同台灣女生食完生日飯,番到屋企都未訓住,因為要準備幸男既生日佈置.每年既十月頭都係咁忙,因為連續三日慶祝嘛.泵得汽球同掛彩旗都點半過後至有得訓........
朝早同台灣女生一齊騎羊去幼稚園,人家接放學,我就去市中心攞預訂好既生日蛋糕兼買MOS BURGER外賣當晏晝個餐.幸男番到屋企見到生日佈置當然開心,但點都唔及可以一個人拎住包薯條慢慢醮茄汁食.
人家番到屋企無耐就準備幸男既午餐,幸男可以開心享用至愛既麵餐.
生日咭上既字眼令幸男摸不著頭腦,但心愛既士多啤利忌廉蛋糕就直接令幸男感受到父母既疼愛.
食完蛋糕,幸男就從汽球陣之中開始拆禮物,THOMAS故事書同MEGA BLOCK玩具令幸男愛不釋手,笑到見牙唔見眼.
足三歲既幸男搭車要俾錢,所以係兆康西鐵站既客戶服務中心買咗張小童八逹通.
晚飯去咗I Square既名家食韓燒,因為幸男鍾意食燒肉嘛. 之前我同人家分別同各自既朋友黎過食嘢,大家都覺得食物OK,所以今日至會一齊同幸男黎慶祝.
雖然要限時交枱,但咁啱可以坐窗邊位望維港.都算唔錯丫~叫咗個餐,再散叫啲嘢食,幸男邊食炒米粉,邊食燒肉.
有父母陪伴既小朋友永遠係開心,更何況係生日有禮物收,有蛋糕食,又出街食晚飯.
其實今晚仲有即興赴會既小歌仔同幸男一齊食飯,不過幸男就掛住星星姐姐多啲,開口問"星星姐姐呢?"
雖然我同人家既生日係早過幸男,但幸男既開心同健康,先至係我地真正既生日禮物.
