外池都全開.第一次去,兜多咗少少路,係附近搵到個好位暫泊愛羊.

新設計,更衣室大好多同企理,LOCKER內分上下格,下格方便放鞋.新LOCKER匙帶更加方便同舒服,另外沖涼間內有分開換衫同沖洗區,乾毛巾唔怕被弄濕,唯一唔好既係個主池好似唔係50米標準池,同埋太陽椅太少得5張......室內嬉水池有滑梯,但幸男應該未夠高玩住,而且冷氣加池水怕會令幸男著涼...

游完水騎羊去置樂幫襯玉林苑,再上去相熟玩店逛吓,見到之前係吉之島見過既TOMICA手動發光車仔,於是揀咗幸男至愛既巴士,長頸鹿價$85,吉之島價$99,抵買!

番屋企放低啲嘢,就再出門搭小巴去西川餐廳會合楝哥同溫生,台灣女生就係護協買完奶粉番入黎搭食.

有勞楝哥代買電腦RAM,有勞溫生代買相機電池,要兩位遷就我同人家食小辣,未能盡興添~今次人多,可以叫埋美國桶蠔,鵝腸同安格斯牛.有講有笑,食飽就同人家行去大興接幸男番屋企,幸男見有新巴士玩具當然開心,最開心係人家,因為可以見幸男,我就開心在可以有私人時間游水,行玩具舖同舊同學食飯兼家庭樂.

區內親子團

 番完夜更,訓咗三個鐘就起身接手湊幸男,因為台灣女生是日番晏.近五點帶幸男出市中心行吓,兼食薯條,櫃台俾完錢就坐定定,幸男邊睇街上既車輛邊等食.

唔知點解晏晝個飯好快就被消化,見要八點至開飯,所以叫咗個餐黎食.即使唔係帶幸男出黎行,自己都想出食搵地方醫肚.

有薯條食,有車望,幸男完全享受呢一刻既時光,我亦奇蹟地得一刻私人空間,可以慢慢飲杯凍鮮奶咖啡同發白日夢.

之後一齊去大眾書局睇吓有無THOMAS故事書賣,結果又真搵到一本,幸男見到當然開心,俾錢前已經攬住本書.有咗幸男之後,多咗去大眾書局買嘢,而且書局內有藍光碟賣,同電腦配件,正好填補吉之島既不足.

係惠康買啤酒上老媽屋企,順道自己添購零食,埋單時姐仔問我"今晚睇波呀?",我答"唔係,今晚湊仔",姐仔答句"辛苦晒".上42號小巴時,一手抱住幸男,一手抽住掛有零食既BB車,好吃力.....晚飯係老家黐餐,食完就同番完晏晝更既人家一齊行番屋企.今日雖然係攰啲,但可以陪吓幸男,唔想小朋友咁悶嘛.

DUCK償所望

今日上午黑雨,帶契番下午班既幸男都唔洗番學.原定同台灣女生接幸男放學後出尖沙咀睇RUBBER DUCK,而家變咗係晏晝出發.係兆康澳斯林食過晏,就去大興接幸男,行去巴士站搭960,幸男坐係最愛既上層車頭位.

係上環落車轉地鐵,唔係繁忙時間,所以幸男都有位坐.第一站去既其實係崇光,因為JACKY話我知有個攤位可以同THOMAS影相.

去到17樓,個立體THOMAS好似膠咗少少,顯得上次舞台劇既THOMAS真似樣好多.幸男都無主動走埋去睇真啲THOMAS,要我同人家叫至肯走去影相.

幸男反而被展放中既THOMAS火車玩具吸引住,推住PERCY黎玩各種機關.先後有兩個小朋友上到黎玩具火車,幸男走去影相時第一個就攞晒啲火車玩具係手,但見人家問幸男"同哥哥一齊玩好唔好?",都主動讓出一架俾幸男.另一個唔單至攞晒火車玩具係手,仲要搶埋幸男手上個架.該名小朋友之父親只顧玩手機,完全無睇住個仔既行為,結果人家要出聲至讓出一架俾幸男.幸男俾人搶咗玩具都無大喊,都算係咁,但唔知係善良定係怕事?

崇光大減價,迫滿同胞及本地人,但無咩嘢啱買咁,好似屯門市中心賣既嘢仲啱心水啲添.跟住我地企地鐵去灣仔,轉搭小輪過海去尖沙咀.

