親子電單車節

今日放假兼香港電單車展,於是帶幸男出中環遮打道行吓.拍拖時代同台灣女生黎行過,無諗過事隔多年,會同阿仔黎同一個地方.

輕鐵轉西鐵,係尖沙咀站轉地鐵,幸男全程係咁問到未,可能無搭把士咁多景望,悶到想落車.幸男見有咁多電單車,只係有少少意外,無咩特別高興咁嚷住要影相.

我就好似賣車既SALE咁,"呢架幾靚丫,埋去睇下丫~",呃呃氹氹咁叫幸男去影相.

"呢架細部啲,啱你身型喎","唔啱丫?行住先,睇啱邊部靚就開聲~"

"呢款係電池推動摩打既環保車,不過車價比傳統汽油款貴好多...." 

                    

行到去偉仕羊區段,幸男至開口話呢架靚.原本只係企係火紅偉仕羊隔離影相,點知skin head黑超老外場地工作人員從後抱起幸男坐上座位.幸男又出奇地無喊,雙手伸前掂住最近既把手位.

睇落好似好威風,其實雙腳係"吊吊fing".

見幸男無咩心機,於是調較好相機,叫幸男幫手影相,呢張相就係幸男自己按快門既作品.

一副悶悶不樂既樣子,唔知係真係無咩車款啱,定係嫌現場既音響太嘈呢?

午餐時間已到,但又未有地方落腳,於是行埋一邊俾幸男享用小食頂肚.

見到有架F1陳列,於是同幸男講"似唔似之前同你睇既高智能方程式卡通既車款?只係個駕駛倉無玻璃上蓋咋~"幸男行去埋去踎低,只係同個轆差唔多高,可惜唔可以放幸男入車廂影相.

幸男見到附近有個噴水池公園,就話要去行公園.本來諗住係三輪雪糕車買個香芋棉花杯,點知只係得甜筒賣兼無香芋味...

人家未放工出黎市區會合,唯有同幸男搭地鐵去油麻地警局附近既相熟咖啡店食晏.電話問過住附近既傑傑,原來該店已轉手,但嘢食一樣無變,仲多人幫親咗.

幫幸男點咗個肉醬意粉,幸男餓到即時開動餐具.

估中幸男食唔晒一個意粉,但都食咗大半.我就食剩下來既份量,餐飲當然由我獨佔-西班牙咖啡~

行去巴士站時經過中華書局,上去睇吓有無THOMAS書,點知搵到呢本教睇鐘既故事教育書,仲要有折添.

搭巴士係尖沙咀巴士站會合人家,一齊行商場,係PACIFIC COFFEE小休.趁相熟兒童書店搬遷特價買咗本THOMAS書,再逛埋玩具反斗城,就行去香港老飯店食大閘蟹餐.雖然依舊係二人餐,但份量都夠幸男加入,尤其係非蟹類既餸菜.

成日俾咗幸男,唔知幸男開唔開心,但真係好鬼攰....尾段因扭眼訓到扭計喊,可能踩成日兼無正式訓晏覺.人家話我耐性已有進步,但我始終都未能做到無私付出.

抵食

番夜班個晚餐例牌同台灣女生一齊騎羊去藍地嘉爵,但無諗過31週年酬賓咁抵食.

灼蝦份量都夠兩個人食,兼且咬落去肉質都爽口,唔係死貨.

成隻炸子雞上碟,加埋茶芥,白飯同兩支汽水,BB鴿2隻外賣(宵夜)都係二百有找,仲要食剩半隻雞打包走,聽日晏晝煮麵食都得.

E-MO 區內韓式食店

大假最後一日,晏晝舉家出市中心食飯.由於唔想排長龍,於是去咗華都地下既一間韓式食店醫肚.幸男有鍾意既炒米粉食,食相十足大人一樣.

台灣女生食既係泡菜石碢飯,睇落都幾齋吓,唔明點會飽肚.....

我就揀咗鐵板柚子牛仔骨配白飯,要成$98,好在味道都算唔錯,份量亦都唔少.

韓式凍咖啡,以凍啡黎講都算香濃,但要散叫,無得跟餐奉送...

幸男試飲人家既凍柚子蜜後,一直係咁飲,當正係自己既餐飲,結果人家要另外叫一杯紅棗茶.

張單寫既都係韓文,都唔知係咩,見啱價錢就算.人家食得開心,幸男食得飽肚,我就覺得食品選擇比較少,下次再黎都可能揀番今次既組合.



大假尾聲

大假尚餘兩日,其實二人時間唔多,多數都係一齊湊幸男,最多係有幾晚幸男係婆婆家過夜.照顧幸男既起居飲食,已花人家唔少時間,我就依舊搞衞生同做支援.

今日就同幸男出去村口公園試玩生日禮物之一既三輪車,因為都係前日至係屯門既反斗城收貨.雖然有諗過買有輔助轆既單車,但係屯門反斗城試過俾幸男踩都唔太成功,所以就萌生先踩三輪車既慨念.

三輪車好有AMERICA CLASSIC復古風格,幸男需要短時間去掌握踩法.見到佢倒後踩,突然諗起IQ博士裡既草菇頭引以為傲既三輪車特點,以及"電髮呀,電髮呀"對白.

