番完早更,騎羊去區內最新既泳池(西北泳池)游水.其實冬天時已開室內池,而家就戶外池都全開.第一次去,兜多咗少少路,係附近搵到個好位暫泊愛羊.
新設計,更衣室大好多同企理,LOCKER內分上下格,下格方便放鞋.新LOCKER匙帶更加方便同舒服,另外沖涼間內有分開換衫同沖洗區,乾毛巾唔怕被弄濕,唯一唔好既係個主池好似唔係50米標準池,同埋太陽椅太少得5張......室內嬉水池有滑梯,但幸男應該未夠高玩住,而且冷氣加池水怕會令幸男著涼...
游完水騎羊去置樂幫襯玉林苑,再上去相熟玩店逛吓,見到之前係吉之島見過既TOMICA手動發光車仔,於是揀咗幸男至愛既巴士,長頸鹿價$85,吉之島價$99,抵買!
番屋企放低啲嘢,就再出門搭小巴去西川餐廳會合楝哥同溫生,台灣女生就係護協買完奶粉番入黎搭食.
有勞楝哥代買電腦RAM,有勞溫生代買相機電池,要兩位遷就我同人家食小辣,未能盡興添~今次人多,可以叫埋美國桶蠔,鵝腸同安格斯牛.有講有笑,食飽就同人家行去大興接幸男番屋企,幸男見有新巴士玩具當然開心,最開心係人家,因為可以見幸男,我就開心在可以有私人時間游水,行玩具舖同舊同學食飯兼家庭樂.