係船上已見到大膠鴨仔,不過好快就俾碼頭遮住.上岸一轉彎就見番隻RUBBER DUCK.幸男好多時都係望住隻鴨,無望鏡頭,所以成功既合照唔多....

落咗成朝大雨,兼且係平日,都無話迫人到影相都無位企埋去.人家透露幸男話鍾意細鴨仔多啲,可能係可以摸到既關係.

之前人家見網上新聞話隻鴨放咗氣,幸男好激動咁話"扁晒,唔睇嘞".好在今日隻鴨仔已充番氣,如果唔係小朋友就失望而回.

影相期間都有落小小雨粉,但都無影響幸男既興致,只係摸濕雙手時向家長求助.今日真係好彩,黑雨令幸男可以早啲出黎,係日光之下影相留念,如果係放學出黎影夜景的話就無咁好效果(部機渣嘛).

咁大隻玩具鴨係維港上浮游,構成有趣既圖片,如果有多幾隻細既做嘰嘰跟尾就更好了.

報紙雜誌教大家點樣就位同鴨仔0鍚0鍚,幸男當然跟唔到個做法,最多只係就到同鴨仔近距離咁影合照,對望都影唔切,因小朋友郁得太快.

夜晚去咗隔離海運既ALMOLO食,人家預早訂咗枱,可惜無窗口位,無得食往黎望鴨.同人家每人半打生蠔,諗住每款三隻,點知其中一款只得三隻,結果無得一半一半.

餐牌唔係英文,似係意大利文,叫餐都要華籍既待應幫手,呢個俾幸男食既意粉都係"問"番黎...自家製麵絛,味道唔錯,但好細碟,幸男都食左四分三落肚.

牛柳好夠肉味,而且好嫰口,一啲都唔韌,可惜份量真係一個人食都嫌少咗啲. 

之前係深井間KCAL食過煎鱸魚,今次食既係鹽焗,肉質滑流但味道清淡,無上次KCAL食既咁好食.本來諗住叫俾幸男食,但幸男好以唔太欣賞,只係食咗少少,無好似平時咁追食魚.

埋單千五蚊,都幾貴,早知上番樓上BLT食漢堡包仲平啲,不過怕幸男除咗薯條無嘢啱食啫.離開餐廳後,都有帶幸男望多次RUBBER DUCK,當係夜景版本嘛.

一家三口一齊沿海傍行番去洲際附近既巴士站等260X.拖住幸男行個陣,諗起唔知自己細個時有無拖住大人行過海傍呢段路呢?

早更+湊仔更

番完個早更,騎羊去食個晏就番屋企泊好愛羊,執好個背囊,係梳化度攤咗半個鐘唔夠,就動身出門搭輕鐵去接幸男放學.

落輕鐵時己經係四點三個字,行番去雅都商場搵到愛姐介紹話有賣雞蛋仔既士多舖,點知阿姐話即制食品要等5分鐘....結果攞得黎都近四點半,三十度之下,孭住背囊,手拎住包雞蛋仔,摩打腳咁跑去幼稚園.最攞命係上山路段,好斜(令我諗起星矢拎住雅典娜聖衣跑上十二宫個一幕),入到去已經係搭七個半字,幸男係尾三被接走既學生.

見出面咁熱,自己又成身汗,於是係禮堂樓梯級坐底,俾幸男享用私家茶點同果汁至出去搭的士番屋企.幸男上咗的士無耐就訓著,唔知係咪作病呢?

抱住幸男落車兼行入屋,一心諗住幸男會係梳化上訓多陣,點知醒咗唔願訓,結果係客廳度玩車仔,我連訓貓仔覺既機會都無埋.........晚飯番老家黐餐,有老豆同老媽既看管,我可以望住電視黎食飯兼發呆.有時間可以發白日夢,原來係另一種幸福,以前廿歲出頭既絶對唔會有呢種想法.

西川風味餐廳

今晚同ANDREW食飯,一心以為佢講個間橋底雞煲就係新墟街市對住個間,點知等極都唔見,原來佢講個間真係叫"橋底雞煲",位於馬會附近.我都覺得奇,又話啲職員態度差,間舖又無冷氣,明明啲職員無咩嘢唔妥,裝潢企理又有冷氣..... 

點咗個重慶花甲雞煲,足料又夠味,啖啖肉,唔會斬到"碎飲飲",雞頭雞尾都飛走晒,唔會令食客難受. 