肥皂泡對女仕們黎講係浪漫,但對少朋友黎講就係夢幻.幸男邊笑邊追住啲泡泡黎跑,唔知我細個時老豆有無吹俾我玩呢?

幸男呢個笑容,十足舞獅既大頭佛咁,可惜啲牙仔黑咗啲.....一直都好鍾意村內有個硬地足球場同小童遊樂場,可以俾小朋友走動吓,方便小型親子活動.

玩到攰,番入屋沖個身就係梳化上訓午睡,小朋友食,玩,訓,真係幸福.遲啲大個啲升小學就開始做苦學生,所以我同人家都唔想幸男係幼稚園階段太辛苦.

夜晚有兩住大姑拉黎燒嘢食,幸男當然掛住星星姐姐啦.

食品依舊係新墟青林同街市購買,再去隔離搭的士番屋企.

由於上次燒鮑魚令人回味,所以今次再買多少少,話晒人多嘛~

其實幫手買嘢既係方大姑拉,我哋因幸男訓晏咗所以遲咗係新墟會合,有勞方大姑拉係惠康買住濕碎嘢先.

今次透爐用咗老豆個支GAS火槍,但其實都要再死命撥報紙至會起大火,只係無燒炭精既大煙問題.

未食鮑魚之前,幸男搶先食香腸,中間其實都唔係食好多嘢(半塊牛扒),唔知係咪玩得攰得滯.

無諗過係惠康買既呢支香檳又幾好飲,比幾年前我貪出名買MOET既易入口,個支真係甜到飲唔落.....以前一齊番工,咩都傾一餐,而家就只係出黎聚吓或者係WHATSAPP至可以閒聊或吐苦水.

今晚仲有P完過黎飲啤酒既特別嘉賓-碧權同IVAN,每次可以同後生一齊飲酒都覺得開心,起碼大家無隔膜嘛.

爸爸大頭蝦,相機無入咭

一心諗住出旺角銀城放低老豆部SHARP手機就去尖沙咀會合台灣女生同幸男,一齊去香港歷史博物館睇巴士展兼影相,點知去到至發覺相機張SD咭唔係機內,一定係早前BACK UP相時無放番入相機.

唯有用手機黎影相,起碼好過無嘛....幸男見到巴士當然開心,但可惜唔可以入去車箱,明明電視新聞啲官員可以坐入去俾記都影相0架嘛.

入埋去歷史博物館行吓,由於燈光昏暗,所以單憑手機未能影到較合埋既照片,呢張電車車箱主題已經係失敗中既成功個案.

順便去埋隔離科學館玩模擬駕駛,點知太長龍,結果無玩到就搭巴士去旺角攞番老豆部電話,再搭巴士番老家黐餐.

星期日

為咗唔好嘥咗幸男生日佈置既汽球,食過燊光午餐外賣後,特意將汽球綁係電動跑車上,行係上黎陪感歡樂.

由於行咗無幾耐就爆咗一個波,所以幸男好小心咁看顧住汽球既狀況.其實係車尾角位望埋去,係見波唔見人........

有咩好得過有埋媽媽出黎陪玩呢?人家抱住幸男一齊打鞦韆,蕩黎蕩去,我就無人家咁大膽黎蕩咁遠.

是日星期日,唔想出去同人迫,於是傍晚約咗楝哥係新墟青林一齊買BBQ食品,實行假日住家BBQ.人家係街市買既大蝦同鮑魚令活動生色不少,幸男鍾意食鮑魚.青林既食品都唔錯,唯獨係羊扒麻麻地.

燒過幾次嘢食,我同人家已有默契,尾段時間人家先沖涼,再幫幸男沖涼兼開奶同氹訓覺.我就同賓客守尾門,負責收拾工作,順便送客兼扔垃圾.可以同舊同學一齊BBQ,邊飲啤酒邊閒聊,確係賞心樂事.

PS:楝哥都覺得幸男多嘢講,一張膠摺櫈都又開又閂,同世侄玩一陣都覺得攰,有一下仲唔少心被幸男拉落地面......

總攻擊,齊去飲

今日係邦邦既結婚大日子,雖然我無去教堂觀禮,但夜晚我同台灣女生帶埋幸男出席婚宴.

幸男真係好掛住星星姐姐,見到面就係咁黐埋去,就算係坐定咗係位,都要走去隔離枱搵人.

幸男尚算合作,除咗有向同事朋友們打招呼外,上台影相都無扭計.

煲呔造型同新郎哥既戰衣有幾份相似,難怪一眾女同事會受埋幸男入鏡一齊同新郎哥合照.

幸男同各位前輩玩,我同人家就可以搵人幫我哋影番張合照,因為屋企少合照嘛.

各有各忙,屯宿之男都鮮有聚會,同阿潘傾咗幾句,湊仔與工作心情及生活難題雖未能盡訴,但共鳴依舊.

貴為兄弟團隊既IVAN不時同幸男玩,仲帶埋幸男去同姊妹團打招呼.幸男對會場既投影機好有興趣,結果一齊影合照添.....

幸男可能已經唔記得ANNA曾經拎住奶樽餵過佢,不過親切感應該總有啲卦.幸男成晚既表現唔錯,無發脾氣,同大家打成一片,只係等到最後時因為攰扭抱同想快啲番屋企.

PS:多謝家楠忙咗成日兄弟,仲要兜埋我地一家番屋企,可惜幸男同家楠張合照矇咗................