叫埋三文魚剌身,手切肥牛,珊瑚蚌,膳片,紅番薯條,墨魚丸,三支藍妹,每人都係$300左右,好過食稻香火煱,百幾蚊但無咩特別嘢食.食得開心,今個夏天相信會係呢度聚多過何福當大排檔.

1st日語藍光碟

今日卒之係大眾書局將訂購既"魔鏡變變變"藍光碟攞到手,呢隻係我第一隻既日本電影藍光碟.貴為綾瀨遙既擁躉,所有香港上映既綾瀨遙既電影,我都有入場睇,係唯獨呢齣無時間出去市區既戲院睇(屯門上映既巴倫紐好快落咗畫).

其實之前係節拍租咗DVD黎睇,台灣女生都話好睇,所以走去大眾問價,見$139咁抵,於是訂購.人家話男主角岡田將生好靚仔,我就覺得佢做<<粉紅系男孩>>既劍道部學生正宗飛鳥個造型,可能係後生啲,切合番佢真實年齡.

故事講述四年級小學生加賀美厚子意外地得到一面魔鏡,可以隨時化身作各種造型既成年人.美厚子化身作OL,並懈逅男主角,繼而往男主角工作之化粧品公司打工,以學生既心,來調解大人既問題.小朋友左真及坦率既思想,往往係成年人所欠缺彧遺忘.社交上既規範及工作坊既政治,往往令人"為做而做",及本未倒置地做"門面工",結果忽略或漠視事情既本義.投身社會十年多,未睇呢齣戲時而有以上既觀感,睇完之後,感受更為強烈及慨歎.

PS:綾瀨遙好似做番<<螢之光>>裡儍大姐既角色,但依舊出色及討人喜愛~

遲來的回饋

對上一次抺車打措巳經係一月尾,差唔多係四個月前既事,亦都係愛羊有史以來最耐無打腊既紀錄.平時忙住湊幸男,又少放假,只係撞啱落雨開車,番黎用大毛巾抺乾車身.一兩個禮拜都有一次用壓力水壺沖洗剎車碟組件及軚軨,以明確保剎車安全.今日sleeping day唔洗照顧幸男，卒之的起心肝動手抹車上腊。

黎緊6月會同羊仔番原廠check車，順便換埋軚，因已行咗3年。雖然里數少，但始終怕老化變質，安全至上。把手油筒膠位一都開始有老化情况，希望原廠有Parts一存貨。

與愛羊擋已有7年,很滿意佢既表現,見證住我同台灣女生拍拖,結婚(外影花車),同埋屋企增添成員-幸男.外殼裂紋花痕多了,包圍組裝接縫鬆濶了,車底大架锈蝕多了,但感情與里數錶一樣有增無減.

NEX-7後續機

今日上網見之前話四月發佈既NEX 7後繼機會順延至夏季,並於十月上市,即係買新相機去旅行既計劃泡湯.....唯等到生日月份買黎氹自己開心.新聞講到SONY今年MILC(無反)產品線只係出呢一部旗艦機,好似好有心機擺落去咁(引入無低通濾鏡).

希望唔會拖到出年至上市,呢兩年半裡,我部初代入門NEX 3,已經先後出咗C3,F3及3N,我真係好想由入門機升級至中旗艦機.快啲有諜照睇吓都好,唔洗成日都係望住NEX 7個樣黎估(當年NEX 7都好似無話咁耐都未有張諜照睇吓).

http://digital.sina.com.hk/news/-7-1360056/1.html

後繼頭盔

現役頭盔年資已有5年,雖然無話日曬雨林都爆裂,只係內綿殘咗,更換過一次咁多,但風鏡已有唔少花痕,尤其係頂部與膠邊接觸之邊位.舊年已密謀換新既SHOEI頭盔J CRUISE,貪佢有個內罝太陽鏡,啱晒我呢啲唔方便戴太陽眼鏡既四睇仔,可惜初期只得淨色賣,所以一直等出拉花版,今日卒之俾我等到CORSO版拉花.黑,白,橙,三色中,以橙色為最搶眼,如果黎緊會出比較型格既拉花就更好了.

J CRUISE比用緊既J STREAM更有線條美,頂部入風及出風位都更具時代感,畢竟係5年後既產品嘛.唯一擔心既係新線條下既J CRUISE唔知可否被收納於SEAT位下,如果無問題的話,遲啲有再帥氣啲既拉花,及女性化既拉花,咁就可以重現情侶頭盔~ 

本人極期待太陽鏡既功能,因為夏天猛太陽時好有用,以前一係成塊風鏡換成茶色,但夜晚開車睇嘢又唔清楚,怕危險.另一個做法就係戴隱形眼鏡黎再配太陽眼鏡,但我又真係懶日日上隱形眼鏡,偶爾出街,戶外運動或晒太陽就還可以.SHOEI頭盔真係品質有保證,不負"MADE IN JAPAN"之名,貴少少都好過兩年唔夠就爛咗,要換過個頭盔咁麻煩,而且"平買密換"條數都係唔化算.

母親節

今日台灣女生放假看管住幸男,所以無機會帶幸男去新墟既芊芊攞訂好花束,唯有番完早更騎羊去新墟攞,兼冒住白撞雨騎羊番屋企.入屋就抱幸男出花園仔,讓幸男攬住紮花入客廳俾佢親生阿媽.人家當然開心,我叫幸男同人家影番張相,幸男好識做咁摸住娘親既面龐黎合照(男公關?).

已經係第二年代幸男買花俾人家,每次都同幸男講會扣番佢利時錢,希望小朋友知道要付出同學習理財慨念.無咩特別禮物送俾家妻,晏晝都係叫藍地間燊光下午茶雞脾薯條外賣(踩單車出村口牌坊交收),叫多份西多士俾幸男食,晚飯就番老家黐餐.平淡又唔洗同人迫既一天,希望人家唔會嫌棄.

"街步"腰包

之前係LOG ON睇中咗呢個袋,今日同台灣女生一齊睇多次就買咗啦.平時一個人出街搵舊同學食飯,要袋晒銀包,電話,紙巾,鎖匙真係有啲"論盡",孭背囊又好似麻煩啲,因為齋食飯唔會買日用品嘛.. 

一個輕便又時尚既腰包就可以解決問題,介紹圖教埋你點樣用個袋,圖畫顯示邊格裝啲嘜,非常貼心.我個人認為如果個腰包載滿晒嘢的話都會幾重下,不如孭番個背囊好啲.黎緊旅行,應該都可以帶埋去用添~

孜男家教會@迪欣湖

今日坐師傅順風車去廸欣湖玩,其實玩既都係兩位小朋友孜孜同幸男.今日係公眾假期,所以師傅要等入停車場,我哋同師母一齊入去行住先,唔好悶親小朋友嘛. 

台灣女生當然開心,因為可以同幸男出去玩,兼且有小孜孜陪幸男玩,唔洗成日得幸男自己一個人咁悶.

呢張相好似係孜孜踼個波俾幸男接住,但其實係幸男見孜孜踼地,於是拎住個波行去撩孜孜玩.雖然係假日,但都無話迫到人山人海,起碼每個家庭單位都有適度既活動空間丫.

除咗大草地外,遊樂場都係賣點之一.係自己屋企附近既韆鞦得一槐板坐幸男都唔驚,而家有成個兜坐入去,我同人家都放心俾佢蕩高少少.

SIR滑梯當然係幸男唔會放過既活動,幸男自己上樓梯再過橋去排隊SIR落黎.落咗地又再走番上去排隊.幸男試過俾後隨既小朋友推撞,好在滑涕既圍邊夠高,如果唔係就會飛落地上.......唔明點解啲父母可以唔睇住小朋友黎玩,佢可以推撞人,亦可以俾人推撞......

搖搖動物就無咩興趣,玩咗一陣就落番地面.場內唯一無玩既係搖搖板,一黎人多,二黎怕幸男膽小.

當地無小賣部,得間七仔,結果買咗司華力腸同熱狗當下午茶,幸男就食師母請既香蕉.

兩個小馬蹓一齊食蕉,增進感情....

食完蕉,一齊飲蔬果汁,無諗過幸男會飲晒,第時又多款飲品俾佢揀吓~

社交飲食完之後,感情果然好好多,一齊拉住手黎跑添,仲要係邊跑邊笑.

師傅見佢哋玩得咁開心,四圍走位幫小朋友影相留念.師傅話幸男踼波仲好過我,睇黎我真係無咩運動天份......

玩到後期,孜孜同幸男簡直係難捨難離,同起初時間分別好大.唔知第時佢哋睇番啲相會唔會仲記得今日玩到攬頭攬頸呢?

PS:多謝師傅邀請我哋一家黎玩,平日大家各有各忙,難得撞即興反而約到出黎聚吓.今日坐車時經過青衣,見到膠鴨已經充好氣,唔知幾時會被拖出維港呢?到時要帶幸男去影吓相先得.